Tuesday, July 31, 2007

مش عارف اكتب عن ايه

السلام عليكم ورحمة الله وبركاته

الواحد مش عارف .. الدنيا اتلخبطت بشكل سريع ومحتاجه تترتب من الاول

كنت الفترة اللى فاتت فى حالة كآبه واحباط شديدة جدا .. بس الواحد كان بيحاول انه يحول الاحباط ده الى نقطة انطلاقة قوية باذن الله

الواحد دايما فى حياته .. لازم يقف مع نفسه .. يسأل نفسه

انا رايح فين ؟؟ انا عايز اروح فين اصلا ؟؟
هل اللى بعمله ده هيوديني ؟؟
طيب ايه العقبات اللى قدامى وازاى اتأكد ان الطريق ده صح ؟؟

انا كنت تعبان من الكلام ده نفسيا .. وبدأت تانى ارتب الاوراق واجمع الدنيا تانى

الحمد لله ان الدنيا بدأت تتضح وتتصلح تانى

لكن .. اعتقد ان ده مهم جدا فى حياة اى واحد

العمر مرة واحدة .. ومفيش حاجة فى الدنيا هتقدر ترجع بيها عمرك تانى

وانت لازم تعمل حاجة فى حياتك .. يعنى مينفعش انك تيجي الدنيا وتطلع منها وانت زى ما انت

او انت معملتش حاجة

الدكتور طارق السويدان فى الندوة اياها دى .. قال ان النهضة للامة .. لا تقوم على الموظفين اللى بيأدو اعمالهم بشكل عادى

صحيح هما بيعملوا وبيأدوا اعمالهم .. بس فى الاخر هو كمثل غيره وكمثل سابقه ولاحقه

يبقى ايه الاضافة اللى عملها

دول مينفعش النهضة تقوم عليهم .. النهضة لا تقوم الا على ناس بتجدد وتبتكر وتسيب بصمتها فى كل مكان
وعلى رأي الشاعر

وكن رجلا ان اتوا بعده ... يقولون مر وهذا الاثر

ولذلك فان التخصص والتميز حاجتين مهمين جدا

والموضوع ده تاعبنى نفسيا جدا من فترة وزاد قوى الفترة اللى فاتت دى

انا بعمل ايه ؟
فين الاضافة بتاعتى والبصمة بتاعتى ؟؟
هل انا ممكن ابقى فى يوم من الايام زى اى موظف او اى شخص عادى فى الدنيا ؟؟
استحالة طبعا ولا يمكن يحصل

(1)

وكنت كل ما ابص فى وجوه الناس البسيطة .. بسأل نفسى .. هل هبقى زى ده ؟؟
واحيانا لما ابص فى وجوه الناس اقول الناس دى عايشة ازاى كده ؟؟ مش من الناحية المادية ابدا حتى لو كان فقير
بس بقول الناس دى اهدافها ايه حياتها؟؟ هيا مخلوقة ليه ؟؟
يعنى الاقى ناس بسيطة جدا .. ويادوب ميعرفش غير انه عايز يشتغل علشان يجيب لقمة العيش ليه ولاولاده .. ولو ربنا كرمه كمان وعرف ان فى خالق اسمه الله ولازم نعبده يبقى كده ملك الدنيا باللى فيها
بس للاسف ده اخر امانيه .. دى نهاية طريقه
يعنى لو هو بقه كويس وغنى وبيعبد ربنا كويس ومش خايف على مستقبل اولاده .. مفيش حاجة تانية فى دماغه او تفكيره هيعملها
وللاسف اولاده برضه هيطلعوا كده واولاد اولاده هيطلعوا كده
وبعدين ؟؟
لحد امتى الدنيا هتفضل ماشية بالشكل ده ؟؟
استحالة تكون دى الحياة .. ملعونة الحياة لو كانت كده
بدون تحدي .. بدون اهداف .. بدون امال وطموحات


انا بفضل اسأل نفسى واقول لنفسى
انا مش واحد عادى .. واستحالة اكون واحد عادى جه وخرج من الدنيا ولا عمل حاجة
انا مش ممكن اكون شخص عادى ابدا كل همي فى الدنيا اجيب فلوس اكل وبس
طيب انا ايه اللى اقدر اعمله ؟؟
وازاى اسيب بصمتى واعمل اضافة فيه ؟؟

حاجات كتيرة كانت فى دماغى وكانت راسى هتولع

لدرجة انى كنت بطلع امشى لوحدى او مع حد اتكلم معاه
ونمشى مسافات طويلة جدا
وكل تفكيري فى الموضوع ده بس
مش عارف حد حاسس بكده .. ولا شايفين ان الموضوع عادى وان ده توتر عصبى بس

(2)

برضه بستغرب قوى من الناس الملتزمة

تلاقى كل واحد منهم برضه همه نفس هموم الناس العادية
مفيش اضافة
ويوم ما يتكلم عن همومه او احلامه تلاقيه بيتكلم على حاجات كبيرة جدا واهدافه وغايات سامية
ويقولك بحلم لو عاد الاسلام يحكم من تانى وبحلم وبحلم وبحلم
لكن للاسف تلاقى ان طموحاته واهدافه الشخصية ليست بذاك القدر من السمو
وتلاقى ان تصرفاته لا تدل الا على انه شخص عادى جدا زى اى موظف

طبعا الا من رحم ربى وقليل ما هم

لما اسمع واحد بيدعي ويقول .. اللهم عليك باليهود
فى نفسى ببقى مستغرب
ازاى نبقى احنا قاعدين فى مكانا ومش بنعمل حاجة بل بنساهم فى تأخر الدولة وفى تخلفها
وناكل ملئ بطوننا ونضحك ملئ افواهنا ونقول يا رب عليك باليهود
كأنه لا غالب لليهود الا الله ... او كأننا ادينا ادوارنا خلاص وكل واحد اتقن عمله وتميز فيه وبنينا المشاريع النهضوية والحمد لله اقتصادنا بقه فل الفل والشباب مش لاقى وقت علشان يعاكس ويتسكع فى كايرو مول وسيتي ستارز والاشكال الضالة اللى بنشوفها .. ونروح ندعى ونقول اللهم عليك باليهود ؟؟

او لما واحد يدعى ويقول اللهم انصر الاسلام واعز المسلمين .. ازاااااااااااى ؟؟
هو اللهم انصر الاسلام بدون المسلمين ؟؟ ولا اللهم اعز المسلمين وهما واقفين مكانهم ؟؟

زى الدكتور راغب السرجانى مرة كان بيحكى ان فى واحد من الشباب جاله وفضل يشكيله حال الامة ومشاكلها وانه خلاص مش قادر يستحمل هموم الامة .. وفى الفجر لم يجده بين المصلين .. فسأل عنه وقاله يعنى افتقدناك فى الفجر
فقاله معلش يا دكتور اصلى مش بعرف اصحى .. فبصليها لما اصحى وخلاص
يقول الدكتور راغب انه صعق .. ازاى تكون الانفصام فى الشخصية ده
ازاى تكون نفسك تشوف العز وانت اكبر مكسل ومتقاعد

ازاى نوصل للدرجة دى من التفكير .. ان الامور هتتصلح واحنا كل يوم بنعمل نفس اللى عملناه امبارح وقبله وقبل قبله ؟؟
ازاى نبقى نفسنا نشوف بلادنا قائدة العالم ونشوف اسلامنا يغطى العالم بالعدل والرحمة .. واحنا نصلى وندعى " اللهم انصر الاسلام " ونطلع نهرج وناكل ونشرب ونسب الدين كمان ونعاكس .. والشباب يتسكع والحياة تبقى بالنسبة لينا عادية خالص من غير اى تغيير

ازاى نعمل نهضة بالمستوى المتدنى من التفكير بالشكل ده ؟؟

وعلى فكرة .. حتى الناس اللى بتفكر بمستوى عالى
للاسف عليهم علامات استفهام كبيرة جدا
تلاقى واحد تفكيره عالى جدا وممكن يكون شاب صغير وعنده طموحات فى الشغل غير طبيعية .. بس لما تسأله وبعدين
وصلت وبقيت رئيس مجلس الادارة فى الشركة .. انت بتعمل كده ليه وايه اللى يخليك تعمل كده ؟؟
يقولك معرفش بس انا عايز ابقى كده وهو فعليا بيحب الشغل لكن بيشتغل من اجل الشغل
معندهوش حاجة كبيرة بيسعى ليها وبيحاول يكون جزء من تحقيقها

ااااااااااااااااااااااااه يا راسى

الدكتور طارق كان قال حاجة
قال ان احنا مش عايزين كل الشباب دول يبقوا كويسين
والنهضة مش عايزاهم كلهم علشان النهضة تتم
لكن احنا عايزين فقط 2.5 % فقط من الشباب ( النسبة دى مثبته اداريا .. بس كنت عرفت انها 5 - 7 % فقط تكفى لاحداث التغير بمعنى لو عندك 100 واحد .. كفاية يكون 7 بيتحركوا وهتلاقى الباقيين زى القطيع وراهم ) .. بس شباب بمواصفات خاصة
شباب فعلا عنده هم وحلم ورؤية .. شباب فعلا قيادي .. شباب عنده نظرة واسعة وسعة افق .. شباب عنده غايات اسمى وعنده همة عالية

والكلام ده فعلا صحيح

لو جينا نشوف الرسول صلى الله عليه وسلم لما راح حجة الوداع .. كان بيحج معاه 104 الالاف مسلم ومسلمة
ده غير اللى مجوش الحج واللى كانوا بيجاهدوا .. يعنى اضرب الرقم ده فى اتنين على الاقل

وتعال نشوف عدد الصحابة الذين غيروا فى التاريخ .. او الذين احدثوا فرقا .. او الذين كتبوا احداث التاريخ .. او حتى الذين ذكرت اسماؤهم مع اولئك الذين كتبوا التاريخ
كلهم كلهم .. حوالى 2500 صحابى فقط !!

وتعقيب الدكتور طارق .. ان الباقين لم يعملوا اشياء تستحق ان يذكر التاريخ حتى اسماؤهم
وفعلا الكلام ده صحيح

تعال شوف تاريخ الاندلس .. او بلاش شوف تاريخ المسلمين العلمى والثقافى فى ازهى عصور الاسلام
هتلاقى ان عدد الذين ذكر التاريخ اسماؤهم قليلون جدا ( الرازي , جابر ابن حيان , ابن القيم , وغيرهم )
وقارنهم بعدد المسلمين ساعتها .. هتقارن بكام مليون واحد

فكل واحد يسأل نفسه .. هل هو من الذين سيذكر التاريخ اسماؤهم فقط .. ام سيذكر التاريخ اسماؤهم وافعالهم الجميلة .. ام سيذكر التاريخ سيرتهم كاملة .. ام سيكتبون احداث التاريخ بايديهم ام سيرميهم التاريخ فى مزبلته غير مأسوف عليهم ؟؟
( طبعا مش معنى كده انك تطلع فى التيلفزيون والناس تشوفك وتبقى واحد مشهور .. انما تكون مشهور من غير ما الناس تشوفك .. وتبقى معروف من غير ما حد ياخد باله وتبقى اعمالك بين الناس تتكلم عنك
وكن رجلا اذا ما اتوا بعده .. يقولون مر وهذا الاثر )


بس الحمد لله .. بدأت المعالم تظهر وبدأت الصورة توضح

وان شاء الله سيكون خيرا باذن الله

Friday, July 20, 2007

طارق السويدان وصناعة النهضة

تحديث هام :

ارجوكم رجاءا حارا .. ان تدعولى كتير جدا جدا

انا دلوقتى فى مرحلة يمكن من اصعب مراحل حياتى

بجد انا محتاج دعائكم بشدة الايام دى

---------------------------------------

السلام عليكم ورحمة الله وبركاته

ازيكوا يا جدعان ... ايه اخبار الدنيا معاكوا

معلش اتأخرت عليكوا شويتين تلاتة فى التدوين

الواحد بقه مشغول جدا ومش بقعد فى بيتنا اصلا الا نادرا

ولو حد شاف بابا يبقى يسلملى عليه


المهم فى كذا حاجة كده كنت عايز اتكلم عليها


الاولى وهيا ان كان يوم الاربع كان فى ندوة للدكتور طارق السويدان

اتكلم فيها عن ثلاثيات النهضة

يعنى كان بيتكلم عن النهضة وايه اللى نعمله وازاى نتعلم صناعة النهضة وحاجات كتيرة كده

بس النقطة ان اللى فعلا محضرهاش خسر كتير جدا

وعامة هيا موجودة فى الساقية متصورة فيديو كأنك حضرتها ممكن تجيبها وانا ان شاء الله ناوى والنية لله انى ابقى اروح اجيبها

بس هو قال فيها ابيات شعر للشاعر الكبير وليد الاعظمي كانت فعلا غاية فى الروعة

كان بيتكلم عن انه ليس معنى انك اصبحت ملتزما حقا انك تروح المسجد وتفضل تركع وتسجد وتشغل نفسك بتوحيد الالوهية والربوبية والاسماء والصفات وما قالت المذاهب فى ذلك و المتصوفة والمعتزلة وما رأيها فى قضية التوحيد وقصة العقيدة والعلوم الشرعية وكده .. او انك تمشى الهوينا وتحنى ظهرك وموطي كده .. او انك تبقى اهبل ومغفل وسهل يضحك عليه واللى يضربك تديله خدك التانى وتقوله الله يسامحك

انما كان بيتكلم على ان الملتزم حقا واللى فاهم دينه كويس .. المفروض انه يبقى غنى ومتفوق فى حياته ومجال شغلة ويبقى فاهم فى كل حاجة ومفتح كده وحاسس بالدنيا . ويبقى مواكب اخر الموضه ودماغه دى تبقى بتفكر ليل ونهار

اسلامنا لا يستقيم عموده .. بدعاء شيخ فى زوايا المسجد

اسلامنا لا يستقيم عموده .. بقصائد تتلى لمدح محمد

اسلامنا نور يضئ طريقنا ... اسلامنا ناااااار على من يعتدي

المهم كانت ابيات شعر ملهاش حل وهو قالها بطريقة هزتنى جدا جدا

سبحان الله .. تلاقى الناس اللى فعلا فاهمة الدين صح .. تلاقيها بتعمل كده فعلا

يعنى ايه المشكلة لما تكون ملتزم جامد جدا وتخرج مع صحابك وتسهر بره .. او انك تروح تتفسح مع صحابك الملتزمين برضه .. او انك تلبس من احسن مكان فى حدود استطاعتك .. وتغير الموبايل والحركات دى

انا افتكر قصة .. كل ما افتكرها افضل اضحك على تفكيري ساعتها .. كنت لسه صغير .. وكنا فى اعتكاف فى مكة .. كنت انا وتلاتة تانيين .. المهم فى واحد صاحب واحد فينا كان جاى فكان بيتكلم معانا .. هو اكبر مننا .. فكان بيتكلم وبيقول .. انا كل سنة اغير عربيتي .. واجيب احدث موديل .. وعندى شاليه فى الساحل الشمالى .. وبروح كل سنة اصيف هناك انا والعيال .. ومش عارف بعمل ايه وبسوى ايه وبتاع

ساعتها انا كنت بقول ايه الراجل اللى شايف نفسه ده !! ايوة يا عم ربنا فاتحها عليك خلاص يعنى ايه يعنى جاى تقولنا ليه يعنى .. ربنا يسهلك يا عم وخلاص

سبحان الله .. الراجل ده بجد انا فاكر كلماته من ساعتها .. كان معنى كلامه انى اه ملتزم .. وبروح احج واعمل عمرة ويعنى الورع كله فيه .. بس مع كده .. انا فاحت فى الدنيا وعارف كل حاجة وماسكها فى ايدي وعايش حياتى جدا كأنى عايش ابد الدهر

اعمل لدنياك كأنك تعيش ابدا .... واعمل لاخرتك كأنك تموت غدا

فعلا جزاه الله خيرا

دكتور طارق السويدان .. أكدلي حبة مفاهيم كانت عايزة ترتيب .. ربنا يكرمك

المهم كفاية كده المرة دى .. علشان انا مستعجل جدا ومشغول برضه جدا

فالله المستعان بحاول ازبط كذا حاجة كده فى حياتى واعيد ترتيب الاوراق من جديد

وفى حاجات كتيرة انا محتاج اقراها واقرا فيها

فادعولى كتير

قد اتغيب لفترة عن الكتابة .. فمتنسونيش من الدعاء

--------------------------------------------------

Saturday, July 14, 2007

دكاترة سنة تانية

السلام عليكم ورحمة الله وبركاته


يلا نكمل فى الدكاترة اللى كانوا بيدونى

فى سنة تانية بقه بدأنا نتعود على النظام بتاع الدكاترة والغياب والمحاضرات وازاى نذاكر

عرفنا الكلية ماشية ازاى

التيرم الاول

الاستاذ الدكتور السيد عبده ناجى .. مبادئ التسويق

الحقيقة مهما اتكلمت فى حق الدكتور ده مش هقدر ابدا ابدا اوفيه ولو جزء من اللى اتعلمته منه

انا فعلا حبيت التسويق منه .. حبيته بجد .. وفعلا كانت اكتر مادة حبيتها بالدكتور بتاعها .. ومحاضراته كانت بتبقى احلى محاضرات فعلا فى التيرم بتاعنا ده
بجد الدكتور ده على الرغم من انه جامد جدا فى المادة وكده .. لكن فعلا كان مش معروف قوى وخسارة فى الكلية
بس انا فرحان فعلا انه ادانى بجد .. ربنا يكرمه دكتور سيد ناجى

الاستاذ الدكتور كامل عمران

الدكتور ده بقه ... دماغ عالية قوى فى المنهج . اساسا هو كان بيدينا مادة ادارة الانتاج .. فالمادة دى كلها عبارة عن كلاكيع كده مش عارف وصلولها ازاى .. فهو الدكتور كان فنان فيها وكان فعلا دكتور فظيع فى المادة

لكن على المستوى الشخصى مكانش محبوب قوى بين الطلبة .. يمكن لانه معاملته بتبقى جافة جدا جدا جدا ... يعنى حتى مش بيعاملك كطالب .. بيعاملك كأنك دكتور واقف قدامه او واحد عندك مشكلة وعايزة تتحل وخلاص .. يا ابيض يا اسود .. وحتى محاضرات بتبقى مملة جدا جدا جدا جدا .. وطبعا الدفعة كلها كانت بتحضر لان اللى مش هيفهم فى المحاضرة مش هيفهم طول حياته .. انا فاكر كان الطلبة بتقعد تحت رجله من الزحمة .. ووراه والحالة بتبقى مزمنة .. بس الحمد لله اتعلمنا منه كويس وربنا يكرمه رغم كده كان بيشرح بضمير .. ربنا يكرمك يا دكتور كامل

الاستاذ الدكتور يوسف عبدالقادر .. محاسبة شركات اموال

ودى كانت مفاجأة حلوة بالنسبة لينا ان دكتور يوسف يدينا تانى محاسبة شركات .. ادانا النص الاول فى السنة الاولى وده كان النص التانى .. طبعا نفس التميز والتألق فى الشرح والفهم العالى جدا .. ربنا يكرمك يا دكتور يوسف

الدكتورة سنية توفيق .. الكمبيوتر

بصوا .. انا مقتنع ان اى دكتورة عامة بتبقى ضعيفه .. ومبتعرفش تشرح كويس .. ودى كانت بالضبط الدكتورة سنية توفيق ..

غير ان المادة من عهد الهكسوس وايام امنحتب .. تصدقوا كنا بندرس شرائط التسجيل بتاعت ما قبل التاريخ !! حاجة كده تحس ان فى واحد هيدخل عليك بالناقة دلوقتى من الباب .. اضف الى ذلك بقه الدكتورة الله يسامحها .. جت فى الاخر وكروتت جزء الخرائط ده وجابته فى الامتحان وجابته فى سؤال مستقل عليه ربع الامتحان وهيا اصلا دلقته فى السريع .. بس يلا .. المادة اصلا مكانش ليها لازمة .. فمفيش داعى للتقيم من بابها

الاستاذ الدكتور عبدالحميد الغزالى .. والدكتور محمد رئيف

نقود وبنوك وتجارة دولية

الحقيقة دكتور الغزالى كان فعلا استااااذ ودماغ فى حتة الاقتصاد دى ... فعلا كان بسم الله ما شاء الله حاجة جامدة قوى فيها .. لكن للاسف مكانش بيفهمنا بالاسلوب اللى نفهمه كطلبة .. فعلشان كده كنا بنروح نحضر واحنا مش فاهمين

غير ان كتابه كان حاجة كده تحس انك فى عالم اخر .. فكده كده مش فاهم حاجة .. لكن الحقيقة مكانش بيبخل علينا باى معلومة .. فى اى حاجة .. وحتى لو بعد المحاضرة مستعد يقف معاك وتتكلم معاه فى اى حاجة ويفهمك كل حاجة .. ده غير انه كان عامل جزء كامل عن الصرافة والبنوك الاسلامية ... كان حاجة دماغ بقه وبروقان .. فاستفدنا كتير جدا منه ربنا يكرمه دكتور عبدالحميد الغزالى

دكتور محمد رئيف بقه .. هو برضه كان نفس النظام .. دماغ كبيرة وبيشرح فى حاجات كبيرة .. واللى ميركزش معاه من اول ما يدخل مش هيجيب معاه حاجة .. احيانا من كتر ما المحاضرة دسمة كده بفصل فى النص مش قادر اتابع من كتر المعلومات والربط وكده . ففعلا مكنتش بقدر اكمل معاه المحاضرة

بس الحمد لله الاتنين كانوا كويسين معانا والحمد لله ربنا يكرمك يا دكتور محمد

نشوف بقه التيرم التانى

الدكتورة آمال كمال .. محاسبة حكومية

بصوا ... افتكروا ان اى دكتورة مبتعرفش تسيطر على الامور .. اه انا عدو المرأة واللى مضايق مننا يعمل زينا

طبعا مكانتش بتسيطر على حاجة .. بس كانت بتحاول انها تفرض شخصيتها بالقوة وبالصوت العالى .. بس على مين يابا ... بس كانت طيبة جدا والله ومكانتش بتزعلنا فى حاجة خالص

افتكر مرة واحدة بنت كانت جايبة اخوها الصغير ( معرفش ايه الفكرة كل واحد عنده عقدة نقص يجيب اخوه الصغير او تجيب اخوها .. قلبت حضانة والله ) فالواد اتكلم وزعق وصوته بقه عالى والدكتورة سمعت .. قالت مين ده ؟

طبعا البنت كانت فى نص هدومها .. اتفضحت فى نص المدرج .. فقامت .. فلما الدكتورة شافت الواد كلنا كنا فاكرين انا هتاخدهم الاتنين وعلى الحبس وتسحب الكارنيه وكده .. فوجئنا بيها بتضحكله وبتطلع لبان وبتديله كمان .. طبعا كان تصرف ذكى بس كان غلط اصلا البنت تجيب الواد معاها والمفروض تبطل حركات التثبيت القديمة دى

وكانت الدكتورة امال تجيب بنتها معاها ... بنتها كبيرة فى ثانوى .. وتيجي وتقعد وراها .. مش عارف على ايه .. وبعدين يعنى اذا كان باب النجار مخلع .. فخلاص بقه

الاستاذ الدكتور شوقى سيف النصر ... رياضة

ده بقه الحقيقة زى دكتور كامل عمران ... بس بزيادة كمان .. جاف بطريقة مستفزة

وكان بيشرح حاجات اساسا شكلها يخض .. الفائدة البسيطة والمركبة وحاجات تفقع المرارة

تخيل لو انت اخدت قرض ... هتدفعه وعليه الفوائد .. ولو اتأخرت ؟؟ هتدفعه وهتدفع الفوائد .. وهندفع فوائد تأخير وفوائد على الفوائد المتأخرة .. ولو اتأخرت كمان ؟؟؟ هيتخرب بيتك

والدكتور كان اول ما يدخل مبيشوفش طلبة قدامه .. يدخل يشرح ساعة ونص او اتنين الا ربع وهو دايس فى المنهج ولا كأن فى حد قاعد .. يا دكتور تعبنا .. طيب زهقنا .. ما تروح النهاردة بدري ... وده مفيش فى الدماغ

بس بالامانة كانت دماغه دى كلها ارقام وحسابات وفوائد .. كان فظيع

الاستاذ الدكتور على قاسم .. قانون تجاري

ده بقه .. يا سبحان الله .. على الرغم من انه من الصعيد شوية وباين قوى على لكنته .. بس بامانة كان الدكتور ده دمااااااااااااااااااااااااااااااااااغ .. بجد كان فاهم جدا جدا فى المادة وبسم الله ما شاء الله على فهمه العالى .. فعلا كان من اكتر الدكاترة اللى صعب تلاقى واحد فى فهمه ده اطلاقا .. بجد كان حاجة فظيعة

لسه فاكر مثال كان بيشرحه على الاعمال التجارية . فبيقول لو واحد جاى من العياط وجاى ببسكلته ( اه والله ) وهو ماشى فى الطريق ركب واحد معاه وجابه لحد الجامعة وخد منه فلوس ده يبقى عمل تجارى ولا مش عمل تجارى ؟؟؟ ها ؟؟ لا .. ده ميبقاش عمل تجارى .. لانه فى لما راح واشترى البسكلته مكانتش نيته انه يركب الراجل وياخد منه فلوس .. انما كان اشتراها علشان يستخدمها هو . فده مش عمل تجاري ولا يخضع للقانون التجاري

( طبعا تخيل الكلام ده باللكنة الصعيدية الواضحة .. انت متخيل المحاضرة ازاى )

بس بجد ربنا يكرمه فعلا كان دكتور دكتور بجد

سيلز الدكتور مصطفى هلال

الدكتور مصطفى طول المحاضرة وهو بسم الله ما شاء الله ... يخليك تفطس على نفسك من الضحك خصوصا مع المجلس القومى لحقوق المرأة ... ويفضل يتريق عليه بشكل ... لو فى واحد بتتكلم يسكت هو كده . ويقولك .. طبعا لتوصيات المجلس القومي لحقوق المرأة .. يجب على الرجال انهم يسكتوا لحد لما الهانم تخلص كلام وبعدها نرجع تانى ... حسبى الله ونعم الوكيل .. وكان بيتكلم بهدوء فظيع يخليك تضحك اصلا من هدوئه وهو بيتكلم

كان بيحب يتكلم معانا فى امور جانبيه كتير .. وكان بيفتح مواضيع كتيرة وبنستفيد .. منها مرة ودى فعلا وجعتنى جدا .. اتكلم على الزواج العرفى .. ان واحدة تروح تقول لواحد زوجتك نفسى .. وهو يقول قبلت .. يلا يروحوا مع بعض ويبقى زنا عرفى

وحتى واحنا قاعدين مرة فى المحاضرة واحدة بنت بعتت قالت يا دكتور .. انا اتجوزت عرفى كده .. راحت للواد وقالتله زوجتك نفسى . قالها وانا قبلت . وراحوا فى بتنجان مع بعض .. فهيا باعته بتسأل تعمل ايه

ساعتها كان الموقف صعب جدا ... حتى الدكتور طبق الورقة تانى .. وحطها وسكت فترة كده وبعدها اتكلم

بس سيبكوا انتوا .. بجد كان دكتور جامد

ادارة عامة الاستاذ الدكتور المعلم الفاضل .. عبدالحميد ابو ناعم

بصوا يا جدعان .. انا مهما اتكلمت وقلت وعدت وزدت فى الكلام .. عمرى فى حياتي ما هقدر اقول كلمة شكر توفيه حقه .. يا جماعة الدكتور ده لو عليا اشيله فوق دماغى .. انا بجد شايله افضال عمرى ما اتخيل انى هقدر اردله الجميل فى حياتى ..

هو اللى علمنى ان يكون عندى هدف فى حياتى . وهو اللى علمنى ازاى اكون متميز .. وهو اللى علمنى قيمة ومعنى الحياة .. هو اللى علمنى وزرع فيا .. نقطة انى اقدر اعمل حاجة جامدة .. وهو اللى رجع فينا الامل تانى باننا نقدر ونقدر ونقدر

انا بجد .. نفسى اروح اقعد عند رجله .. واستفيد منه .. لا يمكن ابدا . ان يكون فى دكتور زيه تانى فى الكلية .. استحالة

وبجد اللى ماخدش معاه فى الكلية .. خسر عمره كله واكتر كمان .. استحالة حد يدخل الكلية ومياخدش مع الدكتور ابو ناعم

وطبعا قصة البحث اللى عملته وشرحته فى المدرج فى اخر محاضرة ليه معانا .. كانت ليها تأثير غير عادى عليا .. والحمد لله انها نقطة وعلامة مضيئة فى حياتى ... والحمد لله انها كانت على ايده

ربنا يكرمك يا دكتور عبدالحميد .. بجد انت خسارة فى الكلية .. وخسارة اللى مخدش معاك

كده التيرم خلص .. نشوفكوا فى سنة تالتة بقه

Saturday, July 7, 2007

الى أساتذتى .. اهديكم من القلب تحية

السلام عليكم ورحمة الله وبركاته

الحقيقة الواحد بعد ما خلاص عرف النتيجة انا حاسس انى خلاص كبرت وعجزت

وخلاص بقه مبقيتش فاضى والحوارات دى .. وامبارح كنت فى فرح واحد صاحبى كده .. فكنت متفق مع صحابى الشلة اننا نخرج .. فوجئت ان ولا واحد منهم جه .. اتصلت بيهم واحد كان مشغول جدا فى فرح اخته .. والتانى مش عارف كان فين ومعرفش يجي

حسيت ان خلاص .. مش هنعرف نتقابل تانى .. شعور وحش انك تحس انك مبقيتش فاضى ومش عارف تعمل حاجات كتيرة كنت عايز تعملها

وصدق رسول الله صلى الله عليه وسلم .. نعمتان مغبون فيهما كثير من الناس .. الصحة والفراغ

وفعلا .. اغتنم خمسا قبل خمس .. صدق رسول الله عليه السلام

المهم النهاردة هتكلم عن الدكاترة اللى ادونى فى الكلية .. من اول سنة اولى لحد رابعة


سنة اولى التيرم الاول

****
الاستاذ الدكتور عادل زايد ... مادة اصول الادارة والتنظيم

الحقيقة انا مهما اتكلمت فى حق الدكتور ده مش هقدر اوفيه واحد على مليون من اللى اتعلمته منه
فعلا انا اتعلمت منه الكثير والكثير .. هو اللى فهمنى يعنى ايه يكون عندى هدف .. هو اللى فهمنى يعنى ايه انى اكون عايش باهداف وعندى رسالة فى الحياة .. هو اللى قال كلمة ولسه فاكرها من ساعتها
اعمل ما تحب .. والا فحب ما تعمل
فعلا من افضل الدكاترة اللى انا اخدت معاهم والحمد لله انى اخدت معاه فى الكلية وهو اللى حببنى فى الادارة
شكرا دكتور عادل .. جزاكم الله خيرا


****
الاستاذ الدكتور محمد المحمدى .. مادة السلوك التنظيمي فى الادارة

فعلا انا اتعلمت من الدكتور محمدي حاجات كتيييييرة جدا .. مرة كان بيشرح يعنى ايه الانتباه .. ففجأه رمى المايك وقعد بصبيه على الكرسى وخبط بايده الطرابيزة .. فالناس كلها فتحت بؤها ايه اللى حصل .. فقال شفتوا ايه اللى حصل .. انتباااااااااااه
فضلنا نضحك ساعتها .. بس كان موقف جامد جدا
كان ليه طريقة متميزة فى الكلام والحديث .. افتكر حد كان بيكلم معايا فى طريقة شرح الدكتور محمدي .. فكان بيقول انه بيعرف يدخل المعلومة للدماغ على طول .. من غير ما تفضل تفكر وتفهم .. لانها بتيجي مفهومة على طول من الاخر

مرة برضه الدكتور كان بيشرح .. فكان بيبصلى لانه كان عارفنى . فواحد قاعد جنبى صاحبى قالى هو عارفك ؟؟ قلتله اه .. فضحك قالى اصله بيبصلك على طول .. طبعا ده كان معناه انى لازم اكون قاعد مركز علشان استعدادا لاى مواجهه محتملة او اى صواريخ اسئلة مفاجأة

ربنا يكرمك يا دكتور .. جزاكم الله خيرا كثيرا

****
الاستاذ الدكتور جلال حربى .. الرياضة للتجاريين
الحقيقة الدكتور ده استاااااذ فى المادة .. فعلا دماغه عالية قوى قوى قوى
وبسم الله ما شاء الله عليه فى الشرح .. كان حاجة فوق الخيال
احنا كنا المجموعة الوحيدة اللى اخدنا اسلوب معقد نفسيا اسمه السمبلكس فى البرمجة الخطية
وسبحان الله على الرغم من اللى كنا بنسمعه عنه وانه مش عارف ايه وبتاع . لكن الدكتور شرحه باسلوب سهل جدا جدا وبطريقة بسيطة خالص . لدرجة ان فى ناس من رابعة علشان بياخدوه تانى طلبوا انى اشرحهولهم لانهم مش فاهمينه
وفعلا لما جينا رابعة واخدناه صحيح الدكتور شرحه .. لكن كل اللى كانوا معايا وخدوه مع دكتور جلال كنا قاعدين بنقول ايه الكلام القديم ده .. لاننا كنا فاهمينه كويس جدا
كان بيحب الهدووء .. وكان لما بيفكر بيفضل ساكت كده ومبيحبش حد يقطع عليه ويتكلم ..
ودماغه بسم الله ما شاء الله كانت اله حاسبه .. بيحسب حاجات معقدة وهو واقف كده ويخلصها
ربنا يكرمك يا دكتور جلال .. جزاكم الله خيرا

****
الاستاذ الدكتور تحسين الشاذلى .. مبادئ المحاسبة المالية
للاسف الشديد متعلمتش منه حاجة .. وللاسف مكانش بيعلم اصلا حاجة
صحيح كان بيدخل المحاضرات ويقعد معانا وقت طويل .. لكن للاسف محاضرة ولا ليها اى لازمة فى الحياة
كان بيدخل ويفضل يقولنا .. ابن الكلب ابن بنتى .. مسك الروج وشخبط بيه على الحيطة اللى انا لسه داهنها
طيب .. انت بتعترف انه ابن ؛×؛ احنا مالنا؟؟ دى مش مشكلتنا احنا بقه انه ابن ×@÷
للاسف الشديد معلمناش حاجة .. كان ممكن يدخل بالساعة والساعة ونص .. ويشرح فى اخر ربع او عشر دقائق ويا تلحق يا متلحقش
انا فاكر انى فعلا مفهمتش المحاسبة الا من المعيد وليد شحاته ربنا يكرمه
المشكلة ان كان باقى على الامتحان حاجة بتاع اقل مش شهر والدراسة تقف فى الكلية .. وكان لسه باقى نص المنهج واهم جزء فى المنهج بتاع التسويات الجردية .. ومكانش فتحه اصلا
للاسف متعلمتش منه حاجة .. لانه مكانش عايز يعلم حد حاجة اصلا .. وهو اللى كرهنى فى المحاسبة الحمد لله

****
الاستاذ الدكتورة امال شاور .. مبادئ الاقتصاد
كانت الدكتورة امال من كلية اداب .. وكانت محاضرتها مملة فحت لانها بتدى مادة مملة اصلا بتاعت الاقتصاد .. فيها حبة جغرافيا على حتة اقصاد على حتة اقتصاد كلى وكانت كلها حاجات تحس كأنك قاعد فى هيئة المساحة
وانا افتكر انها قالتلنا مرة ان مفيش ملازم من بره وكانت بتحلف ميت يمين ان اللى هيجيبها هيسقط .. فجت مرة فى محاضرة قال انا شفت الملزمة دى ولقيتها كويسة .. طبعا كانوا متفقين معاها والناس راحت جابتها ودخلوا بيها الامتحان .. ويلا مش مهم على الناس



------------------------------------------------
سنة اولى التيرم الثانى

****
الاستاذ الدكتور محمد سامى .. والدكتور عبدالوهاب العوضى

مبادئ القانون .. وقانون الحق
الاتنين من كلية الحقوق .. حقيقة الاتنين احسن من بعض فى الشرح وتوصيل المعلومة
بس دكتور محمد سامى كان اكتر دكتور بنحبه فى التيرم ده .. واكتر دكتور محاضرته كانت بتبقى زحمة موت
مع انى فاكر ان محاضرته كانت بتبقى الساعة 8 بليل بس كنا بنفضل مستنيين وبنفضل نقعد ونتزنق علشان نحضرله
الحقيقة اكتر دكتور بحبه .. وفعلا مهما اتكلمت فى حقه مش هوفيه اى حاجة من الى عمله معانا
كان بيتكلم بلغه شبابيه بحته .. وبيوصل المعلومة بشكل لذيذ جدا
افتكر مرة كان بيتكلم على قانون الجرائم والعقوبات فكان فى ولد وبنت فى الاخر قاعدين بشكل مش ظريف .. راح محور الكلام بتاع القانون على الاتنين دول وهو بيشاور عليهم .. ساعتها فضلنا نضحك للصبح لانها قالها بطريقة جامدة جدا
كان دكتور زى العسل ومكانش بيرفض لحد حاجة وبيتكلم وبيحترم الطالب قبل ما يحترمه الطالب
وهو اول دكتور عملنا معاه حفلة تكريم .. وسبحان الله .. الحفلة كانت جميلة جدا .. واتصلنا بالاستاذ عمرو خالد وكلمه شخصيا وقال كلمه للمدرج كله فى المايك .. والدكتور كان مبسوط جدا
فعلا الحفلة كانت جميلة جدا الحمد لله

اما الدكتور عبدالوهاب ففعلا كان دكتور علامة فعلا .. كان بيشرحلنا الحقوق والقانون المدنى ... والاهلية و شروطها والجواز وكل حاجة فى القانون المدنى والاحوال الشخصية .ز فعلا منه اتعلمت حاجات كتيرة مكنتش اعرفها فى حياتى .. صحيح كان ممكن يقول حاجات اوفر شوية بس كان دكتور جامد جدا وعلمه رهيب
( مرة واحد صاحبنا هو عارف نفسه .. دخل امتحان القانون فبيقوله عرف الاهلية .. فكتب تعريف الاهلية وقاله .. هى دى الاهلية يا اصفر .. شال المادة سنتين ورا بعض .. ادعوله يخلص منها )

شكرا يا دكتور محمد .. شكرا يا دكتور عبدالوهاب .. ربنا يكرمكم وجزاكم الله خيرا على اللى علمتهولنا

****
الاستاذ الدكتور يوسف عبدالقادر .. محاسبة شركات الاشخاص
يانهااااااار .. الدكتور يوسف ده .. علاااااااامة
رهيب .. فعلا
انا فعلا فهمت محاسبة صح منه .. عرفت منه انواع الشركات .. عرفت ازاى نعمل معالجة محاسبية لاى حاجة
عرفت يعنى ايه انى اكتب فى دفاتر اليومية ويعنى ايه انى امسك حسابات شركة و ازاى اضيف شريك
يااااه .. كانت مادة جميلة جدا ودكتور اجمل بيديهالنا
فعلا كان استاذ فى المادة .. وامتحانه كان سهل جدا وعمرى ما تخيلت المادة بالسهولة دى
فعلا اتعلمت منك كتير يا دكتور يوسف
جزاكم الله خيرا .. ربنا يكرمك يا دكتور


****
الاستاذ الدكتور احمد فهمي جلال .. مبادئ الاعمال ( بيزنيس )

الحقيقة دكتور احمد من الدكاترة المتميزين جدا فى الكلية .. بس للاسف يمكن محتاج بس يغير من اسلوب الشرح شوية وهيبقى تمام قوى .. الدكتور احمد فعلا نفسه يعمل حاجة جامد ويعلمنا صح ... وكان طلب مننا ان كل واحد يعمل مسودة مشروع هيعمله .. خطة مبدئية يعنى .. طبعا للاسف العدد مكانش مساعد وعوامل اخرى منها اننا مكناش فاهمين المادة قوى
بس فعلا دكتور علمه رائع
ربنا يكرمك يا دكتور احمد .. جزاكم الله خيرا

****
الدكتور احمد السمان .. مبادئ الاقتصاد الكلى والجزئى
بصراحة انا مش عارف الدكتور ده ازاى بقه دكتور .. وايه من كلية الاقتصاد والعلوم السياسية
يعنى كمان انقح
الدكتور كان بيدخل المحاضرة ساعتين .. وكان الطلبة بيفضلوا يتكلموا بصوت عالى لمدة ساعتين الا ربع .. وبعد ساعتين الا ربع من المحاضرة يقول انتوا بتتكلموا ليه !! اااااااه يا قلبك
دكتور للاسف معرفش ينتزع احترامه من الطلبة .. مكانش مهتم باى حاجة .. وحتى الشرح
كان حتى الشرح بتاعه ضعيف جدا جدا ومكناش بنفهم حاجة
وكان ممكن يعيد ويزيد فى حاجة واضحة زى الشمس فى محاضرة كاملة
ولسه فاكر مثال فى الاقتصاد بيوضح حاجة
فبيقول هنعمل توليفه من البيض والعيش !!
عايز يشرح شروط السوق والعرض والطلب .. فيضرب مثل بالبيض والعيش
كانت حاجة صعبة جدا محاضرته دى
خاصة انه فى الاقتصاد الكلى دخل فى النظرية الكنزية ودخل فى الاقتصاديات القومية فى حاجات بلاوى ومحدش كان فاهم حاجة
بالذات النظرية الكنزية دى لانها كان بلوى ومحدش فاهم حاجة فيها
يلا .. ايام وراحت الحمد لله


ان شاء الله هكتب عن باقى الدكاترة فى كل السنين اللى جايه
باذن الله تعالى
الله المستعان

Tuesday, July 3, 2007

Omar Elgarhy >>> Graduate Now

السلام عليكم ورحمة الله وبركاته

النهاردة كان فى واحد صاحبى عندى .. جالى وكان قاعد معايا شوية

فجأة لقيت التيلفون بيرن وبيتنطط .. قلت يا الطاف الله ... وصلوا

المهم كان الدكتور محمدي .. رديت وبعد السلامات والطيبات

كنت فاكر الدكتور عايزنى اروحله او حاجة .. لقيته بيقولى النتيجة !!

( ليه بس يا دكتور كده )

المهم بلعت ريقي بالعافية .. قلتله ايه ده هيا ظهرت ؟

قالى لا انا جبتهالك من الكنترول

المهم بعد ما خدت النتيجة وانا ايدي على قلبى اساسا

تخيل واحد خلاص .. خريج يا جدعان

يا جدعان انا بقيت خريج .. يا نهاااااار

يعنى انا خلاص كده . مش هروح الجامعة تانى ومش هدرس تانى فى الكلية

يا جماعة انا خلاص بقيت خريج

سبحان الله .. النهاردة كنت فى انترفيو فى شركة

فالراجل بيقولى يعنى انت لسه بتدرس ؟؟

قلتله لا انا خلصت الامتحانات والدراسة .. وانا من جوايا مش عارف انا خلصت ولا لأ

قالى يعنى انت لسه مأخدتش الشهادة

اااااااه .. لو اعرف انى هاخدها النهاردة

كده خلاص بقيت خريج رسمى

كده اقدر اقوله انى بقيت خريج

انا خلاص اتخرجت يا جماعة

انا مش عارف اعبر ازاى

عن فرحتى انى الحمد لله انهيت مرحلة التعليم بدون اى مشاكل او تعثرات او اى حاجة غلط

ولا ازعل على الكلية والدرجات دى ولا على الناس اللى مش هشوفهم تانى ومش هقدر انساهم ابدا ومينفعش انساهم

ولا على الايام الجميلة اللى جمعتنى بحبيايبى واصحابى اللى عشت معاهم ايام جميلة وايام كانت شديدة

ولا على مسجد تجارة اللى ياما كان فيه حاجات كتيرة هزت الدنيا وكانت البداية من جنينه المسجد

ولا على المدرجات والعمال اللى مش هشوفهم تانى وارتبطت بيهم بصورة كبيرة جدا

ولا على جو المذاكرة والدراسة والامتحانات والورق وتصويره

يااااااااه مشاعر متضاربة مش عارف اكتب حاجة دلوقتى

الله المستعان

--------------------------------------------------------------------------------

المهم بهذه المناسبة السعيدة اهديكوا نشيدين للتخرج

الاول : انا مش مصدق

انا مش مصدق .. حلم الليالى الغالى خلاص اتحقق
انا مش مصدق .. ابنك من دعواتك لقاه واتوفق

ونجحت خلاص معقولة خلاص .. ارتحت خلاص يا هوووو يا ناس
كان جبل انزاح عن قلبى وراح .. اه يا محلى يا محلى طعم النجاح

انا مش مصدق

حمل اغنية انا مش مصدق



--------------------------------------


والاغنية التانية
اسمها كله يغنى وكله يقول

كله يغنى وكله يقول .. نجاح فى نجاح ان شاء الله على طول
احلى جامعة واحلى فرحة .. احلى ناس وعالم ناجحة
ويا فرحى ده النايم يصحى .. واللى بيصبر بينول

حمل اغنية كله يغنى وكله يقول

--------------------------------------

الاغنية الثالثة بقه للبنات واسمها
( اتحدى لو حد فهم حاجة :D )

جينا نهنيكي