Monday, April 30, 2007

تاجات مدبسة

السلام عليكم ورحمة اله وبركاته

الحمد لله .. هدخل موسوعة جينيس مرتين كده

الاولى .. لان عندى اربع تاجات .. وكل واحد منهم بالصلاة على النبى متكلف

والمرة التانية علشان انا اخيرا فهمت موضوع التاجات ده

المهم بقه

التاجات دى مش عارف ارد عليها ازاى .. بس عامة ربنا ييسر
الاولانى .. من شروق الشواف مدونة احلى ما فى الدنيا
الثانى: مش فاكر الصراحة بس تقريبا كان محمود سعيد مدونة ابن اخ
لثالث : من ابراهيم الشرقاوى من مدونة يتنفس بصعوبة
والرابع اللى لسه جايلي من شوية
من ياسمين الحسيني مدونة حراس الحقيقة

نبدأ بالاول من شروق الشواف
-----------------------------------------------------


تكلم عن هواية لما بتمارسها بتستغرق فيها تماما وتنفصل عن عالم الواقع لفترة من الوقت أثناء ممارستها؟

الحقيقة عندى هوايات مختلفة
هقول اكتر تلاتة انا بحبهم
1- الجري والمشى
2- الانترنت
3- الاناشيد

والثلاثة فعلا بحب انى اعملهم بشكل ما او بأخر
ممكن يكون على فترات متباعدة او مختلفة .. لكن فعلا بحب انى امارسهم فى حياتى بصفة عامة
بالنسبة للمشى فانا الحمد لله معروف عنى انى بمشى كتير لدرجة ان مرة واحد كان عايز يوصل ميدان سفنكس
فانا قلتله اركب وانزل ميدان لبنان واتمشاها حتة صغيرة .. طبعا هو كان بيشتم والحمد لله انه مشافنيش بعدها الا بعد فترة
ومرة مشيت من الجامعة لحد اخر فيصل .. ومرة مشيت من الزمالك لحد الجيزة
عادى يعنى بحب اقضيها مشى خاصة لو فاضى ومحتاج افكر فى حاجة معينة
واما الجري .. انا بين بيتنا وبين الشارع اللى بره حوالى كيلو ونص .. فباخدها احيانا جرى رايح جاى .. فنطلع بسبوبة حلوة فى العملية دى

اما الانترنت فهو فعلا حياتى التانية .. يعنى انا اما بعمل حاجة ( مذاكرة , شغل , فى الجامعة , اى حاجة ) واما على الانترنت
ممكن ابقى ببعت حاجة لحد .. او بقرأ الاخبار .. او اقرأ فى التسويق ومواقع الادارة عامة .. او بدور فى عالم الجديد وماوراء الغرب والحاجات دى بصفة كبيرة
اما اخر حاجة وهى الاناشيد .. فانا مدمن اناشيد بشكل غير طبيعي .. لكن طبعا الحمد لله بحاول اوازن العملية علشان فى اوراد تانية لازم تتزبط ... والحمد لله متابع اول باول اخر الاناشيد والفرق والشغل بتاعهم بشكل كبير
طبعا فى حاجة تانية وهى الشغل فى الجامعة .. طبعا انا اقصد الشغل الطلابى فى الجامعة يعنى الانشطة الطلابية مش التظاهرية او الاعتصامية والهتافية .. سواء كانت طلاب الاخوان او مع الاتحاد او فى القسم عندنا فى الجروبز .. دى فعلا حاجة بستغرق فيها جدا وممكن اديها وقت حاجات تانية ليها اهمية قصوى بالنسبة لاى بشر وكائن حى .. وهى الاكل

توتة توتة خلص التاج
نشوف اللى بعده
( نأجل التاج بتاع شاركى الى اجل غير مسمى .. علشان فيه حاجات مينفعش نجاوب عليه دلوقتى.. عيب عيب )
--------------------------------------------------

نشوف بقه التاج بتاع ياسمين الحسيني

خمس حجات اتكلم عنهم محدش يعرفهم عنى

اممممممممممممممممممم
ايوة كده .. دى التاجات ولا بلاش بلوجات من اساسه
طيب

هو الحقيقة مش عارف ... بس هحاول اجمع واقول اى حوار

-1-
ان انا اساسا عشت واتربيت فى السعودية .. قضيت فيها حوالى 18 سنة من حياتى هناك .. او اقل شوية
طبعا انا مكنتش بدخل المدارس السعودية
ودى الحتة اللى محدش تقريبا يعرفها
وهى انى مكنت بروح المدرسة
شفتوا بقه .. متمرد من صغري
فعلا انا كنت بروح المدرسة بالنظام الدراسى السعودي لحد سنة خامسة ابتدائى
وبعدها حصلت مشكلة فى المدرسة مش هقولكوا عليها
فرحت وحولت لمدرسة بالنظام المصري
وكنت بمتحن فى السفارة المصرية فى السعودية
وطبعا لانه كان ممنوع ان يكون فى مدرسة عربية فى دولة عربية
على اعتبار اننا دولة واحدة وعرب فى بعضهم يعنى
فمكانش فى مدارس
فكنت قاعد فى البيت
وبذاكر فى البيت مع نفسى
واروح امتحن واجيب تقدير
احم احم .. امسح دى فى المونتاج
فضلت على الوضع ده من سنة 5 ابتدائى لحد اواخر تانية ثانوي
لان الثانوية لازم من مصر .. فجيت مصر على امتحانات ثانية ثانوي
يعنى تقريبا قضيت حوالى ست او سبع سنين من سنين الدراسة فى البيت
بين اربع جدران بذاكر لوحدى
والحمد لله كانت حاجة جامدة جدا

-2-
الحاجة التانية اللى الناس متعرفهاش غير يمكن كام الف واحد
ان نتيجة للظروف اللى كانت عندى دى كنت انطوائى فحت
مكانش عندى صحاب غير المصريين اللى فى العمارة بس
وكان الحال من بعضه يا حسرة
برضه فى نفس المناهج ونفس نظام البيت
فكانوا انطوائيين الى حد ما برضه
لحد لما حصلت حاجة كده مش هقولكوا عليها برضه الحمد لله غيرتنى كتير

-3-
ان نتيجة انى قاعد فى البيت .. كان جدول مواعيدي .. اصحى الصبح .. اجيب الفطار .. اكل .. اذاكر .. انام
خلص اليوم
وتقريبا كان هو الجدول هو هو
مش بيتغير
فطبعا .. كنت ما شاء الله ممكن ادخل رفع اثقال اتقل وزن .. وانا فى خامسة ابتدائى
لكن الحمد لله .. حصلت حاجة برضه بعدها وفترة كده جت .. الحمد لله رجعت للواحد لياقته تانى :D

-4-
من ضمن الحاجات برضه اللى محدش يعرفها عنى .. انى الحمد لله ولله الحمد وخمسة وخميسة فى عين اللى يفكر انه يحسد ولا يعمل اى اكشن
لله الحمد .. خلال فترة حياتى .. عمري ما شلت مادة او جبت ملحق حتى او عدت سنة او اى حاجة ... فدى حاجة كويسة .. ولانى كمان داخل المدرسة بدري .. فيعنى الحمد لله على العبقرية اللى انا فيها دلوقتى
موهوب بالفطرة :D
لدرجة ان مرة المستر بتاع الانجليزي فى تالتة ثانوي اتحدانا فى الفصل
ثانوية وضياع بقه .. كتب سبع اسئلة على السبورة .. كل واحد انيل من التانى
وقال اللى هيحل خمسة منهم بس هديله اللى فى جيبي
طبعا العيال شدت نفسها وكله اتعدل وعدل قعدته علشان يشوف ده فيها فلوس وبتاع
طيب يا مستر نتفق .. اللى اوله شرط اخره كهربا وغرامة .. يا مستر قدامك فرصة تسحب التحدي بتاعك ومتخافش مش هنشردلك يعنى ومش هنسيح
لا برضه المستر مصر على انه يتحدانا
قولناله طيب .. معاك كام فى جيبك ؟؟
قال مش اقل من خمسين جنيه
قلنا يا بركة دعاء الوالدين .. توكلنا عليك يا رب
وقعدنا نحل الاسئلة .. وقدمنا الاجابات
فى واحد صاحبى اجاباته كانت 6 صح وواحدة غلط .. ورغم كده قاله لا .. انت جايب اربعة صح من السبعة
وبفضل الله ( نسأل الله التواضع يا رب :D )
انا الوحيد اللى قالى .. انت جبت 6 صح من السبعة
يعنى سؤال واحد فقط غلط
طبعا الناس كلها كانت فرحانة معرفش ليه .. مع ان انا الى هاخد الجايزة مش هما
بس الظاهر انهم كانوا فرحانيين ان الفصل كسب التحدي .. والتحدي ده هو التشريد للمستر فى المدرسة مش اننا نكسبه فى الاسئلة اللى حطها
المهم فى الاخر مخدتش منه حاجة ... وانا من موقعى هنا .. اناشد منظمات المجتمع المدنى وحقوق الانسان والمجتمع الدولى سرعة التدخل ودون تردد .. علشان ترجع حقى اللى مش عارف اخده لحد دلوقتى خاصة ان الحالة صعبة اليومين دول وانا عايز اتجوز ... ولا اراكم الله مكروها فى عزيز صدقى لديكم

-5-
برضه من الحاجات اللى قليلين قوى اللى يعرفوها عنى الا مش فاكر كام الف واحد .. وهى ان بعد ما جيت مصر من السعودية اتغيرت كتير جدا عن فترة حياتى فى السعودية
طبعا انا ممكن اتكلم على اللى شفته فى المجتمع السعودى وده محتاج لكذا قاعدة مش هينفع على الباب كده
لكن .. بعد ما جيت مصر .. اتغيرت تماما من الانطوائية والعزلة .. الى الانفتاح والانطلاق
السبب كان حاجتين
1- انى دخلت مدرسة لاول مرة فى حياتى وحضرت حصة والكلام ده فى ثالثة ثانوي
2- ان فى فترة الصيف بين الثانوية والجامعة ... اشتغلت فى شركة الحمد لله غيرت فيا كتير جدا
انا فاكر اول يوم دخلت فيه الشركة .. معرفش حد .. وكنت فى رووم فيها 8 بنات وانا الولد الوحيد .. طبعا كان منظر جامد فحت
لحد لما الحمد لله الدنيا اتزبطت والحمد لله برضه الناس لحقتنى قبل الفساد خاصة انهم فى البيت هنا واخدين عنى فكرة ان عندى ميل فطري للفساد الطبيعي

-6-
حتة كمان زيادة من عندى علشان متزعلوش وهخليهم ستة مش خمسة
انى الحمد لله .. مفيش حاجة بحطها كهدف قدامى ... الا وبحققها الحمد لله
وده هتعرفوه من خلال المواضيع الى بحطها وباتكلم فيها عن حياتى بشكل عام
ويمكن كان اخرها حفلة ادارة رغم كم المشاكل والصعوبات فى تنفيذ الحفلة واخراجها بالشكل الى تمت بيه
وفى حاجات تانية منها البحث الى انا بدونه كجزء هام من حياتى دلوقتى
ومنها اغنية قاوم تكون برضه .. وغيرها من المواقف والاحداث ان شاء الله هكتب عنها بشكل مفصل

تاخدوا حاجة كمان ولا كفاية كده ؟؟

يلا كفاية كده فعلا علشان البوست طويل قوى وشكله وحش

Saturday, April 28, 2007

ويوم اخر جميل من حياتى

السلام عليكم ورحمة الله وبركاته

معلش انا اسف انا مضطر اقطع حبل الغسيل اللى كنت بنشره امبارح

واكلمكوا على يوم جميل جدا من حياتى .. رغم صعوبته عليا لكن من اجمل ايام حياتى

النهاردة كان عندنا اجتماع مع الدكتور محمدي علشان يتابع اخر تطورات الحفلة

سواء من ناحية الاعداد .. او من ناحية البحث والناس اللى شغاله فيه


وصلت الكلية النهاردة الساعة 11 وربع تقريبا والاجتماع كان الساعة 11

المهم رحت وطلعت فوق وكان الدكتور مش موجود لسه مجاش

نزلت ورحت طبعت ورق .. وكمية مشاكل لا تتخيلوها عند الطباعة

مرة الجهاز مش بينزل من الهوت ميل .. ومرة الياهو مش راضى ينزل وحاجات غريبة

المهم نزلت وطبعت وطلعت للدكتور

وصل الدكتور وفضلنا فى اجتماع مغلق معاه لحد الساعة واحدة ونص تقريبا

وكان كل شوية احنا محتاجين نخلص حاجة .. نلاقى الدكتور يتصل بالدكتور او الشخص المسئول ويخلص معاه الموضوع واحنا قاعدين

موضوع الميزانية .. قلناله يا دكتور احنا محتاجين حوالى 5000 جنيه علشان الحفلة

قالنا طيب استنوا كده

ونزل كلم العميد ورئيس القسم .. وكلمنا الدكتور من تحت

قالنا الميزانية هتبقى 6500 علشان البنود اللى ممكن تزيد او تقل

وطلعلنا تانى بعد ما اتفق على المعاد واتفق على موضوع الاكل وان الكلية هتدفع تكاليفه بالكامل

وفى الاثناء دى كان الجروب كل شوية نفتح موضوع ونخلصه وناخد قرار

البانرات هتبقى كام فى كام .. وهنكتب فيها ايه .. وايه التكاليف .. مش عارفين التكاليف

خد يا هيثم اتصل بمنصور واعرف التكاليف كام

ويتصل هيثم ويعرف السعر ونبدأ فى وضع الخطة على اساس السعر ده

فى الاثناء دى جاء الدكتور الينا بالاخبار .. خلاص تم الاتفاق على كل شئ

طيب خلاص يا دكتور .. الخطوط النهائية كذا كذا كذا

ونخلص الشغل ..

طيب معلش يا دكتور عندنا بس محاضرة .. خلاص ماشى نتقابل فى وقت كذا كذا وخلينا على الايميل ان شاء الله

ننزل نروح نحضر المحاضرة

وبعدها نزلت للمحاضرة وقلت للناس انها تيجي تتأكد من اساميها وتدفع الفلوس علشان الشهادات

احساس جميل جدا انك تكون لوحدك .. وبتخدم 250 واحد

250 واحد وكل واحد منهم عنده مشكلة شكل وعايز يعرف هل هو صح ولا فى حاجة غلط

والله شعور جميل جدا .. خاصة ان انا كان نفسى اشيلهم كلهم فوق راسى واخدمهم بعيني

لانى بجد .. بحبهم جدا ... دفعتى .. سواء ولاد او بنات

فعلا عمى ما حبيت دفعة او ناس وكنت زعلان جدا جدا على فراقهم زى ما انا حبيت دفعة ادارة وزعلان جدا على فراقهم

انا واحد جالى بعد الحفلة وبيقولوا انتى مش بتعيط ليه ؟؟

قلتله هو فى ايه فى الجامعة ازعل واعيط علشانه ؟؟

دلوقتى ... عرفت انا ممكن ازعل واعيط على ايه بالضبط ... دفعتى دفعة ادارة 2007

الدفعة دى عملت بحث عن تطوير الكلية .. فى دكاترة لما شافوه قالوا دى رسالة ماجستير وليس جهد طلبة فى السنة الرابعة

المهم خلصت .. وكانت الساعة 8 مساءا وكنت خلاص هلكان ومش قادر لانى مأكلتش حاجة من الصبح وحاسس انى هقع من طولي

المهم فى اثناء وجودنا مع الدكتور وحتى فى غير وجوده معنا

كنا بنتكلم على موضوع مهم جدا اتعلمناه فى البحث

وهو ان انا كولد بتعامل مع البنات بشكل عادى وتلقائى جدا .. ومن غير ما يكون فى بالى اى حاجة غلط

لانى ببساطة .. هناك ما يشغلنى ويشغلها عن التفكير فى مثل هذا الموضوع

بل وصلنا لنقطة .. اننا اصبحنا كأسرة واحدة

ولا توجد اى مشاكل ولم نسمع باى مشكلة من اى نوع اطلاقا

حقا شعور رائع ان تكون بين هؤلاء الافراد

وشعور وحش جدا انك هتسيبهم كمان اسبوعين

Friday, April 27, 2007

احلى يوم من حياتى

بداية السلام عليكم ورحمة الله وبركاته

طبعا قبل ما حد يحدف طوب او طماطم ( ممكن طماطم علشان معندناش فى البيت منها دلوقتى )



طبعا بداية اعتذرلكوا بجد عن الانقطاع المفاجئ فى التيار الفكري والكتابى فى البلوج .. يعنى بعد ما كتبت الموضوع بتاع الحادثة اللى مرت بسلام والعربية .. حصلت حبة حاجات ورا بعضها كل واحدة منها محتاجة بلوج كامل

من وفيات ( اخت زوجة عمى , واخت صديق والدي ) وكلهم كانوا بشكل مفاجئ وورا بعضهم
مرورا بالدكتور اللى زنقنا زنقة سودا وطلب حبة حاجات فى وقت قياسى ممكن ندخل بيه موسوعة جينيس بجد
الى الانشغال بحفل الافطار السنوى لطلاب الاخوان وحفل وداع دفعة رابعة فى جميع الكليات

المهم نرجع مرجوعنا

سامحونى على التقصير فى الكتابة وتدوين ايام حياتى

بالمناسبة .. احد اسباب الانشغال هو اننا فى الكلية حاليا بنحضر لحفلة تخرج الدفعة

واللى فيها هيتم عرض ابحاث قسم الادارة وعرض بحث القسم

وان شاء الله يبقى تابعوا الحدث على العاشرة مساءا وتسعين دقيقة وغيرها من القنوات والصحف
طبعا مش هقدر اقولكوا اتفضلوا علشان الحضور بالدعوات والعدد محدود جدا
انما لو حد مهتم بالموضوع وفعلا عايز يجي يحضر علشان يستفيد وكده فممكن ازحلقلقه دعوة فى السكرته من غير ما حد يعرف

دعواتكوا علشان ربنا يكرم

المهم بقه



انا ايه اللى هكتبه النهاردة بقه ؟؟



مخبيش عليكوا ان انا اصلا كنت ناسى الحدث المهم اللى هتكلم عنه النهاردة

كنت ناسى خالص ومش فاكره .. لكن اللى فكرنى بيه هو تغيير الساعة اللى كان الليلة الماضية

طبعا نسيانى للحدث مش لانه وحش لا سمح الله او لانه حاجة انا مش عايز افتكرها .. بالعكس ده حدث انا افتخر انه فى حياتى
لكن اللى نسانى الحدث ده هو انشغالى الفترة دى . وسبحان الله .. فى نفس الفترة دى اللى حصل فيها الحدث اللى هتكلم عنه كنت مشغول بنفس الشكل ده واكتر كمان .. والغريب ... انى كنت مشغول فى نفس الحدث

لكن الفرق الوحيد بين الاثنين هو الوقت .. لا اكثر تقريبا

مقدمة بسيطة

كان ذلك منذ سنتين تقريبا .. فى سنة تانية .. عندما كان استاذى العزيز والحبيب واللى فضله مغرقنى وبجد مش عارف ازاى اشكره على اللى عمله معايا .. الدكتور عبدالحميد ابو ناعم .. كان بيدينا مادة اسمها الادارة العامة

او ادارة المنظمات الحكومية بمعنى اصح

وكان الدكتور طالب مننا بحث نعمله عن اى شركة او مؤسسة او قطاع او منظمة حكومية

وهل اسلوب الادارة فيها اسلوب محترف ولا لأ

المهم كان عايز كل واحد لوحده ويعمل بحث منفصل ومفيش اتنين ياخدوا نفس الشركة او المنظمة .. ودى كانت المشكلة فى البحث


ليه بقه مشكلة وايه اللى حصل وايه الحدث الجامد ابن الجامد اللى حصل .. استنونا بعد الفاصل

يلا دعواتكوا

وانتظرونا فى الحلقة الجاية


ملاحظات:

( انا مرضيتش اكتب الموضوع كله مرة واحدة نظرا ًً للشكوى من طول المواضيع اللى بنزلها .. لانى ببقى عايز اكتب الموقف كله علشان لما اجي اقراه تانى ابقى فاكر اللى بكتبه .. بس جاتلى فكرة جامدة فى موضوع الكتابة ده هبقى اقولكوا عليها بس قدام شوية )
وفى تاج جايلي من شاركى .. معلش يا جدعان انا لسه مستجد فى الحتة فلحد لما استوعب الموضوع لو حد يحب ياخده معاه وهو ماشى فى السكة يتسلى يتعامل لحد لما نشوفله صرفه



Sunday, April 22, 2007

العربية .. والذكريات الاليمة

النهاردة انا جاي احكيلكوا على موقف حصلى

العربية عملت فصل مش كويس خالص

اضطريت انى اروح مع بابا مشوار زيارة لعمى فى فيصل

المهم الحمد لله كله كان تمام والحمد لله الدنيا مشيت كويس

وانا جاى راجع بقه بيتنا ومعايا بابا وماما واختى الصغننة

كنت ماشى على 100 تقريبا ولقيت فجأة حفرة كبيرة فى الارض

طبعا معرفتش افاديها واعديها فالكاوتش اليمين اللى قدام واللى ورا وقعوا فى الحفلة وبتاع

طبعا سمعت صوت مش حلو فركنت على اليمين

ونزلت اشوف فكانت المشكلة الكبرى

ان الكاوتش الاتنين ضربوا وبقه منظرنا وحش

خاصة ان مفيش غير واحد بس استبن

انا اول ما وقفت فى المكان الى الكاوتش ضرب فيه

جسمى قشعر .. وقلت لبابا نطلع قدام شوية

يا بابا مش هينفع نقف هنا .. خلينا نطلع قدام شوية .. بس بابا رفض وقال خلينا نخلص

المهم خلصنا ومشيت بكاوتش ضارب

لحد لما وصلنا لمحطة بنزين

وصلحنا الكاوتشين ورجعنا البيت بسلام

الحقيقة ان انا جسمى لما قشعر .. كان بسبب ان المكان اللى احنا وقفنا فيه

كان ليا عنده ذكريات مش حلوة خالص

فى نفس المكان من فترة تعدت السنة

كنت مروح بيتنا برضه ساعتها

فى رمضان وكنا على موعد افطار عند اختى

وانا تأخرت فى الكلية والمحاضرات وكان سواق الميكروباص ماشى عادى

ففى نفس المكان واحد كان هينزل

السواق وقف .. والراجل اللى ورا كان قاعد جنب الباب

هو فتح الباب من هنا .. وعربية نقل رشقت فى الميكروباص من ورا

انا من حسن حظى كنت قاعد ورا

بس فى الكنبة اللى قبل الاخيرة

فالزجاج الخلفى والجانبى كله اتكسر عليا

والحمد لله لم تكن هناك اصابات خطيرة

اللهم الا ولد ابن صاحب النقل .. كان معاه قدام ورجلة اتعورت بس جامد

كان معانا ساعتها بنتين كانوا برضه مروحين

هما شافوا منظر الولد من هنا .. وفتحوا فى العياط والصويت

معرفش ايه اللى جرالى رحت فاتح زعيق فيهم ومشيتهم من هناك

ورحنا نشوف ايه اخبار الولد ده واللى ودوه المستشفى على طول ساعتها

وكان فى راجل قاعد فى الكنبة الاخيرة .. هو اللى تلقى الصدمة كلها تقريبا .. كان بيقول ظهري ظهري

بس الحمد لله كانت بسيطة

المهم مشينا الحمد لله وركبنا ميكروباصات تانية والموضوع خلص الحمد لله

طبعا وانا بغير كاوتش العربية .. قلقان جدا

وخايف جدا لحسن حد يجي يخبطنا .. خاصة ان الطريق مفيهوش نور جامد ممكن الناس تشوفك من خلاله

ولاول مرة فى حياتى ... احس ان الواحد فعلا ممكن يموت فى لحظة

فضلت افكر واتخيل .. لو حصل لا قدر الله عربية جت وخبطتنا من ورا

انا بغير الكاوتش اللى قدام اليمين

يعنى العربية لما تتخبط .. اول حاجة هتزيحها فى الطريق .. انا

يعنى من الاخر هكون انتهيت .. وهموت فعلا وفرصة النجاة هتبقى قليلة جدا

طيب انا مش مستعد للموت دلوقتى

طيب لو حصل فعلا ومت .. هيبقى ايه الموقف

هعمل ايه ؟؟

طيب وبابا هيتخبط .. ولو اتخبط ممكن يموت

طيب ماما اللى فى العربية .. هيكون ايه موقفها لو حصل واتخبطنا

واول ما احس ان فى عربية جاية .. اقوم مفزوع اقف اتأكد انها بعيدة


فعلا كنت فى رعب .. وخوف من الموت بشكل رهيب

والواحد اكتشف قد ايه هو غافل وضايع

وفعلا السؤال

لو الواحد مات دلوقتى حالا من غير لا حادثة ولا يحزنون

هيبقى ايه موقفه ؟؟

فعلا انا محتاج اراجع نفسى فى حاجات كتيرة جدا

ادعولى كتير قوى

قصة اغنية قاوم .. تكون

السلام عليكم ورحمة الله وبركاته
الحقيقة النهاردة هتكلم على يوم .. هو مش يوم
انما يوم ..
بس طويل شوية
وعلشان اجيبه ..
محتاج اجيب السنة من الاول
او اجيب الاربع سنين من الاول
فاستحملوا بقه لانه هيبقى طويل حبتين تلاتة اربعة خمسة ستة سبعة تمانية تسعة عشرة

البداية
البداية كانت لما دخلت الجامعة وبدأت انتمى تدريجيا للتيار الاسلامى ساعتها او ما يعرف بطلاب الاخوان حاليا
الحقيقة دخلت وانا بشخصية مختلفة جدا جدا كنت انطوائى .. غير مبادر ..
مبحبش اعمل غير اللى انا عارفه .. مبحبش اعمل اى حاجة جديدة .. خايف من كل حاجة لحسن
الفشل
واه من الفشل وسنين الفشل المهم ..
لحد لما واحد ربنا يكرمه ومن غير ذكر اسامى كان معانا وبيعلمنى كل حاجة فى الكلية

او هو كان بيعلمنى شغل طلاب الاخوان او التيار ساعتها
واثناء ما انا كنت قاعد مع الناس الكبيرة دى
كان واحد ربنا يكرمه
اسمه عبدالله فرغلى
كان بيتكلم معايا وقالى كلمة .. مازلت اذكرها الى الان قالى فين بصمتك فى الكلية
.. لازم يكون ليك بصمة مميزة فى الكلية قبل ما تتخرج

والحقيقة ان الكلام ده مش هو لوحده اللى قاله ..
لا فى كتير من الناس اللى انا بحبهم جدا قالولى نفس الكلمة
اسلام سيف .. احمد ناجى .. احمد علام .. اسامة زين .. عبدالرحمن السيد .. نادر انور وغيرهم
وان كانوا لم يقولوها صراحة .. لكن افعالهم كانت تقول كده وفعلا
ومن ساعتها وانا بدأت اتغير .. انا مش زى الباقيين
انا متميز عنهم بحاجة ..

وفعلا فضلت الفكرة فى راسى

ما بين تالتة ورابعة

فى الفترة دى ما بين سنة تالتة ورابعة

كان فى لقاء تنظيمي لوضع خطة طلاب الاخوان فى هذا التيرم

كنا تحت حملة كبيرة لدى الاخوان عامة وهى معا للاصلاح

وكانت الخطة الموضوعة مسبقا تتحدث عن الحرية

لكن خلال هذه الجلسات .. فقد اتخذ طلاب الاخوان قرارا بتحول الحملة الى حملة اخرى

وهيا حملة المقاومة والتى عرفت باسم قاوم تكون

وكان لهذا التحول اسباب منها:
1- ان المقاومة هى جزء من الحرية .. فلا توهب الحرية انما تنتزع .. ووسيلة الانتزاع هي المقاومة
2- ان معنى المقاومة ليست المقاومة المسلحة انما اشكال كثيرة للمقاومة .. وهو ما يحتاج الى ايضاح
3- تزامن الحملة فى ذلك التوقيت مع اجتياح لبنان من قبل اسرائيل فى الصيف فى العملية العسكرية التى عرفت بامطار الصيف ردا على قيام حزب الله باسر جنود اسرائيلين وقتل الاخرين

فكانت الموافقة على حملة " قاوم .. تكون "


جلسات تنظيم الحملة

فى هذه الجلسات تم اختيار عدد من طلاب الاخوان فى مختلف كليات الجامعة .. وذلك لوضع ملامح الحملة ووسائلها وادواتها .. بل ووضع خطتها وميزانياتها وكيفية تمويلها والتحرك في تنفيذ هذه الوسائل
وكانت من ضمن الوسائل المقترحة .. هى عمل اغنية عن مضمون ومعنى الحملة واصدارها بين الطلاب

الحقيقة .. ربما لان هذا الاقتراح جديد فلم يلق الترحيب الكافى لدى الحضور متخذى القرار
فتم رفضها .. على اعتبار ان هناك اعمال ووسائل اخرى تحقق الاهداف وبكفاءة وفعالية اكثر
وسبب اخر هو ازدحام جدول طلاب الاخوان وعدم وجود موارد مالية او بشرية للقيام بالمهمة
فتم رفض الفكرة

يوم الحفلة

زى ما قلت ان الحملة دى كانت متزامنة مع اجتياح اسرائيل للبنان للقضاء على حزب الله .. فكان فى مهرجان فنى فى نقابة الاطباء " دار الحكمة " عن المقاومة واغانى للمقاومة
كان الحفل ده لمصطفى محمود
اليوم ده كان اجازة عندى .. ومكنتش رايح الكلية وعرفت قدرا بالحفل ده يوم الحفل الساعة 11 ظهراً

وكنت خلاص عاقد النية انى مش هروح والموضوع انتهى
لكن لقيت صلاح بوب بيكلمنى وقالى تعال نروح ونحضر .. فقلت ماشى توكلنا على الله

فى اثناء الطريق وانا رايح الحفلة .. اتصل بيا احمد الجعلى .. وكان بيقولى على ان فى حفلة فى النقابة ومصطفى محمود رايح وقالى روح وحاول تتفق معاه على الاغنية وكده .. كان بيشجعنى الصراحة على طول .. ربنا يكرمه

ونزلت فعلا علشان احضر .. وانا كان عندى هدف تانى عايز احقق .. الاغنية عن الحملة
كنت قبلها بعد الجلسات التنظيمية للحملة مضايق جدا .. علشان مش هنقدر نعمل اغنية .. خصوصا انى ساعتها كنت متأثر جدا بطلاب الحركة الاسلامية فى الجامعات الفلسطينية حماس يعنى
لانهم كان اى حاجة تحصل عندهم على طول يعملولها نشيد .. واناشيد انما ايه .. على الفرازة حاجة ملهاش حل
فكان اللى بيشجعنى دوما ربنا يكرمه حبيب قلبى احمد الجعلى

فانا نزلت اليوم ده علشان اقابل مصطفى محمود بعد الحفلة واقوله على اننا عايزين نعمل نشيد واعرف ايه الاخبار

داخل القاعة
فى داخل القاعة قابلت العديد من الناس اللى انا اعرفهم .. منهم حبيبي وليد الجنيدي صاحب فرقة اناشيد اسلامية وهو اللى عمل اغنية خاصة لدفعتى غناها فى حفلة التخرج .. هبقى اجيبها ان شاء الله
المهم قابلت وليد داخل القاعة وقالى انه جاى بناءا على طلب من مصطفى محمود .. كان عايزة يحضر واتصل بيه علشان عايزة يغنى كمان بس هو قاله لا هحضر بس .. حاجة زى كده
المهم وقلتله بركة يا جامع.. وقلتله على الموضوع ونعمل ايه وكده
قالى شايف الراجل اللى هناك ده ؟؟

قلتله اه ماله يعنى ؟
قالى رحله وقوله يكتبلكوا كلمات للاغنية
قلتله ده مين بقه ؟؟
قالى انت مش عارفه ؟؟
قلتله لأ
قالى ده استاذ صلاح جلال .. كل اناشيد مصطفى محمود تقريبا هو اللى كاتبها .. وكاتب اناشيد مشهور وكبير ومعروف
قلتله طيب خلاص هروحله بعد الحفلة

المهم الحفلة كانت جميلة .. خصوصا نهايتها .. رغم انها كانت عن المقاومة الا ان مصطفى محمود ختمها بحاجة عالية وجامدة جدا جدا
المهم لما كان هو بيفنش الحفل كنت انا نطيت على الكراسى اللى قدام علشان احجز الاستاذ صلاح جلال على طول


مع الاستاذ صلاح جلال


رحتله على طول اول ما خلص والناس بتخرج .. رحتله وعرفته بنفسى انى من جامعة القاهرة وكل التفاصيل اللى هو محتاج يعرفها

وقلتله على الموضوع واننا محتاجين الاستاذ صلاح يكتبلنا النشيد ونشوف الموضوع ده بياخد فلوس كام ونمشى فى الموضوع على انه شغل بيزنس
الحقيقة انا اتفاجأت بكرم الاستاذ صلاح .. فعلا انا لم اكن اتوقع كل هذا الكرم والترحيب غير العادى ..
رحب جدا جدا بالفكرة .. وقال انا هكتبهالكوا ببلاش وهخلى حامد موسى واحد ملحن كبير جدا
هيخليه يلحنها ببلاش كمان هدية للجامعة
بس قالى كلمة وجعتنى .. قالى هتعملوها بجد ولا ؟؟

لانه الظاهر كان عمل حاجة قبل كده بس مش اتعملت ... قلتله لا احنا هنسجلها وهتنزل الجامعة كمان ..
وقلتله احنا اصلا بنفكر فى اننا نعمل البوم كامل للجامعة
قالى طيب اعملوا دى بس الاول

وانتهى اللقاء بانى اخدت الميل بتاعه على وعد بان ابعتله كل التفاصيل اللى محتاجها عن الحملة واهدافها ورسائلها علشان يبدأ فى الكتابة

بعدها فعلا ارسلت له الملف بتاع الحملة وكنت بتابعه على طول باستمرار علشان اخد منه الكلمات
وفعلا الحمد لله بعدها باسبوعين تقريبا كانت الكلمات معانا كاملة .. كلمات جميلة جدا جدا


المشكلة الكبرى
المشكلة الكبرى كانت فى التلحين والتسجيل

كان الاستاذ حامد موسى سافر الى الادن فى رمضان ساعتها علشان يقدم برنامج منشد الشارقة او سما دبى حاجة زى كده مش متذكر بالضبط اسم البرنامج
وكنا فى حيص بيص .. مين هيلحنها ؟؟
ساعتها كان اللى هيغنيها محمد جمال من تجارة القاهرة برضه قالى انا فى واحد عارفه فى حلوان بسم الله ما شاء الله عليه
قلتله طيب قولى على الفلوس علشان نشوف
راحله وقعد معاه وجاب منه لحن بس مكانش كامل
ومحمد نفسه مع سيد عبده بدأوا فى تلحينها من جديد

والحمد لله اتلحنت بس طبعا بعد طلوع الروح
جت المشكلة الاكبر .. التسجيل فى استوديو والتوزيع

سألنا على الاستوديوهات .. ممكن نسجل عندهم وكده
فوجئنا ان التسجيل الساعة ب150 جنيه واحنا بالميت خالص هنسجلها فى حوالى 10 ساعات
يعنى محتاجين حوالى الف ونص جنيه علشان نسجلها
طبعا لما رجعت لقيادة طلاب الاخوان رفضوا تماما لان المبلغ كبير جدا جدا وصعب تدبيره
فكنت خلاص قد يئست من الاغنية ومن فكرة تسجيل الاغنية

سبحان الله واحد صاحبى من جامعة الزقازيق بعتلى ساعتها لينك للموقع بتاعهم وعليه اغنية حريتنا نادت
اللى هما عملوها

فسألته .. انتوا سجلتوها فين ؟؟ قالى عندنا
بقوله بكام وايه النظام .. قالى ده واحد عندهم موهوب بسم الله ماشاء الله عليه ضربها فى البيت وهو قاعد
وبيعرف يتعامل على برامج الموسيقي
قلتله انا جايلك وهنسجلها يعنى هنسجلها عندكوا

فى الزقازيق والمشوار الطويل

طبعا كانت عملية انى اخد معاد منه ونروح فيه وازبط مواعيدي ومواعيد محمد جمال عليه , كانت عملية فحت النيل او قناة السويس اسهل من تحديد المعاد بس الحمد لله لقينا المعاد واتفقنا على الذهاب

كانت نقطة التجمع فى الكلية الساعة الحادية عشرة ظهرا .. وفعلا تقابلت مع محمد جمال فى الوقت المحدد وانطلقنا الى المؤسسة وجبنا اكل كمان علشان الطريق طويل وكنا عايزين ناكل

وصلنا الزقازيق على العصر تقريبا واتصلت بصاحبى اللى كلمته فى الاول وجالنا هو وواحد تانى
ورحنا لبيت الراجل اللى هنسجل عنده الاغنية .. محمد يونس

قبل ما نبدأ محمد سمعنا حاجة كده هو كان عاملها .. الاغنية دى هو عملها ايام ما كان صايع .. اللى اقدر اقوله انها اغنية جامدة جدا جدا جدا جدا جدا
على .. صاحبى اللى استقبلنا .. قالى ان الاغنية دى بعد ما عملها .. بيقولى مفيش حد فى الزقازيق الا وكان بيسمعها من شدة انتشارها وجمالها
هو فعلا سمعهالى واحنا قاعدين بالموسيقى .. انا اتهبلت من جمالها .. روعة روعة روعة بمعنى الكلمة
بس للاسف مرضيش يديهانى وقالى دى كانت ايام الصياعة
اللى عرفته بعدها ان محمد اصلا كان بينظم حفلات موسيقيه فى الزقازيق فى اماكن كده وبتاع
وكان هو اللى بيغنى فيها وكان عامل فيها احلى شغل .. قبل الالتزام طبعا
المهم فضلنا عند محمد نسجل فى الاغنية من قبل المغرب بساعة .. لحد الساعة 10 ليلا
وبنسجلها حتة حتة علشان تطلع مزبوطة وتمام .. طبعا انا يوميها من شدة الحر والسفر جالى صداع فظيع مكنتش قادر ابص قدامى
حتى محمد يونس ومحمد جمال قالولى تعال غنيها معاهم علشان ميبقاش واحد بس اللى بيغينى قلتله انا مش قادر اصلا اقوم من شدة الصداع الرهيب اللى كان ماسك نفوخى

انطلقنا بسرعة علشان نلحق نروح لان انا ومحمد كان قدامنا سفر بعد ما نوصل القاهرة كمان
ورجعنا القاهرة الحمد لله بعد ما سجلنا الاغنية

بس طبعا اخدناها بعدها باسبوع .. بعد ما محمد زبطها وبط الصوت فيها .. بس المشكلة ان احنا كنا مستعجلين جدا على الاغنية علشان كان فى حفل فنى وفى مهرجان فى الجامعة وكانت لازم الاغنية تخلص قبلها

فطلعت بالشكل ده

ردود الافعال

الحقيقة ان بعد ما الاغنية اتعملت .. على الرغم من انها مكانتش الجامدة بنت الجامد قوى .. لكن عملت صدى واسع وقوى جدا جدا فى اوساط الطلبة واوساط العديد من المهتمين بالجامعات والحركة الطلابية وغيرها
وانا ادعوكم للاطلاع على رد فعل الطلاب فى هذا اللينك
http://www.alltalaba.com/talabaload.php?act=2&id=9984
اللينك ده لوحده زاره عشرة الالاف واحد
يعنى تقريبا فى عشرة الالاف واحد سمعها

ده غير ان احد مديري مراكز التسجيل قال انا مستعد اسجلهالكوا تانى عندى ببلاش وبشغل انضف من ده
اضافة الى الناس الطلاب اللى من فلسطين والدول العربية عامة اللى سمعوها وابدوا اعجابهم الشديد بالتجربة وبنجاحها
ويمكن كام ابرز نجاحات التجربة
انه فى التيرم اللى بعده مباشرة .. اللى هو التيرم ده اللى انا بكتب فيه دلوقتى
فى بداية برضه كان فى جلسات تنظيمية للاعداد للحملة الخاصة بالتيرم ده واللى كانت عن التعديلات الدستورية
فكان من ضمن المهام الاساسية والوسائل الفعالة واللى هيرصد لها ميزانية خاصة بها
هى عمل اغنية عن الحملة للجامعة
وفعلا تم تكليفي بشكل مباشر من البيج بوس بانى اتحرك فى انتاج واصدار اغنية جديدة وان اقوم بابلاغهم بالميزانية لوضعها فى الخطة بتاعت التيرم ده
طبعا بعيدا عن الظروف اللى حصلت خلال الفترة والتيرم ده واللى منعت طلاب الاخوان من الاستمرار فى الحملة وغيره .. وده ليه مجال تانى فى الحديث
وبدل من اصدار اغنية تم تطوير الفكرة واصدار فيلم سينمائى جديد عن التعديلات الدستورية

وبعيدا عما حدث ايا كان .. فالمقصد ان الحمد لله اصبح هناك تطور فى فكر طلاب الاخوان حتى فى اختيار الوسائل الخاصة بتوصيل الرسائل والاهداف
والحمد لله اعتقد انه اصبح هناك تحول كبير ناحية الوسائل الفنية لانها الاكثر توصيلا للمعنى وبشكل اسرع من الالاف الخطب الرنانة والمؤتمرات الحاشدة والمسيرات الكبيرة .. وهو ما تحقق الحمد لله خلال هذا التيرم بشكل وان كان ضعيفا

الحقيقة فى النهاية .. خلص اليوم الطويل .. وخلصت معاه مرحلة مهمة من مراحل العمل الخاص بطلاب الاخوان فى جامعة القاهرة .. لكن لسه مازالت الموقف والاحداث التى يجب ان يتم تدوينها كثيرة
-------------------------------------------------

وكان يوما من ايام حياتى


Saturday, April 21, 2007

متباتش فى بيتكوا .. كلاكيت تانى مرة

السلام عليكم ورحمة الله وبركاته

طبعا نظرا للاقبال الكبير على موضوع متباتش فى بيتكوا

معرفش ليه .. ده حتى فال وحش مش حلو

بس يلا .. هحكيلكوا النهاردة على اليوم التانى اللى كان زيه

برضه كنت مروح بيتنا فى امان الله وعادى مفيش حاجة غير عادية

وفعلا روحت ونمت ولحد دلوقتى مفيش اى حاجة مش طبيعية

لقيت بليل الساعة 12 تقريبا التيلفون بيرن

لحد لما صحيت وجبت الموبايل وشفت مين كان قفل

ولقيت 4 ميسدات من احمد الريدي ولقيت التيلفون بيرن من صلاح بوب

المهم رديت وكانت المحادثة برضه :

- ايوة يا صلاح .. خير ؟؟
- يلا يا حبيبي .. قوم وانزل
- تاااانى ؟؟
- اه والمرة دى انقح
- ايه اللى حصل ؟؟
- فى 100 واحد من اتحاد حر القاهرة اتاخدوا من شوية
- طيب سلام

طبعا انا اتخضيت .. 100 واحد من اتحاد حر القاهرة ؟؟
امال انا ابقى ايه ؟؟

لان المفروض لو هياخد حد .. هياخد الامين والامين المساعد

المهم قمت جرى ولبست
ورحت صحيت بابا

وقلتله انا همشى
وفعلا نزلت وخدت العربية ومشيت من البيت

بعد اما خرجت اتصلت بمحمد سعيد .. امين مساعد اتحاد حر اداب
قلتله ايه يا ريس وبتاع
انت فين ؟؟
قالى فى البيت
قلتله يخرب بيت الكفرة .. انزل من البيت دلوقتى
قالى ايه بس فى ايه ؟؟
قلتله كذا كذا كذا

فهو حول الموضوع لتهريج علشان اخوه كان قاعد معاه ومش عايز يعمل قلق
وقالى طيب ماشى هقابلك وبتاع
( عرفت بعدها انه راح نام ولا خرج ولا بتاع )

المهم وانا ماشى جالى تيلفون من اسلام يوسف من اتحاد حر تجارة القاهرة
قالى انت فين وبتاع .. قلتله جاى فى الطريق نازل

قالى طيب وعمرو حامد ؟؟
قلتله لسه هتصل بيه دلوقتى

وفعلا اتصلت بعمرو حامد امين جامعات مصر وامين القاهرة
اتصل .. مش بيرد
اتصلت تانى ... مش بيرد

قلت اهلا .. الموضوع طلع بجد بقه مش بتهريج

جالى تيلفون من احمد سباعى بيقولى ايه اللى حصل
قلتله كذا كذا كذا

قالى فلان ( التوب بوس ) مش عارف حاجة
ومقالهوش حاجة
قلتله طيب هكلمه ونشوف

فى الفترة دى كنت وصلت لبيت صلاح بوب لانى كنت قايله انى هجيله واعدى عليه
رحتله وطلعت عنده وقعدنا شوية فى بيتهم وكان خالهم فى البيت

وبعد ما حللنا الموضوع وبتاع .. كان فى احتمال فعلا ان يكون ده حصل

المهم كلمنا التوب بوس تانى .. انت فين

قال انا فى الحتة الفلانية .. طيب احنا جايينلك علشان نشوف

رحت انا وصلاح ليه فى المكان اللى اتفقنا عليه

قابلناه .. ايه يا عم وبتاع

قال انا عرفت ان فى حاجة زى كده .. بس معرفش المصدر ولحد دلوقتى مفيش اى كلام رسمى وصل

اتصلنا باحمد الريدي .. ايه يابوحميد وبتاع

وعرفنا التفاصيل اللى وصلتله بالكامل

التوب بوس قال انا هروح مشوار وبتاع

قلنا طيب سلام وسيبناه

فى الوقت ده اتصل بيا اسلام يوسف تانى وكان معاه ابراهيم الشرقاوى

وقالى ان عنده شقة اخته فاضية دلوقتى وممكن نبات فيها

قلتله طيب هجيلك ورحت عديت عليه فى المكان اللى هو كان فيه قبل ما يروح الشقة .. وقلتله هروح للريدي وهجيلك على هناك

طلعت انا وصلاح على الريدي .. كان فى المقطم

رحناله وجالنا حتة معينة اتقابلنا فيها

وعرفنا التفاصيل بالكامل .. كانت الساعة حوالى 2 بليل

فضلنا نتكلم ونشوف البتاع ونتصل وكده

وخلاص

على الساعة 3.30 اتصل
بيا اسلام وقالى هات اكل معاك علشان الحالة صعبة فى البيت

فسيبنا الريدي وهو روح بيتهم

ورحت وصلت صلاح البيت

وجبت اكل ورحت لاسلام يوسف فى البيت

اكلنا .. كان باقى على الفجر حوالى ربع ساعة

فقمنا اتوضينا وصلينا قيام مع بعض

وقبل الفجر ب5 دقائق انطلقت انا علشان اروح

والحمد لله صليته جنب البيت عندنا

وبعد الفجر نزلت علشان اروح الكلية علشان كان عندى محاضرات

من المواقف الجامدة اللى حصلت :

- كان مرة ابراهيم الشرقاوى جالى البيت مع هاشم امين .. وكنا بنحضر لحاجة كده هنعملها
فاحنا رحنا قدام مطعم جاد اللى جنبنا وواقفين .. شارقاوى قال انه هيروح المطعم وجاى على طول
بعد ما شارقاوى دخل المطعم بشوية .. الكهربا قطعت فى المطعم والمحلات اللى جنبه وفى العمارة اللى فيها المطعم كله

لما رحت لابراهيم واسلام يوسف فى الليلة دى ..
كانوا واقفين قدام جاد اللى فى الجيزة
فانا اول ما وصلت .. واول ما شفت ابراهيم واسلام واقفين
لقيت الكهرباء قطعت فى المطعم والمحلات اللى جنبه والعمارة كلها اللى فيها المطعم

فبصيت لابراهيم قلتله انت يا بوز الاخص .. اوعى تقف قدام جاد تانى
تحس كأن ابراهيم بيسحب الكهربا وهو واقف

- لما جبت الاكل ورحت لاسلام فى شقة اخته فى فيصل
ابراهيم كان نايم
فضلنا نصحى فيه .. قوم يا ابراهيم .. يا حبيبي قوم
يا ريس الاكل جه
وده ولا فى الدماغ
مع انه كان جعان جدا ومأكلش حاجة تقريبا

المهم بالعافية قومناه .. ومكانش راضى يقوم وعايز يصوم تانى يوم الخميس

طلع ايه بقه الموضوع

الموضوع ان فى واحد من الاخوان الكبار من اللى ليهم تعامل مع امن الدولة وكده
كان هناك فلقى مجموعة شباب موجودين فى مقر امن الدولة
وتقريبا لقط حاجة عن جامعة القاهرة ... او عرف حاجة عن انهم من جامعة او حاجة كده

فاتصل على طول باحمد لانه يعرفه .. وقاله .. واحمد اتصل بينا وقالنا
لكن الصح اللى حصل ان دول كانوا شباب عاديين او اتجاهات اخرى بس مش اخوان
بس الحمد لله الليلة كانت جامدة جدا

خصوصا شرقاوى ومطعم جاد
بحبك والله يا شارقاوى .. بس متقابلنيش قدام جاد تانى
كفاية علشان خربنا بيت الراجل


وادى يوم من ايام حياتى

Wednesday, April 18, 2007

احلى حفلة فى حياتى

السلام عليكم ورحمة الله

الحقيقة انا النهاردة فرحان مووووووووت وزعلان جدااااااااااااااااا

يوم الثلاثاء 17 ابريل 2007

كان يوم غير عادى ..

كان من اجمل ايام حياتى اللى عمرى ما هنساها واللى لازم اكتب عنها

بس انا علشان احكيلكوا على اليوم ده ومشاعري ... لازم الاول ابدأ من الاول .. من بداية السنة اصلا

الحقيقة من بداية السنة دى لما قررت انى ادخل قسم ادارة الاعمال .. وده كان بارادتى رغم معارضة الكل تقريبا للموضوع ده

المهم من اول يوم دخلت فيه القسم .. وانا كنت شايف انها هتبقى سنة عادية زى الثلاث سنوات اللى كانت قبلها

خاصة ان التيرم الاول فى بدايته مكانش فى حاجة مختلفة

لكن اللى بدأ فى انه يزيح التراب عن الدفعة وعن كوادرها ومواهبها

كان الدكتور حسين عطا ربنا يكرمه

ايا كان اختلافنا او اتفاقنا معاه ومع اتجاهاته وارائه

لكن الحقيقة تتقال انه اللى بدأ الموضوع ده فعلا

ويمكن كان قبله الدكتور عبدالحميد ابو ناعم ربنا يمسيه بالخير ويكرمه يا رب فى اى مكان يروحه

من خلال البحث اللى طلبه مننا فى سنة تانية ... واللى خلى كتير من الناس اللى فى قسم ادارة الاعمال من المجموعتين اللى كان بيديهم وقرر عليهم البحث

المهم طبعا منقدرش ننسى الدكتور اشرف عبدالرحمن ربنا يكرمه برضه .. وعمرى ما هنسى المحاضرة الاخيرة اللى ادهالنا وياريتها كانت الاولى لينا فى الكلية .. وكانت عن اقتصاديات المعرفة والعولمة وتأثيرها على سوق العمل وعلينا احنا كخريجين وعلى امتنا .. بجد ربنا يكرمه

وانتهى التيرم الاول من غير اى احداث مختلفة عن باقى السنوات اللى فاتت

وعلى الرغم من انى فى اول السنة لما دخلت قسم ادارة كان فى ناس كتير اعرفهم طلبة من القسم من خلال السنوات اللى فاتت .. لكن كان فى اكتر مش اعرفهم

ويمكن ندمى انى مكنتش اعرفهم من زمان من اول ما دخلت الكلية

المهم ان التيرم التانى بدأ وبدأت معاه رحلة الوداع

الواحد مكنش عارف ازاى يقضى اخير تيرم

مخبيش عليكوا انى كنت بفكر اسيب الكلية وادور على شغل .. واجى فى الاخر على الامتحانات واكون كده خلصت

لكن حصل حاجة فى التيرم الاول .. وهى ان الكلية كانت بتحطلها رسالة ورؤية واهداف

والدكتور اشرف قالنا على الموضوع ده

فطلع مجموعة من الطلبة وراحوا للعميد وقالوله مش انتوا بتحطوا رسالة للكلية .. واحنا جزء من الكلية .. يبقى لازم نشارك معاكوا فى وضعها

وفعلا شاركوا معاهم وحطوا رسالة للكلية

مفيش حاجة لحد هنا مختلفة

لكن مع بداية التيرم التانى .. مجموعة من الطلبة فكرت فى انها تحط رسالة للقسم .. وانها تبدأ تطلع بالقسم من حالة السبات والنوم الشتوى .. الى قمة الاقسام على مستوى مصر

بدأت الفكرة تنتشر كانتشار النار فى الهشيم .. فعلا

بدأ الطلبة يتحركوا بشكل غير طبيعي

لدرجة ان الدكاترة انبهروا بالشغل وبحماسة وبطريقة تفكير الطلبة فى قسم ادارة
بل لدرجة ان فى الشركات دلوقتى بره .. اسم دفعة ادارة 2007 بقه يرن فى ودنهم .. وبيصحوا كل يوم عليه

الطلبة اللى كلهم على بعضهم حوالى 250 واحد .. لكن كل واحد منهم بدفعة كاملة

بدأت مجموعة تتحرك فى اتجاه عمل بحث عن قسم ادارة الاعمال وتحطله رسالة ورؤية مستقبلية
وتعمل تحليل لوضع القسم ما بين عشر جامعات وتعرف نقاط القوة فى القسم ونقاط الضغف

بدأ مجموعات اخرى فى عمل ابحاث كان طلبها مننا الدكتور محمد المحمدى عن الادارة الاستراتيجية فى الشركات وفعلا فى ناس عملوا شغل على مستوى عالى جدا

بل حتى كان فى طلبة اللى مشاركوش فى الابحاث كانوا متميزين جدا فى شغلهم على المستوى الطلابى

واللى كان منهم الناس اللى غيرت كتير فى الكلية
ولو جينا نشوف هما مين فهنلاقى

محمد خيري .. اللى صحى الجمعية العلمية من سباتها العميق .. واللى فعلا وجوده فى الجمعية كان علامة فارقة فى حياتها وفى مسيرتها ..
محمد خيري هو اللى جاب ابراهيم الفقى فى جامعة القاهرة لاول مرة فى تاريخ البشرية .. ومحمد خيري هو اللى عمل موقع شباب تجارة .. ومحمد فى خلال فترة رئاسته للجمعية .. اتعمل اول موديل طلابى لاول مرة فى تاريخ كلية التجارة .. ربنا يكرمك يا بو حميد

برضه منهم محمد عودة .. محمد اللى بدأ نواه وبذرة اسرة رسالة .. انا افتكر يوم ما كان محمد بيسجل الاسرة لسه .. وكان يا عيني بيلف حوالين نفسه علشان يسجلها .. بس باصراره وبعزيمته .. سجلها وبدأت الاسرة نشاطاتها .. لحد لما بقه ليها وضعها واسمها
وكل ده خلال سنتين فقط .. ومبقاش حد فى الكلية مش يسمع عن اسرة رسالة

احمد امير .. وهو امير فعلا ..
سواء فى افكاره او تحركاته او حتى سكونه
احمد امير ربنا يكرمه نبع افكار لا ينضب
بدأ يفكر فى كيفية تكوين رابطة للخريجين .. وبدأ يحققها فعلا
بدأ يفكر ازاى ممكن يفيد قسم ادارة الاعمال .. وفعلا وصل للفكرة واسمع انه بدأ فى تنفيذها مع رجال اعمال كبار
احمد استطاع من خلال علاقاته مع رجال الاعمال انه ينسق زيارة لاتنين من الضيوف الخارجيين اللى حضروا معانا فى الكلية مع الدكتورة سحر عبدالعال علشان يدونا محاضرات وكان منهم مدير تسويق شركة زاد كولا .. ورجل الاعلانات وصاحب فكرة " سر شويبس " جلال زكي
ربنا يكرمك يا بو حميد

واما بقه البنات فلازم نذكرهم .. اللى منهم
مروة على .. الحقيقة انا مشوفتش واحدة بنت بهمتها ولا بنشاطها او حتى افكارها
مروة فكرت فى انها تعمل حاجة للقسم .. ومرضيتش انها تكون صفر على الشمال ..
ومرضيتش انها تتخرج من الكلية قبل ما تعمل حاجة للكلية او للقسم اللى حبته
مروة .. هيا اللى بدأت الاعداد لمشروع مجلة قسم ادارة الاعمال
مجلة ناطقة باسم قسم ادارة الاعمال .. وتكون من تحرير الطلاب .. وتوجه لطلاب الكلية
مروة شافت ان العصر الجاى هو عصر الادارة .. وان الطلاب لازم ياخدوا بالهم من انهم لازم يكونوا متميزين
ولذلك بدأت فى التجهيز للمشروع
وفعلا حققت امانيها الحمد لله
لدرجة ان رئيس القسم نفسه .. انبهر بالمجلة وبالشغل اللى فيها .. فقالها على شوية حاجات تعملها علشان يبدأ فى طباعة عشرة الالاف نسخة منها وتوزيعها على الطلاب .. وكله على حساب الكلية
بل انه امرها واداها الصلاحيات انها تكون فريق من الكلية من جميع السنوات ويسجل فى الكلية رسمى .. علشان يتابع اصدار المجلة بعد ما مروة تتخرج

نسمة حمدي
برضه من البنات المتميزين جدا جدا فى القسم .. نسمة اصلا من الاتحاد من فترة طويلة حسب ما اعرف
ومفيش حد سمع اسم نسمة الا وافتكر نشاطاتها الكتيرة جدا .. سواء فى تنظيم رحلات لدور الايتام .. او تنظيم معارض خيرية .. وغيرها من الانشطة بتاعت الاتحاد .. ويمكن اخرها كانت حفلة يوم اليتيم الضخمة جدا ..
من اكنر البنات نشاطا ومشهود لها من قبل الدكتور حسين عطا .. ربنا يوفقها ويكرمها يا رب

احمد فؤاد .. صاحب بصمة قسم ادارة الاعمال
الحقيقة دكتور احمد كما احب انا ان اناديه وكما ناديته من سنة اولى منذ معرفتى به .. هو اللى فعلا اقدر اقول صحى القسم كله .. وصحانا معاه
احمد هو اللى بدأ فى تكوين فريق ادارة .. الفريق اللى بدأ يحط رسالة للقسم واهداف خاصة به علشان يبقى الشغل فعلا على بياض
احمد اللى حرك فريق من 18 واحد تقريبا .. وزار 10 جامعات على اقل تقدير .. والفريق ده بدأت فى دراسة متعمقة للقسم وتحديد نقاط القوة والضعف للقسم ووضع اليات لكيفية الاستفادة من كل نقطة منها
الحقيقة احمد .. نقل تجربة فريق زدنى .. لكلية التجارة .. واقدر اقول انه اول واحد بدأ فى نقل كورسات زدنى لداخل الكلية .. وبدأ ينشر فكرة التنمية الفكرية والتنمية المهاراتية داخل الكلية


دول الناس اللى كانت ظاهرة وبارزة جدا فى نشاطها فى القسم
الحقيقة فى غيرهم كتير كتير

وكل واحد من اللى انا اتكلمت عنه دلوقتى وراه كتير من طلاب القسم
يعنى مروة كان معاها فريق ما يقرب من 5 او 6 على اقل تقدير
ومحمد خيري كان معاه فريق اخر ما لا يقل عن 10

والحقيقة ان هناك الكثير والكثير من اللى انا عايز اكتب عنهم .. لكن علشان ضيق البوست والوقت

طيب ايه علاقة ده بالعنوان
العلاقة .. ان يوم الثلاثاء كانت حفلة ادارة الاعمال فى الكلية .. مع الدكتورة سحر عبدالعال

الحقيقة الحفلة لما فكرت فيها .. كنت عايزها بشكل مختلف
كنت عايزها تبقى حاجة غير الحفلات السابقة ليها والحفلات اللى تليها كمان

ولذلك فكرت فى شكل للحفلة ..
فجاتلنا حبة افكار
منها فكرة اننا نجيب جاتوه وعصير لكل الحضور .. وقد كان الحمد لله
منها الفقرة الاساسية واللى كانت فقرة الحوار المفتوح بينا كطلبة

والله انا مش عايز اقولكوا الناس اتكلمت ازاى فى الفقرة دى .. فعلا حسيت بجد اننا حاجة واحدة .. اننا كيان واحد
على الرغم من اننا قد نكون مختلفين تماما فى حاجات كتيرة .. بس كلنا كنا حاجة واحدة
هدفنا واحد .. وغايتنا واحدة
جمعنا قسم واحد .. وجمعتنا سنة واحدة .. بس كانت سنة مختلفة

انا مكنتش متخيل ابدا .. ان بعد الحفلة دى فى ناس كانت بتعيط
بتعيط .. اه بجد بتعيط

والسبب .. اننا خلاص .. اقترب موعد الفراق

اقسم بالله العظيم انى عمرى ما حبيت مكان .. وحبيت انى افضل فيه .. زى قسم ادارة الاعمال
وده بسبب الطلاب اللى فيه سواء ولاد او بنات
مش عارف اعبر ازاى عن مشاعرى لدفعتى

بس بجد .. انا بحب الدفعة دى جدا
واتمنى اننا نبقى على اتصال دوما

بجد بعد الحفلة دى .. جالى feed back كتير

منهم واحد قالى انا حضرت فى حياتى حفلات كتيرة جدا .. ودى كانت تانى احلى حفلة احضرها فى حياتى
ومن الردود دى .. ايميل جالى من واحدة بنت فى القسم معانا .. انا استئذنها انى احطه هنا مع بعض التصرف
لانى شايف ان الميل ده .. يلخص كل اللى انا عايز اوصله فى المقالة دى

-------------------------------------------------------------------

بماذا تشعرين ..

سؤال .. احترت في الاجابة عنه بعد انتهاء الحفل ..

حقا .. بماذا اشعر .. ؟ .. هل انا سعيدة ام حزينة ..

هل انا مطمئنة ام قلقة .. هل انا خائفة ام لدي امل فيما يخبئ المستقبل ..

تضاربت داخلي المشاعر .. تعاركت ..

لكن ثمة شعور واحد .. انتصر في النهاية .. و ساد

مجددا سألتني .. بماذا تشعرين .. ؟

أشعر بكي ..

هذا هو الشعور الذي يملئني .. شعوري بك ..

لا لا .. ليس بك فقط .. بل شعوري بهم ..

لا .. ليس شعوري بهم ايضا .. مالي لا اجيد التعبير ..

انه .. شعوري بنااا

و من لم يشعر اليوم بأننا اتحاد ..

أو .. دعني استخدم الفاظا اكثر دقة ..

من لم يشعر اليوم بأننا .. إخوان ..

أخوات ..

" أسرة "

أسرة .. في شعور كل منا باخوته .. في ارتباطه بهم .. في قيمتهم عنده .. ذلك وحده ماكان جليا .. واضحا .. في حفلنا اليوم .. شعورنا ببعضنا

من لم يتاثر بذلك الحوار المفتوح الذي اجريته .. لماذا تاثرنا .. لاننا نشعر بمن يتحدثون .. نفهمهم جيدا .. ندرك الاحساس الذي تريد ان توصله كلماتهم

صلاح .. كان الى جوارنا يصور الحفل .. كدت اناديه .. يا صلاح .. اعكس اتجاهك .. صور الناس .. صور انفعالاتهم .. ابتساماتهم .. دموعهم .. ضحكاتهم .. صور شعورهم ببعضهم .. أو

أو ابقى .. ابقى كما انت .. ابقى في اتجاهك .. انت محقا في اختيارك لهؤلاء اللذين يعلون المنصة لتصورهم .. فان كانت مشاعرنا و انفعالاتنا روح الحفل .. فان هؤلاء .. هم الجسد .. هم الحياة .. و تظل الروح قادرة على التعبير طالما تحركت اجزاء ذلك الجسد

حقا .. كنتم خير ممثل لروح الدفعة .. ليست هذه الدفعة فقط .. بل منذ السنة الاولى .. و انا ارى في طلاب الاخوان مثالا رائعا لطلاب الجامعة .. على الرغم من انني قد اختلف مع مواقفهم كثيرا .. و لكن يكفي ان لهم موقف .. من كل ما يحدث حولهم .. يكفي انهم لم يضيعو الوقت في التردد .. هل نستطيع ام لا نستطيع .. لكن تحركوا و بدأوا .. يكفي هذا الكم الهائل من التأثير الذي تركوه في علاقات الكثيرين بالله .. و يكفي .. بل و يفيض .. ان يكون للاخلاص رائحة تفوح من كل ما يفعلون

ربما لا اعرفهم جميعا لكي اذكرهم فردا فردا .. و ربما ذلك من اجمل ما يميزهم .. انصهارهم في بعضهم البعض .. اعتقادا .. و افكارا .. و سلوكا

لكني اعرف البعض .. اعرفهم قليلا .. و استطيع ان اتحدث عنهم كثيرا ..

-----------------------------------------------------------

وده كان احد اجمل ايام حياتى .. ومازالت الايام كثيرة .. ايام من حياتى

Saturday, April 14, 2007

انزل متباتش فى بيتكوا ... يوم من ايام حياتى

السلام عليكم ورحمة الله
الحقيقة طبعا وقع الخبر عليا كالصاعقة

وهو خبر اعتقال عبدالمنعم محمود .. اللى لسه خارج اصلا من عندهم
الظاهر انه وحشهم ومش قادرين على بعده

الحقيقة لما قريت الموضوع وانه كان مطارد واللى قالى الخبر كان شارقاوى .. افتكرت الايام اللى كنا فيها فى نفس الموقف مع عبدالمنعم مع الاختلاف

افتكرت ايام الرعب والخوف من فزع الدولة على رأي استاذ مجدى سعد

وقررت انى احكيلكوا على حبة مواقف من اللى كانت ركبنا ساعتها بتخبط فى بعض والحمد لله ربنا ستر

وطبعا خلاص الحاجات دى كانت تعتبر سرية لحد فترة معينة .. لكن دلوقتى بقه واجب اننا نكتبها وندونها .. علشان يشهد التاريخ على ما نعانيه

موقف 1
حصل الموقف ده اثناء المشاركة فى انتخابات الاتحادات الطلابية فى جامعة القاهرة
ساعتها تقريبا كان بعد ما تم الاعلان عن مرشحي طلاب الاخوان لامناء الكليات وامين الجامعة .. وكانت لسه الانتخابات لم تتم ..
انا كنت فى بيتنا بعد يوم طويل فى الجامعة .. و روحت بليل الحمد لله ودخلت البيت واكلت ودخلت انااااااااام علشان تانى يوم مشوار طويل
المهم بعد ما نمت فوجئت بالموبايل بيعيط من كتر الميسدات والاتصالات اللى عليه .. كانت الساعة تقريبا حوالى واحدة وثلث ..
ولقيت اللى بيكلمنى عضمضم خالع الاشجار

- ايه يابنى نوم اهل الكهف ده ؟؟
- ايه يا ريس عايز ايه ؟؟
- يلا يا حبيبي .. انزل من بيتكوا حالا .. متنامش فى بيتكوا النهاردة
- ( مفزوعا ) انت بتقول ايه ؟؟ انت بتهرج يا ريس ؟؟ انت عارف الساعة كام دلوقتى
- لا يا حبيبي .. البس وانزل دلوقتى وهبقى افهمك بعدين
- طيب ماشى .. هبقى اكلمك لما انزل .. سلام
- سلام

ده تقريبا نص المحادثة اللى دارت بينى وبينه
طبعا انا اتفزعت .. ايه الكلام ده .. مكناش متفقين على كده من الاول
المهم قمت طبعا جرى .. وتقريبا هدخل موسوعة جينيس للارقام القياسية .. فى سرعة لبس الهدوم وكنت فى الشارع
طبعا قعدت افكر . .. اكلم مين دلوقتى يجيلى . لان مش هنزل امشى فى الشارع الساعة واحدة ونص
المهم فضلت افكر .. لحد لما ربنا هدانى لواحد
كلمته .. قلتله تكون عندى فى اسرع وقت .. والحمد لله خلال عشر دقائق كان عندى
انا كنت فى الشارع .. بس قبل ما انزل .. رحت صحيت بابا وقلتله كذا كذا كذا .. قالى ماشى مع السلامة

المهم نزلت واستنيت صاحبنا ده لحد لما جه وركبت معاه
فهمته ان فى قلق ولبش ومشاكل امنية وبتاع .. وفضلت الف معاه شوية فى العربية بنفكر نعمل ايه
اثناء ما احنا ماشيين مع بعض بالعربية .. خد باله ان فى عربية بيجو مش فاكر كانت ايه سوداء ماشية ورانا خطوة خطوة
حتى لما كان ماشى بالراحة كانت ماشية ورانا بالراحة ... وهو حتى خد باله وقاله ايه الموضوع
بس الحمد لله لف هو من طريق والعربية ملفتش وراه .. فهو طلع على طريق تانى علشان يتأكد والحمد لله مكانش فى مشاكل

المهم فضلنا نفكر نعمل ايه .. قالى انا هتصل بواحد ازبط انك تروح تنام عنده الليلة دى وبكرة يبقى انزل الجامعة اعرف ايه الموضوع
قلتله مش هينفع .. انا لازم انزل دلوقتى واروحلهم اعرف ايه الموضوع
قالى لا .. وتعالى بس .. قلتله ماشى ربنا يكرم

اتصل بالراجل اللى قالى عليه .. قاله انت فين .. قاله على مكانه .. كانت الساعة تقريبا اتنين بليل
قاله احنا جايينلك ..
رحناله .. وقفنا بالعربية بره البيت .. كانت نظام فيلا كده
نزل الراجل اللى معايا وراح كلم الراجل على الباب شوية .. وبعدها رجع صاحبى وركب العربية .. والتانى دخل شوية فى البيت ... وتقريبا كان بيلبس .. وبعدها خرج وركب معانا فى العربية وانطلقنا

رحنا فى منطقة تانية ... فى بيت الراجل التانى اللى ركب معانا .. شقة تانية فاضية .. رحنا طلعنا فيها انا والراجل التانى
واما صاحبى الاولانى وصلنا ومشى روح بيته

قبل ما نطلع الشقة قلتله انا عايز اتصل بناس احددلهم مكانى علشان كانوا جايين ياخدونى بالعربية .. رحت اتصلت بواحد وقلتله على مكانى وقلتله ان موبايلي مقفول واتصل بيا على الرقم ده .. موبايل الراجل الىل كان معايا
طلعنا الشقة ..


فضلت قاعد فى الشقة الفاضية دى معاه حوالى ربع ساعة تقريبا .. كانت الساعة تقريبا اتنين وثلث
بعد ربع ساعة فى الشقة لقيت صاحبى اللى انا كنت اتصلت بيه وصل المكان اللى اتفقنا عليه
وكان بيرن .. فمعنى كده ان انا لازم انزله دلوقتى .. وفعلا نزلت انا والراجل اللى كان معايا وقفلنا الشقة تانى ونزلنا
طبعا مكان الالتقاء كانت بعيدة شوية .. ففضلنا ماشيين .. واتعرفت عليه .. ربنا يكرمه راجل زى العسل
بعدها لقيت صاحبى اللى كان جايلي بالعريبة ومعاه ناس تانية اعرفهم .. ركبت معاهم .. وبعد ما ركبت الراجل سلم علينا ومشى روح

وفضلت بقه مع صحابى دول نلف بالعربية لحد الفجر رحنا هايبر وكارفور ولفينا حتت فى مصر تقريبا اول مرة نروحها
وكانت ليلة .. من اجمل ليالي حياتى اللى عمرى ما هنساها

كان ايه السبب بقه ؟؟
السبب ان واحد صاحبى كان مروح البيت .. فلقى بوكس عند بيتهم ومخبرين وبتاع .. فطبعا مطلعش ولف ورجع .. فى نفس الوقت تقريبا كان واحد تانى مروح فلقى بوكس داخل الشارع بتاع بيتهم .. وهو كان هيروح وهيدخل فى الشارع بتاعهم .. ولقى كمان ان فى عربيات بوكس واقفة قدام البيت ..
اضف الى ذلك بقه ان ده كان توقيت بعد انتخابات مجالس الاتحادات ولسه الانتخابات مولعة فى الجامعة .. فكان فى قلق امنى وخوف من فزع الدولة اللى بيجي بليل كالعادة

ده كان الموقف الاولانى .. فى موقف تانى بس فى بوست جديد

وده كان يوم ... من ايام حياتى

Wednesday, April 11, 2007

جزااااااااكم الله خيرا جميعا

السلام عليكم ورحمة الله

بجد انا فرحان وسعيد جدا بتعليقاتكم على البلوج

ربنا يكرمكوا يا ريب ويجزيكوا خيرا

انا بجد مش عارف اشكركوا ازاى واحد واحد

سواء من الاخوة او من الاخوات

ربنا يكرمكوا ان شاء الله

انا ان شاء الله هبدأ اكتب ذكرياتى فى الجامعة

وهبدأ احكى عن المواقف الطريفة والعصيبة وكل حاجة

يا رب يا مسهل

دعواتكوا بس

Tuesday, April 10, 2007

صور متناقضة .. الشخصية المصرية

السلام عليكم ورحمة الله وبركاته

الحقيقة انا مش عارف اكتب ايه .. خاصة ان الموضوع ده كان يلح على ذهنى من فترة .. وكنت فعلا محتاج اكتبه واكتب عنه

بس سبحان الله .. احيانا بتحصل مواقف لا نلقى لها بالا .. نلاقي ان المواقف دى فى مجموعها تشكل صورة واضحة عن شئ معين .. وهو ده اللى هتكلم عنه فى هذه التدوينة

مشهد رقم 1

امبارح كنت عند الحلاق .. وان مشغل قناة دريم على برنامج الرياضة .. مش متذكر تحديدا اسمه .. لكن عامة هو كان بيناقش الرياضة وسنينها .. الحقيقة انا صعقت بمقدار التفاهة اللى الناس عايشة فيه ..
ماشى اعتبرنى قفل مصدى .. بس كمل الموضوع للاخر
البرنامج كان بيناقش قضية اساسية ومحورية وهو تصريحات مدرب الزمالك انه لم يحسم امره بعد فى شأن استمراره فى تدريب الزمالك ام لا .. والانقح انه جايب خبير استراتيجي فى الكورة من جرنان مشهور ليقوم بتحليل الخبر ومدى صحته والدوافع التى ادت الى هكذا تصريحات وما الذى تدل عليه هذه التصريحات وخلافه من هذا الكلام

اشكر ربى انى لحقت البرنامج فى الاخر وكنت هجيب الى فى بطنى .. فانا مش عارف لو كنت لحقته من الاول كان ايه اللى ممكن يحصل
حقيقة حسيت ان الناس دى دماغها فاضية ومفيش حاجة بيعملوها فى حياتهم .. وحسيت بجد بكلمة قالهالنا الدكتور الله يكرمه ويبارك فيه الدكتور عبدالحميد ابو ناعم .. وكان بيقولنا ان لازم لكل انسان يكون عنده رؤية ورسالته فى الحياة وميكونش عايش من اجل انه عايش
طبعا التحليل الرائع لصاحبنا الخبير كان سلبى وضد الزمالك .. ويا محااااااسن الصدف .. ان الحلاق كان زملكاوى .. فمش عايز اقولكوا انى سمعت كلام .. لولا انى محترم وابن ناس كنتوا خدتوا فكرة وحشة خالص عنى

ده غير لما اكون مثلا راكب ميكروباز ( هما بيقولها كده ) الاقى واحد جايب جرنان الاخبار والاهرم والجمهوية . وفاتحهم كلهم على صفحة الرياضة علشان يعرف اخر الاخبار !!

مشهد 2
الحقيقة بعد المباراة التاريخية اللى كانت بين الاهلى ومش عارف مين .. كان عندى محاضرات تانى يوم .. فنزلت الجامعة علشان احضر عادى .. ومكانش فى بالى حاجة خالص والله العظيم ده انا قلبى قلب خصاية .. المهم مش عايز اقولكوا انا كنت مندهش جدا
بس من ايه ؟؟
من الطلبة اللى كانوا قاعدين فى الجامعة ومتلمين حوالين بعض .. وفى واحد فى النص ماسك حاجة كده وبيقراها والناس كلها بتقرا معاه وبيتناقشوا فيها .. انا كنت هزغرط من الفرحة .. الطلاب بقه بيذاكروا وبيتثقفوا .. ويا فرحة ما تمت خدها ابن ال÷@ وطار
كمية غير طبيعية من جرنان " الاهلى " وغيرها من الجرائد اللى بتعمل تحليل رياضي للماتش وتذكرت ساعتها كلمة للشيخ وجدى غنيم بيقول
الناس بتكون بتتفرج على الماتش .. وتتفرج على تحليل الماتش .. وتنزل على القهوة تحلل التحليل بتاع الماتش .. وتجيب الجرنان اللى فيه التحليل بتاع الماتش ومجريات الماتش .. ويفضل يتكلم مع خلق ربنا على الفرصة اللى ضاعت وعلى الهجوم الضعيف واسبابه "
بجد مش بتهريج انا حسيت بمقدار التفاهة اللى الناس عايشة فيها
جميل اننا نلعب كورة .. وجميل اننا نكون رياضيين .. بس مش جميل ان الكورة تشغل كل الحيز ده من تفكيرنا وكأننا خلقنا من اجل الكورة ولا شئ غير الكورة !!

مشهد 3

نرجع بقه لصاحبنا الحلاق .. المهم انى روحت وانا بلعن العيش والعيشة واللى عايشينها وابن ال@÷×@ اللى عيشهالنا .. المهم كنت قاعد على الجهاز وماما كانت بتدور على قناة دريم .. قلت يا محااااااااااااسن الصدف !!
بس ماما كانت بتدور على برنامج العاشرة مساءا (هو عجبها البرنامج بعد الحلقات اللى شافتها عن الاتحاد الحر وشافتنى عليها .. فكرونى ابقى احكيلكوا عنها ) المهم جبتلها القناة ورجعت على الجهاز
بس الحقيقة وانا راجع شدنى الحوار اللى كان عليه بين المذيعة المتألقة منى الشاذلى وبين التاجر محمود العربى ..
محمود العربى رئيس مجلس ادارة شركة توشيبا العربى ..
والله كان نفسى اعيط على حالنا وعلى الحلاق والكورة وسنينها
الراجل ده بدأ صبى فى محل بقالة .. وبدأت احلامه تكبر مع سنه .. وبدأ يحلم انه يبقى حاجة كبيرة وانه يفيد البلد .. وفعلا حقق احلامه
بيقول ( الحتة اللى لحقتها ) انه لما سافر اليابان علشان يعمل صفقة ويرجع وشاف مصانع توشيبا .. زعل جدا وقال انه فاشل .. وقال
ليه ميكونش عندنا مصنع هنا فى مصر ؟
وفعلا رجع وعمل توشيبا العربى
وقال كلمة فى اخر الحلقة .. بيوجهها للشبابا .. وبيقول انت قاعد مستنى الوظيفة .. طيب خليك مستنيها .. ويبقى قابلنى .. او معنى كلامه
الحقيقة انا اقف احتراما وتقديرا لهذا الرجل .. والله الراجل ده خسارة فى بلد الكورة وهز الوسط فى الهرم

مشهد 4
واخر مشهد والحقيقة كنت هعيط فعلا مش بتهريج
النهاردة كان عندنا سكشن .. فالمعيد فى النص وقف السكشن وقالنا اسمعوا الحكاية دى اللى حصلت معاه
هو كان بيديى السنة اللى فاتت لمجموعة عندنا فى الكلية .. والسنة دى جاله شاب اسمه مصطفى من جيبوتى .. وعرفه بنفسه وان المعيد كان بيديله السنة اللى فاتت وبتاع
المهم المعيد بيقول بعد السلام والتحية لقى الشاب بيقوله .. انا كنت فاكر ان نظام الدراسة فى كلية التجارة جامعة القاهرة غير كده خالص .. كنت فاكر انى هاجى وكتب ومذاكرة وابحاث ومراجع وحاجات كبيرة كده ومش هيبقى عندى وقت
لكن للاسف ( والكلام للشاب الجيبوتى ) لقى ان المسألة كلها ملزمة قبل الامتحان وفى الاخر تنجح وتجيب تقدير والموضوع خلص
واضاف الجيبوتى ( اسمعوا يا شباب مصر )
- المشكلة ... لما هرجع بلدى هقولهم ايه ؟؟
- قولهم خدت شهادة فى المحاسبة وكده .. رد عليه المعيد
- لا انا اقصد .. هفيدهم بايه ؟؟ انا متعلمتش حاجة اقدر افيدهم بيها وافيد اهلى بيها .. هقولهم ايه ؟؟

شايفين يا جماعة الشاب الجيبوتى ده بيفكر ازاى ؟؟
الحقيقة انا كنت فعلا على وشك انى اعيط .. تخيلوا ان الشاب الجيبوتى ده مش بيفكر فى الكورة ولا فى البنات ولا الخروجات الجامدة .. او انه فى ارض الاحلام بالنسبة لبلده ومش هيرجع خلاص ويقضيها فى مصر .. وعلى الاقل العيش ابو شلن احسن بكتير من اللى عندهم
لكن شوفوا بيفكر فى ايه .. وكل احلامه وامانيه كانت ايه ؟؟
هفيد بلدى بايه ؟؟ لما ارجع بلدى هقولهم ايه ؟؟


وانت ياللى بتقرا المدونة .. هتفيد بلدك بايه ؟؟ وهتقول لبلدك ودينك ايه ؟؟

Monday, April 9, 2007

بسم الله بدينا وبدأنا التدوين

بيب بيب جااارحى
يا جارحى يا حبيبنا .. يا موكلنا رز وفتة


خلاص خلاص لا داعى لا داعى
اخجلتم تواضعنا ايها السادة
اهلا بيا ومرحبا فى عالم التدوين .. يا الله

ايه الحياة هنا مختلفة خالص .. الواحد ولا كأنه فى حتة تانية

المهم نديها حبة جد
السلام عليكم ورحمة الله وبركاته الاول

الحقيقة انتوا مش عارفين انا سعيد وفرحان قد ايه انى الحمد لله خدت قرار بدخول عالم التدوين .. هو فعلا عالم جديد ومختلف عن حياتنا
وقبل ما حد يرزع تعليقات زى اللى راحوا علشان يحجزوا مكان انا احب انى احط كام نقطة على كام حرف كده علشان العملية تمشى

1- انا بداية عمر الجارحى .. طالب فى كلية التجارة جامعة القاهرة
فى قسم ادارة الاعمال Business Administration
.. وعايز اتجوز طبعا .. حاجة اساسية فى حياة الانسان على سطح الارض
ورؤيتي انى ان شاء الله اكون مدير تسويق لاحدى الشركات اللى فى بالى بعد 15 سنة من دلوقتى .. وده بعد التدرج فى مناصب مختلفة فى مجال التسويق لاكتساب الخبرات فى مجال الشغل خلال الفترة دى
كمان من ضمن رؤيتي انى اكون رجل اعمال كبير وناجح وكفاية كده النهاردة وان اصبح الخبير الاول فى التسويق خلال 5 سنين بعدها
وانا الحمد لله كان ليا بعض النشاطات الجامعية الطلابية المختلفة .. واللى هتعرفوها فى المدونة بتاعتى

2- ان قرار زى التدوين ده اخدته بعد طول تفكير وتمحيص وتدقيق فى موضوع المدونات ده .. والحقيقة كان استجابة
لكلمة قالهالى واحد حبيبي اسمه عبدالرحمن ابن خلدون ( هو لسه قاعد عند نجوم الحيرة الظاهر عجبته القعدة هناك )
كان من ضمن كلام كتير قالهولى بيحاول عبثا اقناعى بالتدوين .. قالى ان للاسف ان جزء كبير من حياة الامة ضاع بسبب انه غير مدون .. وانا اضيف ان حياة الافراد هي التى تشكل حياة الامة
وللاسف ان احنا تاريخنا مش معروف جيدا بسبب عدم تدوينه
ومش عايز اقولكوا علشان اعمل المدونة دى تعبت جدا مش لانى مش عارف اعملها .. لكن بسبب ان رضاء الناس غاية لا تدرك .. كل ما اعمل المدونة وابعتها لواحد علشان يقولى رايه فى الالوان والترتيب والذى منه .. كل واحد يطلعلى القطط الفاطسة لدرجة انى كنت هسيبها من بابها
بس الحمد لله الموضوع عدى على خير

3- مدونتى كما هو واضح من اسمها هتكون مدونة اجتماعية عملية .. بمعنى انى هتناول الجانب اللى بحبه فى حياتى وهو الاجتماعيات والعمل .. ولانى بحب التسويق وان شاء الله ناوى والنية لله فى اتخاذه مجال العمل المستقبلى ..فان شاء الله هتشوفوا حاجات جامدة جدا بس خليكوا معانا


واخيرا .. ادعولى جامد علشان ربنا يكرم وتكون الدنيا زى الفل
خصوصا انكوا هتشوفوا حوارات جامدة خاصة مع عضمضم خالع الاشجار
والسلام عليكم ورحمة الله