Thursday, June 28, 2007

ولا تحزن

السلام عليكم ورحمة الله وبركاته

معلش هقطع سلسلة الموقع ... وناخد فاصل صغير كده

سبحان الله بتحصل مع الانسان حبة مواقف جامدة جدا

النهاردة كنت رايح انترفيو فى احدى شركات المحمول فى مصر ... كانت جامدة جدا والشغل كان هيبقى كويس جدا

فالحمد لله .. الموضوع وقف برضه بسبب الجيش زى البتاع التانية اللى وقفت برضه بسبب الجيش

فالحمد لله على كل حال

المهم وانا راجع كنت مضايق شوية .. يعنى راضى بقضاء الله بس مضايق من جوايا شوية بسبب الجيش

سبحان الله ركبت العربية والراديو كان شغال

اول ما اللى بيقرا القرآن فى الراديو نطق .. قال اية سبحان الله جاية فى وقتها

"ولا تحزن .. ولتعلم "

بعدها رجع جاب الاية تانى من الاول

"كى تقر عينها ولا تحزن ولتعلم ان وعد الله حق"

سبحان الله

الراجل قال الاول الكلمتين لوحدهم

"ولا تحزن ولتعلم"

وسكت

وسبحان الله كنت حاسس كأنه بيقولهوملى انا

Tuesday, June 26, 2007

حول اهمية الموقع وصداه

السلام عليكم ورحمة الله وبركاته


معذرة الاول على الانقطاع المفاجئ فى الكتابة لانى كنت مشغول جدا الفترة اللى فاتت دى قوى .. والحمد لله على كل حال

الفترة اللى فاتت دى حصلت حاجة كده جميلة جدا جدا وفرحتنى جدا .. لكن لسه ربنا يكرم

وحصل انى كنت المفروض هروح شغل كده كان هيبقى حاجة جامدة جدا .. لكن الحمد لله بسبب الجيش الموضوع وقف .. فالحمد لله وادعولى الاقى الشغل وانى مدخلش الجيش

المهم امبارح عبدالله كلمنى وقالى ان الشلة كلها متجمعين و هيخرجوا ..

( صلاح , ابراهيم ابوالمجد, عبدالله نبيل ) دول كانوا معايا فى ايام بليل والصياعة بتاعت بليل ومعاهم كمان عمرو اشرف وعبدالرحمن حسام

يعنى صباح الانحراف بجد والمواقف الجامدة اللى هتحصل

قلتله ماشى بس هاجى متأخر علشان كنت رايح مشوار مع ماما الاول

للاسف اتأخرت شوية ورجعت مش شايف قدامى لان الجو امبارح كان نار الله الموقدة فاتصلت بيهم وقلتلهم ييجوا عندى هنا وازبطهم .. ومرضيوش خالص ... مع ان معاهم 3 عربيات وفى كافيه فى المهندسين يعنى مش هيغلبوا انهم يجيوا فى ربع ساعة يكونوا هنا ... لكن محدش منهم راضى

وامبارح وانا بكلم عمرو اشرف قالى روح اكتب الكلام ده بقه على البلوج .. قلتله والله لاكتبه على البلوج فى الموضوع الجاى .. بس الظاهر ان عمرو ربنا بيحبه جدا .. لان دى المرة الثالثة الى اكتب فيها الموضوع واول ما اجى اتكلم على عمرو ... الجهاز يفصل لوحده ( بص يا صاحبى اعمل اى حاجة انت عايزها بس الا الجهاز .. معنديش غيره دلوقتى انا فى عرضك وطولك والعمق وكل حاجة.. سيب الجهاز فى حاله )

المهم بقه نكمل موضوع الموقع

بعد ما قابلت احمد ووصلنى لشقة واحد فى المنطقة اللى هناك .. طلعت فوق ولقيت ناس كان بعضهم اول مرة اشوفهم

استأذنكوا انى هقول رموز .. وكل رمز بيدل على شخصية معينة

طلعت فوق كان موجود الاتى :

اكس واحد وهو الشخص المدير التنفيذي للموقع

اكس اتنين وهو الشخص المسئول عن الجوانب التحريرية

اكس تلاتة وهو الشخص مدير القسم الاعلامى

اكس خمسة وهو الشخص المدير العام او المشرف العام على الموقع

ولحق بيهم اكس اربعة وهو مدير القسم الفنى والتقنى للموقع لانه جه متأخر شوية

انا طبعا كنت فاكر ان الموقع ده عبارة عن مؤسسة متكامله .. وفى ناس بتروح الشغل وفى يجي عشروميت واحد شغالين فيه ... لكن فوجئت ان اللى قاعدين دول هما اللى بيعملوا كل حاجة .. وهما اللى عاملين للموقع الصدى الواسع ليه ده .. وسبحان الله افتكرت دلوقتى قصة صاحب النقب واكيد عارفينها

كان الاجتماع ده علشان متابعة جدول التشغيل الى كان محطوط .. وتحديد الانحرافات عن الجدول .. ووضع جدول تشغيل للفترة القادمة ولو فى اقتراحات جديدة .. وبالنسبة ليا كبداية انى ادخل فى الموقع فانا اخدت مهمة كتابة سلسلة قصصية .. كل قصة منفصلة عن الاخرى وكل قصة تهدف الى ايصال معنى معين باسلوب شبابى لرواد الموقع

انتهى المعاد وانا مذبهل .. بقه الموقع ده كله قائم على الناس دول بس .. سبحان الله

بعدها بدأت علاقتى تتوطد مع العاملين فى الموقع .. والحمد لله انى عرفت ناس زيهم فعلا واستمر الشغل واستمرت اللقاءات لمتابعة الاعمال والاستمرار فى الشغل

فى هذه الفترة كان احمد السباعى زى ما قلت كانت مهمته انه يكون فريق المراسلين .. فتم اختيار لجنة فى كلية التجارة علشان تقوم بعمل المراسلة للموقع .. فاختارونى فى اللجنة دى مع ناس تانيين .. واللجنة دى كان مسئولها واحد من الكلية واشتغلت اللجنة لفترة الحمد لله عملت فيها شغل كويس .. وجه مسئول اللجنة بعد فترة وقالى يا عمر انت هتبقى مسئول اللجنة .. وانت اللى هتشتغل فيها وهتبقى مسئول عن الموضوع كله

بعدها جه z وقابلنى وسألنى عن الموقع وايه رايي فيه وكده .. انا فهمت الموضوع .. ورديت عليه وفعلا بعدها بفترة كنت قد انتقلت للعمل فى الموقع بشكل نهائى

طبعا كنت شغال مراسل للموقع فى كلية التجارة .. وكنت بنقل الاخبار من الكلية للموقع .. وقبل ما اكمل فى قصة الموقع .. فى بعض المواقف اللى حصلت واللى احب انى اعرضها يمكن فى بعضها يتعرض لاول مرة .. لكن انا زى ما قلت ان هدفى هو تدوين المواقف دى لانها هيا التاريخ واللى بتصنع التاريخ . والحاجة التانية هو اننا كاخوان اصبحنا معروفين ولا يوجد شئ نخبيه او نمنع نشره بالعكس نشره افضل بمراحل .. عامة حصلت بعض المواقف اسردها سريعا :

(1)

- فى مرة من المرات كان فى حفلة فى الكلية مع دكتورة .. الحفلة دى كان عملها عمر جمال وعبدالرحمن الريدي فى الكلية كانوا ساعتها فى سنة اولى وانا كنت فى اخر تانية .. المهم كطبيعة عملى كمراسل للموقع رحت وصورت الحفلة وكتبت عنها تقرير وحطيته فى الموقع

فوجئت تانى يوم بان عمر جمال بيوقلى الدكتورة عايزاك .. رحتلها معاه قالتلى انت الى كنت بتصور وكتبت عن الحفلة فى الموقع ؟؟ قلتلها ايوة يا دكتورة .. قالتلى طيب معلش شيل الصور والحاجات دى من الموقع .. وبلاش تحطها علشان الدنيا تمشى وميبقاش فى ضرر

اللى حصل ان قائد حرس الكلية استدعاها لمكتبه ... ووراها التقرير اللى كتبته عن الحفلة والصور اللى كانت فيه .. وقالها ان ده مينفعش وازاى تعملى حفلة وكده .. طبعا الاعتراض مكانش على الحفلة لانها كده كده بتتعمل ومحدش بيقدر يقول حاجة .. لكن المشكلة ان الموقع كتب عنها .. المهم الدكتورة كانت خايفة نوعا ما فطمنتها وفعلا شيلت الموضوع لما روحت يومها

(2)

فى بداية العام الدراسى كنت عملت زى تقرير عن بداية السنة الدراسة واحوال الطلاب .. وركزت على الانشطة الطلابية المنظمة .. زى الاتحاد والجمعية العلمية والاسر وطلاب الاخوان وطالبات الاخوان كمان .. وصورت وكل حاجة كانت تمام وبعت التقرير .. تانى يوم كنت فى الكلية وكنت بسلم على واحد صاحبى فى الجمعية العلمية او الاتحاد مش فاكر بالضبط ... فبيقولى ايه يا عم التقرير اللى اتحط على الموقع ده ؟؟

طبعا ميعرفش انى انا اللى كتبته .. قلتله ايه ماله ؟؟

قالى ابدا .. ده النهاردة الصبح لقيت الدنيا مقلوبة .. وطبعوا التقرير وعملوا منه كذا نسخة وودوها للعميد والوكيل ورائد الاتحاد ومش عارف مين ومين .. علشان يشوفوا ايه الموضوع واللى بيحصل وكده

قلتله والله مش عارف بس مفيش حاجة اكيد يعنى .. وقفلت على كده ومشيت

طبعا الواحد مكنش متخيل ان ده بيعملهم رعب كده وبالشكل ده .. لكن كان موقف ظريف

(3)

الموقع كان بيحتل اهمية كبيرة جدا فى الجامعة .. ترتيبه عالميا كان متقدم جدا جدا جدا .. بل الموقع كان سبق العديد من المواقع الاخرى اللى مجالها اوسع وبيتصرف عليها ومرتبات وحاجات كبيرة ... انا افتكر ان الموقع فى فترة من الفترة وصل ترتيبه عالميا الى 3 الالاف على مستوى العالم بحسب ترتيب اليكسا .. وده ترتيب جامد جدا .. يعنى لما يكون فى حوالى 8 مليااااااااااار موقع او يزيد .. وانت ترتيب الموقع بتاعك يكون 3 الالاف على مستوى العالم ... ده حاجة جامدة جدا .. علشان كده كان الموقع ليه صدى واسع جدا وكبير جدا ومؤثر جدا .. لدرجة ان احد الاعلاميين عمل استقصاء بين الطلبة والدكاترة على السواء على اكثر المواقع زيارة .. فصعق عندما علم انه موقع كل الطلبة !!

بل اكتر من كده .. ان من ضمن الحاجات الغريبة اللى كنت بشوفها .. ناس من فرنسا وامريكا ودول تانية كتير .. ده غير الدول العربية كلها تقريبا .. بتدخل وتتابع الموقع .. بل واحد بعت مرة بالفرنسية للموقع يطلب انه يعرف بعد المعلومات عن الماجستير والشروط وغيرها وطبعا لان الرسالة كانت بالفرنسية فتعبنا شوية لحد لما ترجمناها .. وحصل ان كلمنى احد الاخوة العراقيين كان عايز يسأل على شروط الالتحاق بكلية الحقوق وبعتناله الشروط .. بل والاجمل كمان .. ان كان فى رسائل تصل للموقع من اباء وامهات الطلاب .. اذكر ان احدى هذه الرسائل كانت من اب يبحث فيها عن نتيجة ابنه فى الابتدائى .. وظن انه سيجدها على موقع كل الطلبة !!

فى موضوع الرسائل ده كانت بتصل رسائل مضحكة ومواقف طريفة فى احيان كثيرة .. ناس بتسال عن النتيجة وناس بتسأل عن الامتحانات وناس بتدور على معلومات عن الكلية .. وكلهم بيدوروا فى موقع كل الطلبة !!

اذكر مرة كنت بعد ما حطيت النتيجة بتاعت الكلية .. بعدها بفترة طويلة من الزمن .. كنت فى سايبر بعمل حاجة فلقيت واحد جنبى فى السايبر عمال يدور على النتيجة .. ولف الموقع تقريبا حته حته بيدور فيه على النتيجة .. وراح جاب الراجل بتاع السايبر وقاله فين النتيجة .. قاله استنى .. دخل دور هو كمان عليها .. ملقاش النتيجة فقاله تلاقيهم شالوها خلاص من على الموقع .. وانا قاعد جنبهم مش قادر امسك نفسى .. ونفسى اقوله اهو النتيجة اهى بس مكانش ينفع اقوله .. فده كان دليل ان فى ناس كتيرة بتابع الموقع باستمرار حتى بتاع السايبر نفسه

كل دى كانت مواقف بتدل على اهمية الموقع ومدى تأثيره وصداه اللى حصل بعدها .. طبعا مش هتكلم على الاعلام والصحف اللى كتبت عن الموقع . ولا عن بعض وسائل الاعلام المشهورة والمعروفة والتى كانت تنقل عن موقع كل الطلبة دون ان تشير اليه .. لكن الحمد لله

فى المرة الجاية هبدأ اتكلم على بعض الحاجات اللى حصلت وبعض المواقف الظريفة والاعمال الجميلة اللى تمت .. والله المستعان

Thursday, June 21, 2007

البداية فى موقع كل الطلبة

السلام عليكم ورحمة الله وبركاته

برضه هقول نفس الكلام اللى كتبته فى الموضوع اللى فات ان بجد اللى بيحبنى يدعيلي جامد بقه .. بس المرة دى دوبل .. يعنى يضاعف الدعاء وربنا يكرم

المهم بقه نتكلم عن الموقع

فى البداية فى سنة اولى سنة 2003 انا ساعتها اصلا معرفش الانترنت

كنت عارف اه ان فى انترنت وايميلات وبتاع .. بس مكنتش بدخل ولا عامل ايميل لنفسى مثلا .. لانى كنت حاسس ان الكلام ده مش وقته دلوقتى

او مكنتش حاسس بالاستفادة بتاعته .. طبعا كمان كان دايل اب ... فكانت العملية صعبة والسرعة ولا السلحفاه

كنت فى الكلية عند المسجد .. وقابلت احمد السباعى بتاع مدونة طريق الحياة

المهم كان هو عرف حاجة فبسأله عرفت منين .. قالى فلان بعتلى على الميل

قلتله انت عندك ميل وبتستخدمه ؟؟

فوجئت برده قالى اه طبعا .. انا كل حاجة بخلصها بالميلات

من ساعتها قلت واشمعنى انا يعنى .. هو احنا ولاد البطة السودا

روحت يومها جبت اخويا وخليته فتح النت وعملى ايميل ( اول ايميل فى حياتى ومازال شغل حتى الان وهو الميل الرسمى بتاعى )

المهم

عملت الميل وفعلا كان حاجة كويسة .. بعدها بدأت ادخل على الانترنت كلما سمحت الظروف وحسيت انى مهم شوية :D

بعدها كنت فى المدرج فى الف برضه فكان فى ورق دعاية للموقع اتوزع فى المدرج كان جابه احمد علام

فانا اخدته وقالى ان ده الموقع بتاعنا بتاع الجامعة .. قلتله ماشى هبقى اشوفه

فتحت الموقع .. شفت فيه حبة مواضيع كانت كويسة

مكنتش اعرف اصلا ايه المنتدى ده ولا بيعمل ايه .. يلا اهو التعليم مش ببلاش

بعدها بفترة فهمت يعنى ايه المنتدى وسجلت فيه عضوية متأخرة .. وبدأت اشارك فعلا فى المنتدى

فى الفترة دى بابا كان اشترك فى الدى اس ال

اساسا بابا بحكم شغله بره فى الجامعة كان دايما بيدخل على الانترنت .. واساسا بابا كان عامل ايميل من ايام ما كان ابو جهل بيعمل شات بالحجارة والقزاز ... فكان الانترنت مهم بالنسبة لبابا ... علشان كده اول ما نزل الدى اس ال اشتركنا فيه على طول

فطبعا انا كنت قاعد على النت بشوف بقه ... ايه بقه الانترنت ده وبيعمل ايه وكده

ومن ضمن المواقع الى كنت بدخل عليها كان موقع كل الطلبة

هرجع بفلاش باك لورا شوية

فى الفترة اللى عملت فيها الميل وبدأت ادخل على الانترنت .. كان فى ناس تانية بتقعد تفكر فى الموقع وتعمل ايه وازاى تطلعه للنور

انا هستأذنكوا ان اسم الشخص صاحب الفكرة واللى سعى وراها لحد لما نفذها مش هذكر اسمه

لكنه فعلا كان بيحلم بيه وكان نفسه يعمل موقع يعبر عن طلاب جامعة القاهرة .. بدأ فعلا وعمل اجتماع مع يوسف بدر المبرمج الكبير ( كتب كتابه قريب .. مبروك يا ريسنا يا منفضلنا على طول ) و مع طارق ابوزياد واحمد الجعلى

وحطوا التصور بتاع الموقع .. على دكه بتاعت محطة اتوبيس

وفعلا بدأوا ينفذوا الفكرة واحدة واحدة .. لحد لما طلعت للنور والموقع اشتغل وبداو يوزعوا الدعاية بتاعته

لقاء احمد السباعى

احمد السباعى كان شايل حاجة فى الكلية .. ولان ليه تعاملات على الانترنت كتيرة ساعتها ( وكان قليل جدا اللى يعرفوا الانترنت وبيفهموا فيه ) فكان قرار انتقال احمد السباعى لفريق تشغيل الموقع

احمد كان ساعتها ماسك فريق مراسلين الموقع .. من كل كلية مراسل فكانت مهمته يكون الفريق ده ويبحث عن الناس ويبدأ الفريق ويشتغل

فاحمد لقانى لاجئ على الانترنت وبقعد كل يوم .. فكان عايزنى اروح اشتغل فى الموقع

فهو جه فى يوم وكان عايز يقابلنى .. انا كنت عايز اخد منه حاجات برضه .. فقالى هسألك سؤال يا عمر بس مش اقصد منه اى حاجة .. يعنى السؤال عام ملهوش اى دلالة
انت ايه رأيك فى الموقع ؟؟

طبعا انا فهمت انه بيمهد لانتقالى للموقع .. بس كان الموضوع لسه سيكرت
فانا عملت فيها بقول رايي وقلتله اه كويس بس المنتدى يعمل كذا وكذا وبتاع .. اديته نصايح فى شكل ومضمون الموقع .. بس وصلتله معنى انى مستعد اشتغل فيه وعندى الاستعداد كمان واحمد فهم الرسالة

بعدها باسبوع تقريبا .. احمد قالى انا عايز ابقى اقابلك فى الحتة الفلانية الساعة كذا هنروح لواحد مع بعض

فانا كنت فاكرها حاجة عادية قلتله ماشى مش مشكلة

طبعا مكانش حد فى الكلية والناس اللى انا شايل الشغل معاهم عارف اى حاجة عن الموضوع .. كان بيمشى من تحت لتحت

المهم رحت المعاد كان فى شهاب فى المهندسين .. طبعا انا مكنتش عارف البيت فين .. وفضلت اصل باحمد يجي ساعة ومش بيرد لان الموبايل بعيد ومش سامعه .. كنت خلاص هروح .. لقيته رد بعد ساعة ونص تقريبا

المهم بعد الاعتذارات والاسف وانا برضه عيشت الدور شوية عليه حقى بقه .. جالى واخدنى للبيت

كان مين بقه هناك .. وكان ايه الموضوع

استنونا المرة الجاية

ويلا السلام عليكم ورحمة الله

Monday, June 18, 2007

تمهيد لتدوين تاريخ موقع كل الطلبة

السلام عليكم ورحمة الله وبركاته

اخيرا الواحد قعد فى البيت حبة يستريح

انا من ساعة ما خلصت الامتحانات ومقعدتش فى البيت الا قليل جدا

وياريت شغل وبتاع .. لا لسه دعواتكوا علشان ربنا يكرم ويرزقنا بحاجة حلوة قريب .. قادر يا كريم

المهم انا حاسس كأن عقلى وقف .. مبقيتش قادر افكر .. يمكن من الانشغال الشديد فى الفترة اللى فاتت من بعد ما خلصت الامتحانات

عامة خير ربنا يكرم

انا دلوقتى عايز اكتب عن حاجة مهمة جدا وفترة انا شايف ان التدوين فيها هدفه ان الفترة دى ممكن تضيع لو مكتبتهاش

لان اللى عاصروها وعاشوها قليلين .. فانا لازم اكتب عنها

فى البداية الفترة دى هى فترة انشاء وظهور ونمو موقع كل الطلبة

الحقيقة ان الموقع لفترة طويلة وكبيرة كان طى الكتمان .. يعنى هو موقع على النت وخلاص

ملهوش اتجاه واضح .. ومحدش عارفله مله .. ومحدش كان راضى يتبناه

وده عمل مشاكل للامن فى الاول .. كانوا عايزين يعرفوا مين اللى بيحرك الموقع ده وحقق النجاح ده

لكن طبعا عرفوا مين بعدها وبعد ما تم الاعلان صراحة عن ان الموقع تابع لطلاب الاخوان المسلمين فى جامعة القاهرة

كان ليا الشرف انى احضر بداية انطلاق الموقع .. وكان ليا الشرف انى كنت فى فترة من الفترات احد القائمين على الموقع .. والحمد لله

اللى هكتبه فى خلال المواضيع الجاية كلها حسب ما ربنا يسهلها .. ده تاريخ الموقع .. تاريخ انا عشته . وحاجات انا شفتها بعيني وعاصرتها .. يمكن مفيش حد عارف عنها اى حاجة خالص .. ولا حد حس بيها او بوجودها .. لكنها مواقف وحاجات كبيرة نكون من الغباء بمكان ان لم ندونها ونحفظها للتاريخ

ان شاء الله هيبقى الموضوع مقسم على عدة مراحل وربنا يكرم

اهم حاجة دلوقتى تدعولى جاااااااامد جدا ان ربنا يحققلى اللى فى بالى ان شاء الله .. وبجد اللى بيحبنى يدعيلي كتير جدا جدا جدا بكده

طبعا مش هقولكوا دلوقتى .. واكيد برضه مش جواز علشان الناس فكرها ميروحش لبعيد ( يا رب ارزقنا )

والسلام عليكم ورحمة الله وبركاته

( بالمناسبة .. قسم ادارة الاعمال هيعمل حفلة فى الساقية ان شاء الله يوم الاربع بعد بكرة يعنى الساعة 6 مش عارف فى قاعة ايه .. بس عامة اكبر قاعة والعنوان ميتوهش يعنى مش محطة قطار رمسيس هيا لو حد يحب يجي يعنى )


Monday, June 11, 2007

باى باى جامعة

السلام عليكم ورحمة الله

"واحبب من شئت .. فانك مفارقه"

صدق رسول الله صلى الله عليه وسلم
( عليه الصلاة والسلام )

سبحان الله .. سنة من السنن الكونية ان لك بداية نهاية

مفيش حاجة تدوم ابدا - الا وجه ربى له الدوام سبحانه وتعالى -

كل حاجة كان ليها بداية .. لازم يكون ليها نهاية

لما قعدت افكر شوية فى الموضوع ده .. لقيت ان الانسان مش هيحس بطعم ولا بلذة اى حاجة بيعملها اذا مكانش ليها نهاية

لو كان الانسان مخلد فى الارض .. مش هيموت ابدا .. هيحسس بملل فظيع وهيتمنى لو يموت
لانه مش حاسس ان فى نهاية للى بيعمله .. فمهما عمل مفيش نهاية

طيب ليه بقول الكلام ده دلوقتى ؟؟

علشان باقى بالضبط .. 24 ساعة واكون خريج

باقى 24 ساعة وانهى مرحلة من اهم مراحل حياتى واللى بسببها بدأت التدوين


24 ساعة بس و الدنيا هتتغير بشكل كبير جدا

24 ساعة .. وهكون خلصت امتحان المادة الـ 40 فى الكلية

24 ساعة بس وهودع احلى واجمل دفعة فى احلى واجمل كلية

24 ساعة وهودع مدرجات الكلية والكراسى اللى كنا بنأجرها .. وهودع عمال المدرجات اللى كنت بشوف ابتسامتهم الجميلة كل يوم الصبح قبل ما ندخل نحضر ..
24 ساعة وهنودع الدكاترة والمعيدين... وهنودع الموظفين اللى كانوا بيطلعوا عينينا فى كل حاجة علشان ميخلوش فى نفسنا حاجة خالص

باقى 24 ساعة وهدخل على مرحلة تانية فى حياتى .. مختلفة خالص عن المراحل اللى فاتت فى كل حاجة فيها
مرحلة الزواج والشغل والمسئوليات الكبيرة

الحقيقة ان شريط الذكريات مر عليا سريعا
لسه فاكر اول يوم دخلت فيه الجامعة .. كنت رايح الجامعة انا وعماد حبيبي .. وكان عندنا محاضرات الساعة 12 الظهر ..وكنا فى الجامعة من الساعة 8 ونص الصبح
فضلنا نلف شوية حوالين مدرج أ ,ب وبعدها دخلنا حضرنا محاضرة للدفعة اللى قبلينا ... حضرنا معاهم ( طبعا اول ما دخلنا المدرج بعد المحاضرة الاولى الواحد كان المفروض يقول دعاء دخول السوق )
وبعدها حضرنا محاضرة بتاعتنا .. كنت قاعد فى مدرج أ فى اول بنج قدام خالص .. كنت قاعد انا وعلى يميني عماد
وفاكر كمان ان مكانش معانا اى حاجة نكتب فيها .. ودخل اول دكتور اشوفه فى حياتى .. كان الدكتور تحسين الشاذلى ( تيييييييييييييييييييييييييت! حذفت من قبل الرقابة )

يااااااااااااااااااااااااااااااااااه .. الواحد مش مصدق انى مش هروح الكلية تانى واقعد فى مدرج أ تانى

المدرج اللى كنت فيه اول يوم فى الكلية .. واخر يوم فى الكلية
( مدرج أ ده بحبه جدا هو والعمال بتوعه )

مش هروح اصلى فى مسجد تجارة اللى كنت بصلى فيه على طول وكنت اتمنى انه يركبوله تكييف .. ولما ركبوه كنت اتمنى انهم يشغلوه .. ولما شغلوه كنت اتمنى انهم يخلوه شغال 10 دقايق بتوع الصلاة بس
مش هشوف عم عبدالفتاح .. يااااااااه الراجل ده غلبان قوى يا جماعة وبيحبنا جدا .. ومكانش بيرفضلنا طلب وبيفضل يدعيلنا ويدعى على امن الدولة ويمكن هو مش عارف هما مين او بيعملوا ايه .. بس هو كان بيدعي عليهم علشان بيضايقونا وخلاص .. واحيانا كان بيعمل حاجات المفروض ميعملهاش بس علشاننا .. على الرغم من بساطته وابتسامته الجميلة البريئة
كان بيطلعلنا الحصير من الجامع علشان نعمل حفلة او لو فى حاجة كبيرة بنعملها .. كان بيخلينا نشيل حاجاتنا عنده علشان متتاخدش بليل .. شاف مرة صورتى بتاعت الانتخابات على الارض .. فشالها وادهالى وقالى انا شايلهالك علشان اديهالك من زمان

يااااااااااااااااااااااااه
الواحد دلوقتى افتكر شريط الذكريات الجميل بتاع الدراسة
من اول الابتدائية .. لما كنت بروح المدرسة وانا بعيط .. واول ما ادخل المدرسة خلاص اديها لعب وفرفشة
ومن سنة لسنة بالذكريات بتاعتها
من اول مسرح المدرسة والاناشيد اللى كنا بنقولها فيه .. لحد المسرحيات اللى عملناها .. وبالذات مسرحية ابرهه ( على فكرة انا كنت بمثل دور ابرهه .. عرفتوا بقه معاملة ابرهة للفيلة كانت عاملة ازاى.. عمرى ما هنساها علشان ساعتها عملولى ماسك .. مرضيش يطلع وكان لازق لزقة سودا)
لمدرس الرياضيات اللى كان الموت اسهل من حصة الضرب بتاعته ( مع ان اسمه عبدالرؤوف .. لكن نقول ايه بقه )
لحد لما دخلت المنهج المصري وبقيت اذاكر لوحدى فى البيت ومع بابا

ولما كنا بنروح المدرسة بتاعت المناهج المصرية .. كانت تحصل مشكلة وتتقفل المدرسة ( القانون بيقول ان ممنوع فتح اى مدرسة تدرس مناهج عربية فى دولة عربية )

{ ولسه فاكر المدرس الى كان بيدينا حصة الدين وحاجة تانية .. فاكر لما مرة حصل ان الجوازات فى السعودية ( جهاز امنى زى امن الدولة هنا .. بس فرق المستويات والمعاملة طبعا لصالحهم 70 / صفر )
المهم جه فجأة على المدرسة علشان يقفلها ويطبق القانون .. فكانوا بيقبضوا على المدرسين ويسيبوا الطلبة .. فمرة قبضوا على المدرس بتاع الدين ده .. وباقى المدرسين عرفوا يهربوا ( كانوا قليلين ساعتها )
واحنا كنا بنحبه جدا جدا جدا ... وكان اقرب المدرسين للفصل بتاعنا كله بيحبه .. فرحنا جمعنا نفسنا .. حوالى 8 اتجمعنا .. واتفقنا اننا نهرب الاستاذ من العربية اللى حاطينه فيها

اتفقنا ان واحد هيطلعله بكوباية ميه ويقوله على اللى هنعمله .. وواحد هيقفل باب المدرسة على الضباط اللى جوه .. وواحد هيزق الضابط اللى على باب العربية ويثبته لحد لما المدرس يمشى من المكان وناس هيبقوا مع المدرس لحد لما يركبوه تاكسى ويخلع من الحتة .. ورحنا فعلا علشان نعمل الخطة دى

فعلا طلع واحد زميلنا وقال للمدرس على اللى هنعمله وانه يستعد علشان يطلع ويجري .. واول ما بدأت ساعة الصفر .. وبدأنا ننفذ وفعلا كانت الدنيا ماشية زى الفل والواد قفل باب المدرسة .. وواحد تانى مسك الضابط اللى على العربية وثبته ووقعه على الارض .. والمدرس طلع يجري .. بس علشان مفيش جريمة بتبقى كاملة ( على رأي كونان ) كان فى ضباط تانيين جايين من الاتجاه التانى على ما افتكر .. فلما شافوه بيجري طلعوا وراه وجابوه ومسكوه تانى ورجعوه العربية تانى .. ولسه فاكر لما الضابط بط على المدرس ووقعه على الارض .. جه واد كان بسم الله ما شاء الله .. جاى جرى وراح نط فى الهوا وبرجه خبط الضابط ووقعه من على المدرس ولا كأنه بيلعب كونغ فو .. عيال بقه ..
بس مسكوه برضه وساعتها بقه كانوا ناصحين ... قفلوا باب العربية .. وحطوا على العربية اتنين او تلاتة .. عدد يعنى مش فاكر ومشونا من المدرسة اصلا اياااااااااام }


ولحد الثانوية لما جيت مصر وكنت بروح المدرسة بالمطوة ( يا جماعة محدش يفهم غلط .. مرحلة وعدت انا كويس والله ومفتحتهاش على حد الحمد لله )
وايام ما كنا بنروح ننط من فوق سور المدرسة .. وايام ما كنا بنتحدى المدرسين بالذات بتاع الانجليزي معرفش ليه .. ايام ما كنا انا اللى بمسك الغياب بتاع الفصل وطبعا الفصل كله حضور عدا كام واحد كده علشان ضمان النزاهه ( ده كان زمان يا جدعان .. الله يرحم بقه )

ولحد لما جت مرحلة الجامعة .. والحمد لله ان مكانش فيها الحمد لله اى حاجة غلط او مش تمام
بمظاهراتها ومؤتمراتها وندواتها وانشطتها المختلفة.. والضرب يوم الاربع .. مرورا باول يوم طلعت اقرا فيه قرآن وركبى اللى كانت سايبه ساعتها .. واول يوم طلعت اقول فيه كلمة قدام المدرج .. ياااااااااااااه كل ده انتهى بسرعة جدا

انا لسه فاكر واحد من اقرب اصحابى فى المدرسة .. كنا بنتكلم عن الجامعة واللى بيحصل فيها واننا هنروح برجلينا بقه وبتاع
فقالى انت او دخلت الجامعة وممشيتش مع بنات .. يبقى انت فيك حاجة غلط
دى كانت فكرته عن الجامعة .. انك تمشى مع بنات وتصاحب بنات كأنك بتشرب ميه بالضبط
الاتنين لازم تعملهم علشان تعيش والحياة تستمر معاك ومتبيعكش على اول ناصية

فاكر ساعتها انى قلتله لأ .. مش هيحصل وهبقى اجى وافكرك واقولك
بس مخبيش عليكوا انى خفت جدا ساعتها ... طبعا خوف طبيعي .. يعنى لو الكلام ده كان صح .. لو فعلا مقدرتش واستحملت السنين دى
بس الحمد لله .. الواحد غير فكرته خالص عن الجامعة وعن الناس اللى فيها .. بس برضه فيها ناس محتاجين قنبلة انشطارية عليهم

دلوقتى فعلا .. حسيت بمعنى كلمة قالها اسلام سيف كان هو فى رابعة فى اخر ايامه برضه وانا كنت فى اولى
قال انا بحمد ربنا سبحانه وتعالى انى ممشيتش مع بنت فى الجامعة خالص

طبعا ساعتها كنت مذبهل .. يا عم انت خريج .. قول اى حاجة تانية .. قول مشيلتش اى مادة .. معيتدش سنة لكن مش تقول بنات
دلوقتى حسيت بمعنى كلمته وان فعلا عنده حق

يا سبحان الله .. ذكريات عدت بسرعة .. بس سنة ربنا فى الكون
واحبب من شئت فانك مفارقه

Thursday, June 7, 2007

يوم ما رحت احج . الجزء التاااااانى حصريا

السلام عليكم ورحمة الله وبركاته

هيييييييييييييه .. دنيا

مش عارف انا ايه الامتحانات القنابل النووية دى

يلا مش مهم .. ربنا يكرم اخر سنة بقه

المهم بقه اكملكوا احلى ايام حياتى

بعد ما السواق السوري لف الاوتوبيس .. رحنا على مزدلفة

هناك مفيش خيم ولا حاجة .. اللى يلحق يحجز

رحنا الحمد لله وحجزنا مكان كويس فى مزدلفة

نزلنا ... ورحنا المكان وزبطناه .. مكان للسيدات ومكان للرجالة

المهم طبعا راجعين بلبس الاحرام ومن يوم عرفة واليوم كان صعب والناس كلها

اول ما نزلوا المكان كلهم بقوا جثث بشرية

الساعة ساعتها كانت حوالى 1 بليل

طبعا الناس لما نامت .. كان لازم يبقى فى ناس للحراسة

قعدوا يدوروا .. ملقوش ناس صاحية غير انا وراجل تانى كبير شوية

قالولنا يلا .. ربنا معاكوا .. والباقى ناموا

كنت انا والراجل ده .. فضلنا نتكلم شوية ونبص على الناس اللى رايحة واللى جاية شوية

بعدها لقيته فصل .. ونام جنبهم

المهم فضلت لوحدى فى الحراسة على الناس لحد الفجر

طبعا انا كنت بنام فى صلاة الفجر فانا اساسا مش عارف انا صليت ولا لأ اصلا

المهم طلعنا من مزدلفة على الجمرات علشان نرمى الجمرة الكبرى .. طبعا طول الطريق انا واخدها ايه .. لو فجرت قنبلة جنبى ولا هحس اصلا

لما وصلنا كانت الساعة 9 الصبح لان الطريق زحمة موت
رحنا الجمرات .. بابا لما شافنى كده وشاف الزحمة قالى لا .. انا هرمى عنك .. يابابا يهديك يرضيك قالى ابدا .. هات السبع حصوات ا

وفعلا رمى عنى فى اول يوم بس
بعدها رحنا على المخيم علشان نحلق

وكانت الناس اللى هتدبح بحت خلاص .. فالاكل المفروض انه بيجهز لاننا ميتين اساسا خلقة

المهم الاكل اللى كان بيعمله واحد بحبه جدا اسمه عمو احمد الصباحى .. المهم وهو اساسا بسم الله ما شاء الله فى كل حاجة
بس فى المرة دى وهو بيعمل الاكل .. ضرب منه ومتعملش كويس
بس برضه اكلنا وكنا مبسوطين خالص

بعدها طلعنا على منى بليل علشان المفروض نبات هناك الايام كلها

جينا على العصر كده قالك عايزين ناس تروح الاول تحجز المكان وتجهزه لحد لما نيجي
طيب مين موجود ؟؟

يلا يا عمر وفلان وفلان وفلان .. جابوا الشباب كلهم وشحنوهم فى اتوبيس على هناك
رحنا فضلنا نلف لحد لما لقينا مكان كويس بس كان محتاج تنظيف للصبح

نظفنا المكان كويس وفرشناه .. خلصنا على العشا .. احنا خلصنا من هنا وهما وصلوا من هنا
بعد ما قعدوا والدنيا اتزبطت .. لقيت المسئول عن الحج بيقول لنا يلا يا شباب .. عليكوا الحراسة

وهما راحوا اللى عايز ينام واللى عايز يقرا قرآن واحنا مسكنا الحراسة تانى

طبعا فضلنا لحد الساعة 3 بليل فى الحراسة .. وقلنا ماشى مفيش مشاكل

واحنا راجعين بقه .. انا فعلا مكنتش شايف قدامى ... يومين مفيش نوم تقريبا .. وعيني مفيش خالص

المهم طلعت الاتوبيس اساسا بخبط فى الناس ... ومفيش مكان كمان للاسف

المهم واحد شاف حالتى تصعب على الكافر .. فقام وقالى اقعد ريح انت شوية

طبعا دى المرة الوحيدة الى مرفضتش طلب الراجل بصراحة .. وتقريبا نسيت اقوله شكرا .. وانا قعدت وكانت راسى جابت ورا ونمت

المهم .. فجأة .. صحيت .. ببص حواليا .. الاتوبيس فاااااااااااضى ..

ومفيش مخلوق فى الاتوبيس .. وببص فى الساعة .. لقيتها التاسعة صباحا !!

يانهار ابيض .. ده انا لسه بقول الساعة 3

اللى حصل .. ان الاتوبيس وصل الفيلا ..

والناس بيصحونى علشان اقوم انزل .. وانا ايه .. مفيش

قاطع ميه ونور وكهربا

لدرجة ان الراجل اللى قاعد جنبى جنب الشباك فى الاتوبيس .. عدى منى ونزل وسابونى لما لقونى ان حالتى ميئوس منها

والسواق نفسه .. لما طلع يصحيني .. ومعرفش ساب الاتوبيس مفتوح علشان لما اصحى براحتى ابقى انزل بقه

المهم انا اصلا كنت نايم مش واخد فى بالى .. وبابا كان جوه الفيلا بيدور عليا

فضل يدور عليا بعد الفجر .. ولما ملاقانيش فى الفيلا

قرر انه يروح يقدم بلاغ ويشوف كشوفات الناس اللى تايهين

بابا اول ما قرر كده ... انا نايم فى الانوبيس .. حسيت كأن واحد جاب شاكوش وديب على دماغى

صحيت فجأة وحسيت كأنى واخد بشومة على راسى ..

نزلت من الاتوبيس مش قادر وراسى مصدعة .. ورحت الفيلا لقيت بابا خارج

قالى انت كنت فين ان شاء الله ( كان المفروض يقولى جايلي وش الفجر يا صايع ؟)
المهم قلتله حصل كذا كذا .. قالى طيب ماشى . قلتله انا رايح انام .. ودخلت اديتها ولا فى الدماغ

برضه من المواقف الجامدة .. فى اليوم ده بتاع النوم ده

عمو احمد الصباحى عمل اكل المرة دى جامد جدا .. بسم الله ما شاء الله زبطه صح


المهم .. ساعة الاكل مين اللى بيوزع ؟؟

احنا الشباب .. فطبعا بتطلع عينا لحد لما نخلص توزيع واول ما نيجي نقعد علشان ناكل يقولك هاتوا تانى او يلا احنا خلصنا

ففى اليوم ده .. واحنا قاعدين فى الجنينه ومن فوق مفروشة بمشمع علشان الشمس

اول ما حطينا الاكل .. الدنيا غيمت ومطرت .. ومطرة ايه .. جامدة جدا ما شاء الله

احنا الشباب ولا كأن فى حاجة حوالينا ..

والله احنا اول ما حطينا الاكل لينا احنا الشباب .. المطرة اساسا نزلت على المشمع وتقلته جامد ووقعت على التكييفات الموجودة . والناس بدأت تقوم جرى علشان تلحق حاجاتها من المية .. واللى الميه وقعت على الاكل وتلحق التكييف قبل ما يولع فيهم

واحنا الشباب .. قاعدين .. والله محدش مننا قام من مكانه ولا حتى فكر انه يقوم .. قاعدين بناكل وبكل برود .. عمالين نتكلم ولا كأن فى حاجة والناس تيجي تعدى واللى يخبط فينا واللى ينط من فوق راسنا وعاااااادى

مكناش قادرين اصلا .. واقعين والفطار اى كلام .. وكمان ساعة الغدا .. قلنا اياكش تولع

والله محنا قايمين من مكانا الا لما نخلص اكل

لا وكمان كان فى ناس قاموا علشان يلحقوا المكان ويلموا الحاجة .. رحنا واخدين الاكل بتاعهم وضربناه عادى خالص

وفعلا بعد ما خلصنا اكل بقه قمنا نشوف الخساير .. بس بعد ما الفاس وقع فى الراس وتكييف ضرب والدنيا باظت


ايييييييييييييه .. ايام

طبعا احنا طول السكة والسواق السوري الجامد ده معانا .. يانهار . .. والله كنا بنضحك ضحك معاه .. فظيع فظيع

بجد كان راجل جامد موت

المهم بقه فاكر اننا رحنا للطواف .. وطفنا من الدور التانى .. كان اصعب طواف عملته فى حياتى .. اولا انت ماشى فى موجه بشر متعرفش انك تمشى براحتك حتى ... رجلك على رجلهم متقدرش تعمل حاجة غير كده .. ومن الدور التانى كمان فالمسافة اكبر اصلا .. حاجة كانت صعبة موت

بس الحمد لله الدنيا مشيت تمام

يلا الحمد لله .. كل ما افتكر الايام دى ابقى نفسى اروح اعمل عمرة او احج تانى

بجد بجد احلى ايام حياتى .. مفيش ايام احلى منها فعلا

ربنا يرزقنا بحجة او عمرة

يا رب