Wednesday, March 19, 2008

تفاصيل الاعتقال فى امن الدولة

السلام عليكم ورحمة الله وبركاته
1- طبعا بعتذر بشدة عن طول الفترة اللى فاتت اللى مكتبتش فيها حاجة .. بس فعلا ربنا وحده العالم بالوقت والانشغال الشديد اللى حصل .. لدرجة ان جت فترة بدخل البيت الساعة 12 بليل .. فالحمد لله على كل حال

2- كنت قريت حاجة كده جميلة .. واحد كتبها تعليق على الاية " وان لكم فى الانعام لعبرة"
فهو جايب الانواع المختلفة من الحيوانات وكل واحد نستفيد منه ايه .. بجد لازم تقروها على مدونة خواطر عمر لانها مفيدة جدا

3- كنت مع صلاح فى حاجة كده .. قابلته بعد ما خلصنا شغل .. المهم يعنى صلاح بيقولى انه عايز يتجوز .. وانه بيدور علشان يخطب يعنى .. قلتله يابنى خلاص مفيش جواز دلوقتى .. هنجيب فلوس منين علشان نتجوز ؟؟
قلتله الدهب اصلا هيوصل 200 جنيه للجرام .. يعنى كده مفيش شبكة .. ده غير اسعار الشقق المولعة .. يبقى كده مفيش شقة .. غير البنزين اللى هيغلى يبقى كده مفيش عربية .. واما الخشب فزاد حوالى 300 جنيه يبقى مفيش عفش .. ومش هقولك بقه على الزيت والسكر والرز اللى زاد مرة واحدة يبقى كده مفيش اكل كمان واما العيش فواضح قوي الهدايا اللى بتحطها وزارة التضامن فى رغيف العيش ( تعرفوا ان فى واحدة فى جرنان كده جابت عيش كسبت فى رغيف منه ساعة يد بس للاسف من غير استيك .. فادعولها تكمل باقى اجزاء الساعة علشان تكمل فرحتنا وفرحتها ؟؟ ) .. وبعد كل ده كمان المرتبات جايبه الارض .. يبقى نتجوز ليه ونصرف على البيت منين ان شاء الله ؟؟

قالى لا برضه .. انا هتجوز .. وفعلا بيتكلم بجد وبيدور .. قلتله ربنا معاك بقه

ادعوله ممكن يعملها بجد ويتجوز :D

4- المهم خلونا فى اللى احنا فيه

بعد ما اخويا راح بقه وفضل هناك .. كنا طبعا بنعمل الاكل وواحد بيروح يوديهوله .. الكلام ده كان قبل ما يترحل من امن الدولة لسجن وادى النطرون

كنت انا احيانا بروح اوديله الاكل .. وكان العساكر والامناء اللى هناك عارفينه كويس ... والحق يقال .. انهم كانوا فى غاية الاحترام والتعاطف
لان فى عدة مواقف هقولها دلوقتى هتعرفوا انا بقول كده ليه

الاول: فى الاول لما اخويا راح .. قعدوا فترة محدش من الامناء جالهم علشان ياخد طلباتهم فى الاكل ويشتريهالهم .. ففضلوا فى التخشيبه حوالى 16 ساعة من غير اكل .. فلما الظابط عرف كده مسك الامناء وسلخهم .. اخويا بيقولى جالنا الامين وضارب بوز معتبر وشكله واكل علقه سخنة ... وخد طلباتهم وجابها

التاني: انا لما كنت بروح علشان اودي الاكل لاخويا .. كان الامين فى الوقت اللى الظابط مش موجود فيه .. بيروح طالع يقفل الباب الحديد اللى بره .. ويقفل الباب اللى جوه علشان محدش يشوفنا .. وفى الوقت ده يكون التانى دخل التخشيبه جاب اخويا .. ويطلع يقعد معايا شوية نتكلم ونتناقش فى اللى بيحصل وكده

الثالث:
لما كنت بجيبله الاكل .. كان بيبعتلى هو من خلال الامناء برضه .. يبعتلى الهدوم بتاعته علشان اخدها تتغسل .. ففى اخرة مرة اروحله .. لقيت الامين قفل الباب تانى ودخل جاب اخويا

فاخويا خدنى على جنب وبعيد وقالى .. هتلاقى فى جيب الجلابية اليمين رسالة فيها كذا كذا كذا .. خلي بابا يقراها علشان تشوفوا الموضوع ده

طبعا بما انه ممنوع فى التخشيبه انه يبقى معاه اى حاجة حتى الورقة والقلم .. وحيث انهم رفضوا اننا ندخله كتب طبية علشان يذاكر .. يبقى اللى جابله الحاجات دى كان الامين اللى بره

كل دى مواقف الحقيقة انا مكنتش بصدق لما بشوفها .. هل فعلا معقول ان ده بيحصل ؟؟ ولا انا مش مصدق نفسى وبحلم ولا ايه بالضبط ؟؟

وقصص التعذيب وقلة الادب والقتل اللى بيحصل فى الاقسام ده ايه ؟؟
وكل ده ليه تفسير هقوله فى الاخر لما اخلص

المهم بعد اخر مرة دى لما قالى على الرسالة .. روحت على البيت .. وانا فى الطريق رحت مطلع الرسالة اللى بيقول عليها .. لقيتها مكتوبة بقلم جاف على منديل .. اه والله منديل

واخدتها خبيتها وقعدت عادى جدا .. لما نزلت لصلاة العشا انا وبابا .. قلتله على الرسالة ووريتهاله .. فبابا لما شافها اخدها وقالى اوعى تقول لماما عليها ولا على اللى فيها .. متقولش لحد نهائى

وفعلا .. لحد دلوقتى محدش يعرف الموضوع ده غيري انا وبابا واخويا اللى كتبها بس

كان كاتب فى الرسالة دى تفاصيل حاجات حصلت معاه .. وانهم خدوه علشان يعمل فيش وتشبيه .. وان فى احتمال يترحل لسجن وادى النطرون .. وحبة تفاصيل اخرى وطلبات كان عايزها

المهم بابا قال انه لازم نروح زيارة لمقر امن الدولة اللى هو فيه علشان نشوف ايه الموضوع ... ونتكلم مع الظابط اللى هناك نحاول نفهم ايه اللى بيحصل

المهم بابا قالى يلا علشان نروح .. ورحت انا وبابا هناك .. طبعا لان مواعيد شغلهم الضباط اصلا بليل .. فرحنا بعد العشا على الساعة عشرة علشان الافندي يكون جه

رحنا ودخلنا هناك على الساعة تسعة كده

لقينا ناس تانية قاعدة هناك .. متعرفش السبب ايه .. وواحد بس اول ما شفته عرفت سبب انه هناك .. واحد لابس عمه والعباية بتاعت شيوخ الاوقاف .. وطبعا معروف هو هناك بيعمل ايه

فضلنا قاعدين من الساعة 9 لحد الساعة 10 ونص .. كل ده قاعدين بره بس مستنيين .. وانا وبابا فاهمين سبب القعدة دى
اى حد بيروح امن الدولة بيلطعوه فترة طويلة كده بره .. مستنى .. مش لسبب الا ان الطبيعي ان الواحد لما بيكون رايح تجربة خايف منها وعنده خلفية مسبقة سودة .. بتفضل بقه الافكار تدور فى دماغه ويبدأ يتوتر جدا .. فلما يطلع فوق مع اقل ضغط من الضابط ينهار الشخص نفسيا ويجيب اخره

بعدها جه الامين وقالنا تعالوا يلا .. دخلت من الباب اللى كنت كل مرة .. اقف عنده مكملش .. وكان اخويا بعد ما اقعد معاه شوية يدخل هو ويكمل
دخلنا على طرقة طوييلة .. وفى نصها تقريبا صالة فيها سلم كبير .. اشبه بالضبط بمبنى مدرج (أ,ب)

طلعنا فوق الدور التانى ... ومشينا فى طرقة تانية .. كلها غرف مقفولة .. المهم وقفنا عند واحدة منهم ودخلنا فيها .. اللى المفترض انها تكون بتاعت الضابط

لما دخلنا الغرفة على الضابط .. اول حاجة بدأ يعملها هو ممارسة عادته وهوايته فى طرح الاسئلة .. وبدأ يسأل بابا اسمه والسن والعمل .. وبعدها بدأ يسألنى انا وكلية ايه وسنة كام .. وكنت خايف جدا لحسن يعمل سيرش فى الملفات اللى عنده ويعرف انا بعمل ايه فى الكلية مروحش بيتنا .. بس اكتشفت انهم اغبى من انهم يعملوا كده

فضلنا نتكلم ونتناقش .. ويسأل بابا اسئلة غبية .. وبابا يرد عليه باجابات تناسب غبائه .. لكن مفيش فايدة

الغرفة اللى هو كان قاعد فيها كانت برد جدا جدا .. والتكييف كان فوقيه هو مسلط على اللى قاعد قدامه .. علشان لما يكون بيتكلم معانا او مع غيرنا.. او بيستجوب حد يبقى بيأثر عليه نفسيا بالبرد والتكييف اللى بيلسعه ده .. لكن مش علينا احنا

اول ما بدأ الضابط كلامه .. قال بص يا حاج .. احنا عارفين عنه كل حاجة .. وصور ومعرفش ايه .. وكل حاجة ومشوار كان بيعمله احنا عارفينه كويس جدا وانه كان بيصلى فى مسجد كذا وبيعمل كذا كذا
اللى هو يعنى متحاولش تنكر او تكذب يعنى

وبدأ يسأل .. محمد كان بيعمل ايه ؟؟

بابا قاله مكانش بيعمل حاجة .. اه بيروح يصلى فى مسجد كذا .. بس كان من البيت للمستشفى علشان الشغل ومنها للبيت .. بس

فالضابط حس انه اتاكل قفا .. واننا فاهمين الاشكال دى .. فبدأ يمارس ضغوط علينا بقه
اول حاجة لما بابا قاله كده .. راح ساب بابا يتكلم وبص لشاشة الكمبيوتر وفضل ساكت حتى بعد ما بابا خلص كلامه .. الطريقة دى معرفة جدا وتحسسك بالامبالاه وانه كان متوقع اجابة معينة وانت مقولتهاش فهو بقه بيستعد علشان يعمل تصرف معين انت مش هتقبله

فبابا قعد ساكت برضه ومتكلمش

اول حاجة بدأ يمارسها هو التدخين بصورة مستفزة .. فى طريقة كده فى التدخين تحسسك انك قاعد قدام واحد مش طبيعي .. وتانى حاجة عملها انه كلم الامين وقاله هات اخويا

جابوا اخويا معصوب العينين وحافى .. طبعا المنظر نفسه يخليك تعيط اصلا .. فلما جه الضابط طلع بره وخد الامين معاه .. مفضلش غير انا وبابا واخويا .. الوسيلة دى اسلوب ضغط على كل الاطراف وفى الغالب بيبقى فى حاجة بتسجل اللى بيحصل والكلام اللى بيتقال .. لكن طبعا كنا فاهمين الحركة دى والحياة كملت عادي

المهم رجع الضابط تانى وفضلنا نتكلم تانى معاه .. والحل ونعمل ايه .. وبابا مصر على جملة واحدة ان ابنى معملش حاجة وملهوش فى اى حاجة

واحنا قاعدين هناك خدت بالى من جهاز الكمبيوتر بتاع اخويا .. وكام كتاب على كام معرفش ايه . الحرز الى خدوه من البيت عنده

المهم الضابط حس ان مفيش فايدة .. فراح مزعق بقه .. ودى ثالث حاجة عملها علشان يضغط علينا .. ونادى الامين علشان ياخد محمد يرجعه تانى .. واحنا عادي ولا فى الدماغ ولازم نبقى كده علشان نفرس الضابط .. وبعدها فضل يهدد ويتوعد .. بابا قاله انا معنديش حاجة اقولها وده اللى اعرفه عن محمد

الضابط اتخنق .. فراح مزحلقنا .. ونادى على الامين علشان ينزلنا تانى ويخلينا نمشى

ونزلنا فعلا ومشينا روحنا تانى
وبعدها بكام يوم فعلا .. كان مترحل على سجن وادي النطرون

فضل هناك حوالي 5 شهور .. كان كل مرة نعمل تظلم .. فياخدوه من السجن يتعرض على النيابة ياخد افراج .. وهو راجع فى عربية الترحيل يتعمله امر اعادة اعتقال يرجع بيه تانى على السجن

وهكذا لمدة خمس شهور .. لحد لما طلعوه ومشي

الموضوع وما فيه كان ايه بقه .. انه لما راح اول مرة وسلم نفسه .. الضابط بيسأله فهو اخويا قفش عليه فى الكلام .. فعمل اللى عمله وحدفه فى السجن خمس شهور

بابا لما كان بيروحله زيارة فى السجن قاله لما ترجع للضابط فى فترة الافراج واعادة الاعتقال .. ولما يسألك ها ايه الاخبار وانت صح ولا لأ .. اديله اجابات تدل على انك نادم على اللى حصل .. وانه فى حاجات كتيرة من اللى حصلت انت مش هتعملها تانى وانك بتفكر فى الفترة اللى فاتت واكتشفت كمية الاخطاء اللى كنت بتعملها

والله فعلا .. اخويا لما عمل كده مع الضابط .. خرج ومرجعش السجن تانى .. انما قبل كده لما الضابط كان بيسأله فبيقوله وانا عملت ايه .. انا معملتش حاجة غلط .. فكان الضابط يرجعه تانى على السجن

واتضح ان الموضوع عبارة عن عداء شخصي بينه وبين الضابط .. لان اخويا لما اتسأل فى اول مرة واخويا قفش عليه .. راح مرحله على السجن .. كده بكل بساطة من غير اعتبار لاى حاجة

وحتى لما كان عنده امتحانات فى الكلية بتاعت الماجستير وعملته تصريح خروج للامتحان وانه هيتعمله فى الكلية لجنة خاصة .. الضابط فضل يتلكع ويستهبل لحد لما معاد الامتحان جه وعدى نص ساعة منه وهو لسه فى الحجز مراحش

فالموضوع كان عداء شخصى وتار بايت عند الضابط

واللى عايز اقوله هنا حاجة مهمة جدا
1- ان الضباط دول .. فيهم المحترم وفيهم اللى مش محترم وقليل الادب .. وده طبيعي موجود فى اى مؤسسة فيها تجمع بشري .. لكن فى الاخر احنا بنشوف انهى نوعية اكتر وهو ده اللى بيدي صبغة للمؤسسة ككل ..
والمعروف ان الضباط اللى مش محترمين هما الاكتر فى جهاز امن الدولة .. ولذلك في بلاوي كتيرة بتطلع وبنشوفها حتى فى الايام دي
يعنى فى مرة كنت عايز ادخله الكتب علشان يذاكر .. فالامين اتصل بالضابط علشان يقوله فلقاه بيصلى العصر .. قلت يا الطاف الله .. بيصلى العصر وبيعتقل اللى بيصلوا معاه .. ولما اخويا خرج قالى ان زوجته اصلا منتقبة .. يا مصبر الوحش على الجحش .. يعنى زوجته منتقبه وبيعتقل اللى زوجاتهم منتقبات !!

اكتشفت فى الاخر ان منهم الصالحون ومنهم دون ذلك وهما الاغلبية

وكذلك الحال مع الامناء والعساكر

2- كنت فى مرة من المرات فى حاجة كده مع الدكتور عبدالمنعم ابو الفتوح .. وكان بيتكلم على نقطة اننا بنضرب العساكر وبتوع الامن .. فبصراحة قال كلام جميل جدا كبر فى نظري جدا جدا .. وحسيت ان لسه فى ناس بتفكر صح

قال ان دول فى الاخر اهلنا واخواتنا .. صحيح انهم مجبرين على انهم يعملوا حاجة تتنافى مع فطرتهم ومع حبنا ليهم وحبهم لينا .. بس فى الاخر دول بشر بياكلوا ويشربوا .. يصحوا ويناموا .. يحبو ويتحبوا .. فاحنا مهما كانت تصرفاتهم لازم نتعامل معاهم بالرحمة واللين والحب .. وان جواهم خير كتير جدا .. بس ظروفهم والضغط عليهم خلاهم يعملوا حاجات غلط كتير ..
مش معنى انهم حوطوا الجامعة علشان يمنعوا مظاهرة لمناصرة غزة يبقى هما كفرة وبيحبوا اليهود .. لا خالص كلهم تقريبا مش مقتنعين باللى بيعملوه بس هما مأمورين بكده وملهومش يد فى تغيير اللى بيحصل ده
فاحنا برضه لازم نتعامل مع الامور بالشكل ده .. عمري ما تخيلت فى اول مرة لما الامين قفل الباب وانا جوه انه هيجيب اخويا .. انا كنت بستعد للاحتمال الاسوأ ومجهز نفسى للضرب والدخول فى قتال مع الامناء اللى هناك .. لكن صعقت لما لقيته جايب اخويا علشان اقعد معاه شوية !!

عمري ما تخيلت انه فى مظاهرة من المظاهرة احد عساكر الامن المركزي ضرب احد الشباب واتعور .. فضل وراه علشان يعتذرله وبعت مع احد الشباب التانيين وقاله روح للى هناك ده واعتذرله لانى ضربته وعورته !!

عمرنا ما تخيلنا ان فى اى مظاهرة من المظاهرات .. طلع احد الشباب برضه ووجه كلمه للعساكر لدرجة انهم كانوا بيعيطوا وبيبكوا من الكلام ..

فاللى عايز اقوله انهم فى الاخر بشر .. من لحم ودم .. زينا بالضبط .. لكن ممكن ظروفهم خليتهم يعملوا كده او يتصرفوا بشكل عكس فطرتهم السليمة ..
فده مش معناه انهم كلهم فى ناحية واحدة .. وان كان فى ناس منهم مش كويسين ودول الاغلبية لكن برضه لازم نبص للجانب الكويس اللى فيهم

ده على مستوى العساكر الغلابة .. اما على مستوى الضباط فانا مازلت مقتنع انهم كلهم فى كفة واحدة .. وان كان فى منهم ناس كويسة فللاسف بيطلعوا او بيطردوا .. زى اللواء اللى كان ماسك الجامعة من كام سنة واتنقل .. كان قمة فى الاحترام والذوق .. وفعلا كنت تشوفه تحبه على طول

اه والله تحبه .. ويجبرك على احترامه من غير ما يتكلم

لكن طبعا للاسف دول بيتشالوا من اماكنهم .. ويجي مكانهم بلطجية

وتوتة توتة خلصت الحدوتة

نشوفكوا بقه بعد فترة الله اعلم هتبقى قد ايه علشان ضغط الشغل .. بس ربنا يسهل

دعواااااااااااتكوا بقه

Saturday, March 1, 2008

الاعتقال .. الجزء الاول

السلام عليكم ورحمة الله وبركاته
1- معرفش الواحد جاتله حاله فتور من الكتابة .. ومش عايز اكتب اى حاجة خالص .. ومش لاقى وقت اصلا اكتب اى حاجة اساسا
يعنى الشغل واخد وقت كبير جدا .. او الحقيقة مش وقت كبير انما تركيز كبير .. فانا حاسس انى منقطع عن العالم ومش عارف ايه اللى بيحصل اصلا
لدرجة ان واحد اعرفه معرفش ان الدكتور سناء الله يرحمه مات الا بعدها بخمس ايام مثلا
يعنى الحمد لله على كل حال
2- عندنا فى الشغل عيال فقر .. وعاملين جروب على الفيس بوك وصباح الهلس عليه .. حتى فى الشغل لما بنكون فاضيين شوية بنفضل نهييس لحد لما نفصل ونقع واحد ورا التانى .. بجد جو ممتع جدا ... وما شاء الله على روح الناس اللى فى الشغل .. ما شاء الله فعلا
ويمكن الميزة والحسنة الجامدة فى الشركة دى .. ان مفيش بنات معانا فى الشغل
اه والله .. ميزة جامدة جدا
فواخدين راحتنا بقه وتهريج للصبح .. وتلاقى مثلا المدير العام يدخل يهرج معانا شوية ويطلع .. كل اللى بيبقى مخنوق او مضايق يجي عندنا فى الغرفة بتاعتنا يهلس شوية ويفك ويرجع تانى يكمل شغل :D
كانوا مسميين الغرفة بتاعتنا بالقهوة .. ودلوقتى بالمنتدى .. لكثرة الندوات الفكرية اللى بنعملها :D
ويوم الخميس كنا مزبطين اننا نلعب كورة فى نادي وادي دجلة .. اوف على النادي مش ممكن .. طبعا الحجز كان من 10 لحد 11.30 بليل .. خلصنا على اتناشر بليل مثلا كده .. وبعدها طلعنا اتعشينا فى مطعم فى مدينة نصر .. سيبتهم انا علشان الحق اروح وهما كملوا وكانوا عايزين يطلعوا المقطم يصيعوا للفجر او يروحوا السيدة زينب او الحسين .. بجد عيال فقر
يلا الحمد لله .. لكن طبعا الواحد بيتعلم حاجات كتيرة قوى ومهمة جدا .. وان شاء الله هبقى اتناول الموضوع ده قدام كده
3- الواحد بعد ما اتخرج تفاجأ بالحياة اللى بره .. فعلا الدنيا بره مش زى ما كان الواحد متخيلها تماما .. على مستوى الشغل والدنيا .. وعلى مستوى الوقت ... فعلا الواحد حس بحديث الرسول " نعمتان مغبون فيهما كثير من الناس "
كتير جدا بيبقى نفسى اعمل حاجات كتيرة جدا .. وكل مرة تظهر نفس المشكلة وهى ان ببساطة مفيش وقت فى اليوم علشان اعمل كده
الصبح فى الشغل .. وبليل فى حاجات تانية بقت شبه منتظمة .. فخلاص لم يتبقى غير وقت النوم .. فلازم كل واحد يتعود بجد من دلوقتى .. انه يقلل وقت النوم بتاعه الى اقل حد ممكن .. انا الحمد لله وصلته لخمس ساعات فى اليوم فقط .. وممكن فى اخر الاسبوع ازوده ل8 ساعات علشان اقدر اكمل الاسبوع اللى بعده ..
وان شاءا لله هدفى اوصله ل3 ساعات فقط يوميا .. ليه بقه ؟؟
لان فى الاخر حياتك مش هتعيشها غير مرة واحدة بس .. والحاجات اللى انت نفسك تعملها محدش هيعملها غيرك انت .. فلازم تعملها لو انت فعلا عايز تعملها
يعنى اللى عايز اقوله ان حياتك هي محصلة للى انت بتعمله .. فلو انت مستغلتش وقتك فى تحقيق اهدافك ما هو محدش هيحققهالك
يعنى انت مش من هتنام لحد لما تفطس وتصحى تلاقى نفسك بتدير شركة مثلا وعندك خبرة وكده
لكن الحاجة اللى لازم نستغلها كويس جدا .. هى اننا بدأنا بدري
وطبق بقه ده على كل حاجة فى حياتك .. فى ناس صحابى مثلا بياكلوا من اماكن غريبة ويشربوا شاي وقهوة بسم الله ما شاء الله بشكل مستفز .. وهما عارفين انها مضرة على المدى الطويل .. فبيسألونى مش بتشرب شاي ليه ؟؟ او مش بتاكل من التلوث اللى بياكلوه ليه ؟؟
فبقولهم ان فى الاخر دى حياتك ودى صحتك انت .. لو انت محافظتش عليها محدش هيحافظلك عليها
ولو انت مثلا مش بتلعب رياضة ما انت بعد كام سنة هتمشى بعكاز !!
انا كل ما اشوف حد من الناس الكبيرة فى السن .. واشوف مشاكلها الصحية .. اقول ما انا هبقى زيهم لما اكبر لو استمريت على اللى بعمله دلوقتى !!
فكده بقه :D
4- انا عايز اتكلم المرة دى واللى جاية على حاجة لا يعرفها احد تقريبا
تقريبا محدش يعرف عن الموضوع ده حاجة واول مرة اتكلم فيه
وهو عن الفترة اللى اعتقل فيها اخويا .. والزيارة اللى قمت بيها لامن الدولة
البداية
انا اخويا تفكيره سلفى .. عادى يعنى مش مشكلة .. واعتقاله فى امن الدولة كان بسبب انه بيصلى الفجر فى المسجد .. اه والله العظيم
المهم هو كان بيبقى زائر دائم عندهم .. يعنى كل سنة معروف ان فى الوقت ده من السنة بيجيوا يطبوا عليه فى البيت قبل الفجر .. يشوفوا فى ايه فى البيت ويروح معاهم اسبوع ويرجع تانى
الموضوع فعلا كان عملية روتينية .. لان الضابط فى الفترة دى ( فترة الترقيات ) لازم يقدم ما يثبت جدارة واستحقاقه للمكان اللى هو فيه .. فيعمل ايه ؟؟ ينزل يلم اللى بيصلوا الفجر فيقولوا اه الراجل ده جامد .. خليه فى مكانه
لان فى مصر هنا الناس بتتقاتل علشان تدخل جهاز امن الدولة .. زى ما الناس نفسها تدخل الاف بى اي فى امريكا كده
المهم فهو كان كل سنة ينزل يجيب نفس المجموعة ويروح نفس البيوت فى نفس الوقت قبل الفجر .. وياخد كام كتاب على كام شريط ويحرزهم ويقولك كده انا مسكت حاجة اهو
بالمناسبة .. من اهم اسباب بقاء حبيب العادلي فى اى وزارة ( والمشير طنطاوي كمان ) هو قوة الجهاز الامني الهائلة اللى عملوها .. وانخفاض نسبة العمليات الارهابية بشكل كبير .. مع ان السطوة والنفوذ الامنى دلوقتى تمادوا فيه وجاب نتائج سلبية كبيرة .. لكن يعنى
لكن اخر مره تم القبض فيها على اخويا كانت مختلفة .. لانه طول فيها لحد شهر .. وتم بعدها ترحيله الى سويسرا (سجن طرة)
فانا هكتب عن اخر مرة فقط الى حضرتها
هما ذهبوا الى بيته وكان اخويا فى نبطشية فى المستشفى .. وكانت زوجته فقط الموجودة فى البيت .. فقالتلهم انه فى المستشفى ومرضيتش تفتحلهم الباب
المهم يعنى مش متذكر التفاصيل يومها قوي .. لكن هو راح بعدها وسلم نفسه .. لانه عارف انه شر لابد منه
فراح فعلا وسلم نفسه هناك
ايه بقه وايه التفاصيل وليه الزيارة اللى عملتها لمقر امن الدولة .. وقابلت مين هناك وايه اللى حصل
الحلقة الجاية ان شاء الله :D
يلا السلام عليكم ورحمة الله وبركاته