Wednesday, April 23, 2008

ونجوت من الموت باعجوبة !!

السلام عليكم ورحمة الله وبركاته

متستغربوش من العنوان .. فهو فعلا حقيقة

نجوت من الموت باعجوبة

الحقيقة بعيدا عن مدى صحة هذه العبارة من عدمه

لكن هذا هو شعوري الان

يا الله .. كم هى صعبة هذه اللحظات

الان فقط .. احسست باحساس علاء جبة الله يرحمه فى لحظاته الاخيرة

عندما يكون بينك وبين الموت امتار قليلة .. وتنجو منه فتحمد الله تعالى

وقد لا تستطيع ان تدرك هذا الشكر .. ولا الاستغفار ... بل ولا حتى الشهادة

اليوم والحمد لله تعرضت لحادث من اشد الحوادث التى حدثت لي

واعتقد انه الحادث السابع الذى اتعرض له فى مصر الغالية


المهم القصة من البداية

انى كنت فى شغل ما فى منطقة ما .. وبعد ما خلصت رحت علشان اركب من ميدان لبنان

المهم ركبت وانطلق الميكروباص .. وعلى المحور بسبب اعمال الصيانة والاصلاح فالطريق اللى رايح اكتوبر بيمشى فى نفس الطريق اللى جاي من اكتوبر ماشى فيه

مع فاصل صغير فى النصف لمنع اعمال الغباء الازلي الموجود عند السواقين

المهم كان فى واحد ماشى ورانا وشكله كان واضح من الاول انه غبى من الطراز الاول

فكان سواق الميكروباص اللى انا راكب قدام جنبه .. بيعدى من جنب عربية من على شمال العربية

وبالتالي فكده فى عربية ( احنا بنعديها ) على يمينا .. وبعد كده الطريق اللى راجع من اكتوبر

فجأة لقينا الغبي بالفطرة ده عايز يعدي بالعافية

فجه من على يمين الميكروباص وحاول ياخد غرزة

وكان الطريق لا يسمح له اصلا بالمرور

فدخل بالعافية برضه

فالجزء الاخير من عربيته .. خبطت فى الجزء الامامي من الميكروباص

وحيث ان الخبطة كانت من اليمين

فالميكروباص زحف للناحية التانية ( اللى جايين من اكتوبر )

وانا راكب قدام جنبه

والعربية اللى خبطتنا برضه معانا

ودخلنا الناحية التانية خبطنا حوالى اربع عربيات

ثم الميكروباص رجع الناحية التانية واتقلب على جنبه ( الجنب اللى ناحية السواق ) وزحف مسافة حلوة كده

وتوقف

انا كنت قدام جنب الشباك .. وكان جنبى واحد صاحبى قابلته قدرا فى الموقف وركب جنبى

المهم والميكروباص مقلوب .. رحت على طول شادد نفسى وخرجت من شباك الباب الى جنبى

ونطيت من الميكروباص بسرعة

الحقيقة انا كنت فى حالة لا شعور .. كنت عايز اهرب من الموت وخلاص

لانى وانا بخرج لمحت بنزين العربية بينزل بغزارة

خرجت من الميكروباص .. ونسيت صاحبي اللى كنت بتكلم معاه قبل وقوع الحادثة باجزاء من الثانية

نسيت انه معايا .. كان كل همي انى ابعد عن المكان .. وكنت على يقين تام .. ان العربية ستنفجر

مكانش مهم عندى اى حد غير نفسى

مكنتش بفكر فى انقاذ 14 واحد تانيين فى الميكروباص .. غير 3 فى تاكسي .. والواد اللى خبطنا .. وواحده ست فى عربية اتخبطت برضه ... وتلاتة فى عربية تانية اتاكلت فى النص .. وكام واحد كانوا فى عربياتهم فى امان اتخبطوا

كل دول مكانوش مهمين عندى .. ولا كنت بفكر فيهم .. بقدر ما كنت بفكر فى انى اهرب من المكان ده على وجه السرعة

ياااااااه

للدرجة دى طلعت اناني


بعدها كان كل همي انى ابعد الناس عن البنزين .. معرفش كنت خايف جدا لحسن العربية تنفجر

كنت خايف من النار وحرارتها

لانى كنت عارف ان دى الحاجة الوحيدة اللى ممكن تموتنى بعد الحادثة

بعد ما انا خرجت لقيت صاحبى نط ورايا من الشباك برضه

وجم ناس كسروا الشباك الامامي وفتحوا الباب وبعدها عدلوا الميكروباص علشان الناس تنزل منه

وقام المتطوعون باخلاء الجرحى بعيدا عن مكان الحادثة

الغريب اللى انا مستغربله جدا

ان الحادثة دى لم تحرك فيا ساكنا

على الرغم انها من ابشع الحوادث اللى انا اتعرضتلها .. وتعتبر اشدها سوءا وكربا

لكن فعلا .. انا حاسس كأنها لم تكن

ربما لانى لسه فى تأثير الصدمة .. عمري ما تخليت نفسى راكب عربية وتتقلب

عمري ما تخيلت انى هموت دلوقتى .. يا نهار

طيب والذنوب اللى الواحد بيعملها ليل نهار

طيب والعبادات اللى الواحد مقصر فيها جدا

افتكرت بعد ما فوقت .. انى لسه مصليتش العشاء .. رغم ان معاده عدى

يعنى انا لو كنت مت .. كنت هتسأل اول حاجة عنها ..

يا الله

والله فعلا حسيت بعدها بحديث الرسول عليه السلام " من اصبح آمنا فى سربه معافا فى بدنه .. فقد حيزت له الدنيا بحذافيرها "

فعلا حسيته .. وحسيت بنعمه انك تبقى ماشى مطمئن

الحمد لله

الحمد لله على كل حال

Sunday, April 6, 2008

افكار تدور فى رأسي

السلام عليكم ورحمة الله وبركاته

معلش الواحد مشغول جدا فى كذا حاجة كده

ده غير ضغط الشغل اللى فتح مرة واحدة

المهم النهاردة انا عايز اتكلم على موضوعين الى حد ما ملهومش علاقة ببعض

الموضوع الاول : قصة الاساءة للرسول وردود الفعل اللى حصلت على الموضوع

الحقيقة انا كنت بفكر فى الموضوع .. وبعدين ؟؟

يعنى ماشى طلعنا مظاهرات لم يسمع عنها ولا لها احد .. وبعدين ؟؟

عملوها اول مرة والناس انتفضت دفاعا عن الرسول .. ورجعوا تانى وعملوها من غير ما يعملوا اعتبار للمليار وشوية اللى كلهم غثااااااااء ؟؟ .. طيب وبعدين ؟؟؟

وفضلت افكر .. طيب ما هو الرسول اصلا تعرض للاساءة وهو عايش .. يعنى قالوا عليه انه ساحر وكذاب ومنبوذ وكل حاجة .. اشمعنى ساعتها الصحابة لم ينتفضوا دفاعا عن الرسول برضه وعملوا مظاهرات ؟؟

مع العلم ان كلمة كذاب دى فى المجتمع العربى القديم تعتبر شتيمة كبيرة جدا جدا .. لان المجتمع العربى القديم بيقدس الاخلاق الاساسية بشكل غير طبيعي .. وكانوا ملتزمين بيها .. فالطبيعي عندهم ساعتها ان الصدق ده زى الاكل والشرب .. فان واحد يصفوه بالكذب زى ما تجيب واحد دلوقتى وتتهمه بالزنا وش مثلا

ومع ذلك محصلش حاجة ومحدش عمل حاجة ساعتها

لا دول حاربوه كمان .. وطردوه من بلده وكانوا بيأذوا اصحابه .. ولم يتحرك احد ساعتها فى مظاهرات ولا حاجة

طيب وبعدين ؟؟

فايه الموضوع بقه ؟؟

واكتشفت حاجة تانية اكبر بقه .. ان الرسول عليه الصلاة والسلام لم يثأر لشخصه ابدا .. ولم يكن يهتم اصلا باى اساءات لشخصه اطلاقا ..
يوم لما كان ساجد واترمى عليه امعاء الابل الميت برائحتها القاتلة .. وجاءت السيدة فاطمة تزيله عنه وهى تبكى ... فقالها كلمة انا متخيل انه كان بيقولها وهو مبتسم .. ان الله ناصر اباكي

لما اليهودي كان بيحط الزبالة قدام بيته .. وكان بيخرج يشيلها يرميها فى مكانها ويكمل طريقه

طيب وبعدين ؟؟

وبعدها حضرت درس لاحد الشيوخ اللى بحبهم جدا علشان تفكيره .. فلقيته بيتكلم فى النقطة دى .. وسبحان الله كأنه كان عارف انا بفكر فى ايه

قال ان مع احترامنا الشديد لكل الاساليب اللى الناس بتعملها للدفاع عن الرسول .. بس اصلا احنا مش بندافع عن الرسول

يعنى احنا قد نكون بنسئ للرسول اكتر ما بندافع عنه

وقال ان قبل المقاطعة وقبل المؤتمرات والمظاهرات والبوسترات وكل الكلام الجميل ده .. فى كذا حاجة قبلها

1- وهى الايمان الصادق بالرسول عليه السلام .. ودى المرتبة التانية بعد الايمان بالله تعالى
يعنى منبقاش بنقول احنا بنحبك يا رسول الله واحنا فداك وساعة الجد كله يخلع ..

2- دعوة الناس دى اصلا الى معرفة حقيقة الاسلام .. وهذه الدعوة تكون قائمة على الادلة العقلية وليس الوجدانية او القلبية .. يعنى مينفعش مثلا تروح تقوله ده رسول من عند الله .. يقولك ايه الدليل .. تقوله انه هو رسول او ان القرآن بيقول .. لا
لازم تقوله دليل عقلى ملموس يفهمه علشان يصدقك .. والا يبقى انت بتأذن فى مالطة

3- انه يبقى فى قوة تردعهم عن الاستمرار فى الاساءة .. يعنى مع الاحترام الشديد لكل اللى طلعوا فى مظاهرات .. معلش يعنى كام واحد فيهم بيفهم فى صنعته ومتقنها .. كام واحد عنده هدف انه ينفع بلده ووطنه
هما اصلا معملوش اللى عملوه الا لما اتأكدوا اننا غثاااااااء وملناش وزن
بدليل ان بعد كل اللى عملناه والمؤتمرات اللى عندهم واللقاءات والمظاهرات والمقاطعة والزخم الاعلامي اللى اتعمل ساعة الاساءة الاولى .. رجعوا تانى بكل برووود وعملوا فيلم كمان بقه مش حبة صور

وبالمناسبة .. بعد نشر الرسوم فى المرة الاولى .. نشرت بعدها فى كذا صحيفة اخرى بعدها بشهر تقريبا ... ومحصلش حاجة
لاننا ملناش وزن ولا قيمة ولا وجود اصلا .. ليه يعملوا اعتبار لملياااار وشوية وكلهم سلبيين ومحدش بيشتغل .. والاهم ان اكل عيشهم بايدهم هما ؟؟

عجبنى ابيات شعر لوليد الاعظمي الله يرحمه وقالها الدكتور طارق السويدان

اسلامنا لا يستقيم عموده .. بدعاء شيخ فى زوايا المسجد
اسلامنا لا يستقيم عموده .. بقصائد تتلى فى مدح محمد
اسلامنا نور يضيئ طريقنا .. اسلامنا نااار على كل من يعتدى

والشيخ اللى كنت بحضرله ده ذكر قصة فى النقطة دى

انه حصل مرة ان قيصر روسيا اختفى من على الارض لمدة شهر .. فجأة كده اختفى قيصر اكبر امبراطورية فى الوجود ساعتها
ومحدش عارف هو راح فين ولا ايه الاسباب ولا ايه مصيره حتى
لمدة شهر كامل مفيش اى اخبار عنه ولا معروف ايه اللى جراله

وبعد شهر ظهر تانى ورجع تانى .. تخيلوا كان ايه السبب ؟؟

ان خليفة المسلمين ساعتها ( للاسف مش متذكر اسمه) كان قاعد بيتناول فطاره .. فجاله خبر ازعجه .. فرمى الاكل اللى فى ايده على الارض ومشى وهو متنرفز

فقيصر روسيا اختفى شهر كامل خايف لحسن الخليفة ده يعمل فيه حاجة .. فلما اطمئن على نفسه وانه مش هيعمل فيه حاجة .. رجع تانى

انتوا متخيلين ؟؟

هل فى الوقت ده كان يجرؤ اى واحد هناك انه يسيئ للبواب بتاع قصر الخليفة حتى ؟؟

اذا لم نوجد قوة تحمينا ... يبقى نستاهل الى بيجرالنا

والقوة دى شاملة لكل حاجة .. قوة ثقافية واقتصادية واخلاقية واجتماعية وسياسية وعسكرية وكل حاجة

يقول الله تعالى

واعدوا لهم ما استطعتم من قوة ومن ركاب الخيل

ومعروف ركاب الخيل يعنى السلاح .. طيب ايه المقصود بكلمة قوة ؟؟
واكيد مش مقصود بيها القوة العسكرية والا ربنا مكانش هيكررها مرتين

فاحنا اللى بنعمله ده كله عبارة عن زوبعة فى فنجان فقط .. لا وزن لكل الاعمال اللى بنعملها طالما اننا نسينا الحاجات الاساسية
كل ده كلام فاضى اذا سيبنا الاساس

مش معنى كده اننا نبطل مقاطعة ونسكت وكده .. لا ده كويس لكن لازم نفهم ونعي ان مش ده الاصل

الموضوع التانى بقه وهو قصة الاضراب بتاع النهاردة


واللى يخصنى فيه الحقيقة هو موقف الاخوان منه

الحقيقة موقف الاخوان منه مخزي جدا وسلبى لابعد الحدود وغير متوقع من ناس المفروض انها بتفهم

يعنى احنا منين من كام سنة كنا بنشجع الناس انها تشارك فى الانتخابات ومتبقاش سلبية وتتحرك علشان تاخد حقها .. ودلوقتى لما هما اتحركوا وطلبوا دعمنا نقولهم لا ربنا معاكوا ملناش فيه ؟؟

يعنى ايه ان لما الناس كلها تتجمع على رفض الظلم والطغيان ( اللى الاخوان اصلا بيعانوا منه اشد المعاناه ) ولما يتجمع الشعب المصري على الهدف ده .. نقولهم لا معلش نستأذن احنا علشان بنحاول نتصاحب على النظام ؟؟

واللى يفقع اكتر .. البيان اللى صدر الهزيل واللى عنده هشاشة عظام وانيميا حادة جدا ولا كأنه جاى من الصومال .. ده غير الاسباب اللى ذكرها الدكتور محمد عزت .. يعنى عذر اقبح من ذنب على رأي المثل

يعنى ايه لم توجه لنا الدعوة ؟؟
اولا منطقيا ان اول ناس هتوجه لهم الدعوة هما الاخوان لان عندهم قدرات تنظيمية وحشد كبيرة .. ده الطبيعي .. واى واحد غبى ميعملش كده يبقى مش بيفهم فى السياسة اصلا
ثم كان فى اجتماع تنسيقي للاضراب ده .. وحضره الدكتور الكتاتنى رئيس الكتلة البرلمانية للاخوان .. وساعتها كل القوى الوطنية على طول قالت احنا موافقين الا الدكتور .. قالهم هرجع الاول للمكتب وربنا يسهل

يبقى ازاى لم تتم دعوة الجماعة وان الجماعة مكانتش تعرف حاجة عن الموضوع ؟؟
طيب ده اسمه كلام ؟؟

وبعدين هو الاخوان دول مش جزء من الشعب بيعانوا من الغلاء وجنون الاسعار وضعف المرتبات ؟؟ ولا دول نازلين من السماء ولا يمكن ربنا باعتلهم كنز بيصرفوا منه ؟؟

للاسف الاخوان خذلوا الشعب ايما خذلان .. وفعلا للاسف الشديد رقبتنا بقت زى السمسمة

وبالمناسبة بقه .. اصلا كل الاخوان مشاركين فى الاضراب ده على الرغم من الموقف الرسمى اللى بيغازل الحكومة علشان ياخد الحزب .. وحتى لو مكتب الارشاد اخد قرار او حاجة زى كده .. الاخوان بيعملوا اللى عايزينه وبيشاركوا برضه

يبقى ليه المكتب ياخد قرارات لا تعبر عن رغبة الاخوان الحقيقية ؟؟

فعلا الموقف بتاع الاخوان ده غير مشرف بالمرة وانا ادعو كل القوى الوطنية .. انها لا تشارك الاخوان فعاليتهم وخاصة المحاكمات العسكرية وان محدش يقف جنبهم معاملة بالمثل

ولولا ان الوقت دلوقتى لا يسمح بمثل هذه الاختلافات الشديدة .. لكنا شفنا حملات هجومية شديدة على الجماعة

ربنا يهدي الجميع يا رب

المهم فى الاخر بقه

انا عايز افكار منكوا نعملها فى المدونات

لانى مش لاقى وقت اجيب افكار مواضيع جديدة للمدونة .. فلو حد عنده فكره لله يقولنا عليها

والسلام عليكم ورحمة الله