أيام من حياتى

ضرورة حمل رسالة الإسلام

2010-10-09T11:29:00.002+02:00

السلام عليكم ورحمة الله

اولا لازم اوضح ان كل اللى بكبته فى المدونة ده .. ما هو الا تفريغ لخواطر او دروس او خطب لبعض الناس اللى بحبهم وبحب اسمعلهم

حتى اللى هكتبه النهاردة .. هو نفسه تفريغ لمحاضرة للشيخ حازم صلاح ابواسماعيل ربنا يحفظه ويشفيه شفاءا لا يغادر سقما

-----------------------------------

لازم تسمعوا الدرس ده للشيخ حازم صلاح ابواسماعيل

بعنوان

ضرورة حمل رسالة الاسلا م

لازم تسمعوها .. حوالي 17 دقيقة فقط

والسلام عليكم

مخلصين له الدين حنفاء

2009-10-16T19:38:00.002+02:00

السلام عليكم ورحمة الله وبركاته

الايمان .. لو حبينا نشرحه فهنقول انه التوحيد
والتوحيد يعنى العبادة والاخلاص .. او العبادة باخلاص

يمكن من اهم المواضيع .. ان لم تكن اهمها على الاطلاق

بالضبط زي موقف اتعرضتله .. كنت بعمل عصير جوافة بما انى من مدمني عصير الجوافة الطبيعية

فكانت فى واحدة .. واضح ان كان فيها حتة بايظة وانا مخدتش بالي وانا بعمل العصير

فبعد ما خلصت .. جيت اخدت منه حبة علشان اشوف السكر

لقيته بايظ !!

بالضبط الموقف ده يلخص كلمة واحدة

الاخلاص

الكلمة دي كتب فيها مجلدات وسطرت فيها كتب قيمة

ولم يستطع احد حتى الان ان يكشف سرها او يقدمها فى شكل ملموس

ليه الاخلاص ؟
لان الله تعالى لا يقبل من الاعمال الا ما كان خالصا لوجهه , موافقا لشرعه
ولان الله تعالى اغنى الاغنياء عن الشرك ... ولو واحد كان ليه هدف تانى من اى حاجة بيعملها غير وجه الله تعالى .. فربنا يترك له العمل كله .. له وللشريك التانى .. يتركهم الاثنين مع بعض يتصرفوا مع بعض

لو حد حب يعرف الايمان .. فهو يعنى التوحيد
والتوحيد يعنى ان العبادة والاخلاص .. او العبادة باخلاص

الاخلاص يعنى انك تتوجه بهذا العمل الى الله تعالى وحده .. لا تبتغي ثوابا ولا شكرا ولا جزاءا من احد الا هو وحده وفقط
طبعا معادلة صعبة

ولذلك قال الرسول عليه السلام : الاخلاص سر بين العبد وربه .. لا يطلع عليه ملك فيكتبه .. ولا شيطان فيفسده

فى بعض العلامات اللى لما تظهر .. يبقى لازم تعرف ان فى مشكلة فى الاخلاص
والكلام ده مش كلامي .. لكن كلام احد العلماء اللى بثق فيه وفى رأيه

اول علامة : عدم تقبل النقد
خلينا نفرض ان فى انسان بيعمل عمل عام .. مساعدة ايتام او دروس دينية او تحفيظ او بيجهز لمؤتمر .. ايا كان طبيعة العمل

الطبيعي فى البشر الاختلاف .. ولذلك خلقهم الله تعالى
ولذلك فبالتأكيد هتلاقي بعض الناس بيوجهوا انتقادات للعمل اللى انت بتعمله

توجيه النقد فى حد ذاته لا يقدح فى الاخلاص .. ولو وجه لك النقد وانت بعد ما سمعته حسيت انه غلط او انه مش فاهم وجهة نظرك او ان فى حاجة مش واضحة ليه .. او ان انت وجهة نظرك مختلفة تماما عنه .. كل ده لا يقدح ولا يؤثر فى الاخلاص

لكن الحاجة الوحيدة اللى تظهر لك (ولا اقول تضيع منك الاخلاص ) الاخلاص من عدمه .. هو عدم تقبلك للنقد اصلا
بمعنى انك تشعر من جواك ( حتى وان لم يظهر علنا) انك تضيق بهذا النقد الموجه للعمل بتاعك

لان اللى بيوجه لك النقد فى العمل اللى انت بتعمله بيبقى عايز العمل ده يخرج باحسن صوره
لانه لوجه الله تعالى .. ونحن نحاول الوصول للكمال فى كل شئ نقدمه لله تعالى
يبقى انت ليه بتضيق من النقد ؟؟

معنى انك زعلان من النقد ده .. معناه انك مش بتتوجه بالعمل ده لله تعالى
انما انت فى نيتك الاصلية الداخلية حاجات تانية انت عايزها .. سواء شكر من الناس او مدح او نظرة حب وتقدير او ايا كان نيتك
لكن المهم انه عمل مش مخلص لله تعالى

بغض النظر سواء انت هتعمل بالنقد ده او لا .. او انت شايف انه نقد مش فى محله او لا .. ده لا يؤثر فى الاخلاص

اما اذا كان الانتقاد ده لشخصك انت .. وانت زعلت من الاسلوب مثلا فده لا يقدح فى الاخلاص .. لانه مطلوب من المسلم انه يبقى ذو كرامه وذو عزة نفس مش خسيس وذميم .. وكل من هب ودب يخبط ويشطح فيه وهو ساكت .. لا انت لازم تغضب وترد لنفسك كرامتك وعزة نفسك اذا احتاج الموقف لذلك .. لكن احنا بنتكلم فى الانتقادات التى توجه للعمل الذى تؤديه زاعما انه لله تعالى

.. والزعل من توجيه الانتقاد للعمل يقدح فى الاخلاص .. لكن لشخصك فانت لازم ترد وتزعل لكرامتك
عدم تنفيذ النقد لا يقدح فى الاخلاص .. لكن الزعل من النقد يبوظ الاخلاص

ثاني علامة تدل على عدم الاخلاص من البداية اصلا .. هي حرص الانسان على النتائج

الانسان اللى بيعمل العمل لوجه الله تعالى .. بيبقى ملهوش غير هدف واحد فقط .. هو ارضاء الله تعالى ونيل الثواب والاجر منه
انما نطعمكم لوجه الله لا نريد منكم جزاءا ولا شكورا .. قال يا قوم ما سألتكم عليه من اجر ان اجري الا على الله
قل ان اجري الا على الذى فطرنى ... وغيرها من الايات

كلها تقول بانك طالما كان العمل لوجه الله تعالى ... فانت لا تنتظر الا شيئا واحدا وهو سيحدث يقينا .. وهو الاجر والثواب من الله

يبقى لو انت كنت بتعمل عمل زاعما انه لله تعالى .. والعمل ده انت منتظر منه نتيجة معينة .. ولم تحدث هذه النتيجة
اذا لم تحدث النتيجة فده لا يقدح فى اخلاصك .. لكن زعلك من جواك .. او زعلك الداخلي حتى وان لم يظهر عليك على ان النتائج لم تتحقق فده يقدح فى الاخلاص ويدل على انك لم تكن مخلصا اصلا

لانك لو كنت مخلصا فانت كان هدفك ايه ؟ الاجر والثواب .. فانت اخدته خلاص الحمد لله
لكن لو كنت متعلق بالنتائج المنتظرة من العمل .. يبقى روح خد الاجر والثواب من النتائج اللى انت منتظرها

مثال لو انت فضلت ورا واحد تنصحه وتتقرب منه وتحاول تصلحه .. وبعد كام سنة لم ينصلح حاله وزعلت على انك لم تحقق هدفك .. يبقى انت غير مخلص
لو فضلتي ورا واحدة علشان تخليها تلبس الحجاب الصحيح (مش حتة القماش اللى على الراس) وفضتلي وراها سنين وسنين .. ولم تلبسه وزعلتي على ان اللى عملتيه ده مجابش نتيجة معاها .. يبقى حضرتك لم تكوني مخلصة اصلا

وقس حياتك كلها على ذلك

ان شاء الله لو رايح تحضر درس .. وبعد ما وصلت الشيخ اعتذر .. وانت زعلت لانه مفيش درس .. يبقى انت مش مخلص
لانك اخدت الاجر والثواب من الله على حرصك على الحضور والاستفادة حتى وان لم تتحقق فعليا

اوعى تبقى زعلان من نتيجة كنت مستنيها ولم تتحقق .. لو انت بتدور على شغل ومش لاقي شغل .. اوعى تزعل وارضى بالنتيجة اللى اختارها الله .. بل افرح لانك اخدت الاجر والثواب من الله تعالى

وهنا فى نقطة مهمة جدا لازم تتقال

لو فرضنا قدامك عملين من اعمال الخير والبر او غيرها من الاعمال الدنيوية
واحد انت مستنى منه نتيجة معينة
والاخر مفيش منه نتيجة منتظرة لكنه عمل جيد ومحمود

لو كانت همتك وجهدك وحرصك وبذلك للمال والوقت فى العمل الاول ذو النتائج اكبر ولو يعنى بمقدار صغير .. من العمل الاخر اللى مفيش منه نتائج .. فده يدل على عدم الاخلاص

ويدل على انك بتتحرك بناءا على النتائج اللى انت عايزها .. وليس تحركا لله تعالى وابتغاء الاجر والثواب منه

مثال :
انت شغال فى حاجتين .. الاولى انك بتجهز لمؤتمر عام وفى استعدادات وتجهيزات ومتوقع تأثير كبير فى الناس
والعمل الثاني انك هتروح تخرج مع اصحابك تلعبوا كورة وانت اللى بتنظم اليوم الرياضي ده

لو حرصك وهمتك فى الاولاني كان اعلى من التانى .. يبقى راجع نفسك على الفور واسأل نفسك .. انا بعمل كده لمين بالضبط !

زي ما قلنا .. افتكر دائما ان ارضاء الله تعالى وابتغاء الاجر والثواب من الله تعالى هو هدفك الاول والاخير والوحيد والاوحد

خلينا نوضح مثال ظريف برضه

ايهما افضل عند الله تعالى مقاما ؟؟
سيدنا نوح عليه السلام ام صلاح الدين الايوبي؟

اكيد سيدنا نوح .. قطعا وبدون جدال ومش محتاجه تفكير يعنى

طيب .. سيدنا نوح لبث فى قومه الف سنة الا خمسين عاما
وصلاح الدين الايوبي مكملش حتى واحد على عشرة من هذه المدة .. اقل منها بكثير كمان

والنتائج ؟

سيدنا نوح .. وما آمن معه الا قليل !
وصلاح الدين الايوبي .. ربنا فتح عليه وعلى يديه وحرر القدس كمان واعادها للمسلمين

لو بمعايير النتائج يبقى صلاح الدين افضل عند الله .. لانه حقق نتائج افضل واحسن من سيدنا نوح عليه السلام

لكن قطعا الكلام ده غلط .. لا تقاس الامور بالنتائج .. ولكن لانهم يبتغون الاجر والثواب من الله تعالى . واخلاصهم لله وحده لا شريك له

ليس عليك ادراك النتائج .. ولكن عليك السعي فقط

العلامة الثالثة التى تدل على الاخلاص من عدمه

وانت ماشي فى العمل اللى انت بتعمله ده .. جه واحد وقدم لك نقدا فى العمل وانت قبلته بنفس راضيه
وبعد التفكير فى النقد ده تبين لك .. بما لا يدع مجالا للشك ان الطريق الى كنت ماشي فيه ده غلط

او ان العمل ده كان فيه اخطاء قاتله لا يمكن اصلاحها

ايا كان مفيش حاجة فى بالي دلوقتى .. لكن تبين لك ان العمل ده كان فيه اخطاء خطيرة وان الطريق ده غلط
انت رايح الغردقة وماشي فى طريق الاسكندرية الصحراوي وحد قالك ان الطريق غلط ولف وارجع تانى

هنا فى حالتين ... يا اما انك هتقف على طول .. فى لحظتها وترجع تانى
يا اما انك هتغير وجهتك اصلا وتكمل فى طريقك اللى بدأت فيه

لو تبين لك انك كنت على خطا وان الطريق لم يكن هو الطريق الصحيح .. فانت لو كملت فيه خطوة واحدة ... يبقى انت لم تكن مخلصا
لانك لو مخلص فعلا لله .. ايه اللى هيخليك تكمل فيه خطوة واحدة كمان ؟
كونك تكمل فيه خطوة واحدة فده يعنى انك مش بتعمله لله .. انما فى حد تانى شايفك او انت بتعمله علشان حد تانى او مستنى حاجة تانية غير رضاء الله وثوابه

وهنا فى حاجة كمان اضافية
مع انك تلف وترجع .. المفروض تعلن وتقول كده للناس
يعنى لا يكفي فقط انك تلف وترجع او توقف العمل بمعنى اصح .. لكن يجب ان يصاحبه كمان الاعلان للناس انك كنت مخطئا وانك هترجع للطريق الصواب

ايا كان .. سواء كان الاعلان ده بالقول او الفعل .. وسواء كان الصح يعرفوا علنا ام لا .. لكن المهم انك لا تجد فى نفسك اى ضيق او حرج او شئ من انك تعلن للناس على الملأ من قومك .. انك كنت مخطئ وانك هترجع للطريق الصحيح

فاذا انت لم ترجع للطريق الصحيح بعدما تبين لك الصح وانك كنت مخطئ .. فده يدل على عدم الاخلاص اصلا
واذا واجهت مشكلة او حرج فى نفسك .. من نقطة انك تعلن للناس صراحة عن انك كنت مخطئ وانك هترجع للطريق الصحيح .. فده ايضا يدل على عدم اخلاصك وعلى انك حاطط الناس ونظرتهم ليك قدامك .. مش رضاء الله تعالى

دي ثلاث علامات .. يعنى اجتهاد بعض العلماء ..

وانا مجرد ناقل لكلامهم مع بعض التصرف .. ربنا يرزقنا الاخلاص

مكارم الاخلاق ليست ترفاً

2009-09-14T14:48:00.010+02:00

السلام عليكم ورحمة الله وبركاته

من اربعة ايام .. وفقط اربعة ايام

كانت الذكرى الثانية

طبعا لا احد يذكر

ولا احد يعرف عن ماذا اتحدث

لكنها سنة الحياة

من اربعة ايام كانت ذكرى الحادث الاليم

ووفاة علاء جبة رحمه الله

ربنا لا يتذكره البعض .. وربما لم يره البعض الاخر

لكن .. هذه ذكرى .. علها تنفعنا

المهم نتكلم بقه فى الموضوع بتاعنا

مكارم الاخلاق

كتير من الناس فاكره ان مكارم الاخلاق دي حاجة كده زيادة

كمالة بمعنى اصح

لو يعنى عملتها فده خير وفضل منك

ولو سيبتها فخلاص انت قمت بالحد الادنى من العبادات

ومن الصلاة والصوم والزكاة

وعملتلك كام عمرة على كام حجة مسحت كل حاجة

فخلاص .. انت كده رايح الجنة حدف

ويااخي ان الله غفور رحيم .. واكيد ربنا هيسامحك لو كنت عملت غلط فى النص ولا اخدت ربع جنيه زيادة

فطالما انت صليت كويس وقلبك ابيض والمهم اللى جوه القلب .. وصمت رمضان كله وحجيت اربع مرات يا اخي .. متخافش

ودي طبعا ام المصايب وسبب البلاوي اللى احنا فيها

وانا شايف ان مشاكلنا كلها تتلخص فى الكلمة دي

مكارم الاخلاق

------------------------------

مبدئيا خليني اقول ان الموضوع ده طويل جدا جدا جدا

لانه تفريغ لخطبة جمعة سمعتها من واحد بحبه جدا جدا وربنا يكرمه ويطول فى عمره ويصلح عمله

فانا هحاول اختصر .. وانتوا حاولوا تعصروا على نفسكوا شوية وتكملوه

ويمكن حتى تلاقوا الاسلوب مختلف شوية ... بس على قد ما اقدر
---------------------------------------------

1-

قوة الامم لا تقاس بما تملكه من اسلحة ومعدات وتكنولوجيا
وان كانت القوة المادية دي مهمة وضرورية جدا علشان تحميها وتحافظ على تقدمها
لكن هيا عبارة عن معادلة .. لو فى عنصر فى المعادلة دي صفر .. فكل المعادلة تتحول الى صفر كبير

ما قيمة الاسلحة اذا كان من يستخدمها لا خلق ولا دين له .. يسفك ويقتل ويستبيح الدماء ويهلك الحرث والنسل !!
ما قيمة التكنولوجيا اذا كان من يستخدمها لا خلق ولا دين له .. يسرق وينهب وينشر الفساد ويعيث فى الارض فسادا !!
ما قيمة المعدات اذا كان من يستخدمها لا خلق ولا دين له .. يضيع حقوق البلاد والعباد .. يكذب ويختلس ويفسد ويغتصب !!
ما قيمة الاقتصاد القوي اذا كان قائما على السرقة وتكريس الطبقية واتاحة الفرصة لكل فاسد مرتشي وحرامي راشي بالعبث والافساد!!
ما قيمة مجتمع يملك كل ذلك .. وفيه اعلى معدل جريمة وقتل واغتصاب.. ولا يعرفون شيئا اسمه شرف او بكارة ولا تستطيع المرأة ان تسير ليلا دون ان تغتصب !!

لا يمكن باى حال من الاحوال ان تكون هذه المعايير مقياسا لتقدم الامم
ولو كانت فعلا هو معيار تقدم وقياس الحضارات .. لكنا لحد دلوقتى بنشوف فراعنة ماشيين جنبنا فى العربيات او راكبين معانا فى المترو

ولكانت الحضارة الامريكية الزائفة هتستمر الفترة الجاية .. وكانت قدرت تحمي نفسها من الازمة المالية العالمية .. التى هي بالاصل ازمة اخلاقية بحته ( هما مسمينها ازمة ثقة !)

لازم نفهم ان الازمات الاخلاقية تودي وتهلك الامم اكثر واشد من اهلاك الازمات المالية والاقتصادية بها

الفلوس ممكن ترجع .. المشاريع ممكن تشتغل تانى .. لكن الا العنصر البشري
واهم حاجة فى العنصر البشري اخلاقه

يبقى لما نتكلم عن مكارم الاخلاق فاحنا مش بنتكلم عن حاجة ترفيهيه فى حياة سعادتك
ولا حاجة لو كنت عايز تعملها اعملها .. او مش عايز بلاش

انما احنا بنتكلم عن واقع وحاضر مأساوي.. ومستقبل ربنا يستر منه اذا لم نغير من انفسنا فورا

وده واضح قوي فى البرنامج بتاع خواطر اللى بيعمله احمد الشقيري عن اليابان

ادركوا ان تقدمهم لن يكون الا باخلاق .. ففعلا ركزوا على بعض الاخلاق اللى للاسف احنا نسفناها بايدينا
النظافة ... العلم .. القراءة .. الاحترام .. النظام وغيرها

--------------------------------------------------------

2-

على المستوى الديني فكل الرسل والانبياء بعثهم الله تعالى لاجل ان يعالجوا مشكلة اخلاقية فى قومهم
فكل رسول بعثه الله لكي يبلغ قومه بان يعبدوا الله وحده لا شريك له .. ثم يقوم هو بمعالجة المشكلة الاخلاقية في قومه
والدليل :

( وما ارسلنا من قبلك من رسول الا نوحي اليه انه لا اله الا انا فاعبدون)
سيدنا نوح .. ( ولقد ارسلنا نوحا الى قومه فقال يا قوم اعبدوا الله .. مالكم من اله غيره)
سيدنا هود.. ( والى عاد اخاهم هودا .. قال يا قوم اعبدوا الله ما لكم من اله غيره )
سيدنا صالح .. ( والى ثمود اخاهم صالحا .. قال يا قوم اعبدوا الله مالكم من اله غيره )
سيدنا شعيب .. ( والى مدين اخاهم شعيبا .. قال يا قوم اعبدوا الله مالكم من اله غيره )
سيدنا عيسى ..( ما قلت لهم الا ما امرتنى به ان اعبدوا الله ربي وربكم .. وكنت عليهم شهيدا ما دمت فيهم )
سيدنا محمد قال للناس ( قولوا لا اله الا الله تفلحوا )

فكل نبي من الانبياء جاء اولا الى توحيد الله تعالى
ثم يقوم كل نبي بمعالجة الازمة الاخلاقية التى يعيشها قومه
سيدنا هود ..( اما عاد فاستكبروا فى الارض بغير الحق وقالوا من اشد منا قوة )
سيدنا صالح ..( واما ثمود فهديناهم فاستحبوا العمى على الهدى )
سيدنا موسى .. ( ان فرعون علا فى الارض وجعل اهلها شيعا يستضعف طائفة منهم .. يذبح ابنائهم ويستحيي نسائهم )
سيدنا شعيب ..( اوفوا الكيل ولا تكونوا من المخسرين .. وزنوا بالقسطاس المستقيم )
سيدنا لوط .. ( اتأتون الذكران من العالمين.. وتذرون ما خلق لكم ربكم من ازواجكم )
اما الرسول عليه السلام فقال .. انما بعثت لاتمم مكارم الاخلاق

فكل نبي جاء ليعالج ازمة اخلاقية يعيشها قومه .. بعد ان يأمرهم بتوحيد الله تعالى والايمان به

فهنا يجب ان نفهم ان مكارم الاخلاق من صميم الحياة .. ومن صميم الدين الذى جاء به الرسول عليه السلام
وهنا لفته ظريفة .. فان الايمان والاخلاق متلازمان .. كما سنقول فيما بعد

----------------------------------------------------------------

3-

مكارم الاخلاق ليست ترفا فى الحياة .. ,لا شيئا اضافيا عليها ان شئت التزمت بها وان شئت تركتها
تصلي وتصوم .. وان شئت تكون صادقا او لا
او ان شئت تكون حيياً ( من الحياء ) او لا
او ان شئت تكون امينا او لا
او ان شئت تكون محترما فى قولك وفعلا وتراعي الاخرين وتراعي مشاعرهم او لا
او ان شئت تكون نظيفا منظما محافظا على كلمتك وعلى مواعيدك او لا

لا طبعا
لان مكارم الاخلاق من صميم الايمان .. وهى الغاية التى جاء من اجلها الرسول عليه السلام
الجيل السابق من الصحابة قدم الاسلام باخلاقهم الرفيعة وتدينهم الجميل
ونحن اليوم نقدم الاسلام اقوالا ولا انعكاس لهذه الاقوال على افعالنا
(كبر مقتا عند الله ان تقولوا مالا تفعلون)

-----------------------------------------------------------

4-

الصلاة على سبيل المثال .. نؤديها خمس مرات فى اليوم
ولكن لا انعكاس على اخلاق الصلاة علينا وفى تصرفاتنا
يقول الله تعالى ( ان الصلاة تنهى عن الفحشااااااء والمنكر)
نسمع هذه الاية كل جمعة .. ولكن لا نعمل بها
هدف الصلاة الاساسي ان تطهرك من فحش القول والفعل .. وان تحفظ عليك لسانك ونفسك الامارة بالسوء
تخيل لو ان الناس ادركت هذا الهدف العظيم للصلاة .. فلو كان بيتاجر فى السوق وحس انه بدأ يفقد اخلاق الصلاة .. يلاقى المؤذن يناديه لكي يتزود من اخلاق الصلاة ويرجع مرةا خرى الى السوق باخلاق الصلاة

الذي يحدث الان .. ان الناس دخلت الى المسجد والى الصلاة باخلاق السوق .. ولم تخرج الى الحياة باخلاق المسجد

واذا لم تقم الصلاة بهذا الدور وهذا التأثير فيك .. تحولت الى مجرد افعال رياضية والعاب سويدي تعمل ريفريش ليك فى اليوم خمس مرات

يقول احمد شوقي:

لو لم تكن الصلاة راس العبادات لعدت من صالح العادات
رياضة ابدان .. وطهارة اردان .. وتهذيب وجدان .. وشتى فضائل يشب عليها الجواري والولدان.
اصحابها هم الصابرون والمثابرون .. وعلى الواجب هم القادرون .
عودتهم البكور وهو مفتاح باب الرزق .. وخير ما يُعالج به العبد مناجاة الرازق

•انظر جلال الجمع , وتامل اثرها بالمجتمع
وانظر اليها كيف ساوت العلية بالزمع
مست الارض الجباه , فالناس اكباء واشباء
الرعية والولاة .. شرع في عتية الله
خر الجمع للمناخر .. فالصف الاول كالآخر
لم يرفع المتقدم تقدمه .. ولم يضع المتاخر تاخره

فالصلاة ليست افعالا رياضية نؤديها خمس مرات فى اليوم .. وانما هي دعوة صريحة لمكارم الاخلاق
ان تتعلم انه لا فرق بينك ولا بين الغفير الذى يقف بجوارك
ان تتعلم التواضع فى الصلاة .. فلا تسبق الامام ولا تساويه فى الافعال
ان تتعلم التواضع فتخر ساجدا لله وتضع جبينك على الارض
ان تتعلم ان الله تعالى يطلبك خمس مرات فى اليوم .. فلا تغش الناس ولا تظلم احدا ولا تسب ولا تسرق ولا تختلس من احد

الصلاة دعوة للعباد جميعا ان يتقاربوا فلا يتباعدوا .. ان يتحابوا فلا يتباغضوا .. ان يتعارفوا فلا يختلفوا
ان يتصافوا جميعا فى الصف فلا يتشاحنوا
يصلون خلف امام واحد .. يقرأون كتابا واحدا .. يؤدون اعمالا واحدة
حتى يصبحوا كالبنيان .. يشد بعضه بعضا

----------------------------------------------------
5-

الزكاة ليست ضريبة يدفعها الغني للفقير .. وليست مجرد تداول للاموال
بل هي اولا غرس لمشاعر الحب والحنان والعطف بين المسلمين
وتوطيد لعلاقات المحبة والالفة بينهم وفى شتى طبقات المجتمع

ما فائدة زكاة تدفعها للفقير .. وانت تمن عليه وتتكبر عليه وتذله بها !!

وكتير من الناس فاهمين ان الصدقة عبارة عن مال تدفعه لمن يستحق
وهو مفهوم خاطئ تماما

الرسول عليه الصلاة لم يحصر الصدقة فى هذا المفهوم.. بل قال ان الصدقة تشمل اى باب من ابواب الاصلاح الاجتماعي ونشر ثقافة الحب والخير والالفة بين الناس
انظر الحديث:
ارشادك الرجل فى ارض الضلال صدقة (تقول للراجل على الطريق اللى هو عايزة)
وان تفرغ من دلوك فى دلو اخيك صدقة ( تديله بوء ميه مثلا )
وان تحمل الرجل على دابته صدقة ( عربية عطلانة وتصلحها معاه او تزقهاله لحد لما تشتغل )
واماطة الاذى عن الطريق صدقة
والكلمة الطيبة صدقة
وتبسمك فى وجه اخيك صدقة !!

تخيل انك حتى لما تبتسم فى وشه .. حسبت لك صدقة !!

فالصدقة تأكيد للاخلاق الحسنة بين الناس .. وتأكيد على ان الاخلاق من اساسيات الايمان

ثم هنا فى نقطة
الاجمل انك تقدم الصدقة دون ان تطلب منك
يعنى لا تنتظر حتى يطلب الشخص منك المساعدة فتقدمها له
لما هاجر الصحابة واخا النبي بين سيدنا كعب بن الربيع وسيدنا عبدالرحمن بن عوف
قاله انا اكثر الانصار مالا فاقسم مالي نصفين !!
طيب ليه ؟

ليه مقالهوش زي ما احنا بنعمل دلوقتى .. لو احتاجت حاجة كلمنى !! متتكسفش !!
علشان مكارم الاخلاق عندهم كانت عالية
مكانش عايز يجرحه وكان بيراعي احاسيسه ومشاعره
فاداله الفلوس على طول حتى ولو كان مش عايزها .. بس لمجرد انه لا يجعله محتاجا للمال فيذهب هو اليه يطلب منه المال

مع انه اداله الصلاحية دي .. انه يجي يطلب منه فلوس براحته
بس علشان ميخليهوش يشعر باى نوع من الاحراج وهو بياخد الفلوس !!

--------------------------------------------------------
6-

الصوم .. وما ادراك ما الصوم
يقول الرسول عليه الصلاة والسلام:
من لم يدع قول الزور والعمل به فليس لله حااجة فى ان يدع طعامه وشرابه
ويقول ليس الصيام من الاكل والشرب .. انما الصوم من اللغو والرفث .. فان سابك احد او جهل عليك فقل انى امرؤا صائم
وقال .. رب صائم ليس له من صومه الا الجوع والعطش !!
طب ازاي

اذا كان الصيام اصلا يعنى الامتناع عن الاكل والشرب من الفجر لحد المغرب ..
يبقى انا بعد ما اعمل ده كمان .. لا اخذ اجرا عليه ؟

اه .. لانك لم تتعلم الفائدة والحكمة من الصوم .. والاخلاق الحسنة اللى بيزرعها فيك الصوم

انت بقالك عشرين سنة بتصوم كل سنة لمدة شهر كامل
ولا تستطيع ان تقاوم السجائر !!
بقالك عشرين سنة بتصوم .. ولا تستطيع ان تقاوم شهواتك ونزواتك !!
بقالك عشرين سنة بتصوم ... ولو حد جه كده وعمل فيك حركة بتسمعه كل انواع الشتيمة والسب ولا تستطيع ان تكظم غيظك!

من اهم اهداف الصيام ان تتعلم كيف تربي عزيمتك .. وكيف تقوي ارداتك وتتحكم فى شهواتك
لا تجعلها هي تتحكم فيك
ما انت لو رحت واكلت وحدش شايفك خلاص مش ازمة
لكن انت بتمنع نفسك بنفسك .. علشان تعلم نفسك الاصرار والعزيمة

وكذلك الحج وكافة العبادات اللى احنا مأمورين بيها

------------------------------------------------
7-

اهم نقطة فى الموضوع بقه والخلاصة بتاعته
النبي عليه السلام وضح لينا ان الايمان القوي .. يولد الخلق القوي
وان انهيار الاخلاق لدى الانسان .. سببه الاساسى ضعف الايمان
والعكس

فـ
ضعيف الايمان .. ضعيف الخلق
وضعيف الخلق .. ضعيف الايمان

لا يمكن.. ان تكون مؤمنا وتصلي وتصوم وتزكي وتحج وتعتمر وتكسر الدنيا بالعبادات
وانت تغش الناس .. او تسرق .. او تخدعهم .. او ترتشي او تعاكس او تدخن السجائر فى الميكروباص بدون مراعاة للناس واللى حواليك او لا تقوم بعملك بضمير وتقول على قد فلوسهم

يقول الرسول عليه السلام فى حديث خطير جدا جدا جدا
الحياء والايمان .. قرناء
ان رفع احدهما رفع الاخر
ويقول : الايمان بضع وستون شعبة .. اعلاها لا اله الا الله وادناها اماطة الاذى عن الطريق .. والحياء شعبة من الايمان

الناس اللى بتتكلم بالفاظ سيئة فى الشارع وفى الطريق .. رفع الحياء منهم فرفع الايمان
الناس اللى بتشغل الموبايل الصيني بصوته المزعج فى المترو وفى الميكروباص .. رفع الحياء منهم فرفع الايمان
الناس اللى بتاكل وتشرب علنا قدام الناس بدون استحياء او خوف على مشاعر الفقراء وغير القادرين .. رفع الحياء منهم
الناس اللى بتلبس ملابس غريبة الشكل .. رفع الحياء منهم
البنات اللى بتلبس لبس .. الكفار ساعة الجاهلية الاولى مكانوش بيلبسوه لبناتهم ونسائهم وكانت البنات ساعتها تتكسف انها تلبس حاجة زي كده .. رفع الحياء منهم

ويقول عليه السلام :
اكمل المؤمنين ايمانا .. احسنهم خلقا

ويقول عليه السلام ايضا :
الخلق الحسن يذيب الخطايا كما يذيب الماء الجليد . والخلق السوء يفسد العمل كما يفسد الخل العسل

يقول عليه السلام :
ان الله يحب معالي الاخلاق .. ويكره سفاسفها

ويقول ايضا:
من سعادة المرء حسن الخلق .. ومن شقاوته سوء الخلق

يقول الرسول فى حديث اخر:
والله لا يؤمن .. والله لا يؤمن .. والله لا يؤمن

يانهار ابيض .. مين ده اللى رايح جهنم حدف
اكيد عمل مصيبة ... كفر بالله او اشرك او عمل حاجة كبيرة جدا خلت الرسول يحلف ثلاث مرات على عدم اكتمال ايمانه

قال الرسول : الذى لا يأمن جاره بوائقه

اللى جاره لا يستطيع ان يأمن من اذاه
سواء كان اذى سمعى ( الفاظ وشتيمة وصوت عالي او صوت تيلفزيون او راديو او اغاني )
او اذى بصري ( يشوف بيتك بشكل سئ او بناتك او اولادك او ترمي الزبالة فى مكان فى النص بينكوا او قدامه او توقف العربية قدام باب البيت او يشوف منك منظر مش كويس )
او اى نوع من انواع الاذى ( تشهد ضده زور او تشتمه او تضربه او تسلط عيالك عليه الخ الخ الخ )

واعتقد ان كل دي اعمال لا تدخل ضمن العبادات .. انما هي بالدرجة الاولى اخلاق اجتماعية تساعد المجتمع على النهوض والعمل الجاد

شوف الحديث اللى جاي :
من كان يؤمن بالله واليوم الاخر .. ها يعمل ايه
اكيد الرسول هيقول يصلي كويس .. او يقيم الليل ... او يحج اربع مرات مثلا
لا
انما قال :
من كان يؤمن بالله واليوم الاخر .. فليحسن الى جاره
ومن كان يؤمن بالله واليوم الاخر .. فليكرم ضيفه
ومن كان يؤمن بالله واليوم الاخر .. فليقل خيرا او ليصمت

كلها اخلاق حسنة .. يحث الاسلام عليها .. بل ويربطها الرسول عليه السلام بالايمان
فالمؤمن .. يكرم الضيف .. والمؤمن يحسن الى جاره
ولا يكون مؤمنا اذا لم يكرم ضيفه .. ولا يكون مؤمنا اذى اساء الى جاره

حديث اخر:
ثلاث من كن فيه .. كان منافقا وان صلى وصام وحج واعتمر وقال انى مسلم
يا نهار .. ثلاث صفات .. تبقى انت منافق على طول ولو عملت العبادات كلها واقسمت على انك مسلم وعملت اذاعة للناس انك مسلم
اذا حدث كذب .. واذا وعد اخلف .. واذا اؤتمن خان

وكلها اخلاااااااااق .. مش عبادة بتعملها زي الصلاة والصوم والزكاة .. كلها اخلاق الطبيعي انها تبقى فى اى بني ادم طبيعي

تخيل الحديث الجاي
اتدرون من المفلس ؟؟
قالوا : المفلس فينا من لا درهم له ولا دينار
فقال الرسول : المفلس من امتى من يأتي يوم القيامة بصلاة وصيام وزكاة
ويأتي وقد سب هذا .. وقذف هذا .. واكل مال هذا

تخيل .. يأتي برصيد عبادات رائع وكبير جدا جدا
ولكن رصيده فى الاخلاق صفر !!!

يقول الرسول عليه السلام:
الا اخبركم باحبكم الي .. واقربكم من مجلسا يوم القيامة ؟؟
قال احاسنكم اخلاقا .. الموطئون اكنافا .. الذين يألفون ويؤلفون

لم يقل اكثركم صلاة وزكاة واللى حج عشرين مرة !!

يقول عليه السلام:
ما من شئ اثقل فى ميزان المؤمن يوم القيامة .. من ايه بقه ؟؟
صلاة .. صوم .. زكاة .. عمرة .. ذكر !!
من خلق حسن !
تكملة الحديث: وان صاحب الخلق الحسن ليبلغ درجة الصائم القائم
يعنى انت باخلاقك الحسنة تبلغ نفس درجة العابد الزاهد
لكن العابد الزاهد لا يبلغ درجة صاحب الخلق الحسن

لا ومن تمام حسن الخلق الاحسان الى جميع المخلوقات
الرجل دخل الجنة بسبب كلب سقاه .. والمرأة دخلت النار بسبب قطة حبستها ولم تطعمها !!

لم يذكر الحديث شيئا عن صلاة وصيام الرجل عبادته لله .. ولا شيئا عن تفريط المرأة فى حق الله تعالى وفى الصلاة والصيام والزكاة
وانما ذكر شيئا واحدا يتعلق بخلق الاثنين .. ده عنده رحمه وعطف على الضعفاء
والتانية عندها كبر وجبروت وظلم للضعفاء
حتى وان كان الضعيف من الحيوانات !!

المرأة اللى ماتت فكان الناس يذكرونها بحسن صلاتها وصيامهم وتقواها
فالرسول قال : هي فى النار !!
يا نهار ابيض .. تصلي وتصوم وكمان دخلت النار خلاص
ليه .. لانها كانت تؤذي جيرانها

بس !! اه والله العظيم بس
كانت تؤذي جيرانها بس
فدخلت النار .. ولم تنفعها لا صلاتها ولا عبادتها
لانها اصلا متعلمتش الاخلاق اللى المفروض تتعلمها من هذه العبادات

ويحث الاسلام على التحلي بالاخلاق الحسنة وتحمل الاذى من الاخرين فيقول عليه السلام
(المؤمن الذى يخالط الناس ويصبر على اذاهم .. خير واحب الى الله من المؤمن الذى لا يخالط الناس ولا يصبر على اذاهم)

تخيل ان الاثنين مؤمنين .. والاثنين عندهم اخلاق .. لكن واحد فى عنده نقص فى خلق الصبر على الاذى .. وعلشان لا يرد على اذى الناس باذى مثله .. فقالم باعتزال الناس ولا يخالطهم
فى حين ان الاخر عنده خلق الصبر على الاذى ومسامحة الناس
فده يزيد على التانى .. ليه .. بسبب حسن الخلق

كل هذه الاحاديث .. لتؤكد
ان مكارم الاخلاق هي من صميم الايمان بالله
بل قد تكون سببا فى ذهابك الى الجنة
او الى النار
حتى ولو جئت يوم القيامة بحسنات لا حصر لها

-----------------------------------------------------------
8-

علشان كده .. كان الرسول عليه السلام صاحب الخلق العظيم
( وانك لعلى خلق عظيم)

لانه القدوة لينا جميعا
(لقد كان لكم فى رسول الله اسوة حسنة لمن كان يرجوا الله واليوم الاخر )

وبس :)

الكل يستخدم سلاح المقاطعة .. الا نحن !!!

2009-08-29T15:01:00.004+02:00

السلام عليكم ورحمة الله وبركاته

1- تدور فى رأسي افكار كثيرة ولكن للاسف كالعادة يقتلنى الوقت ولا استطيع التفرغ لتسجيل هذه الافكار

2- ان شاء الله فى موضوع بجهزه .. اعتقد اننا لازم كلنا نفهمه كويس وهيبقى عن مكارم الاخلاق .. هو باختصار موضوع كان شاغل بالي من فترة طويلة .. وهو فصل بعض الناس بين حياتهم ومعاملاتهم اليومية والذى يمكن تلخيصها فى الاخلاق .. وبين عباداتهم وشعائرهم

كنت بستغرب جدا من واحد الاقيه فى المسجد فى الصف الاول ويا سلام على الاخلاص .. وفعلا بيبقى بيبكي من قلبه ونفسه ربنا يتوب عليه ويدخله الجنه

واول ما يخرج من الجامع .. يسب الدين ويلعن ويفتري على ده ويسرق من ده

كان قمة علامات الاستفهام فى موقفين .. الاول كان احد الصحفيين كتب عنه حيث كتب انه مرة وقع صاحبه فى مشكلة وكان الحل عند احد الافراد الذين يعملون فى مصلحة ما .. وكان معروفا بالتدين والالتزام واللحية والصلاة واوعى وشك يعنى .. شيخ الاسلام قدامك

كتب الصحفي ده انه ذهب مع صاحبه لحل المشكلة .. واللى كانوا مخطئين فيها تمام .. وتكلموا مع هذا "الشيخ" حتى اتفقوا على رقم "رشوة" علشان القصة تعدي على خير .. وقد كان
وبعد ما دفعوا الفلوس قاموا جميعا وصلوا العشاء .. وكانت زيارة ايمانية رائعة ما شاء الله !!

الموقف التانى كنت بشوفه بعيني فى الجامعة .. كنت بستغرب ازاي واحد يبقى مثلا قاعد مع بنت وبيعملوا حاجات تشيب .. وساعة الاذان يقوموا الاتنين ده يروح يصلي فى الجامع ودي تروح تصلي

لا والادهى كمان لما تشوفهم وهما قبل اللى بيعملوه ده واللى انتوا عارفينه ده .. تلاقيهم بيقروا قرآن مع بعض .. وفى بعض الاحيان تلاقيهم بيحفظوا ويسمعوا لبعض

من المواقف دي اللى كانت بتخليني مستغرب وكأني من كوكب تانى .. انك تلاقى واحد يدعي انه داعية وانه ممسك بزمام الناس الى الطريق الصحيح !! وفى النهاية تسمع قصص تخلي الانسان يفتح القبر وينام احسنله من القصص دي

المهم الخلاصة .. كانت خطبة جمعة واحدة لواحد بيفهم .. زبط الدنيا دي كلها عندي الحمد لله .. فقلت لازم اكتب عن الموضوع ونفهمه كويس

لكن ده خليه للمرة الجاية

المرة دي انا بكتب وانا مفقوع

والكلام هيبقى برضه عن المقاطعة

ومش هبطل اتكلم عن المقاطعة لسببين :

الاول ان المقاطعة دي لا تعتبر ترف من الحياة .. ان شئت عملتها او لا .. واعتقد ان اللى هكتبه النهاردة ده يرد على كل المشككين فى جدوى المقاطعة ..

والسبب الثانى .. اننا عمرنا ما هنعمل حاجة فى حياتنا طول ما الكسل بينخرب فى جسدنا .. وطول ما شهواتنا متحكمة فى تصرفاتنا
مش ممكن اننا مش عارفين نبطل بيبسي !!
دي قمة الاستسلام والانصياع للشهوات !!

المهم القصة ايه بقه

احنا عندنا فى الشغل احد اكبر العملاء اللى بنتعامل معاهم .. ماركة عالمية فى الاثاث المنزلي

اسمه أيكيا IKEA

انا بطبيعة شغلي بتابع اخباره باستمرار علشان نعرف الدنيا ماشية ازاي وايه الخطوات اللى هتتعمل وكده

كان يا ما كان واحد من الصحفيين السويديين .. راح فلسطين ودخل غزة
المهم انه عمل تحقيق صحفي عن فضيحة كبيرة جدا فى الجيش الاسرائيلي

وللاسف الاعلام العربي كله لم يعيرها اي اهتمام

الفضيحة دي كانت سرقة الجنود الاسرائيليين لاعضاء الاسرى الفلسطينيين بعد قتلهم

وكان بيركز على قضية احد الشباب الى اختطف من قبل جنود الاحتلال .. ورجعت جثته وبها خياطة من اول الرقبة وحتى اسفل البطن

واعضاء من جسمه مسروقة

المهم مش هتكلم عن سرقة الاعضاء دي دلوقتى لكن خلينا نتكلم فى موضوعنا

طلع التحقيق الصحفي ده واتنشر .. والجزيرة ترجمته ونشرته للى عايز يقرا ويشوف على اللينك ده

لقراءة التحقيق الصحفي عن سرقة اعضاء الاسرى الفلسطينيين

بعد ما نشر التحقيق ده .. قامت الدنيا ولم تقعد فى اسرائيل

ويعنى الحكاية كبرت جدا وبقت حركة احتجاجات كبيرة وكأنهم خدوا على قفاهم

المهم .. من بين كل الهوجة دي .. طلعت مجموعة ونادت بمقاطعة المنتجات السويدية

وكانت منها .. منتجات العميل بتاعنا ده .. وسيارات فولفو ( لانهم صناعة سويدية )

المهم .. خلال يومين اثنين من بداية الموضوع .. وبعد بداية الدعوة للمقاطعة

بعدها بيومين فقط .. يومين فقط ( يا محبطين ويااللى مش قادرين تبطلوا تشربوا بيبسي وتاكلوا كنتاكي)

وصل عدد الموقعين على عريضة المقاطعة على الانترنت حوالي 10 الالاف بنى ادم اسرائيلي

ولو مش مصدق ادخل شوف بنفسك

من صحيفة الجيرزولم بوست الاسرائيلية

انا من فقعتي .. مش قادر اعلق

لكن نفسي اشوف واحد من اياهم .. من المحبطين والفاشلين اللى بيقولوا ان المقاطعة ليس لها جدوى

وانها هتخرب بيوت مصرية مفتوحة !!

تخيلوا اسرائيل اللى هيا كام مليون واحد .. واعتقد يعنى ان حركة التجارة السويدية الى اسرائيل مش اللى هيا يعنى

واحنا مليار وشوية .. او بلاش خلينا نتكلم فى العالم العربي بس

وبنشتري كميات سلع رهيبة من امريكا ( خليها امريكا بس وننسي بريطانيا وفرنسا دلوقتى )

ومش قادرين نبطل شرب بيبسي وناكل كنتاكي

ولا حول ولا قوة الا بالله

رحمك الله يا عمي

2009-07-05T19:00:00.002+02:00

عدت الى البيت بعد يوم عمل طويل .. وتعب وجهد كبير من التمرين الذى اذهب اليه بعد العمل
دخلت الى المنزل ليلا .. سلمت على ابى وامي .. سألت ابى عن حال عمي المريض .. وما هي حالته اليوم .. فاجاب بانه لا شئ جديد
اخبرتنى امي بانى غدا سأذهب الى قريتنا الصغيره لانجاز بعض الاعمال .. وان زوجة عمي ستأتي معي صباحا ... دخلت فى نقاشات كبيرة .. لا اريد الذهاب لان احد اصدقائي سيأتي الي فى الجمعة وسنذهب سويا الى بعض المشاوير .. وكان ابرزه هذه النقاشات ان زوجة عمي لن تستيقظ فى السابعة صباحا وانما هي تريد ان نتحرك فى الحادية عشرة صباحا
انتهت النقاشات بانى سأتحرك فى الثامنة صباحا .. وهي ستحاول الاستيقاظ مبكرا للذهاب معي

عند دخولى فى محاولة للنوم بعد التعب المضنى .. فوجئت بجرس الباب المزعج واذ بعمتى تصيح " الحقوا عمكوا شوفوا ماله "

اخبرنى اخي بسرعة التوجه لشقته فى الدور الاعلى .. واستيقظ ابي على الصوت العالى .. وذهبنا بسرعة الى الشقة التى نستضيفه بها
كان يرتعش بشدة .. والعرق يتصبب منه .. ويصرخ من شدة الالم .. ويقول الحقونى

حملناه من على السرير .. واجلسناه على السرير .. هدأ قليلا ..
ظننا انه الحر .. الحمد لله هدأ كثيرا .. حملناه مرة اخرى ووضعناه على السرير .. قال بانه يريد النوم .. ونام بالفعل

عدنا الى بيوتنا وغرفنا .. وانتهى اليوم

فى الصباح استيقظت مبكرا واخذت ما اريد وانطلقت بالسيارة الى القرية .. ولم تأت زوجة عمي معي

وكان لله فى ذلك حكمة

اخبرتنى امي باني سأخذ بعض الاغراض الخاصة بمنزلنا بالقرية .. بعض المفارش والملايات .. حسنا يا امي بعضها لا يضر

وصلت لقريتنا .. انجزت ما جئت من اجله .. واثناء انتظاري لاحد الاشخاص لكي انجز بعض الاشياء معه .. رن جرس الموبايل اللعين

انه اخي .. عمك توفاه الله تعالى من شوية يا عمر

اذهب الى اسامة ( ابن عم ابي ) واخبره وقم باعداد الترتيبات والتجهيزات للدفن

اغلقت الهاتف وانا فى صدمة .. لا حول ولا قوة الا بالله

ذهبت الى اسامة .. ايقظته من النوم .. واخبرته .. حمد الله واسترجع .. وانطلقنا الى المساجد ننعى فقيدا كنت بالامس اجلس معه

بعد ان انهيت الترتيبات فى قريتنا .. انطلقت بالسيارة مسرعا الى بيتنا .. وصلت قبل اذان الجمعة بعشر دقائق

صعدت السلم الى نفس المكان الذى كنت اصعد اليه بعض الليالي

وجدت سرير عمي خاليا .. انه نفس السرير القطنى الذى كنت اكلمه وهو راقد عليه كل يوم

ووجدته يرقد على سرير حاد وجاف مصنوع من الحديد ..

عندما وصلت الى المكان كان خالي قد انتهى من تكفينه

يا الله .. عمي يرقد داخل هذا القماش الابيض !!

هممنا بحمله .. يااااااه

بالامس حملته لاضعه على السرير لينام .. واليوم احمله لاضعه فى النعش لينام ايضا .. ولكن شتان بين هذه وتلك

ذهبنا به الى المسجد وصلينا عليه الجنازة بعد صلاة الجمعة .. ثم انطلقنا الى قريتنا وصلينا عليه بعد العصر مرة اخرى

عندما وصلنا للقبر .. كنت اريد الدخول الى القبر .. لكن لضيق المكان اكتفيت بالوقوف على باب القبر والنظر من الخارج

كان هناك اثنان .. يرقدان فى سلام

لا يقلق منامهم الا هذا الشخص الذى جاء مبكرا لكي يفتح القبر .. وازداد قلقهم بتزايد اعداد هؤلاء الذين يمشون متسارعين

وما هي الا لحظات حتى هدأوا .. بعدما علموا انه مرافق جديد .. جاء ليرقد بجوارهم

ما هذا الشعور الغريب؟؟ انظر الى الاثنين الراقدين فى القبر .. احدهما على ما يبدوا نزيل جديد من ستة اشهر على الاقل .. والاخر يبدوا انه هو اول نزيل بالقبر من عدة اعوام .. وربما اكثر نظرا لحالة الكفن
انظر اليهما .. وكأنهما يقولان لي على ماذا العجب يا هذا ؟؟

الا تعلم بان هذا هو مصيرك ؟؟

وكأنى ارد عليهم .. ولكنى لم اتخيل انه سيكون هكذا .. انام فى قبر مظلم وحدي

فيردون علي .. هذه حكمة ربك القائل " كل من عليها فان " .. انظر الى عمك ..

استرجع فى نفسي .. علاء جبة .. عبدالله ( ابن عمتي الله يرحمه ) واخرون

انظر الى عمي الذي كان بالامس بيننا

اجد الشخص الذى وضعه فى القبر يواريه بالتراب .. ويقوم بفك الرباط الذى يربط الكفن

ثم يهم بالخروج من القبر

انتظر يا هذا .. نسيت احد الاشخاص بالاسفل .. نسيت ان تخرج عمي معك

يقوم بابعادنا عن القبر .. يغلق باب القبر .. دخل ثلاثة .. وخرج اثنان

تركوا واحدا فى الداخل

ينام بلا حول ولا قوة

ذهبنا وتركناهم .. ودعتهم جميعا .. عمي والاثنان الاخران .. تركتهم ليتعرفوا على بعضهم .. ولينظروا الى مقاعدهم فى الجنة ان شاء الله .. ويحكوا لبعضهم ذكرياتهم فى الدنيا القصيرة

-----------------------------------------

كان عمي مصابا بعدة امراض عافانا الله واياكم منها ورزقنا واياكم الصحة والعافية .. الان ادركت انه عندما صعدت لعمي ليلا .. ادركت انه كان فى سكرات الموت
فى يوم وفاته صباحا .. صعد ابي الى شقته وجلس معه ثلاث ساعات كاملة .. من السابعة صباحا وحتى العاشرة قبل الجمعة
وكان ابي يقول الاذكار ويلقنها لعمي .. وهو يردد خلفه .. حتى انهى عمي جميع الاذكار
كان عمي فى تلك الليلة يسبح الله تعالى .. يقول سبحان الله وبحمد سبحان الله العظيم
ولم ينقطع عن قول سبحان الله والحمد لله ولا اله الا الله والله اكبر ولا حول ولا قوة الا بالله

فى العاشرة نزل ابي ليترك زوجة عمي التى لم تأت معي فى الصباح لحكمة الله تعالى .. لكي تقوم بتغير ملابس عمي
ولم تمض دقيقة على نزول ابي حتى سمع اصوات البكاء والصراخ .. فعلم انه قد حان الوقت

فصعد اليه و تحسس نبضه .. كان يخفت شيئا فشيئا
اغلق ابي عيني عمي .. وفى صمت بدأت الاستعدادات

وادركت حكمة ربي فى ان اذهب الى قريتنا يومها .. وفى ان تقوم امي باعطائي المفارش والملايات .. وفى ان تبقى زوجة عمي مستيقظة طوال الليل ولا تنام الا بعض الفجر لكي لا تأتي معي .. وفى ان يصعد ابي ويجلس معه ثلاث ساعات وكأنه يودعه .. وفى ان يتوفاه الله فى العاشرة صباحا .. فنصلي عليه بعد الجمعة وبعد العصر .. وفى ان يمرض عمي بشدة قبل وفاته باسبوعين .. اسبوع منهم فى المستشفى بجوارنا والاسبوع الاخر فى بيتنا لتهيئة ابي للوفاه .. وخاصة انه الاخ الوحيد له

رحمك الله يا عمي .. كيف انت الان فى القبر مع رفيقيك ؟؟
هل وجدتهما كما تمنيت ؟؟

الى المخدوعين والموهومين باوباما

2009-06-12T08:14:00.002+02:00

السلام عليكم ورحمة الله وبركاته

صعقت واصابتنى حالة من الاذبهلال الانخلالي التحولي من قصة اوباما دي .. والحالة السيئة دي من نقطتين:

1- ان الاستعدادات الامنية غير المسبوقة دي كشفت عن مدى احنا بلد مفيهوش قانون ولا فى بلد اصلا .. ده غير ان التفاصيل الامنية اللى هقولكوا عليها دي تعتبر وصمة عار فى وشنا
2- ودي الاخطر وهي ان الناس توهمت ان اوباما ده منقذ البشرية وراعى الامة وحامي حماها وانه هو الذى سيرفع العرب الى اعلى عليين

خلونا ناخدها واحدة واحدة

وانا مش هقول كلام من عندي انا هجيبلكوا مصادر موثوقة

1- الاستعدادات الامنية
اولا مفيش بلد محترم فى العالم يعمل اللى اتعمل عندنا .. بذخ واسراف وافراط فى الاستعداد الامنى والفلوس ايضا
ثانيا على موقع الامن الداخلي الامريكي HomeLand Security
كتبت مقالة عن الاستعدادات الامريكية الامنية لتأمين اوباما فى مصر
وقيل ما نصه , انه 3000 من افراد الامن الامريكي وصلوا قبل اوباما لتأمينه , طائرات خاصة كبيرة وصلت محملة بسيارات مصفحة وادوات حديثة لتأمنيه , 30 الف فرد امني مصري كانوا تحت امره الاف بي اي والسي اي ايه وانهم هما اللى تولوا العملية الامنية من اولها لاخرها وان العملية بالكامل كانت تدار من غرفة عمليات داخل السفارة الامريكية ( يعنى لو الامن كان محترم كان عمل غرفة عمليات مشتركة فى اى داهية لكن كونها فى السفارة الامريكية يبقى العملية الامنية كانت امريكية بحتة ) بالاضافة لاخر سطرين فى المقالة وهي ان الجانب المصري لم يتم اطلاعه على تفاصيل الحماية الامنية التى ستوفرها القوات الامريكية لحماية اوباما .. قمة العار والله العظيم
وانا مش عايز اتكلم اكتر من كده علشان ميحصلش قلق

واللى عايز يتأكد يرجع للمصدر ده :
http://www.nationalterroralert.com/updates/2009/05/31/security-tight-for-obama-visit-to-cairo/

الموضوع التانى وهو الاهم بالنسبة لي .. ايه الهبل اللى احنا وصلناله ده
للدرجة دي بقينا خلاص فى حالة من الاحباط والبؤس واليأس والسلبية .. لدرجة اننا مستنيين رئيس دولة اخرى يحل مشاكلنا احنا ؟؟
وكمان مش مسلم ؟؟
هل احنا بقينا لدرجة الغبااااااء .. ان خطيب الجمعة يدعيله بعد الخطبة ؟؟
الغباء وصل لدرجة ان فى ناس بتموت فى عشق اوباما وترى فيه المهدي المنتظر ؟؟
لدرجة ان احد الدعاة عمل البوم اغاني (!!) وفيه اغنية خاصة مهداه لاوباما ؟؟

ايه يا جماعة فى ايه ؟؟

هو علشان قال السلام عليكم .. وقراله كام ايه من القرآن يبقى خلاص الراجل بقه صلاح الدين الجديد ؟؟
اللى بيفهم .. هيلاقى ان خطاب اوباما ده ولا ليه اى لازمة .. وانه مجرد كلام معسول تحته زفت وطين وشتيمة علنى

عامة انا مش عايز اتكلم كتير .. انا هديكوا لينك لمقالة كتبها الكاتب الكبير محمد حسنين هيكل .. الراجل ده عبقري فى السياسة .. برجاء الاطلاع عليها لاهميتها القصوى ولانه بيوضح كل حاجة ويضع النقاط على الحروف فى السياسة الامريكية .. وخاصة الموهومين .. واصله اختار مصر لاهميتها .. واصله عارف موقع مصر وتاريخها .. كل ده هبل وتخلف
مصر اصلا تم اختيارها لانها كانت اخر دولة قدامه وهي فى اخر القائمة اصلا وكان عليها خمس اعتراضات كل واحد انقح من التانى

اقروا المقال بتاعه وافهموه .. افهموا يا امة اقرأ

http://www.masrawy.com/News/Egypt/Politics/2009/june/10/heikal.aspx

واللينك اللى جاي ده اللى لازم تشوفوه برضه
كان خطاب قاله اوباما قدام لجنة العلاقات الامريكية الاسرائيلية ... اسمعوا الخطاب ده .. وافتكروا اللى قاله فى القاهرة
مش هتلاقوا فيه اى اختلاف غير فى الالفاظ .. والمحتوى واحد .. واكتشفوا احنا قد ايه مخدوعين ولا نقرأ واذا قرأنا لا نفهم

http://www.youtube.com/watch?v=lPwF8ZsIZkc&eurl=http%3A%2F%2Fwww.facebook.com%2Fhome.php%3Fref%3Dhome&feature=player_embedded

للاسف الشديد .. اختم بابيات شعر خطيرة جدا

أي جرح في فؤاد المجد غائر.. أي موج في بحار الذل هادر
أي حزنٍ أمتي ..... بل أي دمع في المآقي
أي أشجان تشاطر

أمتي ياويح قلبي ما دهاك .... دارك الميمون أضحى كالمقابر
كل جزء منك بحر من دماء .... كل جزء منك مهدوم المنابر

إنما العيش الذي نحياه ذل ... نرتضي حتى وإن دنت الكواسر
يرفع المحتال قومي يا الهي ... والصديق الحق للعدوان آمر
أيها التاريخ حدث عن رجال .... عن زمان لم تمت فيه الضمائر

هل ترى يا أمتي ألقاك يوم ... تكتبين لنا من النصر المفاخر
ذلك الحلم الذي ارجوه دوماً.. أن أراك عزيزة والله قادر

سامحوني يا جماعة على الاسلوب لكن والله لانى محروق ومفقوع

ما فائدة المقاطعة !!

2009-04-18T14:23:00.003+02:00

السلام عليكم ورحمة الله وبركاته

فى البداية احب ان اوضح بعض الامور

1- اعتذر وبشدة عن عدم كتابتي ان الموضوع السابق " ومن الخرفان ما قتل " ليس من تأليفي وانما انا نقلته بعدما جائنى على البريد الاليكتروني

2- دعواتكوا جميعا علشان عندي امتحان الـ

( mid term )
يوم الاربعاء القادم .. فالله المستعان

3- امبارح كنت فى فرح احد الاصدقاء من الجامعة .. وبعد الفرح قررنا اننا نصيع شوية ونتغدى مع بعض

فالمهم واحنا ماشيين وكنا فى شارع الهرم .. لقيت واحد نايم على الارض على الرصيف

ومغطي نفسه ببطانية .. وفارش قدامه فى مكان نومه اكياس الليمون اللى بيبعها

وهو مستغرق فى نوم عميق .. وسايب اكياس الليمون على الارض مفروشة دون اى احساس بالخوف من ان يتم سرقتها

استغربت من الموقف جدا

حسيت ان فى حاجة عنده مش طبيعية

ازاي واحد ينام كده .. فى عز وقت الشغل وفى الوقت اللى الناس كلها بتنزل فى الشارع وقد يصادف ان واحد يشتري منه ( كنا وقت المغرب )

وازاي اصلا ينام كده وهو سايب رأس ماله وكل ما يملك امامه فى الشارع

ازاي يجيله قلب ينام وهو سايب اكياس الليمون ممكن بكل سهولة حد يسرقها ؟؟؟

وسبحان الله .. لا يجروأ احد معدي من قدامه انه ياخد او يسرق كيس الليمون مع ان الراجل مسافر فى الـ (second life )

وترى العكس تماما

تلاقي واحد عايش فى قصور وحوله الخدم والحشم .. وفى كل شبر فى القصر حرس واسلحة

ويملك من الاموال ما لا يستطيع هو نفسه ان يحصيها او يعدها او يعرف مصدرها اصلا

ومع ذلك .. تلاقيه خايف ومرعوب جدا .. خايف لحسن الفلوس تتسرق .. وخايف لحسن حد يؤذيه

وفعلا لا يستطيع النوم .. مع كل الحراسة اللى حواليه لكنه يخاف من ان ينام

وسبحان الله ... وتلاقي الناس لا تتوانى عن سرقته حتى ولو كان ربع جنيه !!

وقديما قال احد العلماء .. فى معنى الكلام انه الحكام لو يعرفوا مقدار السعادة والراحة اللى احنا فيها واحنا بنام بليل .. لقاتلونا عليها بالسيوف !!

وصدق الرسول عليه السلام " من بات آمنا فى سربه ... معافً فى بدنه .. عنده قوت يومه .. فقد حيزت له الدنيا بحذافيرها "

فعلا .. انت مش هتبقى محتاج حاجة من الدنيا دى خلاص بعد ما حصلت على الثلاثة دول
نايم مرتاح البال وقرير العين .. أتاك الله صحة فى البدن وبسطة فى الجسم .. ولديك قوت يومك وما تحتاجه من اكل وشرب وملبس ومسكن .. خلاص محتاج ايه تانى من الدنيا دي

فى ابحاث عديدة اتعملت وحاولوا يوصلوا لحل .. ايه هيا الحاجة اللى يعنى تمثل غاية الغايات الانسانية

اللى يعنى لو وصلها خلاص يفتح القبر وينام وهو مرتاح ؟؟

قالوا تحقيق الذات .. قالوا الاجتماعية .. قالوا الانجاز .. قالوا الاضافة للبشرية ..
وفى الاخر وجدوا .. انها السعادة وراحة البال

المهم .. موضوع النهاردة ده كان شاغل بالي من زمان

ومن فترة وانا كنت عايز ادون فيه واكتب رأيي الشخصي اللى انا مقتنع بيه تمام الاقتناع

وهو عن المقاطعة واهميتها

كتير جدا من الناس اللى كانت بتقاطع بدأت تشعر بان المقاطعة لم تأت بنتائج .. بدليل ان الشركات لسه موجودة اهي وبتتوسع والحياة زي الفل
واصلا نسبة الناس اللى كانت بتقاطع كانت قليلة مقارنة بغير المقاطعين

ولقيت حتى لدى بعض الناس المقاطعين .. بعض المشاكل فى فهم السبب من المقاطعة

وكانت اغلب ارائهم تتجه نحو اننا نقاطعهم لانهم يقتلوننا

ماشى جميل طبعا السبب ده وهو طبعا احد الاسباب الهامة جدا

لكن فى حاجات تانية برضه مهمة جدا ولازم تبقى قدامنا واحنا بنتكلم عن المقاطعة او بننفذها فعلا

1- هو احنا اصلا ليه بنشتري منهم ؟؟ يعنى احنا ليه معندناش احنا اكتفاء ذاتى اصلا من الحاجات اللى احنا محتاجينها حتى ولو كانت سلع رفاهية وليست سلعا اساسية ؟؟
احد اهم الاهداف الرئيسية اللى لازم نفهمها من موضوع المقاطعة ده .. هو اننا نعتمد على انفسنا فى انتاج ما نحتاجه
عيب جدا لما نبقى مليار وشوية وما زلنا لا نستطيع ان ننتج ما نحتاجه وما نستهلكه
انت لما بتقاطع المنتجات الامريكية او اليهودية وما شابهها .. انما بنقاطعها علشان نوجد لانفسنا بدائل محلية تحل محل تلك المستوردة
ولازم نستغل المقاطعة فى الموضوع ده كويس جدا

2- لازم نفهم ان المقاطعة هي احد الوسائل الهامة اللى تخلصنا من التبعية للاخرين .. بمعنى انه اذا انت على مستواك الشخصي قادر على ان تقاطع البيبسى والكنتاكي وغيرها .. فانت على مستوى الدولة تستطيع ان تتخلص من التبعية والتذلل للاخرين اللى بيدونا الاكل والشرب واللبس بتاعنا
والعكس .. لو احنا مش عارفين نبطل نشرب ازازة بيبسى .. يبقى لايمكن يبقى عندنا عزيمة وقوة اننا نعمل اى حاجة فى حياتنا وهنفضل طول عمرنا مذلولين ومتخاذلين بدون هوية وبدون قرار مدى الحياة . او على الاقل لحد لما يأتي جيل جديد يمتلك من العزيمة ما يستطيع ان يفعل ذلك
لان المقاطعة تربي العزيمة

3- المقاطعة من اهم فوائدها الوحدة .. النهاردة لما مليار وشوية يتفقوا على انهم لن يشربوا البيبسى ولن يأكلوا كنتاكي ولن يلبسوا الملابس الامريكية .. تخيلوا ممكن يعملوا ايه تانى على رأي موبينيل

اذا استطاع هؤلاء ان يجتمعوا على هدف واحد وهو مقاطعة المنتجات الامريكية .. افلا يستطيعون ان يحكموا العالم ؟؟
واكيد كلنا فاكرين القصة اللى حكاها الاستاذ عمرو خالد لما كان بيفطر فى مطعم مع شاب اسباني وحكاله عن رمضان وقاله انه لو عدنهم قانون فى اوروبا يستطيع ان يجمع الناس على شئ واحد لقادوا العالم باسره

4- المقاطعة تعلي الهمة والعزة فى نفوس الناس .. هحكيلكوا على موقف ظريف
كنت فى نقاش فى الشغل مع بعض الزملاء عن المقاطعة .. كان محور الحديث انه لو حد عزمك على شئ وهو مقاطعة .. بيبسى - ماك - كنتاكي - اى حاجة
فمن قواعد الذوق انك لا ترفض وتقبلها .. وبعد كده تقوله انك مقاطع وانك مش بتشرب الحاجات دي
كان برضه احد اسباب انك لا ترفض الدعوة .. هو انك لا تكلفه مرتين .. مرة اشترى البيبسى ورفضتها .. ومرة تانية اشترالك العصير البديل

انا طبعا ضد ده تماما واخالفه بشدة
لانه اولا اذا انا قبلت فى المرة الاولى ان اتنازل .. فاكيد هتنازل بعد كده على طول وفى كل مرة يقدم لي فيها المنتجات اللى المفروض نقاطعها
ثانيا : مين اللى صح ومين الغلط ؟؟ يعنى لو واحد دعانى للزنا هقوله ماشى علشان مكسفهوش وبعد كده اقوله ان الزنا حرام ؟
ثالثا : انا لما برفض وبقوله ان مقاطع .. بقوله باسلوب راقي ولا انكر عليه انه بيشرب حاجات مقاطعة .. هو حر يشرب اللى هو عايزة .. وانا حر اشرب اللى انا عايزة
رابعا : ايهما اغلى .. دماء اخوانا المهدرة .. كرامة الامة المهانة .. حرمة الدول المستباحة .. ولا انى مكسفهوش ومرجعش ايده ؟؟
خامسا : هو يعلم انى مقاطع .. فلماذا يطلب لي مشروبات مقاطعة ؟؟
سادسا : لو كل شئ هيمشى بالذوقيات واننا منكسفش الناس .. يبقى فى حاجات كتير هنتنازل عنها تحت هذا البند
سابعا بقه ودي الاخطر : الدكتور القرضاوي قال فى احدى فتواه ايام انتصار غزة الاخير على الصهاينة .. قال فى فتوى صدرت على الموقع بتاريخ 16 يناير 2009 ان شراء البضائع الامريكية والاسرائيلية فى هذا الوقت من الكبائر
يعنى تخيل انت بقه الكبائر زي الشرك بالله وعقوق الوالدين والزنا وشهادة الزور .. ومعاها شراء البضائع الامريكية والاسرائيلية

ثامنا : القصة مش قصة مين اللى دفع .. يعنى يا فرحتي .. مش انا اللى بكسبهم لا ده واحد تانى اللى بيكسبهم .. يعنى احنا اكيد مش هنضحك على بعض بقصة انه مش انا اللى اشترتها ده هو اللى اشتراها وانا شربتها .. يبقى قول لربنا كده لو تقدر
انا بعتبر الكلام ده عذر اقبح من الذنب نفسه .. لانه عامل زي بني اسرائيل .. ينصبوا الشباك يوم الجمعة ويلموها الاحد .. علشان يقولوا احنا مش بنصيد السمك يوم السبت!!

واخيرا .. هيا دعوة لتجديد المقاطعة .. يا جماعة لا تنظروا للمقاطعة بهذا المفهوم الضيق
وياريت كمان متبقاش المقاطعة موسمية .. لما يحصل عدوان على غزة يبقى نقاطع .. وبعدها نرجع نشتري وان عادوا عدنا وهكذا
العملية دي بتفقد المقاطعة وزنها وتأثيرها
وهيا دعوة لعدم التذرع بـانه " مش انا اللى اشتريتها " وانما يكون عندنا عزم وقوة وارادة وصبر وهمة , متخافش والله مش هتموت لو مشربتش بيبسى ... ووالله مش هتموت لو لم تأكل من كنتاكي او ماك وما شابههم

وهيا دعوة لكي نقوم بايجاد بدائل عملية اسلامية ومحلية .. تساعد الناس فى استمرار المقاطعة والاعتماد على انفسنا

ونلقاكم فى موضوع اخر ان شاء الله ان كان فى العمر بقية وقت

والسلام عليكم ورحمة الله

ومن الخرفان ما قُـتل

2009-01-31T21:02:00.002+02:00

السلام عليكم ورحمة الله وبركاته

في زاوية قصيّة .. وبعيدا عن أعين الإعلام ... كان الجزار يحد سكينه ويجهز كلاليبه ...

منتظرا وصول أول خروف عربي من الحظيرة المجاورة للمسلخ

في تلك اللحظة كانت الخراف في الحظيرة تعيش وتاكل وتشرب وكأنها قد جاءت الى تلك الحظيرة بضمان الخلود .

دخل الجزار فجأة الى وسط الحظيرة فأدركت " الخرفان " بحسها الفطري أن الموت قادم لامحالة .

وقع الاختيار على احد الخراف ..وأمسك الجزار بقرنيه يسحبه الى خارج الحظيرة ....

ولكن ذلك الكبش كان فتيا في السن ذو بنية قوية وجسما ممتلئا وقرنين قويين ...وقد شعر برهبة الحدث..

وجبن الموقف ..وهو يقاد الى الموت ... فنسي

الوصية رقم واحد من دستور القطيع ... وهي بالمناسبة الوصية الوحيدة في ذلك الدستور ...

وكان قد سمع تلك الوصية قبل ساعات من كبار الخرفان في الحظيرة .....

وكانت الوصية تقول :- حينما يقع عليك اختيار الجزار فلا تقاوم فهذا لن ينفعك بل سيغضب منك

الجزار ويعرض حياتك وحياة افراد القطيع للخطر .

قال هذا الكبش في نفسه : هذه وصية باطلة ودستور غبي لاينطلي حتى على قطيع الخنازير ...فكيف بنا نحن الخراف ونحن أشرف وأطهر .. .... فاذا كانت مقاومتي لن تنفعني في هذا الموقف ... فلا أعتقد انها ستضرني ....

اما قولهم ان مقاومتي ستغضب الجزار وقد يقتل جميع الخرفان ...فهذا من الغباء ....فماجاء بنا هذا الجزار الى هذه الحظيرة الا وقد أعد عدته ورسم خطته ليذبحنا واحدا بعد الاخر .....فمقاومتي قد تفيد ولكنها بلا شك لن تضر ....

انتفض ذلك الكبش انتفاظة الاسد الهصور ...وفاجئ الجزار ....واستطاع ان يهرب من بين يديه ليدخل في وسط القطيع حيث نجح في الافلات من الموت الذي كان ينتظره .

لم يكترث الجزار بما حدث كثيرا ... فالحظيرة مكتظة بالخراف ولاداعي لتضييع الوقت في ملاحقة ذلك الكبش الهارب....

أمسك الجزار بخروف اخر وجره من رجليه وخرج به ....
كان الخروف الاخير مسالما مستسلما ولم يبد اية مقاومة ..........الا صوتا خافتا يودع فيه بقية القطيع
نال ذلك الخروف اعجاب جميع الخرفان في الزريبة ... وكانت جميعها تثني عليه بصوت مرتفع وتهتف باسمه ... ولم تتوقف عن الهتاف حتى قاطعها صوت الجزار الجهوري وهو
يقول ...... بسم الله والله أكبر

خيم الصمت على الجميع ......وخاصة بعد ان وصلت رائحة الموت الى الحظيرة . ولكنهم سرعان ماعادوا الى اكلهم وشربهم مستسلمين لمصيرهم الذي يرفضون أي فكرة لمقاومة ذلك المصير بل قد يتعرض أي خروف يدعو الى مقاومة الجزار الى الموت نطحا قبل أن يقتل ذبحا.

وهكذا بقيت الخراف في الحظيرة تنتظر الموت واحدا بعد الاخر ... وفي كل مرة ياتي الجزار ليأخذ احدهم لاتنسى بقية الخراف بان توصيه على الموت على دستور القطيع لا ثم لا للمقاومه

وكان الجزار وتوفيرا للوقت والجهد .... اذا وجد خروفا هادئا مطيعا ...فانه يأخذ معه خروفا اخر .

وكل مازاد عدد الخراف المستسلمة ... زاد طمع الجزار في أخذ عددا اكبر في المرة الواحدة ... حتى وصل به الحال أن يمسك خروفا واحدا بيده وينادي خروفين اخرين او ثلاثة او اكثر لتسير خلف هذا الخروف الى المسلخ.....

وهو يقول : يالها من خراف مسالمة ... لم احترم خرافا من قبل قدر ما احترم هذه الخراف ...
انها فعلا خراف تستحق الاحترام.

كان الجزار من قبل يتجنب أن يذبح خروفا امام الخراف الاخرى حتى لايثير غضبها وخوفا من أن
تقوم تلك الخراف بالقفز من فوق سياج الزريبة والهرب بعيدا... ولكنه حينما رأى استسلامها المطلق ..

أدرك أنه كان يكلف نفسه فوق طاقته ..وان خرافه تلك تملك من القناعة بمصيرها المحتوم مايمنعها من المطالبة بمزيد من الحقوق ...

فصار يجمع الخراف بجانب بعضها ... ويقوم بحد السكين مرة واحدة فقط ... ثم يقوم بسدحها وذبحها...

والاحياء منها تشاهد من سبقت اليهم سكين الجزار .. ولكن .. كانت الوصية من دستور القطيع تقف حائلا امام أي احد يحاول المقاومة او الهروب ...." لا تقاوم ..." ....

في مساء ذلك اليوم وبعد أن تعب الجزار وذهب لاخذ قسط من الراحة ليكمل في الصباح مابدأه ذلك اليوم ...

كان الكبش الشاب قد فكر في طريقة للخروج من حظيرة الموت واخراج بقية القطيع معه

كانت الخراف تنظر الى الخروف الشاب وهو ينطح سياج الزريبة الخشبي مندهشة من جرأته وتهوره .

لم يكن ذلك الحاجز الخشبي قويا ... فقد كان الجزار يعلم أن خرافه أجبن من أن تحاول الهرب .

وجد الخروف الشاب نفسه خارج الحظيرة .... لم يكد يصدق عينيه ...

صاح في رفاقه داخل الحظيرة للخروج والهرب معه قبل أن يطلع الصباح

ولكن كانت المفاجأة أنه لم يخرج أحد من القطيع .... بل كانوا جميعا يشتمون ذلك الكبش ويلعنونه و يرتعدون خوفا من أن يكتشف الجزار ماحدث...

وقف ذلك الكبش الشجاع ينظر الى القطيع .. في انتظار قرارهم الاخير

تحدث افراد القطيع مع بعضهم في شأن ما اقترحه عليهم ذلك الكبش من الخروج معه والنجاة بانفسهم من سكين الجزار ......

وجاء القرار النهائي بالاجماع مخيبا ومفاجئا للكبش الشجاع .....

في صباح اليوم التالي ....جاء الجزار الى الحظيرة ليكمل عمله .. فكانت المفاجأة مذهلة

سياج الحظيرة مكسور ....... ولكن القطيع موجود داخل الزريبة و لم يهرب منه أحد ............

ثم كانت المفاجأة الثانية حينما رأى في وسط الحظيرة خروفا ميتا ... وكان جسده مثخنا بالجراح وكأنه تعرض للنطح و الطعن...

نظر اليه ليعرف حقيقة ماحدث ............ صاح الجزار ... ياالله ... انه ذلك الكبش القوي الذي هرب مني يوم أمس .

نظرت الخراف الى الجزار بعيون الامل ونظرات الاعتزاز والفخر بما فعلته مع

ذلك الخروف " الارهابي " الذي حاول أن يفسد علاقة الجزار بالقطيع ويعرض حياتهم للخطر .

كانت سعادة الجزار أكبر من أن توصف ... حتى أنه صار يحدث القطيع بكلمات الاعجاب والثناء

ايها القطيع .. كم افتخر بكم وكم يزيد احترامي لكم في كل مرة اتعامل معكم ...

ايها الخراف الجميلة ....لدي خبر سعيد سيسركم جميعا ......وذلك تقديرا مني لتعاونكم منقطع النظير .....

أنا وبداية من هذا الصباح ..... لن أقدم على سحب أي واحد منكم الى المسلخ بالقوة ..... كما كنت أفعل من قبل ... فقد اكتشفت انني كنت قاسيا عليكم وان ذلك يجرح كرامتكم .....

كل ما عليكم أن تفعلونه يا خرافي الاعزاء أن تنظروا الى تلك السكين المعلقة على باب المسلخ ....فاذا لم تروها معلقة فهذا يعني أنني أنتظركم داخل المسلخ .
فليأت واحد بعد الاخر ..... وتجنبوا التزاحم على ابواب المسلخ ....

وفي الختام لا انسى أن اشيد بدستوركم العظيم ...... لا للمقاومة ...
وهذا ماجنته ايديكم ايتها الخراف الغبية

في الختام ... مجرد سؤال بسيط : هل الخرفان عضو في جامعة الخرفان العربية؟؟؟؟؟

اهديكم نشيد تحفة
غزة الاحرار

ربنا يسهل وارجع اكتب تانى زي الاول
دعواتكو

لولولولولولوللللللللللليييييييييي

2008-10-25T16:07:00.003+02:00

السلام عليكم ورحمة الله

يا رجالة العالم .. استعدوا

علشان صلاح بوب خطب يا رجالة

واستنوا الصور قريبا

هو ده الخبر اللى كان مفرحنى من فترة

وربنا يديم الافراح ان شاء الله

نلقاكم بعد فاصل صغير ان شاء الله

دين جعل التفكير فريضة .. والتفكر فى الايات عبادة

2008-09-19T08:00:00.004+02:00

السلام عليكم ورحمة الله وبركاته

1- جائت العشر الاواخر من رمضان .. وما هى الا ليالي وتنتهى وينتهى رمضان

ويأتي العيد ليكون مكافأة لاولئك الذين اجتهدوا وعملوا بجد .. ويكون العيد حسرة لاولئك الذين ناموا وكسدوا

ادعوا اننا نكون من المقبولين

2-
انا اقصد بالغباء ... الغباء اللى بيكون مخالف للفطرة ..

اللى هو واحد يطلع بكلام او يعمل حاجة مخالفة للعقل ويلزقها فى الدين وخلاص

زى واحد مثلا بعت مشكلة بيقول انه من العاملين فى الدعوة الى الله وانه بيعمل وبيسوي ويعنى اللى هو داخل الجنة حدف

وعنده خادمة فليبينية فى البيت وفى مرة كل البيت خرجوا عدا هو وهى فقط

فهو نفسه بيقول فى المشكلة اللى بعتها .. انه اراد ان يختبر معدن الخادمة ( !!! ) .. ويعرف مدى ايمانها وثباتها

فراح يتحرش بيها لحد لما وقعوا !!!

اهو ده الغباء اللى اقصد وده الغباء اللى هو حرام بجد

و زى واحدة طلعت فتوى .. واحدة برضه يقال انها من الداعيات و من العالمات وليها دروس وكل حاجة .. طلعت فتوى فى سوريا لانها سورية وعايشة هناك .. ان نوم المرأة بجوار الحائط حرام !!

ليه .. لان الحائط مذكر .. والحائط ده قد يستغل فترة نومها ويغتصب المرأة اللى نايمة جنب الحيطة !!!

ده بقه غباء ازلي وده مش حرام .. لا ده عدى مرحلة الحرام كمان

من الغباء اللى اقصده

برضه يستوي فى ذلك الناس اللى بتؤمن بالخرافات والخزعبلات .. وخاصة مس الجن والعمل اللى معرفش منين ولا ازاي

ده تخلف

الواد الى راح قتل خطيبته وحماته واختها .. وكان مستنى ابوها

الحادثة الشهيرة اللى كانت فى بين السرايات ساعة العصر علنا كده فى النهار

عايز اقولكوا ان الشاب ده انا عارفه .. وهو كان شاب كويس وبنشوفه فى الجامع وفى الاعتكاف والتهجد

وكان مثقف وفاتح مكتبة وكان بيحضر دبلومة فى كلية الاعلام

يعنى على مستوى ثقافة وعلم .. لكن للاسف واحد متخلف من اللى بيسموهم بيعالجوا بالقرآن

اوهمه انه تعبان نفسيا .. لانه معموله عمل من خطيبته وحماته بالذات

والحل ليه انه يروح يقتلهم كلهم .. ويفصل راس حماته عن جسدها او راس خطيبته (!!!) مش فاكر قاله ايه

وقد كان اللى حصل فى عز الظهر

تخيلوا ؟؟

ايه رأيكوا فى الغباء ؟؟

مش حرام بجد الغباء ده ؟؟

الغباء ان واحد يفضل يدعي ويقول يا رب يا رب .. واول ما يطلع من الجامع يسب الدين ويلعن ولا كأن فى حاجة

الحاجة المشتركة بين كل الامثلة اللى قلتها سابقا .. انهم بيبقوا متدينين او بمعنى اصح بيدعوا التدين .. وطبعا الغباء

متهيقلي كده فهمنا العلاقة اللى اقصدها

لم اقصد التعميم .. ولم اقصد اللفظ بمطلقه كده

3- استكمالا لموضوع الدويقة
الصراحة تحية كبيرة جدا لامن الدولة .. لانه بجد عمل حركة جدعنة والله احييهم عليها

الناس الى خدت شقق ساعة المشكلة مكانتش تستحق الشقق ... لان بيوتها لم تنهار ولا حاجة انما جم من بره علشان يلحقوا اى حاجة

فدخل امن الدولة فى الموضوع لحل المشكلة .. وراح باتوبيس او اتنين .. لمخيم الايواء والاغاثة فى المنشية

ونزل ضابطين امن دولة وجابوا كراسي وقعدوا ..

وقالوا .. اللى شايف انه فعلا متضرر .. وانه يستحق شقه بدل بيته اللى اتهد .. يركب الاتوبيس هو وعياله

واحد بيقولي من بين حوالي 30 اسرة .. لم يركب سوا 4 اسر تقريبا

والباقيين مركبوش

طبعا لان الموضوع ده دلوقتى امن الدولة .. يعني مفيش هزار

وطبعا هما هيعرفوا اذا كان فعلا يستحق شقة ولا لأ عن طريق الاسئلة

المهم فامن الدولة قالهم خلاص مفيش حد متضرر ؟؟

فركب امن الدولة ومشي بالاتوبيس

وساب الامن المركزي على الناس الباقية اللى فى المخيم واكلوا حتة علقة ..

فبصراحة .. تحية كبيرة جدا للتصرف الذكي من امن الدولة ... فعلا اول مرة يعملوا حاجة تستحق الاحترام

4- الموضوع النهاردة عن العقل

يمكن كنت وضحت فى موضوع سابق ان تكريم الله تعالى للانسان مش لانه اداله عقل .. ووضحت قبل كده حقيقة التكريم للانسان وليه انه مفضل على سائر المخلوقات
وانه لولا التكريم ده .. لكان الانسان عبارة عن كائن او مخلوق ياكل ويشرب ويتناسل ومسخر لخدمة كائن او مخلوق اخر وينتهى ذكره بمجرد ان يتحول الى تراب يوم القيامة " ويقول الكافر يا ليتنى كنت ترابا"

طيب ايه اهمية العقل ؟

الكلام اللى جاي ده قاله الدكتور القرضاوي :

ولا تجد كتابا دينيا - غير القرآن - كرَّم العقل، وأشاد به، وحضَّ على الرجوع إليه، وذمَّ الذين يعطلونه بالجمود أو التقليد، أو اتباع الظنون والأهواء. كما حفل بكل المفردات من (عائلة العقل) مثل: التفكُّر والنظر والتدبُّر والاعتبار، والبرهان والحجَّة والحكمة والتعلُّم والتفقُّه والتذكُّر.

وإن كان مما يؤسف (من الأسف) له: أن كثيرا من المسلمين في عالم اليوم غيَّبوا عقولهم، واستسلموا للأوهام أو الجهالات، أو ألقَوا عقولهم وغدَوا يفكرون بعقول الموتى.

والعقلانية التي ننشدها لا تحتاج إلى تفلسف ولا معاناة في تعريفها. إنها ببساطة تعني: أن نعتمد على عقولنا في تسخير قوى الكون لصالحنا، والانتفاع بخيراته للنهوض بأمتنا، والخروج بها من سجن التخلف إلى باحة التقدم، واستخدام طاقات العلم ووثباته الهائلة، وثوراته الكبرى في خدمة أمتنا خاصة، والإنسانية عامة. وأن تكون هذه منهجية الأمة في تعليمها وثقافتها وإعلامها.

وليس هذا جديدا على أمتنا، فقد شادت حضارة شامخة جمعت بين العلم والإيمان، وبين الإبداع المادي والسمو الروحي والأخلاقي، ولم يعرف في تاريخها صراع بين الدِّين و العلم، بل كان الدِّين عندها علما، والعلم عندها دينا.

وقد شارك رجال كبار من علماء الدِّين في علوم الكون والطبيعة مثل: ابن رشد الحفيد، والفخر الرازي، وابن النفيس، وغيرهم.

وليس هذا بغريب على أمة يجعل دينها التفكير فريضة، والنظر في آيات الله في الآفاق والأنفس عبادة، ويعمل قرآنه على إنشاء العقلية العلمية، ويرفض الظن والهوى والتقليد في تأسيس الحقائق، وينادي بإقامة البرهان في كل دعوى.

ويرى علماء الشريعة فيه: أن إتقان علوم الدنيا فرض كفاية على الأمة في مجموعها، مثل علوم الدِّين. فإن وجد بها عدد كاف في كل علم ديني أو دنيوي، يلبي الحاجة، ويغطي مطالب الخَلق، فقد رفع عنها الإثم والحرج، وإلا باءت الأمة كلها بالإثم

انتهى كلام الدكتور القرضاوي

لما قرأت كلامه حسيت انه بيتكلم بلسانى وبنفس اللى انا عايز اقوله

وانا عايز اضيف نقطه .. ان العلماء السابقين واللى كتبوا فى الدين سواء فى الفقه او العقيدة او غيرها .. تطرقوا لنقطة ابعد من التفكير .. كتبوا فى الفلسفة

وكتبوا فى استنخدام العقل والادلة العقلية على اثبات وجود الله تعالى ... و هو ده الصح

وهو انك تتبع العقل والتفكير لحد لما تثبت وجود الله تعالى وتثبت وحدانيته وتثبت نبوءة ورسالة محمد صلى الله عليه وسلم

فى الشركات بره بيقولوا ان رأس مال الشركة مش فى الفلوس او حجم اعمالها او الاستثمارات اللى فيها .. انما فى العقول البشرية اللى شغاله فيها

هو ده رأس المال الحقيقي .. لانك لو مشغل ناس من النوعيات بتاعت اختبار المعادن او اللى وصلت لمرحلة من التخريف ان النوم جنب الحيطة حرام .. فاكيد الشركة هترجع لورا

لكن لما يكون العنصر البشري فاهم وبيفكر .. اكيد هتقدم لقدام

النهضة كذلك .. عبارة عن شركة .. عايزة توصل لهدف معين .. وعندها راس مال واستثمارات عايزة تسخرها للوصل للهدف

واهم حاجة فى الاستثمار ده .. هو العقل البشري للناس

وهو ده بالضبط اللى مهاتير محمد اعتمد عليه .. فى النهضة الهائلة الى عملها فى ماليزيا

بدأ بالتعليم .. لانه لو طلع اغبياء فمش هيعرف يعمل نهضة

ولذلك ماليزيا بعد عشرين سنة لما اتغير الجيل اللى مش بيفكر وجه جيل تأسس صح وبيفكر

حصلت نهضة غير عادية فى ماليزيا

وهو نفسه العقل اللى دفع جاري ميلر اكبر منصر فى اوروبا .. الى انه يسلم

وهو نفسه العقل اللى خلاه نفسه .. يطلع كتاب مذهل .. اسمه القرآن المذهل

وجاب ادلة عقلانية ولا يرفضها الا غبي .. على ان القرآن ده فى حد ذاته معجزة ولا يمكن ان يكون اى شئ الا انه منزل من الله تعالى

ودى مقتطفات من كتابه القرآن المذهل نقلا عن موقع اسلام اونلاين:

1- يقول د. ميلر: 'لا يوجد مؤلف في العالم يمتلك الجرأة ويؤلف كتاباً ثم يقول هذا الكتاب خال من الأخطاء ... ولكن القرآن على العكس تماماً يقول لك لا يوجد أخطاء بل يتحداك أن تجد فيه أخطاء .. ولن تجد.

2- لا يستعرض القرآن أيضاً من الأحداث العصيبة التي مرت بالنبي – صلى الله عليه وسلم – مثل وفاة زوجته خديجة أو وفاة بناته وأولاده. بل الأغرب أن الآيات التي نزلت تعقيباً على بعض النكسات في طريق الدعوة، كانت تبشر بالنصر، وتلك التي نزلت تعقيباً على الانتصارات كانت تدعو إلى عدم الاغترار والمزيد من التضحيات والعطاء. ولو كان أحدٌ يؤرخ لسيرته لعظم من شأن الانتصارات، وبرر الهزائم، ولكن القرآن فعل العكس تماماً، لأنه لا يؤرخ لفترة تاريخية بقدر ما يضع القواعد العامة للعلاقة مع الله والآخرين.

3- توقف ميلر عند قوله تعالى: 'قل إني أعظكم أن تقوموا لله مثنى وفرادى ثم تتفكروا'، مشيراً إلى التجربة التي أجراها أحد الباحثين في جامعة تورنتو عن 'فعالية المناقشة الجماعية'، وفيها جمع أعداداً مختلفة من المناقشين، وقارن النتائج فاكتشف أن أقصى فعالية للنقاش تكون عندما يكون عدد المتحاورين اثنين، وأن الفعالية تقل إذا زاد هذا العدد.

4- هناك سورة كاملة في القرآن تسمى سورة مريم وفيها تشريف لمريم عليها السلام بما لا مثيل له في الكتاب المقدس، بينما لا توجد سورة باسم عائشة أو فاطمة. وكذلك فإن عيسى عليه السلام ذُكر بالاسم 25 مرة في القرآن في حين أن النبي محمد لم يذكر إلا 5 مرات فقط.

5- يرى المنكرون للوحي وللرسالة أن الشياطين هي التي كانت تملي على الرسول ما جاء به، والقرآن يتحدى: 'وما تنزلت به الشياطين، وما ينبغي لهم وما يستطيعون'. فهل تؤلف الشياطين كتاباً ثم تقول لا أستطيع أن أؤلفه، بل تقول: إذا قرأت هذا الكتاب فتعوذ مني؟

6- لو كنت في موقف الرسول – صلى الله عليه وسلم – هو وأبي بكر محاصرين في الغار، بحيث لو نظر أحد المشركين تحت قدميه لرآهما. ألن يكون الرد الطبيعي على خوف أبي بكر: هو من مثل 'دعنا نبحث عن باب خلفي'، أو 'أصمت تماماً كي لا يسمعك أحد'، ولكن الرسول – صلى الله عليه وسلم – قال بهدوء: 'لا تحزن إن الله معنا'، 'الله معنا ولن يضيعنا'. هل هذه عقلية كذاب أو مخادع، أم عقلية نبي ورسول يثق بعناية الله له؟

7- نزلت سورة المسد قبل وفاة أبي لهب بعشر سنوات. وكان أمامه 365 يوم × 10 سنوات = 3650 فرصة لإثبات أن هذا الكتاب وهم، ولكن ما هذا التحدي؟ لم يسلم أبو لهب ولو بالتظاهر، وظلت الآيات تتلى حتى اليوم. كيف يكون الرسول واثقاً خلال عشر سنوات أن ما لديه حق، لو لم يكن يعلم أنه وحي من الله؟

8- وتعليقاً على قوله تعالى 'ما كنت تعلمها أنت ولا قومك' تعقيباً على بعض القصص القرآني، يقول ميلر: 'لا يوجد كتاب من الكتب الدينية المقدسة يتكلم بهذا الأسلوب، إنه يمد القارئ بالمعلومة ثم يقول له هذه معلومة جديدة!! هذا تحد لا مثيل له؟ ماذا لو كذبه أهل مكة – ولو بالادعاء – فقالو: كذبت كنا نعرف هذا من قبل. ماذا لو كذبه أحد من الباحثين بعد ذلك مدعياً أن هذه المعلومات كانت معروفة من قبل؟ ولكن كل ذلك لم يحدث ولن يحدث.
انتهى كلام الدكتور جاري ميلر

الراجل معملش حاجة .. غير انه شغل دماغه وفكر

فوصل لكل ده

وهو ده المطلوب مننا ... بل يمكن اقل
المطلوب اننا نشغل عقولنا .. ونفكر

نفكر فى الدين ونفهمه كويس .. ونفهم المقصد منه والاهداف والحكمة من ورا احكامه
علشان لما تطبق الاحكام دى تبقى مقتنع كل الاقتناع انها الصح
نفكر فى اساليب دعوية جديدة .. نفكر ايه اللى الامة محتاجاه واقدر اقدمه
نفكر ونفهم ان فى مليون طريق لخدمة الدين غير الكلمات والكتيبات والدروس والمحاضرات
نفكر ونفهم ان مش مهم انت بتتكلم كويس ولا لأ .. المهم انك بتعمل وتشتغل كويس ولا لأ ( مش مهم الاقوال انما الافعال )
نتفكر فى خلق السماوات والارض ... نتفكر فى جمال الخلق .. نتفكر فى قدرة الله تعالى وكيف ان الله احسن كل شئ خلقه
نفكر ونفكر ونفكر .. علشان نفهم

عقبالنا يا رب لما نخلص من الاعمال السفلية ومن الدجل .. ونبدأ النهضة بعقول مفكرة وواعية ونبقى ماليزيا

ونلقاكم فى الحلقة القادمة

الصورة الاخرى عن الدويقة

2008-09-11T21:31:00.009+02:00

السلام عليكم ورحمة الله وبركاته

1- بداية جزاكم الله خيرا كل الذين شاركوا فى التعليقات ومعذرة على عدم التفاعل والرد عليها .. وفعلا انا مقصر فى الناحية دي بس الحمد لله على كل حال

انا لما بتكلم عن الغباء .. اولا مش اقصد التعميم ... وثانيا لا اقصد اللفظ على الاطلاق
يعنى مش اقصد صفة الغباء ... انما اقصد غباء التصرف .. البلاهة ممكن
اقصد مفهوم ان انا بقيت ملتزم يبقى خلاص انسى الدنيا ومتفكرش ووقف عقلك
او ان الواحد يقدم على حاجات يعملها بحجة الدين .. والعقل لا يقبلها .. وهحكي على حاجات ومواقف بس فى المرة الجاية ان شاء الله

الله المستعان

2- المرة دي انا محتار جدا فى الكتابة .. من بين عدة مواضيع كنت عايز اكتب فيها .. لكنى اخترت انى اكتب فى كارثة الدويقة

وانا اخترت موضوع الدويقة علشان فى ورا الصور الى شفناها مصايب وبلاوي لازم نحاربها فعلا

لان الموضوع لا يتوقف على صخور وقعت وناس ماتت وخلاص .. لا فى مشاكل تانية اكبر بكتير

فانا كنت عايز اكتب ثلاث حاجات .. وهركز على واحدة بس لانها اللى تهمنى

كنت هكتب مأسي وقصص من الناس الى شافت وعاشت الموقف
وكنت هكتب عن فضائح الحكومة اللى ظهرت واضحة وجلية فى الموقف .. بداية من غباء التصرف الى التأخر فى التصرف الى التهرب من المسئولية

والاهم عندي واللى بسميها ام المصايب .. وهي الفضيحة الكبرى والطامة الاشد .. هي فضيحة الشعب المصري الاجتماعية

واتمنى اننا نحاول نفهم الصورة بشكل جيد لان الموضوع خطير جدا من الناحية الاجتماعية

1- فضائح الحكومة فى الدويقة

يعنى انا شايف ان الموضوع ده واضح اشد من الشمس .. وهى ان الحكومة اتفضحت بشدة فى كارثة الدويقة .. مش لان الناس دى غلابة وان محدش سائل فيهم لحد لما ماتوا .. انما لان ده بيكشف عن الفساد المستشري فى جسد الحكومة واللى فضح وجهها الزائف

من ضمن المواقف ايضا ان الجميعات التى ارسلت اغاثة ومعونات للاهالي هناك ... رفض الامن مساعدتها وادخالها للمنطقة .. الا تحت اسم الهلال الاحمر ( الذي ترأسه السيدة الحاجة ) وتحت اسم شباب الحزب الوطني .. واضطرت الجمعيات الى التنازل عن اسمها فى مقابل اغاثة المنكوبين ومساعدتهم وايصال الماء والغذاء اليهم وايصاله ايضا الى العاملين بالحفر

من ضمن المواقف الفاضحة ايضا ان الاهالي ذهبوا الى رئاسة الحي قبل الكارثة باسبوع وقالوا ان فى طوب بيقع عليهم من الجبل وفى احتمال حدوث انهيارات .. فقال لهم الموظفون الفاسدون .. مش هنعمل حاجة الا لما الجبل يقع عليكوا وحد يموت يبقى ساعتها نتحرك !!!

يعنى لن استفيض اكثر فى كشف وجه الحكومة .. لكن يكفي بمقارنة بسيطة بين موقف حريق الشورى والذى لم يحرك ساكنا لدى المواطنين بل كان مضربا للدعابة والسرور .. وبين كارثة الدويقة وكيف ان الاهالي جاؤوا من كل مكان ومن اماكن بعيدة للمساعدة وتقديم العون بالمال
والنفس

فكده خلاص الحكومة تعرت تماما ومبقاش فى مجال لتجميل الصورة او حتى لاظهار اى انجازات

2- فضائح الشعب نفسه .. مؤشرات خطيرة

انا هسرد بعض المواقف اللى حصلت هناك من بين الكواليس الاول وبعدها نشوف نطلع منها بايه

- بعد الانهيار الذى كان فى الساعة 8 صباحا .. ذهب احد اصدقائي الى المنطقة للمساعدة فى الحفر واخراج الاحياء وكان ذلك فى الساعة 1 ظهرا .. واثناء الحفر قام باستخراج جهاز كمبيوتر ( كيسه ) فجاءه رجل وقال له انه عايز ياخد الهارد بتاع الجهاز !! ( صاحبي كان عايز يناوله بالكيسه فى وشه )

- صاحبي بيقولي انه خلال اليومين اللى حضر فيهم الحفر بنفسه .. ان 30% من الناس اللى موجودين هناك .. هما فعلا اللى بيحفروا بجد .. وان الباقي 70% جاءوا لسرقة الممتلكات واى شئ يخرجوا به من تحت الانقاض !!!

- وبيقولي ايضا انهم بيعطلوا اللى بيحفروا .. لانه مثلا بيبقى واقف على صخرة والناس بتحفر تحتها .. فحركته عليها بيخليها تهتز فيضايقهم ... اضافة الى ان الناس بعد الحفر تنزل تحت للبيوت المدكوكة تشوف الناس .. فتلاقي واحد طالع فى ايده الشمال تيلفزيون وايده اليمين مطواه .. والراجل يتكلم معاه علشان يفتحله بطنه

- بعد الكارثة الحكومة وعدت بانها هتدي شقق للناس فى مشروع السيدة الحاجة اللى كل شققه مقفولة .. ففى ناس من بره المكان اصلا وليس لها اى علاقة بالحادثة ولم تتهدم بيوتها ولا اى حاجة .. جاءت من كل حدب وصوب وافترشت الارض لكي يحصلوا على عقد شقة .. وبالمناسبة فكل اللى اخدوا عقود ايجار اليوم وامس .. ليسوا من المتضررين من سقوط الحجارة

- احدى الجمعيات فى مكان الحادث تقوم بادخال الطعام والشراب كمساعدة للقائمين على الحفر فى منطقة الكارثة .. وبالمناسبة فكل اعمال الحفر هي جهود ذاتيه من الاهالي ولم تشارك قوات الانقاذ ولا الجيش فيها .. المهم كان الاهالي يقومون بخطف وسرقة الاكل والشرب .. وفعلا كانوا بيلاقوا هجوم شرس من الاهالي .. وطبعا اللى بيهجم ده اكيد واحد فاضى مش بيحفر .. يعنى من ال70% اللى وجودهم زي قلته
فكان افراد الجميعة يقومون بعمل كردون امنى بشري لمنع الناس من سرقة الاكل .. ثم اللى بيسرق ده مش بيسرق علبة عصير ولا وجبة اكل .. لا ياخدله كرتونة عصير .. كده بيسرق بالجملة

- احد الشباب هناك ولنفرض انه (ع) متزوج من (س) .. وله اخت (ص) تزوجها شخص (ز)
وليلة الكارثة كانت س عند حماتها .. المهم انها ماتت فى الانهيار .. فقام الناس باستخراج جثتها ... وهى زوجة (ع)
فجاء (ز) وادعى انها اخته حيث انها ماتت ايضا .. وذهب معها الى المشرحة
و قام بسرقة كل الذهب الذي تلبسه وكل المقتنيات الثمينة التى كانت تحملها قبل دخولها للمشرحة .. فقام الطبيب بالاتصال ب(ع) واخبره ..
فجاء الى المشرحة وتعرف على جثة زوجته فعلا وتأكد من انها جثتها
لكن بعد ما كان (ز) سرق كل الذهب والاشياء الثمينة خلاص

كل هذه القصص وغيرها وما خفي كان اعظم .. تدل على ان التركيبة الاجتماعية فى مصر بها خلل كبير جدا

ربما يكون الكلام ده قديم والناس قالته قبل كده .. لكن فى الاخر الموضوع محتاج لعلاج

يعنى لا يمكن ان فى بلد طبيعي والناس الى فيه عايشين بطبيعتهم وبسلام .. تلاقي فيهم ناس بتشتري فلل ب6 مليون جنيه ( فلل داماك ومدينتي) وناس تانية الصخور بتقع فوق راسهم وهما عارفين انه هتيجي لحظة والجبل ينهار لكن بيقولوا مفيش مكان تاني نروحه

لا ده مش اجتماعيا وبس .. لا ده احنا دلوقتى بنتكلم اخلاقيا كمان

قصص السلب والنهب اللى بتحصل هناك دى مأساه فعلا .. احنا مش بنتكلم على صلاة ولا صوم .. ولا بنتكلم عن الدين اصلا

انما بنتكلم على اخلاق .. البنى ادم الطبيعي بيتولد وهيا فيه

عارفين يعنى ايه ان واحد يسرق الذهب بتاع زوجة اخو زوجته !!!! والادهى انه سرق الذهب وهيا قدامه جثة ميته !!!

عارفين يعنى ايه انك تكون سامع صراخ الناس تحت الانقاض وانت عمال تحفر علشان تطلعهم ويجي واحد عايز يسرق الممتلكات ؟؟

دى مصيبة والله .. لان كده دول مبقوش بشر طبيعيين

واذا ربطنا ده بالقصة التى سردها الاستاذ فهمي هويدي عن الرجل اللى كان راكب تاكسي

وقاله انا مستنى اليوم اللى هيجي ندخل فيه الفلل دى ونسرقها وتبقى بتاعتنا .. ومفيش ساعتها قوة فى الارض تقدر تمنعنا من الانتقام !!
مش عارف اقول ايه .. بس بعد كده كل واحد هيمسك سلاح وينزل قدام بيته

ربنا يستر

فعلا صدق الله العظيم
" فليعبدوا رب هذا البيت .. الذي اطعمهم من جوع وأمنهم من خوف "

الاول الناس تاكل وتشبع .. وبعدها تحس بالامان
وبعد كده نكلمهم فى الدين والعبادة

قدامنا مشوار طويل لسه
مفيش نهضة ولا تقدم بيقوم فى بلد بينهم ناس جعانة وحرامية ومعندهاش اخلاق اساسية

3- مآسي الدويقة

اما بخصوص القصص المتعلقة بالمآسي اللى حصلت هناك
فهي لا تعد ولا تحصى .. لكن اذكر منها عدة مواقف

- احد الاشخاص رزقه الله بمولود جديد وكان عايز يعمل حفلة السبوع .. فجاء اهله كلهم من الفيوم للمشاركة فى الاحتفال
وطبعا قرروا المبيت هناك .. وكان قدرهم جميعا
ما يفوق ال26 شخص من عائلة واحدة

- أم كانت مستيقظة فى ذلك الوقت .. وقبل الكارثة بدقائق ارادت ان تبدأ فى غسل الملابس .. فهمت بالخروج لشراء ما تحتاجه .. فبكى طفلها الصغير .. وكان الوحيد اللى صاحي والباقيين نايمين
فخدته معاها تشتري الحاجات ... رجعت ولم تجد البيت ولا الاطفال

- طبعا فاكرين قصة (س) زوجة (ع)
ودى ليها قصة مآساه اخرى

هما الاتنين اصلا مش من سكان المنطقة المنكوبة
ولكن فى منطقة اخرى

وحماة (س) كانت بمفردها فى بيتها فى الدويقة .. فقالت لها ان تأتي لكي تجلس معها
ف(س) قالت خلاص هتروحلها يوم السبت الصبح
فلما جه زوجها بالليل وعرف انها هتروحلها السبت الصبح
قالها طيب تعالي نروح دلوقتى علشان اوصلك بدل ما تروحي الصبح لوحدك
وهو ما حدث فعلا
راح (ع) وصل ( س) الحامل بالمناسبة
يوم الجمعة مساءا .. وكان قدرها فى انتظارها صباحا

ربنا يرحمنا جميعا ويحسن ختامنا

لماذا يكون المسلمون دائما .. اغبياء ؟؟

2008-08-16T18:40:00.005+02:00

السلام عليكم ورحمة الله وبركاته

1- طبعا بعد الاعتذار الشديد على الاهمال الشديد والبعد عن المدونة .. لكن فعلا كنت فى ضغط شغل فظيع .. لدرجة ان كنا بنخلص الشغل اتناشر بليل وواحدة بليل .. لا ده مرة خلصت شغل الساعة 5 الفجر .. ونزلت الساعة 6 الفجر من الشركة على الاسكندرية وش

فيعنى الحمد لله الموضوع خلص .. لكن مستحلفين لنا فى الشغل ان رمضان هنفطر كل يوم مع بعض فى الشركة ومفيش تراويح كمان

ده غير انى الحمد لله تعرضت لعدة ابتلاءات .. اتنين منهم تعبونى جدا واقعدونى لفترة .. لكن الحمد لله الذى خلق الصبر على الابتلاء

طبعا انا بشكر كل اللى سألوا عليا او بعتوا فى التعليقات .. فعلا جزاكم الله خيرا وفعلا التعليقات الجميلة دى بتفرحنى جدا .. ربنا يكرمكوا

2- بالمناسبة فعلا رمضان خلاص باقيله اسبوعين تقريبا او يمكن اقل .. والواحد مش عارف الوقت عدى بسرعة خاصة ان دى اول سنة بعد التخرج والشغل والدوامة بتاعته .. وخايف لحسن رمضان يعدي كالعادة بسرعته المعهودة من غير ما نلحق نعمل فيه حاجة

لكن عامة ربنا يستر وربنا يوفقنا للطاعات فيه

فى مثل هذه الايام حسب التاريخ الهجري .. كان الحدث العظيم اللى حصل ..

من سنة واحدة بس

من سنة فاتت .. كانت وفاة علاء جبة الله يرحمه

سنة كاملة يا علاء مرت ومحسيتش بيها

سنة كاملة يا علاء والواحد حاسس انه لم يتعظ من اقتراب اجله

سنة كاملة يا علاء مرت على الواحد وبالكاد افتكر الايام الجميلة اللى كنا فيها مع بعض .. ذهبنا وتركناك وحدك

سنة كاملة يا علاء ولم نعد حتى نذكرك فى دعائنا .. اعترف اننا مقصرون لكن هكذا هي الحياة

سنة كاملة يا علاء وللاسف كانت فى نفس الايام قبل رمضان ... فهل سنصل الى رمضان

الواحد فعلا مش متخيل ان سنة كاملة عدت على حادثة وفاة علاء جبة

رحمك الله يا علاء رحمة واسعة .. ظني انك فى الفردوس الاعلى

3- فى خبر جميل قوي عرفته من كام يوم .. فرحني جدا بس هعلن عنه فى الفترة الجاية ان شاء الله

اما بقه بخصوص موضوع النهاردة

فالاول معلش اعذرونى على صراحتي .. لانى بعتبر ان المدونة دى مكان لانى اتكلم وافكر بصوت عالي براحتي

من فترة كان فى سؤال بيدور فى ذهني ومش عارف الاقيله جواب

او يمكن من اللى كنت بشوفه كان السؤال بيلح على ذهني بطريقة مستفزة

ليه دايما المسلمين اغبياء .. فى حين ان غير المسلمين بيبقوا اذكياء وعلماء ؟؟
ليه السحر ومس الجن والاعمال السفلية والعلوية وفوق المتوسطة مش بتحصل غير فى المسلمين .. ولم نسمع عنها فى اسرائيل او امريكا مثلا ؟؟
ليه دايما المسلمين مكتوب عليهم انهم يبقوا فقرا دايما .. وايدهم ممدودة لاى حد معدي يمكن يدينا حاجة .. على العكس من الدول التانية ؟؟
كان فى الشغل دايما يقولولنا ان الحسنة تخص والسيئة تعم .. طبعا المبدأ ده غلط جدا واشك ان فيه حاجة تخالف الشرع والله اعلم .. لكن لما نتكلم يقولك نعمل ايه دى قوانين مجتمع .. طيب اشمعنى الكلام ده مش موجود غير بين المسلمين ؟؟
وليه مفيش رجال اعمال مسلمين بجد ومحترمين يفرضوا قوانينهم اللى هيا اساس الاخلاق .. على الباقيين ؟؟

كنت كل ما افكر فى حالنا كمسلمين والوضع المأساوي اللى احنا عايشين فيه الاقى الاسئلة دى بتجري ورايا .. وكان اكثرها الحاحا هو ليه احنا اغبياء .. ليه دايما المسلمين دول بياخدوا على قفاهم

وسبحان الله .. حصلت عدة مواقف وضحتلى ان الصورة القاتمة دى ما هي الا فترة احنا عايشينها للاسف .. لكنها ستسقط من التاريخ

لانها مش امتداد طبيعي للتاريخ الاسلامي بتاعنا .. اللى احنا منعرفش عنه اى حاجة

( احنا فى الشغل لما نيجي ناخد سلسلة زمنية علشان نشتغل عليها .. بنشوف الطبيعي فى السلسلة دى شكله عامل ازاي واى فترة شاذة ومش ماشية مزبوط بنشيلها على طول )

وده اللى المفروض نبقى حاسينه .. اننا فى فترة انتكاسة مش طبيعية لكوننا مسلمين

يعنى الطبيعي اننا نكون فوق العالم ده كله .. واحنا اللى نمشيه باخلاقنا واسلامنا الى هو الفطرة الانسانية السليمة

لكن اللى بيحصل فينا دلوقتى ده .. دى حاجة استثنائية مؤقتة المؤرخين هينسوها وهينسوا يحطوها فى التاريخ

من ضمن الحاجات اللى فوقت الواحد خطبة حضرتها كان بيتكلم الخطيب فيها عن سيدنا عثمان ابن عفان

معلوماتي عن سيدنا عثمان ابن عفان ليست بالكثيرة .. وانه كان مشهورا بالحياء الشديد

لكن التقت افكار الخطيب مع افكاري وتكلم عن الجانب غير المعروف من سيدنا عثمان

وهو انه كان رجل اعمال كبير جدا فى زمانه

وحكى ثلاث مواقف .. الاول عندما هاجر الصحابة من مكة للمدينة .. واجهوا اول مشكلة وهى عدم وجود مياه للشرب والاستخدام اليومي

ومكانش فى غير بئر واحد فقط فى المدينة يملكه يهودي .. وكان بيبع المياه للناس

طبعا اول ما يكون اكل وشرب المسلمين بايد عدوهم يبقى الجيل ده منتهى ومينفعش

افتكر انى سمعت احد الشيوخ قال انه لو فى مجال المسلمين محتاجينه ومفيش حد يقف يسد فيه .. يأثم جميع المسلمون حتى يتم سد هذا العجز
فما بالكوا بقضية الاكل والشرب

المهم .. اليهودي بطبعه منع الماء عن المسلمين ومكانش بيبيع ليهم

ده غير ان المسلمين كانوا فقرا لسه واموالهم كلها استولت عليها قريش

فاحس سيدنا عثمان ان من واجبه انه يشتري البئر

فراح لليهودي وعرض عليه مبلغ من الذهب .. رفض

ضاعف المبلغ .. رفض اليهودي

ضاعفه مره اخرى .. رفض اليهودي

وتم الاتفاق على مبلغ اكبر .. فى مقابل انه يقسم بين عثان يوما .. ولليهودي يوما

طبعا سيدنا عثمان بن عفان اطلق يومه لله .. فكانت المدينة كلها مسلمين وغير مسلمين بتشرب فى اليوم بتاع سيدنا عثمان .. ومحدش بقه بيشتري من اليهودي فى اليوم بتاعه

وبعد فترة كسدت تجارة اليهودي فراح باع نصيبه فى البئر لسيدنا عثمان بن عفان

واصبح البئر متاح للجميع حتى اليهودي نفسه اللى كان بيبيعه .. ياخد اللى هو عايزه من غير فلوس

هكذا يكون المسلمون .. لهم اليد العليا على غيرهم حتى على اعدائهم .. ولكن لا يكون لاحد اى مقدار من تحكم فى مصيرهم ومستقبلهم

علشان كده احنا محتاجين رجال اعمال مسلمين محترمين

الموقف التانى ساعة تجهيز جيش العسرة .. كان فى رجال كتير وفى جنود كتير .. لكن مفيش معدات ولا مؤن تكفيهم للقتال

فجاء سيدنا عثمان بن عفان بكمية من المال ... الله اعلم بمقدارها .. فكان النبي صلى الله عليه وسلم يقلب فى المال بتاع سيدنا عثمان وهو متهلل وفرحان

وقال .. ما ضر عثمان ما فعل بعد ذلك

يعنى مهما فعل من ذنوب .. فلن تساوي شيئا امام انفاقه وسخائه الشديد

علشان كده عايزين رجال اعمال مسلمين ومحترمين

الموقف الثالث ساعة لما حصلت المجاعة فى عهد سيدنا ابوبكر الصديق .. وجائت قافلة من الشام محملة بكل ما يطلبه المسلمون وما يحتاجونه

مراحش ساعتها واحتكر الحاجات اللى فى القافلة .. او استغل حاجة الناس ورفع الاسعار زي ولاد ال /!@

انما طلع القافلة كلها لله .. طبعا ده فضل وكرم منه لكن علشان كده احنا متاجين رجال اعمال مسلمين ومحترمين

اخر حاجة فى حكاية سيدنا عثمان ابن عفان .. ان على الرغم من انه كان غني جدا جدا .. وكان معاه من الاموال ما يكفيه ويكفي اهل المدينة كلهخم .. الا انه كان متواضع جدا .. وحيي ( من الحياء ) جدا لدرجة ان الملائكة كانت تستحي منه

لان الاموال كان فى ايده .. ولم يكن هو فى ايد الاموال

فعلشان كده عايزين رجال اعمال مسلمين ومحترمين

الحاجة التانية اللى فوقتنى

هو موقف كنت سمعته وكنت كتبته قبل كده .. ان حصل فجأة .. ان قيصر روسيا اكبر امبراطورية فى زمانها .. وايه بقه .. قوة عسكرية واقتصادية وقوة ثقافية لا يستهان بها

المهم ان القيصر ده فجأة .. اختفى تماما من القصر الملكي ومن على وجه الارض تماما

ولم يظهر الا بعد شهر كامل

فلما جه سألوه .. كان فين وبيعمل ايه .. وايه اسباب الاختفاء المفاجئ ده

فتخيلوا قال ايه

انه وصلتله اخبار .. ان حاكم المسلمين ساعتها مش فاكر اسمه للاسف ..

كان قاعد بياكل .. وجاله احد وزرائه بورقه .. فالحاكم المسلم ده رمى الاكل اللى كان فى ايده

وقام غاضبا .. ولم يتكلم بكلمه

فقيصر روسيا كان خايف لحسن يكون عمل حاجة زعلته !!!

فعلشان كده اختفى لمدة شهر لحد لما اتأكد انه مزعلهوش فى حاجة وبعدها رجع تانى

هل تفتكروا كان حد منهم يقدر يقرب من المسلمين او يقولهم اذا كان عاجبكوا ؟؟

علشان كده .. احنا محتاجين رجال اعمال واطباء ومهندسين وكل التخصصات .. والمهم انهم يكونوا مسلمين ومحترمين

من ضمن الحاجات بره اللى فوقتنى .. هو تاريخ المسلمين فى الاندلس .. وانها تحولت من فقر مدقع وزبالة التاريخ .. الى اوروبا اللى احنا موهومين بيها دلوقتى

اللى صحانى وفوقنى هم العلماء المسلمين المحترمين .. امثال ابو بكر الرازي وابن الهيثم وجابر ابن حيان والخوارزمي والقرطبي والغزالي وابن تيميه وابن قيم الجوزية وغيرهم الكثير والكثير ممكن تشوف اللينك ده
http://muslimscience.8m.com/main.htm

العلماء اللى خلوا حاكم بريطانيا اعظم دولة اوروبية ساعتها .. ترسل هدايا للسلطان المسلم وتغرقه بالهدايا فى مقابل انه يقبل ابنة الحاكم البريطاني علشان تتعلم فى بلاد المسلمين

مش العكس اننا نبعت المسلمين يروحوا يدرسوا فى هارفارد وكامبريدج وواشنطن ونيويورك

اللى صحانى العلماء الحاليين امثال زويل ومجدي يعقوب والباز وعبدالقدير خان ابوالقنبلة النووية الباكستانية .. وامثال صمد كوردام وجاري ميلر وزغلول النجار والدكتور خالد عبدالقادر عودة وهيثم دسوقي وغيرهم كتير وكتير

احنا محتاجين النوعية دي .. محتاجين دلوقتى كل واحد متخصص فى مجاله .. يبدع فيه ويبقى هو رمز فى نفسه .. رمز فى حد ذاته للمسلمين والالتزام اللى بجد

حكاية جاري ميلر وصمد كوردام

انا عايز اركز بس على الاتنين دول على الهامش كده

صمد كوردام ده طالب باكستاني . جاتله منحة انه يسافر ( اما امريكا او بريطانيا ) ويروح فى ارقى جامعة هناك يدرس . وذلك لانه طالب متفوق ومتميز

والسفيرة الامريكية كانت هتديله الشهادة وتسلمه المنحه .. اول ما طلع صمد كوردام على المسرح والناس بتسقفله

واتجه نحو السفيرة علشان يساخد المنحة .. بس فجأة ترك ايد السفيرة الممدودة له .. وتجاوزها وتركها خلفه كأنه لا يراها .. وراح للمايك

واعلن صراحة امام السفيرة انه يرفض هذه المنحة احتجاجا على سياسات امريكا فى بلاده وتدخلها فى شئونها الداخلية

احنا محتاجين ناس زيه كده

اما جاري ميلر فده ليه موضوع لوحده

ان شاء الله

هل فعلا كرمنا الله تعالى بالعقل ؟؟

2008-06-17T07:24:00.005+02:00

السلام عليكم ورحمة الله وبركاته

اولا جزاكم الله خيرا على التعليقات الجميلة بتاعت المرة اللى فاتت

واحب اوضح حاجة بس

1- كل واحد فسر المثل حسب ما يراه .. فى ناس كانت شايفه ان الاتوبيس ده هو اتوبيس الحياة , وان اللى بيزقوا دول هما الاشخاص المؤثرين اللى ظهروا وخدوا مساحة تاريخية وزقوا الاتوبيس
لكن الحقيقة مش ده المقصود خالص .. المعنى التانى المقصود هو ان الاتوبيس ده هو الاسلام نفسه , وهتلاقوا ان الامثلة اللى ضربتها كلها موجودة .. وكلها حقيقية ومن الواقع كمان

2- كتير من الناس قالوا وفى التعليقات كمان ان فى انواع واصناف مكررة , لكن فعليا مفيش نوع مكرر , ممكن متشابهين فى الصفات لكن مختلفين فى الافعال .. وانا المهم عندى واللى حاولت ابرزه هو الافعال .. لان الصفات الشخصية ملهاش تأثير ولا ليها اى كيان اذا لم تترجم الى افعال

3- هتلاقوا تقريبا الانواع المهمة هى الانواع اللى نزلت تزق الاتوبيس .. لان مفيش حد نزل وهيضحى بحاجات كتيرة ويقف ورا الاتوبيس ويبذل الجهد ده .. الا اذا كان عارف كويس جدا اهمية ان الاتوبيس يصل للمكان المراد .. وبالتالي فهم دول الاصل فى العملية دى كلها
وهتلاقيهم كلهم حوالى 5 ولا حاجة من اصل 100 فرد .. واداريا الكلام ده مزبوط جدا جدا

ويمكن اهم الانواع اللى انا عايز اركز عليه بشدة وهمسكه سلخ .. هو النوعين 14 و 15
لانه للاسف فى منطقة الزق .. والناس حسبته مع اللى بيزقوا .. لكنه فى الحقيقة عبء على الاتوبيس اللى شايله

بصوا يا جماعة

جميل قوي اننا نبقى دعاه وان ربنا يفتح على ايدينا وناس كتير تتوب وترجع لربنا على ايدينا
لكن للاسف الكلام ده مينفعش يتعمل الا لما نصل لمرحلة من الفهم تساعد على ذلك

لان الغباء حرام .. اه والله الغباء فى مرحلة الدعوة الى الله حرام بجد

مش كل واحد قرأ كتابين ولا سمع شريط يبقى خلاص .. مفتى الديار المصرية
او يبقى شيخ الاسلام ومجدد هذ العصر الذى يرسله الله على رأس كل مائة عام

وكتير قوي بنعمل تصرفات هى فى اصلها من اكبر الكبائر .. او مصيبة سوده
ومع ذلك احنا بنحاول نبرر او بنحاول نصور انفسنا على اننا دعاه الى الله
ونقول معلش يا اخي .. علشان دعوة ربنا
او مثلا يجي نفكر فى حاجات نعملها .. وفى الاخر الحاجات دى فيها بلاوي ومخالفات ونعديها

طبعا انا اخص بالكلام ده طبقة الملتزمين .. اللى عاملين نفسهم بيزقوا بس فى الحقيقة عبء وثقل زيادة على الاتوبيس
واعتقد ان كل واحد يعرف يقييم نفسه ويحدد هو فين

الحاجة التانية .. وهى ان الدعوة الى الله ليس بالاقواااال
افضل اتكلم مليون سنة .. وخطب ودروس وما الى ذلك .. ولا ليه اى لازمة
يقول الله تعالى " ولو انهم فعلوا ما يوعظون به لكان خيرا لهم واشد تثبيتا "

وشوف التكملة للايات
" واذا لاتيناهم من لدنا اجرا عظيما () ولهديناهم صراطا مستقيما () "

وشوفوا اللفظ .. لو انهم فعلوا
مش لو انهم قالوا
مش لو انهم تابوا .. او صلحوا فى انفسهم

احنا دين الافعال لا الاقوال

فلازم نفهم .. ونفكر
ربنا خلق العقل علشان نفكر بيه
وده هيدخلنا للنقطة التانية فى قصة الافعال وهى مهمة جدا

""" العقل """

كتير من الناس لما تسأله عن الانسان .. يقولك هو رقم واحد لان ربنا ميزه بالعقل

طيب صحيح ان ربنا اعطى للانسان عقل .. لكن هل ربنا مكانش قادر يدي العقل ده لاى حيوان تانى ؟؟

ثم ان فعليا الحيوانات عندها عقل .. وثبت ان الكلاب والخنازير من اذكى الحيوانات

طيب والانسان اللى عنده نقص فى القوى العقلية .. ده يبقى ايه ؟؟ مش مكرم عند ربنا ؟؟

لكن الصح ان ربنا كرم الانسان .. لان ربنا هو اللى اختار انه يكرمه

يعنى التكريم والشرف للانسان ده عن باقى المخلوفات .. بسبب ان ربنا هو اللى اختاره .. وقبل ان الانسان يبقى فى المكانة دى

واعطاه بعض المزايا .. بان سخر له الكون ده واللى فيه واداله قوى عقلية افضل من الباقيين

ولولا ان ربنا اختاره .. وهو بنفسه اللى كرمه .. كان الانسان زى اى مخلوق تانى

عبارة عن حاجة كده لا تذكر .. موجودة فى الكون الواسع ده .. بتاكل وتشرب وتتناسل .. من اجل وظائف بيولوجية وتكامل نظام كوني للتعايش وخلاص

وكان الانسان ده حتى لو عمل حاجات تكنولوجية وثورات واختراعات .. كان هيفضل الكائن البيولوجي الذى يبحث عن الاكل والشرب والتناسل .. وخلاص

لكن التكريم الحقيقي للانسان فى الاية " ولقد كرمنا بنى ادم " هو بسبب ان ربنا اللى اختارنا وقبلنا .. وانه هو اللى كرمنا

ولذلك .. فان الافعال اللى بنعملها برضه .. اذا لم تتصف بنفس الصفة يبقى احنا بنعمل اى كلام

يعنى لو مكانتش الافعال اللى بنعملها مقبولة عند ربنا .. وانه هو الى يتفضل علينا بقبولها
يبقى الصوم نوع من انواع الريجيم او العلاج
وتبقى الصلاة نوع من انواع الرياضة والسويدي
ويبقى الحج نوع من انواع السفر والسياحة
وتبقى الزكاة ضرائب بتتدفع وخلاص
وبر الوالدين ده علشان انت بتحبهم لان ابوك روش وظريف مثلا وقريب منك .. مثلا

فكل الافعال دى ملهاش اى لازمة ولا اى اعتبار .. اذا لم تكن مقبولة عند ربنا

وبالتالي فالقيمة الحقيقية للافعال دى .. فى ان ربنا يقبلها مننا ويضفى هو بجلالته القيمة التى يشاء عليها

هو ده التكريم الحقيقي لينا وللانسان

ولذلك مثلا قصة الثلاثة الذين حبسوا فى كهف ونزلت صخرة سدت الكهف عليهم

لو بصينا للاعمال اللى عملوها .. هتلاقيها يعنى حاجات عادية
واحد كان بيحب قريبته وبعد ما مكنته من نفسها تحت ضغط الحاجة للفلوس .. امتنع
وواحد كان جايب لبن لوالده فكانوا نايمين ... فاستنى للصبح لحد لما شربوا الاول
والتالت كان عنده عمال .. وواحد منهم نسى فلوسه .. فدخلها فى الاستثمارات بتاعته ولما رجع اداله الفلوس بعد ما كسبت وربحت

كلها اعمال عادية يعنى
يعنى اللى امتنع عن قريبته ده .. مش كان ممكن يكون بسبب انه خايف من الفضيحة مثلا .. او انها قريبته برضه وعيب يكسر عينها كده تحت ضغط انها عايزة فلوس
واللى منع اللبن عن عياله لحد لما ابوه وامه يشربوا .. يعنى اهو ممكن يكونوا كبار وتعبانين وان اللبن ده هو اللى بيعالجهم مثلا
والثالث ده .. واحد رجل اعمال استثمر الفلوس واداله ارباحه وخلاص خلصت القصة يعنى

مش حاجة كبيرة .. مش مثلا واحد ضحى بنفسه مثلا او مات شهيد .. او مثلا تحمل اذى نفسى وبدني زى الصحابة اللى كانوا بيتعذبوا

ومع ذلك لما كل واحد كان بيقول .. كان ربنا بيفرج عنهم الصخرة

ليه ؟؟

افعالهم دى ممكن اى واحد يعملها
لكن اللى اضفى علي الافعال دى صفة القدسية دى او صفة العظمة .. هو ربنا سبحانه وتعالى
بايه ؟؟

بانه قبلها منهم .. ولذلك

ممكن يكون واحد عمل نفس الاعمال دى .. ولما يدعي ربنا بيها لا يستجاب له

لانها لم تقبل

فيبقى كده التكريم للانسان مش بسبب ان عنده عقل .. انما بسبب ان ربنا هو اللى قبله وكرمه
وتبقى الافعال اللى بنعملها ملهاش اى معنى اذا لم تقبل ايضا ويرضى عنها المولى تعالى

وده هو الاخلاص
انك وانت بتعمل كده .. انت بتعمل كده علشان ده اللى يفرح ويرضى ربنا .. فانت بتعمل كده علشانه هو .. وعلشان هو يقبلها ويرضى عنك

نقاط على الهامش

ان اصحاب الكهف دول .. مدعوش ربنا الا بعد ما حاولوا يخرجوا الاول
يعنى حاولوا ياخدوا بالاسباب المحيطة حواليهم .. وبعدها بدأوا يدعوا ربنا ويتوسلوا بالافعال بتاعتهم
علشان ميجيش واحد مثلا يفضل قاعد وبيدعي .. ولا يأخذ بالاسباب ومستنى بقه الاجابة

والحاجة التانية .. انهم لما بدأوا يدعوا ربنا ويتوسلوا له بالاعمال الصالحة الى كانوا
عملوها وكانوا يظنون انها قبلت

مطلبوش من ربنا نتيجة معينة
يعنى مقالوش .. يارب انا عملت كذا كذا كذا .. فاللهم ان كنت تعلم انى فعلت ذلك من اجلك .. فافتح الصخرة دى .. او اسقط الصخرة من على الجبل علشان نخرج

انما قالوا .. ففرج عنا ما نحن فيه

مش شرط ان الفرج ده يكون فى انهم يخرجوا من الباب اللى الصخرة سدته .. ممكن ربنا كان فتحلهم مخرج تانى يخرجوا منه
ولانهم كانوا فاهمين كده كويس .. ان مش شرط اللى انا شايفه مفيد ليا سواء كنت فى مأزق او كرب او مصيبة او حتى بختار حاجة معينة .. انت كل اللى بتقوله فاقدر لى الخير حيث كان

فممكن تبقى انت فى مشكلة كبيرة ومش عارف ازاي تحلها .. وتلجأ لربنا .. وانت بتدعي ربنا اوعى تقوله انا اعيز كذا كذا
قوله .. فافرج عنى ما انا فيه .. او اقدر لى الخير حيث كان

بس كده كفاية بقه :D

عايزين نزق الاتوبيس

2008-06-05T04:13:00.007+02:00

السلام عليكم ورحمة الله وبركاته

مفيش حاجة اصعب من انك تكون مضغوط لدرجة انك مش قادر تتابع الاخبار حواليك

اسبوع كان صعب شوية ومزنوق جدا .. يلا الحمد لله

---------------------------

يوم الاثنين الماضى كنت حضرت درس لاحد الشيوخ اللى بحبهم ومحدش يسأل عن التفاصيل

المهم كان بيحكي قصة ... وبيطرح مشكلة للنقاش

وده جزء من الدرس انقله بتصرف شوية

ان فى ناس .. كانوا عايزين يوصلوا مكان معين

فركبوا الاتوبيس

فى نص السكة .. الاتوبيس عطل بيهم

والاتوبيس ده لازم يوصل للمكان الفلاني علشان يوصلوا للمنطقة اللى هما عايزينها

فانقسم الناس الى اقسام .. وكل قسم منهم اخد جنب

1- فى نوع منهم .. نزل يزق الاتوبيس
لانه مقتنع ان الاتوبيس ده لازم يوصل ... ولان مصلحته مرتبطة بوصول الاتوبيس .. وهو ميقدرش يوصل للمكان اللى هو رايحه الا اذا الاتوبيس ده وصل .. فعلشان كده نزل يزق الاتوبيس بسرعة

2- فى نوع تانى .. نزل وطلع قدام الاتوبيس بمسافة
النوع ده مش بيهرب من الاتوبيس او لانه عايز يوصل بسرعة .. لا ده طلع جري قدامه .. علشان يزيل العوائق من قدام الاتوبيس.. الجندي
المجهول .. بيزيح كل الطوب الكبير والمشاكل والمطبات التى قد تعوق حركة الاتوبيس ..
وهو مش بيعمل كده علشان مش عايز يزق الاتوبيس او عايز يهرب من الزق .. لا هو مقتنع تماما ان مصلحته مرتبطة بوصول الاتوبيس .. وانه مش هيعرف يوصل المكان اللى هو عايزة الا لما الاتوبيس ده يوصل
وهو فعلا عنده القدرة على الزق .. لكنه فضل ان يكون الجندي المجهول .. ويزيل المشاكل من امام الاتوبيس قبل حدوثها

3- فى نوع نزل من الاتوبيس .. ومشى فى حاله
مشى مع نفسه .. لقى ان الاتوبيس عطلان والناس بتحاول تزق .. وهو عايز يوصل فمشى فى حاله كده مع نفسه .. وساب الناس تحاول تزق الاتوبيس مع نفسها

4- فى تانى نزل من الاتوبيس .. ووقف يتفرج على اللى بيزقوا الاتوبيس .. ودول نوعين .. نوع بيتفرج وهو ساكت.. ماشى جنب الاتوبيس وبيتفرج بس ساكت

والتاني ماشى جنب الاتوبيس وبيتفرج .. بس بيتكلم وبيرغي .. كل شوية .. لا حاسب حاسب فى طوبة قدامك .. حاسب خلى بالك من الرصيف .. حاسب انت كده هتقع فى المكان الغلط وفى الحفرة .. ويفضل يوجع دماغ اللى بيزقوا ويشتت انتباههم

5- ونوع اخر نزل .. وهو مش عايز الاتوبيس ده يوصل .. نط ركب فيه من غير ما يعرف السبب .. او يمكن هو لقى نفسه فجأة راكب الاتوبيس .. لكن لما عطل وحصلت فيه مشكلة نزل وفضل يزق بالعكس من قدام بدل ما يزق من ورا
لانه اصلا مش عايزه يوصل .. وبيعلن كده على الملأ انه مش عايز الاتوبيس ده يوصل .. وبيدي المبررات لكده .. بان الاتوبيس ده عطلان .. وانه تعبان .. وانه قديم ومتخلف .. او ان السواق بتاعه مش فاهم ومش عارف الطريق .. وانه اتوبيس متخلف ورجعي ومكسر وحالته تصعب على الكافر

6- وفى نوع تانى من نفس الصنف اللى فات على طول .. لقى نفسه فجأة فى الاتوبيس .. او هو مكانش عايز يبقى فى الاتوبيس ده .. بس هو راح نط فيه لاهداف اخرى خفية ومش واضحة
هو اصلا مش مقتنع بالاتوبيس ده .. هو مقتنع بالقطر او الطيارة .. لكنه نزل منها وجه الاتوبيس ده علشان اهداف غير معلنه للى حواليه
فلما الاتوبيس عطل والناس نزلت تزق .. فى وسط الزحمة دى طلع وفضل يخرب فى الاتوبيس
يفصل الفرامل .. يسيح الزيت .. يخرم قربة البنزين .. او ممكن يعمل حاجات مش ظاهرة .. فيروح يغير العلامات بتاعت الطريق ويحولها لاتجاهات اخرى .. اوانه يروح يحط العوائق امام الاتوبيس .. او انه مثلا يخرم الكاوتش علشان يبقى الزق اصعب

وفى نوع تانى منهم كمان .. شغلته انه يجي جنب الناس اللى بتزق ويشتمهم ويرمي طوب على الاتوبيس او على السواق .. علشان يشتت اللى بيزقوا ويخليهم ميكملوش .. بتحصل

7- فى نوع تانى برضه .. هو لقى نفسه فى الاتوبيس برضه .. فتح عينيه لقى نفسه راكب الاتوبيس ... او هو كان ماشى فى المحطة لقى واحد صاحبه راكب الاتوبيس فراح راكب معاه وخلاص .. لكنه مش عارف الاتوبيس ده رايح فين ولا ازاي ولا اى حاجة
فالنوع ده مش فارق معاه الاتوبيس يوصل ولا ميوصلش .. المهم انه مستريح ومفيش حد جنبه يضايقه .. ومش مهتم اصلا يشوف الناس اللى بتزق دى وصلت لفين او بتعمل ايه .. ولا مهتم انه يشوف الناس اللى بتزق بالعكس .. او اللى بيحدف طوب على الاتوبيس ده بيعمل كده ليه ..
ولما الناس نزلت وفضل تزق .. فضل هو قاعد فى الاتوبيس لم يحرك ساكنا .. وسواء قعد كده تبجحا او متعللا بعذر بانه ضعيف ومش قادر يقاوم يزق يعنى ... او انه مريض او ان عنده اصابه تمنعه من الزق .. لكنه فى الاخر اصبح عبء على اللى الاتوبيس وعلى اللى بيزقوا
يعنى هو بقه محسوب على الاتوبيس ده .. والاتوبيس شايله .. وعبء كمان على اللى بيزقوا لان الاتوبيس تقيل

8- وفى نوع من الركاب .. نزل ووقف جنب الاتوبيس .. وفضل يشمت فى الى بيزقوا
انا قلت من الاول ان الاتوبيس ده تعبان .. وانا قلت من الاول ان الاتوبيس ده بايظ انتوا مش مصدقين
وكل ما يجي اتوبيس من جنبنا يعدي بسرعة .. وشكله نظيف كده ومكيف والناس اللى راكبه شكلها حاجة لارج كده ولبسها نظيفه .. فالناس الى فى الاتوبيس النظيف ده تبص من الشباك على الاتوبيس العطلان وتضحك علينا .. وتقول ايه التخلف الى انتوا فيه ده .. انتوا لسه بتركبوا الاتوبيسات التعبانه دى ( لان شكله بايظ وخربان من كتر الخبط والتخريب فيه لكنه جميل جدا وشيك جدا واسرع من الباقيين ) , ويفضلوا يتريقوا ويحبطوا الناس الركاب كلهم .. فالصنف ده .. ينبهر بالاتوبيس النظيف ده ويفضل يتريق على الاتوبيس اللى هو كان راكب فيه ولسه ما زال محسوب على اللى راكبين فيه .. فيفضل يتريق ويحبط الناس ويثبت عزيمتهم ويقولهم شوفوا الناس بتسافر ازاي .. عايزين نخلي الاتوبيس بتاعنا زيهم .. شوف الناس لابسة ازاي جوه الاتوبيس .. لازم علشان نوصل نبقى زيهم .. ايه الخرم اللى فى الاتوبيس ده .. وشوف الكاوتش بتاهم وبتاعنا

9- صنف اخر من الركاب مقتنع تمام الاقتناع بان الاتوبيس ده هو الصح .. ومتيقن ان مصلحته فى ان الاتوبيس يوصل .. وهو فعلا عايزة يوصل
بس لما الاتوبيس عطل .. نزل ووقف جنب الاتوبيس .. وفضل يعيط
وفضل يعيط بحرقة وبيعيط فعلا من قلبه
وقعد جنب الاتوبيس .. لم حبة ناس حواليه .. وفضل يدعي
يارب الاتوبيس يوصل .. يا رب وصل الاتوبيس
يارب اجعلنا سببا فى وصول الاتوبيس
يارب استخدمنا علشان نوصل الاتوبيس ده بسرعة ..
ويدعي ويعيط .. واللى حواليه يعيطوا بصدق فعلا

لكن ما يفيد الاتوبيس بكاؤهم وما تفعل دموعهم لايصال الاتوبيس

بل الاغرب .. ان ممكن يكون فى واحد بيدعي من بره الاتوبيس وحواليه ناس بتأمن على الدعاء من بره الاتوبيس .. وفى ناس جوه الاتوبيس . الاتوبيس شايلها وهى حمل عليه .. وبتأمن برضه .. لا ده فى ناس بتكسر فى الاتوبيس او بتزق بالعكس .. وبتأمن برضه على الدعاء وبتعيط بحرقة .. وهو مع الاسف بيكسر فيه وبيشوه صورته اصلا بالحاجات اللى بيعملها

10 - وزي الصنف اللى فات فى صنف اخر .. لما الاتوبيس عطل .. نزل جاب جردل ميه وحتة قماش وفضل يلمع فى الاتوبيس ... وينظف الازاز علشان الراجل يشوف .. وقعد ينظفه ويخليه حاجة اخر شياكه
بس للاسف .. هنعمل ايه بالاتوبيس النظيف اذا لم يصل اصلا !!
واكيد طبعا هيطرطش ميه على اللى بيزقوا .. مش هيسيبهم فى حالهم

الانواع اللى جايه هتبقى مركزة اكتر على الجانب الخلفى للاتوبيس .. على اللى بيزقوا الاتوبيس انفسهم .. لانهم برضه اقسام
11- فى نوع من اللى واقف ورا الاتوبيس فى منطقة زق الاتوبيس .. واقف عمال يكلم اللى بيزقوا ويشغلهم .. الا صحيح الساعة كام .. ايه ده هو انت لابس الجزمة كبيرة شوية كده ليه ؟؟ فين الجاونتى بتاعك .. طيب هو باقى قد ايه علشان نوصل
او مثلا .. انا جعاان .. الحقوني .. انا تعبان عايز دوا ..
انا عطست ومحدش رد عليا .. انا انا انا
يشغل اللى حواليه بيه او بامور فرعية تافهه

12- فى نوع من اللى بيزق فعلا .. هو بيزق اه لكن كلامه كتير
فلو حد خبط فيه يقفله .. ايه يا اخي اللى بتعمله ده .. انت بتخبطنى .. يعنى انا بزق معاك تقوم انت تديني بالكوع .. لا انا مش هزق الا لما اخد حقي .. ويجيب ناس من بره .. شوفوا .. قليل الادب والتربية انا بزق جنبه يقوم دايس على رجلي .. يعنى الحق عليا انى بزق .. انت اصلا مبتفهمش ومعندكش علم يؤهلك للزق
وبعدين بقه يقلب الطرابيزة عليه ..
طيب تعال بقه قولى .. انت عارف قواعد الزق اصلا .. طيب فين الجزمة بتاعت الزق ؟؟ هو انت مش عارف ان انت لازم تلبس الجاونتى علشان تزق !!
وكل ده بسبب ان الاتنين خبطوا فى بعض فى زحمة ولخفنه الزق

13- فى نوع تانى نزل علشان يزق .. وفعلا كان بيزق .. لكنه وجد طريقة تانية احسن للزق .. فاقترحها عليهم لكنهم شافوا انه مش وقتها ..يمكن لاننا على منحدر ولا مطلع اى حاجة .. فيقول بقه كده .. طيب الحق عليا اصلا .. والله مش هزق معاكوا .. اولعوا بجاز .. والصح انه يفضل يزق لحد لما الظروف تتغير او يقنعهم بطريقته .. بس الاقناع ده يكون اثناء الزق مش يوقفوا زق ويسمعوا الاقتراح ويقرروا
لا واثناء ما هما بيزقوا وهو بيزق معاهم .. يحاول يقنعهم باسلوب لا يشتتهم عن اهدافهم

14- من الانواع السيئة .. نوع نزل .. وراح فعلا منطقة الزق .. وحط ايده .. لكنه فى الحقيقة مش بيزق
فيبقى مثلا فى عشرين واحد ورا بيزقوا .. والناس عملت حسابها ان فى عشرين واحد معروفين بالاسم ومشهورين بين ركاب الاتوبيس انهم بيزقوا الاتوبيس .. لكن فعليا اللى بيزق بجد واللى الاتوبيس بيتحرك بفضل قوتهم وبفضل زقهم ومكافحتهم .. هما 3 بس !!!

فدول فعلا من اسوأ الانواع واكثرها احباطا

15- اما النوع اللى جاي ده .. فهو اسوأ السيئين سوءاً
وياريت نحاول نركز فيه
فهو النوع اللى نزل .. وراح منطقة الزق فعلا .. وحط ايده كأنه بيزق .. لكنه فى الحقيقة مش بيزق .. لا وايه .. ومتشعبط فى الاتوبيس من ورا
ده صعب جدا .. لانه مش بس محسوب على الناس اللى بتزق بصدق وبتزق صح .. لا ده اصبح كمان حمل على الاتوبيس
لان كده الاتوبيس شايله مع ان الظاهر انه واحد جدع وبيزق الاتوبيس .. لكن فعليا هو مش بيزق وهو حمل اصلا على الاتوبيس كمان
والسئ فى كده .. ان الناس هتبصله على انه واحد بيزق الاتوبيس .. وعلى انه شخص ممتاز ومحترم يسعى لمصلحة الجميع ويضحي بجزمته ولبسه ويتبهدل فى سبيل ان الاتوبيس يوصل والناس توصل لبر الامان ... لكنه فى الحقيقة مش بيزق اصلا .. لا ده هو محسوب متشعبط على الاتوبيس وحمل على اللى بيزقوا فعليا .. وبالتالى كل تصرفاته السيئة اللى بيعملها .. الناس اللى حواليهم بيقولوا شوفوا الناس اللى بتزق عاملين ازاي ..
وتبقى كل سيئاته تلزق فى التانيين اللى بيزقوا بجد وبهمه عالية
وهو لو كان مشى فى حاله جنب الاتوبيس .. او حتى ركب فى الاتوبيس ونام زى اللى مش فارق معاه يوصل ولا لأ .. كان اكرمله واحسنله وللناس اللى بتزق بجد ورا
لكن بقه عبء ومحسوب على الناس اللى بتزق وهو حمل على الاتوبيس كمان

16- الناس اللى بتزق الاتوبيس دى .. لازم تكون مركزة كويس قوي فى اللى بتعمله وفى الطريق .. صحيح ان السواق او القائد سابهم .. بس اداهم الخريطة .. وقالهم على حاجتين يتمسكوا بيهم كويس قوي علشان لا يضلوا بعد ما يسيبهم ابدا
وقالهم كده .. هسيبلكوا حاجتين لو تمسكتوا بيهم مش هتوهوا ابدا عن الطريق وهتوصلوا للاخر
وفعلا صدق ووفى بوعده .. واداهم الخريطة والمفتاح وسابهم لانه مات فى نص الطريق
فالناس اللى بتزق بجد ورا عارفه الخريطة ومعاها نسخ كتيرة من المفتاح وكل واحد شايل نسخة فى جيبه كمان وفى شنطته ومع عياله ومراته
ومع كده .. يجي واحد من اللى بيزقوا يقول .. الا الخريطة دى عاملة كده ليه .. انا شايف ان احنا ناخد الطريق الشمال مع ان فى الخريطة
الطريق يمين

او يجي واحد منهم مثلا ويقول .. انا الوحيد اللى فاهم الخريطة دى .. والباقيين دول مش فاهمين حاجة ويحتكر الخريطة لنفسه
او يطلع واحد تانى مثلا ويقطع الخريطة وياخد جزء منها .. ويقول الحتة اللى معايا هى الخريطة كلها ويحط كل تركيزه فى الجزء اللى معاه
طبعا فى ناس بتبص للخريطة من فوق على كل جوانبها ومظاهرها .. بس ممكن يكونوا مش فاهمينها او مش عارفين ايه تفسير الخط ده او الطريق ده
لكن لازم يمشوا على حسب الخريطة والمفتاح اللى فى ايديهم

والناس اللى بتزق دى كلهم .. سواء اللى معاه جزء اومعاه الخريطة كلها ( طالما هو بيزق يبقى ان شاء الله كويس ) يجب عليهم انه لا يلتفتوا للى عمالين يعيقوهم .. يعنى يجي واحد مثلا يقوم شاتمهم .. او يقولهم الاتوبيس ده مش هيوصل وعلى جثتى لو وصل .. او يحدف عليهم طوب مثلا
فالتصرف الغلط انهم يسيبوا الزق ويفضلوا يردوا عليه ويقولوا لا هيوصل يعنى هيوصل .. مع انهم سايبين الزق
او مثلا يسيبوا الزق ويروحوا يضربوا اللى قال كده علشان يعملوه الادب .. وهم فى الحقيقة سابوا الزق فعليا

الخلاصة
انه بشكل عام .. لو الاتوبيس ماشى .. فاى عمل لا تصب جهوده فى ان الاتوبيس يوصل للغاية والهدف اللى طلع من اجلها .. فهو غلط ويقع صاحبه فى منطقه خطرة
وفى الحالة الى فاتت دى بشكل خاص .. لما الاتوبيس يكون عطلان والاتوبيسات التانية سبقتنا بمراحل .. فان اى عمل لا تصب جهوده ولا يصب تعب صاحبه فى ان الاتوبيس يتزق لقدام للطريق الصحيح .. فهو غلط كبير ويقع صاحبه فى منطقه الخطر الاكبر

دى الاصناف الموجودة .. ودى الصورة بشكل شبه متكامل
واى تشابه او اسقاط بين حالة الاتوبيس وحالتنا دلوقتى .... هو مقصود ومدبر ومخطط له مسبقا ومبيت له النيه بليل

لعلنا نتعظ او نفهم

المطلوب هو الاتي :

كل واحد يختار لنفسه النوع اللى يعجبه .. وفعلا قيم نفسك واقعيا .. انت فين دلوقتى
وكن صادقا مع نفسك

الموضوع ليه تكمله ان شاء الرحمن .. دعواتكوا بس

عن لبنان وما يجري فيه

2008-05-13T19:35:00.002+02:00

السلام عليكم ورحمة الله وبركاته

لن ابدا هذه التدوينة بالاعتذار عن التأخير لانكم مسامحين وانا عارف كده كويس

ولانكوا عارفين نفس المبررات برضه بتاعت ضغط الشغل وده حقيقي على فكرة

المهم ندخل فى الموضوع اللى هو عن لبنان

انا مكنتش عايز اكتب عنه لكن الاحداث الاخيرة والتحركات العسكرية داخل لبنان مهمة جدا وخطيرة ولازم نفهمها

فى البداية انا مش محلل سياسي ولا خبير فى الشئون اللبنانية ولا حاجة .. لكن هي محاولة لقراءة ما بين السطور واننا نفهم

لان كتير من الناس اللى اعرفهم بيغلطوا حزب الله وكأنه عمل عمله سوده .. لكن الحقيقة غير كده وان تحركه ده كان فى وقته

كان فى مقالين وللمصادفة كانوا فى نفس الصفحة فى دستور يوم الاحد تقريبا .. واحدة لرئيس جهاز المخابرات الاسرائيلية الاسبق .. والاخر لعبدالباري عطوان

المقالين فى منتهى الخطورة .. هحاول احط العناوين الرئيسية ثم اوضح حبة حاجات

المقالة الاولى : اهارون زئيفي فركش رئيس المخابرات الاسرائيلية الاسبق

- قال .. نصحنا ال سى اى ايه بعدم الاعتماد على وليد جنبلاط او على سعد الحريري لاننا جربناهم فى 2006 ولم يتبين ان لديهم الجرأة او القدرة على مواجهة حزب الله !!
- قال ايضا .. لقد دربت اسرائيل رجال جعجع احسن تدريب وسيظهر فى اى مواجهة مقبلة ان المقاتلين سيصمدون وقتا اكبر فى مواجهة حزب الله ولكن سيهزمون فى النهاية
- قال .. الامريكين ليسوا مستعدين للتورط باكثر من ارسال طواقم حراسة لمراكز اقامة كل من السنيورة وجنبلاط والحريري
وقال بان كوندوليزا رايس قالت للسينيورة فى اتصال هاتفيى وكان منهارا جدا .. بانها ستأخذ من بوش وعد بارسال قوات مارينز الى بيروت لحماية السنيورة
- وعن اغتيال عماد مغنية قال.. لا علم لى بان اسرائيل هى من قتلت مغنية ولكنى اعلم ان طرفا لبنانيا زودها او اكد لها شخصيته.. وشخص واحد كان يعرف من هو الحاج ربيع او رضوان وهو زعيم .. فى اشارة الى جنبلاط

والحقيقة ان المقالة دى خطيرة جدا .. وتدلل على اهمية ان نفهم اللى بيحصل هناك واننا لا نترك انفسنا فريسة للاعلام المضلل اللى بيوصلنا وبيتقالنا انها معركة بين السنة والشيعة فى لبنان

المقالة الثانية بقه وهى الخلاصة واللى فعلا مينفعش يتقال بعدها كلام .. كانت للمفكر عبدالباري عطوان

- عندما يجد فريق الموالاه (الحريري والسنيورة وجنبلاط وجعجع) انفسهم محاصرين فى مقارهم بين ليلة وضحاها .. فهم يدركون تماما ان هناك قوة واحدة فقط باستطاعتها ان تفرض سيطرتها على ارض الواقع .. وهم يدركون ذلك جيدا
- اذن لماذا لجأوا الى هذا التصعيد المفاجئ ؟؟ ( عن طريق اتخاذ قرار بعزل مدير امن مطار بيروت المقرب من حزب الله وازالة شبكة اتصالاته وكاميراته من المطار )

هناك احتمالين .. اما انهم على درجة عالية من السذاجة والغباء وهذا مستبعد .. واما ان هناك جهة ما طلبت منهم التصعيد واستفزاز حزب الله لجره الى حرب اهلية تستنزفه داخليا وتسقط الشرعية عن سلاحه خارجيا .. وهو الذى حدث فعلا

- هناك اطراف تجمع على ضرورة تصفية سلاح المقاومة وتلتقى هذه الاطراف مع امريكا واسرائيل فى هذا الهدف .. وبالطبع فهم حرضوهم على التعجيل بنزع سلاح حزب الله وذلك عن طريق استفزازه وجره لحرب اهلية داخلية وذلك لاظهار ان هذا السلاح لم يكن بالاساس موجها ضد اسرائيل وانما ضد الحكومة ( والسنة ) بين قوسين

- ولان امريكا لا تستطيع ان تعلن الحرب على حزب الله ولا تستطيع اللجوء الى الاكاذيب بعد سقوط مصداقيتها فى حربها الاخيرة على العراق , ولان الجبهة اللبنانية هادئة .. كان من المهم ان يتم استفزاز حزب الله ليستخدم سلاحه

- هذا يقودنا الى ان هناك مشروعين فى المنطقة .. مشروع يعتمد خيار المقاومة المشروعة وتتبناه سوريا وايران فى العلن دعما لحزب الله وحماس والفصائل الفلسطينية .. والاخير يعتمد الوقوف فى صف امريكا واسرائيل وحماية مصالحهما فى المنطقة لحماية كراسيهم

- ان خيار المقاومة هو الذى مكن حماس من السيطرة على غزة .. ومكن حزب الله من السيطرة على بيروت فى ايام , والمشكلة ليست فى ان الغير لديه مشروع فى المنطقة .. وانما المشكلة فى ان العرب ليس لديهم مشروع ولا استراتيجية لانفسهم فى هذه المنطقة المحورية

-ان الصراع فى لبنان ليس بين السنة والشيعة .. كما يريد الاعلام ان يصوره .. ويريد الاعلام ان " يشيطن " حزب الله ويصوره على انه الشيطان الاكبر والاوحد وانه يقوم باباده السنة فى لبنان .. بل هو صراع بين من انتصر على اسرائيل واذلها .. وبين من انهزم فى مواجهته معها ووقف يساندها

هذا هو ملخص التحليل الذى ذكره عبدالباري عطوان

الفكرة فى الاخر .. ان الموضوع ليس بين السنة والشيعة .. او بين الحق والباطل كما يصوره بعض الناس اللى المفترض انها فاهمه
المشكلة اكبر من كده

ثم ان حزب الله لم يقم بالسيطرة على لبنان .. والجميع يعلم ان حزب الله هو الوحيد القادر على السيطرة على مقاليد الامور فى لبنان بين طرفة عين وانتباهتها .. لانه الوحيد الذى تصدى للجيش الاسرائيلي وطرده خارج لبنان حين عجز الجيش الرسمي للدولة عن القيام بمهمته فى حماية الارض

ثم ان التقارير كلها تقول ان فريق الموالاة كان بيدرب ميليشيات علشان ضرب حزب الله فى الشارع .. ولذلك فتحرك حزب الله كضربة استباقية وقائية كان متميز جدا وفى وقته

مثلما فعلت حماس فى غزة .. عندما رصدت معدات عسكرية متقدمة فى ايد فتح وانه هناك تحركات مشبوهة للانقلاب على مشروع المقاومة .. كان لابد من التحرك عسكريا

ده هيدخلنا فى موضوع تانى المرة الجاية ان شاء الله

ايه رأيكوا ؟؟

ونجوت من الموت باعجوبة !!

2008-04-23T22:01:00.002+02:00

السلام عليكم ورحمة الله وبركاته

متستغربوش من العنوان .. فهو فعلا حقيقة

نجوت من الموت باعجوبة

الحقيقة بعيدا عن مدى صحة هذه العبارة من عدمه

لكن هذا هو شعوري الان

يا الله .. كم هى صعبة هذه اللحظات

الان فقط .. احسست باحساس علاء جبة الله يرحمه فى لحظاته الاخيرة

عندما يكون بينك وبين الموت امتار قليلة .. وتنجو منه فتحمد الله تعالى

وقد لا تستطيع ان تدرك هذا الشكر .. ولا الاستغفار ... بل ولا حتى الشهادة

اليوم والحمد لله تعرضت لحادث من اشد الحوادث التى حدثت لي

واعتقد انه الحادث السابع الذى اتعرض له فى مصر الغالية

المهم القصة من البداية

انى كنت فى شغل ما فى منطقة ما .. وبعد ما خلصت رحت علشان اركب من ميدان لبنان

المهم ركبت وانطلق الميكروباص .. وعلى المحور بسبب اعمال الصيانة والاصلاح فالطريق اللى رايح اكتوبر بيمشى فى نفس الطريق اللى جاي من اكتوبر ماشى فيه

مع فاصل صغير فى النصف لمنع اعمال الغباء الازلي الموجود عند السواقين

المهم كان فى واحد ماشى ورانا وشكله كان واضح من الاول انه غبى من الطراز الاول

فكان سواق الميكروباص اللى انا راكب قدام جنبه .. بيعدى من جنب عربية من على شمال العربية

وبالتالي فكده فى عربية ( احنا بنعديها ) على يمينا .. وبعد كده الطريق اللى راجع من اكتوبر

فجأة لقينا الغبي بالفطرة ده عايز يعدي بالعافية

فجه من على يمين الميكروباص وحاول ياخد غرزة

وكان الطريق لا يسمح له اصلا بالمرور

فدخل بالعافية برضه

فالجزء الاخير من عربيته .. خبطت فى الجزء الامامي من الميكروباص

وحيث ان الخبطة كانت من اليمين

فالميكروباص زحف للناحية التانية ( اللى جايين من اكتوبر )

وانا راكب قدام جنبه

والعربية اللى خبطتنا برضه معانا

ودخلنا الناحية التانية خبطنا حوالى اربع عربيات

ثم الميكروباص رجع الناحية التانية واتقلب على جنبه ( الجنب اللى ناحية السواق ) وزحف مسافة حلوة كده

وتوقف

انا كنت قدام جنب الشباك .. وكان جنبى واحد صاحبى قابلته قدرا فى الموقف وركب جنبى

المهم والميكروباص مقلوب .. رحت على طول شادد نفسى وخرجت من شباك الباب الى جنبى

ونطيت من الميكروباص بسرعة

الحقيقة انا كنت فى حالة لا شعور .. كنت عايز اهرب من الموت وخلاص

لانى وانا بخرج لمحت بنزين العربية بينزل بغزارة

خرجت من الميكروباص .. ونسيت صاحبي اللى كنت بتكلم معاه قبل وقوع الحادثة باجزاء من الثانية

نسيت انه معايا .. كان كل همي انى ابعد عن المكان .. وكنت على يقين تام .. ان العربية ستنفجر

مكانش مهم عندى اى حد غير نفسى

مكنتش بفكر فى انقاذ 14 واحد تانيين فى الميكروباص .. غير 3 فى تاكسي .. والواد اللى خبطنا .. وواحده ست فى عربية اتخبطت برضه ... وتلاتة فى عربية تانية اتاكلت فى النص .. وكام واحد كانوا فى عربياتهم فى امان اتخبطوا

كل دول مكانوش مهمين عندى .. ولا كنت بفكر فيهم .. بقدر ما كنت بفكر فى انى اهرب من المكان ده على وجه السرعة

ياااااااه

للدرجة دى طلعت اناني

بعدها كان كل همي انى ابعد الناس عن البنزين .. معرفش كنت خايف جدا لحسن العربية تنفجر

كنت خايف من النار وحرارتها

لانى كنت عارف ان دى الحاجة الوحيدة اللى ممكن تموتنى بعد الحادثة

بعد ما انا خرجت لقيت صاحبى نط ورايا من الشباك برضه

وجم ناس كسروا الشباك الامامي وفتحوا الباب وبعدها عدلوا الميكروباص علشان الناس تنزل منه

وقام المتطوعون باخلاء الجرحى بعيدا عن مكان الحادثة

الغريب اللى انا مستغربله جدا

ان الحادثة دى لم تحرك فيا ساكنا

على الرغم انها من ابشع الحوادث اللى انا اتعرضتلها .. وتعتبر اشدها سوءا وكربا

لكن فعلا .. انا حاسس كأنها لم تكن

ربما لانى لسه فى تأثير الصدمة .. عمري ما تخليت نفسى راكب عربية وتتقلب

عمري ما تخيلت انى هموت دلوقتى .. يا نهار

طيب والذنوب اللى الواحد بيعملها ليل نهار

طيب والعبادات اللى الواحد مقصر فيها جدا

افتكرت بعد ما فوقت .. انى لسه مصليتش العشاء .. رغم ان معاده عدى

يعنى انا لو كنت مت .. كنت هتسأل اول حاجة عنها ..

يا الله

والله فعلا حسيت بعدها بحديث الرسول عليه السلام " من اصبح آمنا فى سربه معافا فى بدنه .. فقد حيزت له الدنيا بحذافيرها "

فعلا حسيته .. وحسيت بنعمه انك تبقى ماشى مطمئن

الحمد لله

الحمد لله على كل حال

افكار تدور فى رأسي

2008-04-06T07:33:00.003+02:00

السلام عليكم ورحمة الله وبركاته

معلش الواحد مشغول جدا فى كذا حاجة كده

ده غير ضغط الشغل اللى فتح مرة واحدة

المهم النهاردة انا عايز اتكلم على موضوعين الى حد ما ملهومش علاقة ببعض

الموضوع الاول : قصة الاساءة للرسول وردود الفعل اللى حصلت على الموضوع

الحقيقة انا كنت بفكر فى الموضوع .. وبعدين ؟؟

يعنى ماشى طلعنا مظاهرات لم يسمع عنها ولا لها احد .. وبعدين ؟؟

عملوها اول مرة والناس انتفضت دفاعا عن الرسول .. ورجعوا تانى وعملوها من غير ما يعملوا اعتبار للمليار وشوية اللى كلهم غثااااااااء ؟؟ .. طيب وبعدين ؟؟؟

وفضلت افكر .. طيب ما هو الرسول اصلا تعرض للاساءة وهو عايش .. يعنى قالوا عليه انه ساحر وكذاب ومنبوذ وكل حاجة .. اشمعنى ساعتها الصحابة لم ينتفضوا دفاعا عن الرسول برضه وعملوا مظاهرات ؟؟

مع العلم ان كلمة كذاب دى فى المجتمع العربى القديم تعتبر شتيمة كبيرة جدا جدا .. لان المجتمع العربى القديم بيقدس الاخلاق الاساسية بشكل غير طبيعي .. وكانوا ملتزمين بيها .. فالطبيعي عندهم ساعتها ان الصدق ده زى الاكل والشرب .. فان واحد يصفوه بالكذب زى ما تجيب واحد دلوقتى وتتهمه بالزنا وش مثلا

ومع ذلك محصلش حاجة ومحدش عمل حاجة ساعتها

لا دول حاربوه كمان .. وطردوه من بلده وكانوا بيأذوا اصحابه .. ولم يتحرك احد ساعتها فى مظاهرات ولا حاجة

طيب وبعدين ؟؟

فايه الموضوع بقه ؟؟

واكتشفت حاجة تانية اكبر بقه .. ان الرسول عليه الصلاة والسلام لم يثأر لشخصه ابدا .. ولم يكن يهتم اصلا باى اساءات لشخصه اطلاقا ..
يوم لما كان ساجد واترمى عليه امعاء الابل الميت برائحتها القاتلة .. وجاءت السيدة فاطمة تزيله عنه وهى تبكى ... فقالها كلمة انا متخيل انه كان بيقولها وهو مبتسم .. ان الله ناصر اباكي

لما اليهودي كان بيحط الزبالة قدام بيته .. وكان بيخرج يشيلها يرميها فى مكانها ويكمل طريقه

طيب وبعدين ؟؟

وبعدها حضرت درس لاحد الشيوخ اللى بحبهم جدا علشان تفكيره .. فلقيته بيتكلم فى النقطة دى .. وسبحان الله كأنه كان عارف انا بفكر فى ايه

قال ان مع احترامنا الشديد لكل الاساليب اللى الناس بتعملها للدفاع عن الرسول .. بس اصلا احنا مش بندافع عن الرسول

يعنى احنا قد نكون بنسئ للرسول اكتر ما بندافع عنه

وقال ان قبل المقاطعة وقبل المؤتمرات والمظاهرات والبوسترات وكل الكلام الجميل ده .. فى كذا حاجة قبلها

1- وهى الايمان الصادق بالرسول عليه السلام .. ودى المرتبة التانية بعد الايمان بالله تعالى
يعنى منبقاش بنقول احنا بنحبك يا رسول الله واحنا فداك وساعة الجد كله يخلع ..

2- دعوة الناس دى اصلا الى معرفة حقيقة الاسلام .. وهذه الدعوة تكون قائمة على الادلة العقلية وليس الوجدانية او القلبية .. يعنى مينفعش مثلا تروح تقوله ده رسول من عند الله .. يقولك ايه الدليل .. تقوله انه هو رسول او ان القرآن بيقول .. لا
لازم تقوله دليل عقلى ملموس يفهمه علشان يصدقك .. والا يبقى انت بتأذن فى مالطة

3- انه يبقى فى قوة تردعهم عن الاستمرار فى الاساءة .. يعنى مع الاحترام الشديد لكل اللى طلعوا فى مظاهرات .. معلش يعنى كام واحد فيهم بيفهم فى صنعته ومتقنها .. كام واحد عنده هدف انه ينفع بلده ووطنه
هما اصلا معملوش اللى عملوه الا لما اتأكدوا اننا غثاااااااء وملناش وزن
بدليل ان بعد كل اللى عملناه والمؤتمرات اللى عندهم واللقاءات والمظاهرات والمقاطعة والزخم الاعلامي اللى اتعمل ساعة الاساءة الاولى .. رجعوا تانى بكل برووود وعملوا فيلم كمان بقه مش حبة صور

وبالمناسبة .. بعد نشر الرسوم فى المرة الاولى .. نشرت بعدها فى كذا صحيفة اخرى بعدها بشهر تقريبا ... ومحصلش حاجة
لاننا ملناش وزن ولا قيمة ولا وجود اصلا .. ليه يعملوا اعتبار لملياااار وشوية وكلهم سلبيين ومحدش بيشتغل .. والاهم ان اكل عيشهم بايدهم هما ؟؟

عجبنى ابيات شعر لوليد الاعظمي الله يرحمه وقالها الدكتور طارق السويدان

اسلامنا لا يستقيم عموده .. بدعاء شيخ فى زوايا المسجد
اسلامنا لا يستقيم عموده .. بقصائد تتلى فى مدح محمد
اسلامنا نور يضيئ طريقنا .. اسلامنا نااار على كل من يعتدى

والشيخ اللى كنت بحضرله ده ذكر قصة فى النقطة دى

انه حصل مرة ان قيصر روسيا اختفى من على الارض لمدة شهر .. فجأة كده اختفى قيصر اكبر امبراطورية فى الوجود ساعتها
ومحدش عارف هو راح فين ولا ايه الاسباب ولا ايه مصيره حتى
لمدة شهر كامل مفيش اى اخبار عنه ولا معروف ايه اللى جراله

وبعد شهر ظهر تانى ورجع تانى .. تخيلوا كان ايه السبب ؟؟

ان خليفة المسلمين ساعتها ( للاسف مش متذكر اسمه) كان قاعد بيتناول فطاره .. فجاله خبر ازعجه .. فرمى الاكل اللى فى ايده على الارض ومشى وهو متنرفز

فقيصر روسيا اختفى شهر كامل خايف لحسن الخليفة ده يعمل فيه حاجة .. فلما اطمئن على نفسه وانه مش هيعمل فيه حاجة .. رجع تانى

انتوا متخيلين ؟؟

هل فى الوقت ده كان يجرؤ اى واحد هناك انه يسيئ للبواب بتاع قصر الخليفة حتى ؟؟

اذا لم نوجد قوة تحمينا ... يبقى نستاهل الى بيجرالنا

والقوة دى شاملة لكل حاجة .. قوة ثقافية واقتصادية واخلاقية واجتماعية وسياسية وعسكرية وكل حاجة

يقول الله تعالى

واعدوا لهم ما استطعتم من قوة ومن ركاب الخيل

ومعروف ركاب الخيل يعنى السلاح .. طيب ايه المقصود بكلمة قوة ؟؟
واكيد مش مقصود بيها القوة العسكرية والا ربنا مكانش هيكررها مرتين

فاحنا اللى بنعمله ده كله عبارة عن زوبعة فى فنجان فقط .. لا وزن لكل الاعمال اللى بنعملها طالما اننا نسينا الحاجات الاساسية
كل ده كلام فاضى اذا سيبنا الاساس

مش معنى كده اننا نبطل مقاطعة ونسكت وكده .. لا ده كويس لكن لازم نفهم ونعي ان مش ده الاصل

الموضوع التانى بقه وهو قصة الاضراب بتاع النهاردة

واللى يخصنى فيه الحقيقة هو موقف الاخوان منه

الحقيقة موقف الاخوان منه مخزي جدا وسلبى لابعد الحدود وغير متوقع من ناس المفروض انها بتفهم

يعنى احنا منين من كام سنة كنا بنشجع الناس انها تشارك فى الانتخابات ومتبقاش سلبية وتتحرك علشان تاخد حقها .. ودلوقتى لما هما اتحركوا وطلبوا دعمنا نقولهم لا ربنا معاكوا ملناش فيه ؟؟

يعنى ايه ان لما الناس كلها تتجمع على رفض الظلم والطغيان ( اللى الاخوان اصلا بيعانوا منه اشد المعاناه ) ولما يتجمع الشعب المصري على الهدف ده .. نقولهم لا معلش نستأذن احنا علشان بنحاول نتصاحب على النظام ؟؟

واللى يفقع اكتر .. البيان اللى صدر الهزيل واللى عنده هشاشة عظام وانيميا حادة جدا ولا كأنه جاى من الصومال .. ده غير الاسباب اللى ذكرها الدكتور محمد عزت .. يعنى عذر اقبح من ذنب على رأي المثل

يعنى ايه لم توجه لنا الدعوة ؟؟
اولا منطقيا ان اول ناس هتوجه لهم الدعوة هما الاخوان لان عندهم قدرات تنظيمية وحشد كبيرة .. ده الطبيعي .. واى واحد غبى ميعملش كده يبقى مش بيفهم فى السياسة اصلا
ثم كان فى اجتماع تنسيقي للاضراب ده .. وحضره الدكتور الكتاتنى رئيس الكتلة البرلمانية للاخوان .. وساعتها كل القوى الوطنية على طول قالت احنا موافقين الا الدكتور .. قالهم هرجع الاول للمكتب وربنا يسهل

يبقى ازاى لم تتم دعوة الجماعة وان الجماعة مكانتش تعرف حاجة عن الموضوع ؟؟
طيب ده اسمه كلام ؟؟

وبعدين هو الاخوان دول مش جزء من الشعب بيعانوا من الغلاء وجنون الاسعار وضعف المرتبات ؟؟ ولا دول نازلين من السماء ولا يمكن ربنا باعتلهم كنز بيصرفوا منه ؟؟

للاسف الاخوان خذلوا الشعب ايما خذلان .. وفعلا للاسف الشديد رقبتنا بقت زى السمسمة

وبالمناسبة بقه .. اصلا كل الاخوان مشاركين فى الاضراب ده على الرغم من الموقف الرسمى اللى بيغازل الحكومة علشان ياخد الحزب .. وحتى لو مكتب الارشاد اخد قرار او حاجة زى كده .. الاخوان بيعملوا اللى عايزينه وبيشاركوا برضه

يبقى ليه المكتب ياخد قرارات لا تعبر عن رغبة الاخوان الحقيقية ؟؟

فعلا الموقف بتاع الاخوان ده غير مشرف بالمرة وانا ادعو كل القوى الوطنية .. انها لا تشارك الاخوان فعاليتهم وخاصة المحاكمات العسكرية وان محدش يقف جنبهم معاملة بالمثل

ولولا ان الوقت دلوقتى لا يسمح بمثل هذه الاختلافات الشديدة .. لكنا شفنا حملات هجومية شديدة على الجماعة

ربنا يهدي الجميع يا رب

المهم فى الاخر بقه

انا عايز افكار منكوا نعملها فى المدونات

لانى مش لاقى وقت اجيب افكار مواضيع جديدة للمدونة .. فلو حد عنده فكره لله يقولنا عليها

والسلام عليكم ورحمة الله

تفاصيل الاعتقال فى امن الدولة

2008-03-19T21:56:00.003+02:00

السلام عليكم ورحمة الله وبركاته

1- طبعا بعتذر بشدة عن طول الفترة اللى فاتت اللى مكتبتش فيها حاجة .. بس فعلا ربنا وحده العالم بالوقت والانشغال الشديد اللى حصل .. لدرجة ان جت فترة بدخل البيت الساعة 12 بليل .. فالحمد لله على كل حال

2- كنت قريت حاجة كده جميلة .. واحد كتبها تعليق على الاية " وان لكم فى الانعام لعبرة"
فهو جايب الانواع المختلفة من الحيوانات وكل واحد نستفيد منه ايه .. بجد لازم تقروها على مدونة خواطر عمر لانها مفيدة جدا

3- كنت مع صلاح فى حاجة كده .. قابلته بعد ما خلصنا شغل .. المهم يعنى صلاح بيقولى انه عايز يتجوز .. وانه بيدور علشان يخطب يعنى .. قلتله يابنى خلاص مفيش جواز دلوقتى .. هنجيب فلوس منين علشان نتجوز ؟؟
قلتله الدهب اصلا هيوصل 200 جنيه للجرام .. يعنى كده مفيش شبكة .. ده غير اسعار الشقق المولعة .. يبقى كده مفيش شقة .. غير البنزين اللى هيغلى يبقى كده مفيش عربية .. واما الخشب فزاد حوالى 300 جنيه يبقى مفيش عفش .. ومش هقولك بقه على الزيت والسكر والرز اللى زاد مرة واحدة يبقى كده مفيش اكل كمان واما العيش فواضح قوي الهدايا اللى بتحطها وزارة التضامن فى رغيف العيش ( تعرفوا ان فى واحدة فى جرنان كده جابت عيش كسبت فى رغيف منه ساعة يد بس للاسف من غير استيك .. فادعولها تكمل باقى اجزاء الساعة علشان تكمل فرحتنا وفرحتها ؟؟ ) .. وبعد كل ده كمان المرتبات جايبه الارض .. يبقى نتجوز ليه ونصرف على البيت منين ان شاء الله ؟؟

قالى لا برضه .. انا هتجوز .. وفعلا بيتكلم بجد وبيدور .. قلتله ربنا معاك بقه

ادعوله ممكن يعملها بجد ويتجوز :D

4- المهم خلونا فى اللى احنا فيه

بعد ما اخويا راح بقه وفضل هناك .. كنا طبعا بنعمل الاكل وواحد بيروح يوديهوله .. الكلام ده كان قبل ما يترحل من امن الدولة لسجن وادى النطرون

كنت انا احيانا بروح اوديله الاكل .. وكان العساكر والامناء اللى هناك عارفينه كويس ... والحق يقال .. انهم كانوا فى غاية الاحترام والتعاطف
لان فى عدة مواقف هقولها دلوقتى هتعرفوا انا بقول كده ليه

الاول: فى الاول لما اخويا راح .. قعدوا فترة محدش من الامناء جالهم علشان ياخد طلباتهم فى الاكل ويشتريهالهم .. ففضلوا فى التخشيبه حوالى 16 ساعة من غير اكل .. فلما الظابط عرف كده مسك الامناء وسلخهم .. اخويا بيقولى جالنا الامين وضارب بوز معتبر وشكله واكل علقه سخنة ... وخد طلباتهم وجابها

التاني: انا لما كنت بروح علشان اودي الاكل لاخويا .. كان الامين فى الوقت اللى الظابط مش موجود فيه .. بيروح طالع يقفل الباب الحديد اللى بره .. ويقفل الباب اللى جوه علشان محدش يشوفنا .. وفى الوقت ده يكون التانى دخل التخشيبه جاب اخويا .. ويطلع يقعد معايا شوية نتكلم ونتناقش فى اللى بيحصل وكده

الثالث:
لما كنت بجيبله الاكل .. كان بيبعتلى هو من خلال الامناء برضه .. يبعتلى الهدوم بتاعته علشان اخدها تتغسل .. ففى اخرة مرة اروحله .. لقيت الامين قفل الباب تانى ودخل جاب اخويا

فاخويا خدنى على جنب وبعيد وقالى .. هتلاقى فى جيب الجلابية اليمين رسالة فيها كذا كذا كذا .. خلي بابا يقراها علشان تشوفوا الموضوع ده

طبعا بما انه ممنوع فى التخشيبه انه يبقى معاه اى حاجة حتى الورقة والقلم .. وحيث انهم رفضوا اننا ندخله كتب طبية علشان يذاكر .. يبقى اللى جابله الحاجات دى كان الامين اللى بره

كل دى مواقف الحقيقة انا مكنتش بصدق لما بشوفها .. هل فعلا معقول ان ده بيحصل ؟؟ ولا انا مش مصدق نفسى وبحلم ولا ايه بالضبط ؟؟

وقصص التعذيب وقلة الادب والقتل اللى بيحصل فى الاقسام ده ايه ؟؟
وكل ده ليه تفسير هقوله فى الاخر لما اخلص

المهم بعد اخر مرة دى لما قالى على الرسالة .. روحت على البيت .. وانا فى الطريق رحت مطلع الرسالة اللى بيقول عليها .. لقيتها مكتوبة بقلم جاف على منديل .. اه والله منديل

واخدتها خبيتها وقعدت عادى جدا .. لما نزلت لصلاة العشا انا وبابا .. قلتله على الرسالة ووريتهاله .. فبابا لما شافها اخدها وقالى اوعى تقول لماما عليها ولا على اللى فيها .. متقولش لحد نهائى

وفعلا .. لحد دلوقتى محدش يعرف الموضوع ده غيري انا وبابا واخويا اللى كتبها بس

كان كاتب فى الرسالة دى تفاصيل حاجات حصلت معاه .. وانهم خدوه علشان يعمل فيش وتشبيه .. وان فى احتمال يترحل لسجن وادى النطرون .. وحبة تفاصيل اخرى وطلبات كان عايزها

المهم بابا قال انه لازم نروح زيارة لمقر امن الدولة اللى هو فيه علشان نشوف ايه الموضوع ... ونتكلم مع الظابط اللى هناك نحاول نفهم ايه اللى بيحصل

المهم بابا قالى يلا علشان نروح .. ورحت انا وبابا هناك .. طبعا لان مواعيد شغلهم الضباط اصلا بليل .. فرحنا بعد العشا على الساعة عشرة علشان الافندي يكون جه

رحنا ودخلنا هناك على الساعة تسعة كده

لقينا ناس تانية قاعدة هناك .. متعرفش السبب ايه .. وواحد بس اول ما شفته عرفت سبب انه هناك .. واحد لابس عمه والعباية بتاعت شيوخ الاوقاف .. وطبعا معروف هو هناك بيعمل ايه

فضلنا قاعدين من الساعة 9 لحد الساعة 10 ونص .. كل ده قاعدين بره بس مستنيين .. وانا وبابا فاهمين سبب القعدة دى
اى حد بيروح امن الدولة بيلطعوه فترة طويلة كده بره .. مستنى .. مش لسبب الا ان الطبيعي ان الواحد لما بيكون رايح تجربة خايف منها وعنده خلفية مسبقة سودة .. بتفضل بقه الافكار تدور فى دماغه ويبدأ يتوتر جدا .. فلما يطلع فوق مع اقل ضغط من الضابط ينهار الشخص نفسيا ويجيب اخره

بعدها جه الامين وقالنا تعالوا يلا .. دخلت من الباب اللى كنت كل مرة .. اقف عنده مكملش .. وكان اخويا بعد ما اقعد معاه شوية يدخل هو ويكمل
دخلنا على طرقة طوييلة .. وفى نصها تقريبا صالة فيها سلم كبير .. اشبه بالضبط بمبنى مدرج (أ,ب)

طلعنا فوق الدور التانى ... ومشينا فى طرقة تانية .. كلها غرف مقفولة .. المهم وقفنا عند واحدة منهم ودخلنا فيها .. اللى المفترض انها تكون بتاعت الضابط

لما دخلنا الغرفة على الضابط .. اول حاجة بدأ يعملها هو ممارسة عادته وهوايته فى طرح الاسئلة .. وبدأ يسأل بابا اسمه والسن والعمل .. وبعدها بدأ يسألنى انا وكلية ايه وسنة كام .. وكنت خايف جدا لحسن يعمل سيرش فى الملفات اللى عنده ويعرف انا بعمل ايه فى الكلية مروحش بيتنا .. بس اكتشفت انهم اغبى من انهم يعملوا كده

فضلنا نتكلم ونتناقش .. ويسأل بابا اسئلة غبية .. وبابا يرد عليه باجابات تناسب غبائه .. لكن مفيش فايدة

الغرفة اللى هو كان قاعد فيها كانت برد جدا جدا .. والتكييف كان فوقيه هو مسلط على اللى قاعد قدامه .. علشان لما يكون بيتكلم معانا او مع غيرنا.. او بيستجوب حد يبقى بيأثر عليه نفسيا بالبرد والتكييف اللى بيلسعه ده .. لكن مش علينا احنا

اول ما بدأ الضابط كلامه .. قال بص يا حاج .. احنا عارفين عنه كل حاجة .. وصور ومعرفش ايه .. وكل حاجة ومشوار كان بيعمله احنا عارفينه كويس جدا وانه كان بيصلى فى مسجد كذا وبيعمل كذا كذا
اللى هو يعنى متحاولش تنكر او تكذب يعنى

وبدأ يسأل .. محمد كان بيعمل ايه ؟؟

بابا قاله مكانش بيعمل حاجة .. اه بيروح يصلى فى مسجد كذا .. بس كان من البيت للمستشفى علشان الشغل ومنها للبيت .. بس

فالضابط حس انه اتاكل قفا .. واننا فاهمين الاشكال دى .. فبدأ يمارس ضغوط علينا بقه
اول حاجة لما بابا قاله كده .. راح ساب بابا يتكلم وبص لشاشة الكمبيوتر وفضل ساكت حتى بعد ما بابا خلص كلامه .. الطريقة دى معرفة جدا وتحسسك بالامبالاه وانه كان متوقع اجابة معينة وانت مقولتهاش فهو بقه بيستعد علشان يعمل تصرف معين انت مش هتقبله

فبابا قعد ساكت برضه ومتكلمش

اول حاجة بدأ يمارسها هو التدخين بصورة مستفزة .. فى طريقة كده فى التدخين تحسسك انك قاعد قدام واحد مش طبيعي .. وتانى حاجة عملها انه كلم الامين وقاله هات اخويا

جابوا اخويا معصوب العينين وحافى .. طبعا المنظر نفسه يخليك تعيط اصلا .. فلما جه الضابط طلع بره وخد الامين معاه .. مفضلش غير انا وبابا واخويا .. الوسيلة دى اسلوب ضغط على كل الاطراف وفى الغالب بيبقى فى حاجة بتسجل اللى بيحصل والكلام اللى بيتقال .. لكن طبعا كنا فاهمين الحركة دى والحياة كملت عادي

المهم رجع الضابط تانى وفضلنا نتكلم تانى معاه .. والحل ونعمل ايه .. وبابا مصر على جملة واحدة ان ابنى معملش حاجة وملهوش فى اى حاجة

واحنا قاعدين هناك خدت بالى من جهاز الكمبيوتر بتاع اخويا .. وكام كتاب على كام معرفش ايه . الحرز الى خدوه من البيت عنده

المهم الضابط حس ان مفيش فايدة .. فراح مزعق بقه .. ودى ثالث حاجة عملها علشان يضغط علينا .. ونادى الامين علشان ياخد محمد يرجعه تانى .. واحنا عادي ولا فى الدماغ ولازم نبقى كده علشان نفرس الضابط .. وبعدها فضل يهدد ويتوعد .. بابا قاله انا معنديش حاجة اقولها وده اللى اعرفه عن محمد

الضابط اتخنق .. فراح مزحلقنا .. ونادى على الامين علشان ينزلنا تانى ويخلينا نمشى

ونزلنا فعلا ومشينا روحنا تانى
وبعدها بكام يوم فعلا .. كان مترحل على سجن وادي النطرون

فضل هناك حوالي 5 شهور .. كان كل مرة نعمل تظلم .. فياخدوه من السجن يتعرض على النيابة ياخد افراج .. وهو راجع فى عربية الترحيل يتعمله امر اعادة اعتقال يرجع بيه تانى على السجن

وهكذا لمدة خمس شهور .. لحد لما طلعوه ومشي

الموضوع وما فيه كان ايه بقه .. انه لما راح اول مرة وسلم نفسه .. الضابط بيسأله فهو اخويا قفش عليه فى الكلام .. فعمل اللى عمله وحدفه فى السجن خمس شهور

بابا لما كان بيروحله زيارة فى السجن قاله لما ترجع للضابط فى فترة الافراج واعادة الاعتقال .. ولما يسألك ها ايه الاخبار وانت صح ولا لأ .. اديله اجابات تدل على انك نادم على اللى حصل .. وانه فى حاجات كتيرة من اللى حصلت انت مش هتعملها تانى وانك بتفكر فى الفترة اللى فاتت واكتشفت كمية الاخطاء اللى كنت بتعملها

والله فعلا .. اخويا لما عمل كده مع الضابط .. خرج ومرجعش السجن تانى .. انما قبل كده لما الضابط كان بيسأله فبيقوله وانا عملت ايه .. انا معملتش حاجة غلط .. فكان الضابط يرجعه تانى على السجن

واتضح ان الموضوع عبارة عن عداء شخصي بينه وبين الضابط .. لان اخويا لما اتسأل فى اول مرة واخويا قفش عليه .. راح مرحله على السجن .. كده بكل بساطة من غير اعتبار لاى حاجة

وحتى لما كان عنده امتحانات فى الكلية بتاعت الماجستير وعملته تصريح خروج للامتحان وانه هيتعمله فى الكلية لجنة خاصة .. الضابط فضل يتلكع ويستهبل لحد لما معاد الامتحان جه وعدى نص ساعة منه وهو لسه فى الحجز مراحش

فالموضوع كان عداء شخصى وتار بايت عند الضابط

واللى عايز اقوله هنا حاجة مهمة جدا
1- ان الضباط دول .. فيهم المحترم وفيهم اللى مش محترم وقليل الادب .. وده طبيعي موجود فى اى مؤسسة فيها تجمع بشري .. لكن فى الاخر احنا بنشوف انهى نوعية اكتر وهو ده اللى بيدي صبغة للمؤسسة ككل ..
والمعروف ان الضباط اللى مش محترمين هما الاكتر فى جهاز امن الدولة .. ولذلك في بلاوي كتيرة بتطلع وبنشوفها حتى فى الايام دي
يعنى فى مرة كنت عايز ادخله الكتب علشان يذاكر .. فالامين اتصل بالضابط علشان يقوله فلقاه بيصلى العصر .. قلت يا الطاف الله .. بيصلى العصر وبيعتقل اللى بيصلوا معاه .. ولما اخويا خرج قالى ان زوجته اصلا منتقبة .. يا مصبر الوحش على الجحش .. يعنى زوجته منتقبه وبيعتقل اللى زوجاتهم منتقبات !!

اكتشفت فى الاخر ان منهم الصالحون ومنهم دون ذلك وهما الاغلبية

وكذلك الحال مع الامناء والعساكر

2- كنت فى مرة من المرات فى حاجة كده مع الدكتور عبدالمنعم ابو الفتوح .. وكان بيتكلم على نقطة اننا بنضرب العساكر وبتوع الامن .. فبصراحة قال كلام جميل جدا كبر فى نظري جدا جدا .. وحسيت ان لسه فى ناس بتفكر صح

قال ان دول فى الاخر اهلنا واخواتنا .. صحيح انهم مجبرين على انهم يعملوا حاجة تتنافى مع فطرتهم ومع حبنا ليهم وحبهم لينا .. بس فى الاخر دول بشر بياكلوا ويشربوا .. يصحوا ويناموا .. يحبو ويتحبوا .. فاحنا مهما كانت تصرفاتهم لازم نتعامل معاهم بالرحمة واللين والحب .. وان جواهم خير كتير جدا .. بس ظروفهم والضغط عليهم خلاهم يعملوا حاجات غلط كتير ..
مش معنى انهم حوطوا الجامعة علشان يمنعوا مظاهرة لمناصرة غزة يبقى هما كفرة وبيحبوا اليهود .. لا خالص كلهم تقريبا مش مقتنعين باللى بيعملوه بس هما مأمورين بكده وملهومش يد فى تغيير اللى بيحصل ده
فاحنا برضه لازم نتعامل مع الامور بالشكل ده .. عمري ما تخيلت فى اول مرة لما الامين قفل الباب وانا جوه انه هيجيب اخويا .. انا كنت بستعد للاحتمال الاسوأ ومجهز نفسى للضرب والدخول فى قتال مع الامناء اللى هناك .. لكن صعقت لما لقيته جايب اخويا علشان اقعد معاه شوية !!

عمري ما تخيلت انه فى مظاهرة من المظاهرة احد عساكر الامن المركزي ضرب احد الشباب واتعور .. فضل وراه علشان يعتذرله وبعت مع احد الشباب التانيين وقاله روح للى هناك ده واعتذرله لانى ضربته وعورته !!

عمرنا ما تخيلنا ان فى اى مظاهرة من المظاهرات .. طلع احد الشباب برضه ووجه كلمه للعساكر لدرجة انهم كانوا بيعيطوا وبيبكوا من الكلام ..

فاللى عايز اقوله انهم فى الاخر بشر .. من لحم ودم .. زينا بالضبط .. لكن ممكن ظروفهم خليتهم يعملوا كده او يتصرفوا بشكل عكس فطرتهم السليمة ..
فده مش معناه انهم كلهم فى ناحية واحدة .. وان كان فى ناس منهم مش كويسين ودول الاغلبية لكن برضه لازم نبص للجانب الكويس اللى فيهم

ده على مستوى العساكر الغلابة .. اما على مستوى الضباط فانا مازلت مقتنع انهم كلهم فى كفة واحدة .. وان كان فى منهم ناس كويسة فللاسف بيطلعوا او بيطردوا .. زى اللواء اللى كان ماسك الجامعة من كام سنة واتنقل .. كان قمة فى الاحترام والذوق .. وفعلا كنت تشوفه تحبه على طول

اه والله تحبه .. ويجبرك على احترامه من غير ما يتكلم

لكن طبعا للاسف دول بيتشالوا من اماكنهم .. ويجي مكانهم بلطجية

وتوتة توتة خلصت الحدوتة

نشوفكوا بقه بعد فترة الله اعلم هتبقى قد ايه علشان ضغط الشغل .. بس ربنا يسهل

دعواااااااااااتكوا بقه

الاعتقال .. الجزء الاول

2008-03-01T20:47:00.003+02:00

السلام عليكم ورحمة الله وبركاته

1- معرفش الواحد جاتله حاله فتور من الكتابة .. ومش عايز اكتب اى حاجة خالص .. ومش لاقى وقت اصلا اكتب اى حاجة اساسا

يعنى الشغل واخد وقت كبير جدا .. او الحقيقة مش وقت كبير انما تركيز كبير .. فانا حاسس انى منقطع عن العالم ومش عارف ايه اللى بيحصل اصلا

لدرجة ان واحد اعرفه معرفش ان الدكتور سناء الله يرحمه مات الا بعدها بخمس ايام مثلا

يعنى الحمد لله على كل حال

2- عندنا فى الشغل عيال فقر .. وعاملين جروب على الفيس بوك وصباح الهلس عليه .. حتى فى الشغل لما بنكون فاضيين شوية بنفضل نهييس لحد لما نفصل ونقع واحد ورا التانى .. بجد جو ممتع جدا ... وما شاء الله على روح الناس اللى فى الشغل .. ما شاء الله فعلا

ويمكن الميزة والحسنة الجامدة فى الشركة دى .. ان مفيش بنات معانا فى الشغل

اه والله .. ميزة جامدة جدا

فواخدين راحتنا بقه وتهريج للصبح .. وتلاقى مثلا المدير العام يدخل يهرج معانا شوية ويطلع .. كل اللى بيبقى مخنوق او مضايق يجي عندنا فى الغرفة بتاعتنا يهلس شوية ويفك ويرجع تانى يكمل شغل :D

كانوا مسميين الغرفة بتاعتنا بالقهوة .. ودلوقتى بالمنتدى .. لكثرة الندوات الفكرية اللى بنعملها :D

ويوم الخميس كنا مزبطين اننا نلعب كورة فى نادي وادي دجلة .. اوف على النادي مش ممكن .. طبعا الحجز كان من 10 لحد 11.30 بليل .. خلصنا على اتناشر بليل مثلا كده .. وبعدها طلعنا اتعشينا فى مطعم فى مدينة نصر .. سيبتهم انا علشان الحق اروح وهما كملوا وكانوا عايزين يطلعوا المقطم يصيعوا للفجر او يروحوا السيدة زينب او الحسين .. بجد عيال فقر

يلا الحمد لله .. لكن طبعا الواحد بيتعلم حاجات كتيرة قوى ومهمة جدا .. وان شاء الله هبقى اتناول الموضوع ده قدام كده

3- الواحد بعد ما اتخرج تفاجأ بالحياة اللى بره .. فعلا الدنيا بره مش زى ما كان الواحد متخيلها تماما .. على مستوى الشغل والدنيا .. وعلى مستوى الوقت ... فعلا الواحد حس بحديث الرسول " نعمتان مغبون فيهما كثير من الناس "

كتير جدا بيبقى نفسى اعمل حاجات كتيرة جدا .. وكل مرة تظهر نفس المشكلة وهى ان ببساطة مفيش وقت فى اليوم علشان اعمل كده

الصبح فى الشغل .. وبليل فى حاجات تانية بقت شبه منتظمة .. فخلاص لم يتبقى غير وقت النوم .. فلازم كل واحد يتعود بجد من دلوقتى .. انه يقلل وقت النوم بتاعه الى اقل حد ممكن .. انا الحمد لله وصلته لخمس ساعات فى اليوم فقط .. وممكن فى اخر الاسبوع ازوده ل8 ساعات علشان اقدر اكمل الاسبوع اللى بعده ..

وان شاءا لله هدفى اوصله ل3 ساعات فقط يوميا .. ليه بقه ؟؟

لان فى الاخر حياتك مش هتعيشها غير مرة واحدة بس .. والحاجات اللى انت نفسك تعملها محدش هيعملها غيرك انت .. فلازم تعملها لو انت فعلا عايز تعملها

يعنى اللى عايز اقوله ان حياتك هي محصلة للى انت بتعمله .. فلو انت مستغلتش وقتك فى تحقيق اهدافك ما هو محدش هيحققهالك

يعنى انت مش من هتنام لحد لما تفطس وتصحى تلاقى نفسك بتدير شركة مثلا وعندك خبرة وكده

لكن الحاجة اللى لازم نستغلها كويس جدا .. هى اننا بدأنا بدري

وطبق بقه ده على كل حاجة فى حياتك .. فى ناس صحابى مثلا بياكلوا من اماكن غريبة ويشربوا شاي وقهوة بسم الله ما شاء الله بشكل مستفز .. وهما عارفين انها مضرة على المدى الطويل .. فبيسألونى مش بتشرب شاي ليه ؟؟ او مش بتاكل من التلوث اللى بياكلوه ليه ؟؟

فبقولهم ان فى الاخر دى حياتك ودى صحتك انت .. لو انت محافظتش عليها محدش هيحافظلك عليها

ولو انت مثلا مش بتلعب رياضة ما انت بعد كام سنة هتمشى بعكاز !!

انا كل ما اشوف حد من الناس الكبيرة فى السن .. واشوف مشاكلها الصحية .. اقول ما انا هبقى زيهم لما اكبر لو استمريت على اللى بعمله دلوقتى !!

فكده بقه :D

4- انا عايز اتكلم المرة دى واللى جاية على حاجة لا يعرفها احد تقريبا

تقريبا محدش يعرف عن الموضوع ده حاجة واول مرة اتكلم فيه

وهو عن الفترة اللى اعتقل فيها اخويا .. والزيارة اللى قمت بيها لامن الدولة

البداية

انا اخويا تفكيره سلفى .. عادى يعنى مش مشكلة .. واعتقاله فى امن الدولة كان بسبب انه بيصلى الفجر فى المسجد .. اه والله العظيم

المهم هو كان بيبقى زائر دائم عندهم .. يعنى كل سنة معروف ان فى الوقت ده من السنة بيجيوا يطبوا عليه فى البيت قبل الفجر .. يشوفوا فى ايه فى البيت ويروح معاهم اسبوع ويرجع تانى

الموضوع فعلا كان عملية روتينية .. لان الضابط فى الفترة دى ( فترة الترقيات ) لازم يقدم ما يثبت جدارة واستحقاقه للمكان اللى هو فيه .. فيعمل ايه ؟؟ ينزل يلم اللى بيصلوا الفجر فيقولوا اه الراجل ده جامد .. خليه فى مكانه

لان فى مصر هنا الناس بتتقاتل علشان تدخل جهاز امن الدولة .. زى ما الناس نفسها تدخل الاف بى اي فى امريكا كده

المهم فهو كان كل سنة ينزل يجيب نفس المجموعة ويروح نفس البيوت فى نفس الوقت قبل الفجر .. وياخد كام كتاب على كام شريط ويحرزهم ويقولك كده انا مسكت حاجة اهو

بالمناسبة .. من اهم اسباب بقاء حبيب العادلي فى اى وزارة ( والمشير طنطاوي كمان ) هو قوة الجهاز الامني الهائلة اللى عملوها .. وانخفاض نسبة العمليات الارهابية بشكل كبير .. مع ان السطوة والنفوذ الامنى دلوقتى تمادوا فيه وجاب نتائج سلبية كبيرة .. لكن يعنى

لكن اخر مره تم القبض فيها على اخويا كانت مختلفة .. لانه طول فيها لحد شهر .. وتم بعدها ترحيله الى سويسرا (سجن طرة)

فانا هكتب عن اخر مرة فقط الى حضرتها

هما ذهبوا الى بيته وكان اخويا فى نبطشية فى المستشفى .. وكانت زوجته فقط الموجودة فى البيت .. فقالتلهم انه فى المستشفى ومرضيتش تفتحلهم الباب

المهم يعنى مش متذكر التفاصيل يومها قوي .. لكن هو راح بعدها وسلم نفسه .. لانه عارف انه شر لابد منه

فراح فعلا وسلم نفسه هناك

ايه بقه وايه التفاصيل وليه الزيارة اللى عملتها لمقر امن الدولة .. وقابلت مين هناك وايه اللى حصل

الحلقة الجاية ان شاء الله :D

يلا السلام عليكم ورحمة الله وبركاته

حوار مع البزي وسليم ومحاولة مع الشاذلي

2008-02-18T22:21:00.003+02:00

السلام عليكم ورحمة الله وبركاته
ياااااااااه .. الواحد من زمان مكتبش حاجة فى المدونة
1- اعتذار طبعا لكل اللى بيشرفونى فى المدونة .. انا كنت المفروض اكتب كل يوم سبت .. لكن الحمد لله الشغل مش سايب حد فى حاله بجد والله انا بعتذر بشدة عن التأخير ده اللى دخل فى اسبوعين .. المفروض فعلا كنت هكتب حاجة السبت اللى فات بس نزلت

الشغل ..

2- احب اشكر كل اللى شارك فى الموضوعين اللى فاتوا .. معلش كانوا بره التسلسل الطبيعي للى بكتبه .. بس الحمد لله الاحداث جت فى الجون وفى نقطة كنت عايز اعقب عليها .. وهى انى مش بشكك فى جدوى وفاعلية المظاهرة .. لكن الافراط فى استخدامها هو المشكلة عندى مع اغفال الوسائل الاخرى الاكثر فعالية بالمناسبة على قصة المظاهرات .. فى سنة 1995 كان فى محاكمات عسكرية زى اللى موجودة دلوقتى لرموز من الاخوان .. فطلاب الاخوان فى جامعات مصر عملوا مظاهرة عرفت فى التاريخ باسم مظاهرة جامعات مصر واللى كانت الاولى من نوعها .. ان كل طلاب الاخوان يتجمعوا فى مكان واحد وزمان واحد بشعار واحد المهم الشاهد من الموضوع ان كان فى طائرة هيلوكوبتر بتصور المظاهرة من فوق الجامعة وبعتت الشريط مباشرة الى الرئيس والذى حدث ان الرئيس كان قد اصدر قرارا باعدام خمسة من المحاكمين عسكريا .. لكنه تراجع عن هذا القرار بعدما شاهد هذا الشريط .. ومعنى الكلام انه اذا كان دول جزء فى الالف من الاخوان امال الباقيين هيعملوا ايه ؟ وتراجع عن قرارات الاعدام .. وهذا الكلام بحسب احد المصادر الخاصة اللى قالت الكلام ده للمرشد وقتها
فانا مش بنكر دور المظاهرات لكن فى حدودها .. وان لا يلهينا ذلك عن الاهداف الكبرى لنا والانشطة الطلابية لاننا طلبة فى الاول والاخر

3- انا بشكر الناس اللى بتسأل عليا الفترة اللى فاتت ... لكن والله العظيم مشغول جدا وجت عليا فترة كنت انا اخر واحد بيقفل الشركة ويمشى من الشغل .. ده غير كذا حاجة تانية كده بعملها واخدة جزء من الوقت
4- ندخل فى الموضوع بتاع النهاردة اللى عمال يتأجل

اولا: محمد حسين البزي

بعد الاجتياح الاسرائيلي لجنوب لبنان .. بعد ما حزب الله اسر الجنود الاسرائيلين فى العملية النوعية والاولى من نوعها اللى عملها .. بدأت اسرائيل اجتياح لبنان المهم كلنا عارفين الموضوع لكن المهم هنا هو انه بعد ما اسرائيل اوقفت العدوان وبدأت الانسحاب .. عقد مؤتمر فى القاهرة عن المقاومة اللبنانية والفلسطينية .. كان الموضوع سخن فالمنظمين ارسلوا الى حزب الله يطلب منهم واحد يتحدث عن اللى حصل ويمثل الحزب فى المؤتمر .. فارسلوا محمد حسين البزي

محمد حسين البزي احد القياديين فى حزب الله فى داخل لبنان .. جه مفوضا من الامين العام حسن نصر الله شخصيا لتمثيل الحزب فى لبنان .. طبعا ساعتها كان الامين العام مختفى من على الساحة ومكانش له ظهور لانه كان مستهدف بالدرجة الاولىالمهم جه محمد حسين البزي وتكلم عن مشاهد من اللى حصل فى لبنان .. الحقيقة عنده قدره غير طبيعية على انه يخليك تعيط من اللى بيقوله .. فعلا كان كلامه مؤثر جدا بعد المؤتمر .. مسكته وقلتله مش هتمشى الا لما اعمل معاك حوار ..

قالى معلش دلوقتى مش هينفع واصل وفصل .. قالى بكرة بعد المؤتمر انا معاك كانت طيارته الساعة 11 بليل .. والمؤتمر بيخلص 8 .. وكان هيروح كام مشوار تانيين فى الوقت ده .. بس قالى تعال الساعة 8 وانا معاك رحتله فعلا فى المعاد ده وقابلته .. كان عنده جلسة ختامية شارك فيها وبعدها خرج منها

الحقيقة على الرغم من الدقن والكلام الجميل .. لقيته قالى معلش استنانى شوية اشرب سيجارة واجى اتكلم معاك .. قلتله اتفضل هعمله ايه يعنى المهم بعدها قعدت معاه واتكلمت معاه فى اللى حصل وكده ... فعلا كان كلام جامد جدا وواضح .. ومؤثر للغاية
كنت بسأله سؤال .. ايه اكثر موقف اثر فيك فى الحرب اللى فاتت ؟؟

فبص للارض شوية وقالى بصوت حزين والدموع فى عينه .. قالى منظر احد المسعفين يرفع طفلة ويقول انتظروا الى الكاتيوشا التى بيدها .. فلما نظرنا .. وجدناها تحتضن لعبتها ..والمشهد الاخر هو محاولة فك طفلة عن امها بعدما ماتوا الاثنين .. والاثنين يحتضنون بعضهم البعض .. هذا المشهد لن انساه وعلمته لبناتى لكي يعرفوا ما يفعله العدو بنا .. انتهى كلامه

المهم وحكى عن مبنى ضخم جدا .. عبارة عن مكتبة ضخمة جدا كان اسمها دار الامير .. او دار نشر وتوزيع الامير حاجة كده
انا كنت بسأله ماذا حدث لدار الامير .. قال وما الذى لم يحدث لدار الامير ؟؟ لقد ازيلت عن الخارطة بـ 17 غارة جوية غير قصف بوارج البحرية التى لا نعرف لها عددا

المبنى عبارة عن سبعة طوابق على ما افتكر يعنى .. وحاجة كده ضخمة .. بقت حفرة عمقها 12 متر بعد قصفها بصاروخ وزنه مش عارف كام طن كده المهم فى القصة دى .. انه هو .. صاحب ومالك هذه المكتبة

ومع ذلك .. محسيتش انه بيبكى عليها .. لانه فقد تقريبا رأس ماله كله .. حسيته متماسك ولم اشعر انه حزين عليها انا اصلا صعقت لما قال كده .. لكن لقيته بيتكلم بكل ثبات وثقة

اخدت الكارت بتاعه فى نهاية الكلام وكان المفترض ابعتله حاجات يشوفها وكده .. لكن للاسف مش لاقيه :(
ده كان محمد حسين البزي

مقابلة اللواء اركان حرب صلاح الدين سليم الله يرحمه

فى المؤتمر اللى اتكلمت عليه ده .. كان طبعا لازم اللواء صلاح الدين سليم الله يرحمه يكون موجود .. وفعلا كان هناك طبعا قال كلام قمة فى الروعة عن المقاومة واستراتيجياتها وتحليلات للاسرائيلين .. انا لما شفته هناك .. عرفت انه على رأس قائمة المستهدفين عندى علشان اعمل حوار معاه ... وكنت اتمنى قبلها انى اقابله هو واللى جاى بعده

فلما عرفت انه هناك رحتله على طول وكنت عايز احدد معاه معاد .. لاننا فى الجامعة كنا هنعمل حاجة عن يوم 6 اكتوبر لانه كان يتوافق مع 10 رمضان ساعتها فرحتله واخدت رقمه .. لكنه اعتذر لان جدوله كان مشغول لحد يوم 10 اكتوبر !! فاتفقنا اننا نبقى على اتصال

المهم جه اليوم اللى عملنا فيه الحفلة بتاعت اكتوبر .. وكان يوم 10 رمضان .. الموافق تقريبا 4 اكتوبر ... فاتصلت بيه قبلها الاول استأذنته فى انه يعمل مداخله على التيلفون لطلاب الجامعة ويتحدث اليهم عن نصر اكتوبر ودور الشباب خاصة فى الجامعة .. فوافق الحمد لله

يومها اتصلت بيه قبلها واكدت عليه واكدت عليه المعاد الخاص بالمداخلة بتاعته .. فقالى معلش انا فى اجتماع دلوقتى وصعب جدا .. قلتله معلش دى كلها خمس دقائق فوافق على مضض .. تقريبا الاجتماع ده كان على مستوى كبير .. المهم وافق على مضض وفعلا فى الوقت المحدد اتصلت بيه وعمل المداخلة واتكلم فيها ... وكالمعتاد قال كلام جميل جدا وفوق الرائع .. لكن كان فى مشكلة انه لم يتطرق الى الشباب ودورهم فحاولت استأذنه فى انه يقول حاجة فيها ... فرفض بسبب ضيق الوقت .. فشكرته وقفلت معاه
الله يرحمه ويحسن اليه .. من الناس اللى اثرت فيا انا شخصيا

اما الاخير واللى للاسف لم احظى بعد بشرف مقابلته .. ونفسى ومنى عيني اقابله هو الفريق ركن سعد الدين الشاذلي
ساعة قصة اكتوبر دى اللى قلتلها ... كان احد الاختيارات المتاحة قدامى قبل اللواء صلاح الدين سليم الله يرحمه .. كان الفريق ركن سعد الدين الشاذلي .. قائد هيئة الاركان وقت الحرب وده كان على رأس الاولويات الخاصة باجندة الحوار ..

واتصلت بيه فعلا .. فى المرة الاولى ردت زوجته وتعللت بان الفريق سعد الدين الشاذلي مريض .. وفى المرة الثانية ردت زوجته برضه .. وقالتلنا انه رفض لانه ممنوع من الحديث للاعلام .. وحيث اننا جهه اعلامية بشكل ما او باخر .. فرفض الحديث الينا .. وعرفت فيما بعد انه لا يرد على التيلفونات وتقوم بهذه المهمة زوجتهعامة شكرتهم .. ولكن مازلت احلم بانى اقابله .. لدرجة انى بعتله ميل مجرد محاولة انه يستجيب ليا واقابله .. لكن الحمد لله

يلا كفاية كده ... ونشوفكوا المرة الجاية باذن الله

اااااااااااه يا ابو تريكة .. احرجتنى جدا

2008-01-30T20:57:00.000+02:00

السلام عليكم ورحمة الله وبركاته

مش عارف اودي وشى فين بعد اللى عمله ابوتريكة ... بس قررت انى اعترف بالحقيقة .. واواجه الناس اللى بتقرا فى المدونة واعترف بالخطأ

فى الموضوع اللى فات كنت كتبته قبل ما اشوف الماتش اللى كان بين مصر والسودان ... والحقيقة رغم كرهي الشديد للكورة مش علشان هيا كورة لانى بلعبها .. لكن للاثر اللى بتتركه فى نفوس الناس وتخليهم زى الالات اللى مش بتفكر .. لكن الحقيقة اللى حصل فى الماتش اللى مشوفتهوش .. كان غريب جدا

قبل ما ابدأ فى الموضوع .. انا عايز بس من الموضوع ده انه يكون رسالة .. رسالة ليا انا الاول ولنفسى .. قبل ما تكون لحد غيري

رسالة لكل الاخوان المسلمين .. نشوف التجربة ممكن يكون فيها شئ يفيدنا واعتقد انها هتفيدنا جدا

الموضوع عبارة عن رسالة الى كل الدعاة وكل من حمل على عاتقه هم ايصال الدعوة والاسلام الى العالم .. والمفترض ان كل بنى ادم يشهد انه لا اله الا الله وان محمدا رسول الله اصبح واجب عليه انه يوصل رسالة الاسلام الى من يستطيع ان يوصلها اليهم

فى البداية كنت كتبت فى الموضوع اللى فات ومن قبل سنة موضوع اخر عن ان الدعوة الى الاسلام افضل وسيلة ليها هو فى مجالك .. وهو انك تبدع فى مجالك وتبقى انت رمز للاسلام فى مكانك وتخصصك

وافتكر ابيات شعر قالها وليد الاعظمي رحمة الله عليه وسمعتها من الدكتور طارق السويدان :

اسلامنا لا يستقيم عموده .. بدعاء شيخ فى زوايا المسجدِ

اسلامنا لا يستقيم عموده .. بقصائد تتلى فى مدح محمدِ

اسلامنا نور يضيئ طريقنا ... اسلامنا نار على كل من يعتدي

فالدعوة والاسلام مش دروشة .. ولا كلمتين حفظتهم وخلاص .. انما هو افعال متزبطة ونور يضيئ للجميع بما فيهم انت نفسك وتبدأ تؤثر فيمن حولك .. وانك تكون قوي وتستطيع ان ترد الصاع صاعين والا تكون ساذجا ومغفلا

كنت فى احد الايام فى الشغل فاتصل بيا احد الاشخاص وقالى عايز اصلى معاك العشا فى مسجد كذا .. قلتله ماشى خير هتروح لمين ؟

فقالى لا هقابلك بس وكده .. قلتله ايه يعنى ؟؟

قالى فاكر اللى كنت بتعمله فى الجامعة ؟؟

طبعا فهمت انه بيتكلم على مظاهرة بسبب احداث غزة

المهم حصل اللى حصل ومروحتش ومكنتش عايز اروح اصلا

بعدها تانى يوم كانت مظاهرة التحرير واللى اتاخد فيها الفين شخص

ثم يوم الجمعة كانت مظاهرة معرض الكتاب

وخلال هذه الفترة .. كانت البوسترات وضعت فى الشوارع عن موضوع غزة

كل هذه الافعال جميلة وان شاءا لله تكون فى ميزان حسنات الجميع .. لكن خلينا نتكلم كناس بتفهم ودماغها عالية

هل كل اللى حصل ده .. ادى فعلا الى ايصال الرسالة والهدف المراد .. وهو توعيه الناس بالقضية وحشد دعم اعلامى لها لفك الحصار عن غزة ؟؟

انا استطيع ان ابصم بالعشرين انها لم تحقق سوى 5% فقط من اهدافها ومستهدفها

وان شعب مصر لم يفهم الرسالة ولم يستوعب هذا الهدف .. لانه لا يهتم اصلا بما تقوله من شعارات فى المظاهرة ولا يهمه اصلا لماذا قامت المظاهرة .. فالمهم هو الحفاظ على قوت يومه وان يمشى داخل الحيطة علشان يأمن مستقبله

فلما اجى اكلمه عن غزة واللى بيحصل .. هيقول كما يقول بعض السفهاء ان دى مشكلتهم هناك يحلوها بعيد عننا .. واحنا اولى بالحليب والدقيق والكهرباء بتاعتنا واحنا حرين

ده للاسف الواقع .. عايزين ننزل من الكهوف والصوامع الى احنا قاعدين فيها ونشوف الناس بتقول ايه وبتفكر ازاى علشان نعرف نوصلهم رسالتنا

فده اللى الاخوان عملوه واللى الاخوان بيعملوه دائما .. حبة مظاهرات لا توصل الهدف الاصلى منها للمواطن المصري .. وفى الاخر نفضل نقول اننا لا نتقدم وان الاهداف لم تتحقق

لكن فى مثالنا هذا ... المثال اللى الحقيقة لو اطول اقبل قدمه لفعلت .. هو فعلا خير مثال للدعوة الصحيحة والاسلوب المثالى فى التأثير

تخيلوا ان ابو تريكة بمجرد حركة بسيطة لم تستمر الدقيقتين .. استطاع فيها ان يوصل تلك الرسالة التى اعتقل فيها الالاف من الاخوان ولم يستطيعوا ايصالها فى نهاية المطاف ؟

لم يفعل ابوتريكة اى شئ .. سوى انه رفع التى شيرت الذى يرتديه وهو يلعب .. ليظهر الرسالة التى اراد ايصالها واستطاع بكل بساطة وحنكة وذكاء ان يوصل ويرسخ معنى عند كل اللى بيتفرجو .. لدرجة ان العمل اللى عمله ده اصبح حديث الناس البسطاء منهم والمثقفين ( الاستاذ فهمي هويدي كتب عنه وشكره) .. المهتمين بالقضية وغير المهتمين بها .. الاغنياء منهم والفقراء .. السواقين ورؤساء الشركاء

كل ما فعله ابوتريكة هو انه بعد ان احرز الهدف الاول له .. رفع التى شيرت وكان يرتدي اخر كتب عليه تعاطفا مع غزة

فقط هذا كل ما فعله البطل الكبير

قد لا استطيع التعبير جيدا عن ما اريد ايصاله .. لكن هل لاحظتم التأثير الشديد الذى قام به ابوتريكة ؟

لدرجة ان الجميع نسوا الهدف اصلا وتكلموا فى كلمة تعاطفا مع غزة

لدرجة ان هناك اناسا بدأوا يتكلمون ماذا فى غزة وايه اللى حصل ؟؟

نحن لا نحتاج الى حناجر شديدة واصوات عالية لايصال رسالتنا .. فرب فعل واحد فقط صغير وبسيط يحدث تأثير اعظم من اقوال امم وهتافات وتجمعات لجماعة كاملة فى حجم جماعة الاخوان

تخيلوا ان هذا التصرف اصبح حديث الصحافة الاسرائيلية والامريكية والمصرية .. وانهمك المحللون فى الحديث عن التى شيرت وابعاد هذا التصرف وكيف يتعاطف مع غزة .. بل ان هذه الكلمة قد اوقعت مصر فى حرج شديد

والامر لا يتوقف عند كلمة تعاطفا مع غزة .. بل ان ابوتريكة قد احرجنا جميعا فى موقف اخر .. عندما احرز هدفا فى احدى المرات .. فذهب مسرعا ركضا خارج الملعب

ذهل الجمهور .. الى اين ايها النجم والكاميرات كلها عليك

وفجأة .. اذا به ينحنى ويقبل يد امرأة عجوز .. كانت امه

الموقف على الرغم من بساطته .. الا انه رسخ معنى كبير جدا ومهم عن بر الوالدين .. لدرجة انه لقب بحبيب والديه !!

واكاد اجزم انه اول ما سجد لله شكرا بعد احراز الاهداف .. ولم يفعلها قبله احد

وهو الذى كان يرتدي تي شيرت كتب عليه كلنا فداك يا رسول الله ايام الرسوم الدنماركية .. واستطاع ايضا ببساطة شديدة وجميلة ان يوقظ البشر لهذه المشكلة وان يفهمهم ان هناك مشكلة ما

ولا احدثكم عن اخلاقه وادبه الكبير واحترامه ... فهو قد فرض نفسه رغما عن كل الكلمات والقصائد

لكم اخوانى ان تتخيلو عندما كرم الرئيس فريق الاهلى بعد حصوله على البطولة .. وكان من بينهم ابوتريكة .. لا تتخيلو ان هذه الصورة اثرت بشكل كبيرجدا فى الكثير من الشباب .. بل يكفى فقط ان يكون الكثير من الشباب والفتيات قد اتخذوا ابوتريكة قدوة لهم فى حياتهم الخاصة وفى تعاملاتهم .. فالكثير من الشباب الان بعد ان يحرز الاهداف يقوم بالسجود لله شكرا على ذلك

هى دعوة الى ان نستفيد من تجربة ابوتريكة ..

دعوة الى التجديد فى اليات الدعوة ..دعوة الى ان نجعل من انفسنا فى مجالاتنا رموزا مؤثرة فيمن حولنا .. لماذا ننهك انفسنا فى اجتماعات ولقاءات تلو اللقاءات لمناقشة كيفية سير المسيرة ... والتى لا يلقى لها الطلاب بالا ولا يهتمون بها اصلا

لماذا ننهك انفسنا ماديا ومعنويا وبشريا .. فى مظاهرات ومؤتمرات لا نجنى منها سوى الاعتقالات والحبس ومشاكل لا حصر لها

والموضوع لا يحتاج الى ان تكون نجما مشهورا تحت الاضواء وفى الصحف لكى تستطيع التأثير

بل المقصود ان كل شخص يركز فى مجاله ويبدع فيه ويصبح رمزا للاسلام فيه ..

بالبلدي .. عايزين سواق ميكروباص ملتزم .. عايزين بياع فاكهه ملتزم .. عايزين رجال اعمال ملتزمين .. عايزين سباكين ونجارين وعمال بناء ملتزمين .. عايزين وزراء ونواب فى البرلمان وقضاه ومحامين ومثقفين وممثلين وممثلات ومغنيين ملتزمين

وطبعا لا اقصد بالملتزمين ان يكونوا من الاخوان .. انما كل من يتقى الله ويراعي حرماته هو ملتزم محترم الى ان يثبت العكس

كل من يحافظ على اموال الناس وكل من يسعى الى ان تكون كلمة الله هي العليا وان يكون الاسلام عاليا يشمل الكون بعدله وفضله .. فهو ملتزم محترم الى ان يثبت العكس

كل من يسعى الى ايصال رسالة الاسلام فى ارجاء الفضا هو ملتزم محترم الى ان يثبت العكس

وكما قلت ان الموضوع لا يحتاج الى اضواء شهرة لفعل ذلك

حدثنى احد الاشخاص والذى اعتبره رمز فى مجاله .. انه فكر ماذا يفعل لغزة ... فقام بتجميع مبالغ مالية وحشد اصدقائه ومن حوله وارسل ثلاث شاحنات كبار محملة بالدقيق والسكر والمواد الاساسية لاهلنا فى غزة

هذا هو المطلوب .. ان تقوم بالتأثير فيمن حولك وان تكون انت قدوة لهم .. وان تكون انت رمزا للاسلام فى مجالك .. وبالتأكيد هذا يتطلب ان تركز فى مجالك اكثر وان تتخصص فيه بشكل اكبر وان تصبح رقم واحد في هذا المجال لكى تصبح رمزا مؤثرا .. وكل ما تفعله من اشياء فى مجالك يعتبر نصرة للدين واعلاءا ً لراية الاسلام .. واعتقد ان هيثم دسوقى مثلا باختراعاته التى ستخلدها البشرية .. قد ساهم بشكل مباشر وفعال فى اظهار صورة جميلة ومشرقة عن المسلم الملتزم .. مثلما فعلنا من قبل ابن سينا والرازي والبخاري ومسلم وجابر ابن حيان وعمر بن الخطاب وعبدالرحمن بن عوف اغنى اغنياء المسلمين وعثمان ابن عفان وغيرهم

هذا هو الاسلام اخوانى ... الاسلام قوة وعزة واخلاق وعمل وابداع وابتكار وجهد واجتهاد وشركات ومؤسسات وكورة ورياضة وثقافة وفن واعلام وسياسة وخروجات وفسح وكل حاجة

اليس ذلك افضل من مئات الخطب والدروس والاجتماعات واللقاءات والمسيرات التى لاتسمن ولا تغنى من جوع ؟؟

اتمنى ان تصل رسالتى .. وان نشعر بمقدار الاحراج الايجابى الذى سببه لنا النجم المحبوب .. ابوتريكه

اااه يا دسوقى .. اتعبت كل من حولك

2008-01-24T20:18:00.000+02:00

السلام عليكم ورحمة الله وبركاته

قبل البدء

1- اولا المهزلة اللى حصلت فى الموضوع اللى فات فى التعليقات للاسف الشديد انا مش لاقى تعليق عليها .. لكن كل واحد كتب كلمة او انتحل شخصية حد او شارك فى المهزلة اللى حصلت .. فاكيد ربنا مش هيسيبه .. ولا الناس اللى غلطت فيا هسيبها يوم القيامة .. وكويس علشان الواحد الفترة دى محتاج حسنات كتيرة

2- كنت كتبت امبارح موضوع طويل جدا .. كان عبارة عن حبة خواطر كده حصلت فى فترة صغيرة جدا وتزامنت مع بعض .. رغم تناقضها الشديد جدا والواضح .. لكن بعد ما كتبته لقيت انه تقريبا نفس المسلسل الهزلى اللى كنت كتبته سابقا (الشخصية المصرية والمشاهد المتناقضة) ولقيت انى مضيفتش حاجة جديدة .. اه هيا خواطر تتكتب زى ما هيا ..

لكن فى الاخر مش هنفضل نكرر نفس المسلسل

طبعا كانت المشاهد والمواقف عن الكورة الله يخرب بيتها وحصار غزة .. وما بين حصار المارة فى الشارع علشان الريس معدي وكنت هناك للاسف ده غير المخبرين والمباحث والقناصة اللى كنت شايفهم وما بين اسماعيل هنية وهو يمشى فى السوق بين الناس لكن الحقيقة حصرت تفكيري فى قضية غزة والكورة .. واستبعدت الموضوع التانى لاسباب الحفاظ على الامن القومي الشخصي خاصة ان اجهزة الامن لا تتمتع بالروح الرياضية فى كثير من الاحيان

المهم بعد ما كتبت الموضوع ولقيت ان الصور متكررة بنفس السيناريو السخيف والتناقض العجيب ..قلت انه استحالة تكون نفس النتائج هيا هيا التى حصلنا عليها من سنة .. ونزعم اننا اتغيرنا

يعنى مش ممكن نكون احنا اتغيرنا خلال السنة دى .. وفى الاخر وصلنا لنفس النتيجة من المشاهد المتناقضة وضياع الاولويات يبقى احنا لم نتغير اصلا لكى ننتظر نتائج مختلفة مينفعش اننا نفضل فى مكانا وننتظر نتائج مختلفة كل عام ..

يبقى لازم فى حاجة غلط فى مشكلة محتاجة تتعالج

كنت قرأت مقالة لاحد الناس على الانترنت يتحدث فيها عن واجباتنا نحو قضية غزة وكيف نكون عنصر مساعدة فى تحرير غزة .. الحقيقة مقترحات جميلة وجيدة جدا ياريت بس نعملها ..

لكن فى رأيي الشخصيى .. فكل ما كتبه من اقتراحات من التبرع بالمال والدم وشراء الادوية والدعاء ورفع روحهم المعنوية والتعبير عن رأيك ونشر القضية والمسيرات .. المهم ان كل ذلك ( على الرغم من اهميته) فما هي الا مسكنات للالم فقط ..

مسكنات لحظية ووقتيه للالم لا تعالج المشكلة من جذورها تعالوا نتخيل واحد اصيب باى مصيبة وبيصرخ من الالم .. طبيعي لن يستطيع الدكتور انه يعالجه الا لما يديله مسكنات تساعده على انه يتكتم الاول علشان الدكتور يعرف يعالج اصل المشكلة

فكل الاقتراحات دى جميلة لكنها مسكنات .. وتحتاج الى استمرار العلاج الفعال والجذري لاصل المشكلة علشان ميبقاش اخدنا مسكنات وتركنا المرض فيرجع يصرخ تانى ونرجع فى المسكنات تانى

ده بالضبط حالنا فى تعاملنا مع المشاكل المختلفة والتى تمس الاسلام بشكل مباشر .. وده راجع لاننا شعب متدين بالفطرة .. تلاقى الواحد فى رمضان بيسب الدين ويعاكس والحياة زى الفل .. ويقولك انا صائم الحمد لله ومؤمن والايمان طافح فى قلبى

او واحد يدخل يصلى ويدعى يا رب انصر المسلمين يا رب اعز الاسلام وانصر المسلمين وينتحب على حال المسلمين .. ويطلع ايوة يا حبيبتي انا جاي فى السكة اهو استنيني عند مدخل السينما

حاول تفتكر كده الازمات اللى حصلت وتعاملنا معاها بمسكنات فقط .. قضية الرسوم الكاريكاتورية الدنماركية .. وبعدها الاسبانية والتى لم يشعر بها احد

زى ازمة اجتياح لبنان الاخير .. وبالذات ساعة لما قصفت اسرائيل الضاحية الجنوبية وكانت الجزيرة هناك وصورت مشاهد مؤلمة جدا .. فاكر عملنا ايه ساعتها؟؟

زى برضه ساعة حصار الكثير من الفلسطينيين فى مسجد فى القدس لمدة اسبوع تقريبا وبعدها رحلوا خارج فلسطين .. وساعتها كان الحصار ينقل على الجزيرة لايف 24 ساعة

زى برضه لما شارون راح المسجد الاقصى وكانت الانتفاضة .. وفضلنا ندعو ونستخدم المسكنات وها نحن قد نسينا اصلا تاريخ ذلك اليوم

طيب والحل

الحل فهمه طالب .. هو فى غيره فهمه الحقيقة لكن اللى ظهر واللى عرفناه منهم كان واحد .. فى هندسة الازهر واسمه هيثم الدسوقى

اااااااااه يا دسوقى .. اتعبت كل من حولك

فعلا اتعبت كل من حولك , هيثم دسوقي لما كان عنده 12 سنة .. يعنى من عشر سنين .. بدأ مشوار اختراعاته وبدأ يخترع حاجات .. دلوقتى وخلال عشر سنين وصلوا الى ستة اختراعات .. مفيش واحد منهم حد اخترعه قبله اخترع ماوس عبارة عن خاتم لا سلكي صغير فى اليد تتحرك بيه زى ما انت عايز .. كأنه بالتاتش

اخترع جهاز تخليق اوزون ( الاوزون اللى العالم بيطبل على انه الكارثة الجاية ) والجهاز ده مؤثق ومسجل انه فعلا جامد

اخترع نظارة بديلة عن شاشة الكمبيوتر .. بابعادها الثلاثية .. انتوا متخيلين ؟؟

طبعا هو هيثم دسوقى هو المعروف علشان تم تكريمه فى اول الاسبوع .. لكن فى غيره كتير جدا عملوا اختراعات واكتشافات كتيرة منهم واحد اخترع جهاز لحماية البيئة والتنظيف الذاتى للبيئة من التلوث واحد العلماء الامريكيين قال ان الاختراع ده لو كان ظهر للنور كان غير حاجات كتيرة وحل معظم مشكل العالم

اقرأ اكتر عن هيثم دسوقي

الحل فهمه مهاتير محمد من عشرين سنة .. واستوعب الدرس وبدأ فعلا يشتغله .. فكان اول حاجة عملها انه بدأ يفهم الناس حواليه بالحل ده .. وطلع كتاب ينتقد فيه الشعب على سلوكيات غلط .. زى اللى بيفضل يدعي وينتحب ويطلع يقعد على القهوة ويقولك مفيش شغل
مهاتير محمد حط خطة ورؤية لنهضة البلد على مدار اربعين سنة .. فضل هو فى الحكم عشرين سنة .. وعمل نقلة كبيرة جدا فى البلد فى الفترة دى .. لدرجة ان 90 % من العربيات اللى فى الشارع هناك صناعة ماليزية خالصة .. والرؤية اللى عاملها لحد 2020 ومازالوا مستمرين فيها دلوقتى

الحل ده فهمه الحاج محمود العربى .. انه احنا مهما فضلنا ندى فى مسكنات ومسكنات مش هنحل المشكلة .. لازم يكون فى قوة داخلية تدينا هيبة وخوف عند العالم الخارجي

الحل ده فهمه محمد يونس ابو الفقراء .. كان ممكن يكمل حياته فى امريكا .. والفلوس نازله عليه من كل حدب وصوب .. ده غير ان وضعه كبروفيسور جامعة مهم جدا هناك .. لكن هو كان فاهم الحل كويس .. فقرر انه يرجع .. لا مش يرجع وبس .. يرجع ويعمل حاجة .. فعمل بنك الفقراء فى بنغلاديش وغير حياة الالاف هناك

الحل ده فهمه الاستاذ الدكتور يوسف عبدالقادر عودة ربنا يفك اسره .. واعتقد ان الجميع يعرفه او يسمع عنه

الحل ده فهمه الدكتور زغلول النجار اطال الله عمره .. وكلنا عارفين مين الدكتور زغلول النجار

الحل ده فهمه اردوغان وعبدالله جول .. انك مهما فضلت تتظاهر وتعمل ندوات وتدى مسكنات ومسكنات فى قضية الحجاب فى تركيا . فمش هتعمل حاجة .. ومهما حاولت تنضم للاتحاد الاوروربي وانت معندكش قوة داخلية تخليهم غصب عنهم يحترموك ويضموك ليهم .. فمش هتعمل حاجة
دلوقتى فى خبر انهم هيرفعوا الحظر عن الحجاب فى تركيا

الحل ده فهمه روجيه جارودي الفيلسوف الفرنسي .. بالمناسبة حد يعرفه اصلا ؟؟

وفى غيرهم كتييير

ايه المقصود بكل اللى فات ده ؟؟

انا من وجهة نظري .. ان اللى بنعمله عبارة عن مسكنات فقط .. يعنى احنا مش بنعالج المشكلة من اصولها

صحيح المقاطعة سلاح فعال جدا ومهم جدا وواجب على كل واحد .. لكن مش هو ده الحل

تعالوا نتخيل ان مصر فتحت الحدود واللى عايز يروح يحارب يتكل على الله .. هل فلسطين هتتحرر ؟؟ استحالة ولا يمكن يحصل

النصر مش هيجي على غفلة كده بين ليلة وضحاها .. ده لازم يكون فى مقدمات للنصر .. مقدمات على جميع الجوانب

مقدمات سياسية واننا نقوى انفسنا سياسيا .. مقدمات اقتصادية واننا نبقى احسن من احسن دولة اقتصادية
مقدمات اعلامية ويبقى فى شفافية ومصداقية ويقوم المثقفين بدورهم .. مقدمات انسانية واخلاقية

والاهم مقدمات دينية

وكل واحد يشوف نفسه .. هل هو جزء من الحل وجزء من المقدمات دى .. ولا الناحية التانية

الخلاصة

ان اللى بنعمله والمظاهرات اللى بنفرغ فيها الغضب بتاعنا ثم تعود الحياة كما كانت .. والتبرع بالمال والدعم المعنوي والمقاطعة .. كلها افعال جميلة ومهمة .. لكن المهم هو العلاج الجذري والمتمثل فى ان كل واحد يتخصص فى ما يتقنه و يساهم بشكل فعال فى اعلاء راية الاسلام فى المجال الخاص به

احنا مش عايزين دراويش او مفتيين وازهريين .. فى ناس مهمتهم كده وبيعملوا كده فعلا ربنا يكرمهم .. لكن احنا فى مجالات اخرى ضايعين فيها
السياسيين الاسلامين يتعدوا على الصوابع ..فى الفن واااه من الفن .. فى الطب .. فى الهندسة بكل انواعها .. فى التجارة ورجال الاعمال .. فى الانتاج والخدمات .. فى قطاع البنوك .. فى المجالات الاجتماعية بكل انواعها

احنا للاسف بنعانى من نقص فى المسلمين الملتزمين فى الاماكن دى .. ودى اولى دلوقتى اننا نديها تركيز اعلى بالتوازي مع المسكنات اللى بنعملها

كل واحد يبقى رمز للاسلام فى مجاله .. ساعتها .. هيجي النصر

اتمنى انى اكون قدرت اوصل وجهة نظري

ذكرياتي مع الاستاذ أسامة حمدان

2008-01-19T07:20:00.000+02:00

السلام عليكم ورحمة الله وبركاته

1- اولا جزاكم الله خيرا على كلامكم الجميل .. وربنا يكرمكوا

2- بالنسبة لقصة الغموض ومش غموض .. فانا اولا اعتبر المدونة نوع من التأريخ .. يعنى كتابة تاريخ واحيانا فضفضة .. وثانيا مش كل حاجة تحصل يبقى لازم تنشر على المدونة .. ولو انا عملت كده يبقى فى حاجات كتيرة جدا هتتغير فى البلد دى .. يعنى فى حاجات كتيرة حصلت لكن لسه لم يحن الوقت المناسب لطرحها

وثالثا بقه .. انا بطبيعتى مش من النوع اللى يظهر عليا مشاعري الداخلية وبعرف اتحكم فى الحاجات دى الحمد لله .. يعني ممكن ابقى من جوايا مضايق جدا من حاجة ومخنوق جدا .. ومحدش يحس بيا ولا يعرف ايه اللى جوايا او العكس .. يعنى مثلا يوم وفاة علاء جبه الله يرحمه اخويا كان جاي من السفر وكان فرح فى البيت بقه .. وكنت قاعد عادى ومحدش حاسس باى حاجة .. ولحد دلوقتى محدش يعرف اصلا ان فى واحد صاحبى مات الا اختى لما دخلت وشافت على المدونة

حتى الموضوع اللى اتكلمت عليه المرة اللى فاتت وقلت انى اخدت فيه قرار صعب جدا .. مكانش فى حد يعرف الموضوع غير واحد فقط .. وبقوا اتنين دلوقتى :D

الحمد لله وخلاص

3- بمناسبة بقه اختنا مى واللى دخلت قالت تعليق جميل قوى على الموضوع اللى فات .. وسبحان الله يا محاسن الصدف يعنى .. انا الحمد لله بحضر درس انا و صلاح مع احد الشيوخ الكبار .. وكان المرة اللى فاتت بيتكلم عن العجب ( الاعجاب بالنفس يعنى ) وكان بيتكلم عن الكبر والغرور بالنفس

طبعا حبايبنا المتحفزين بيشمروا دلوقتى

فقال ... ان دايما الانسان لما بيشوف حد اقل منه .. سواء ماديا او دينيا او اجتماعيا .. بينظر له بشئ من الاشمئزاز .. يعنى مثلا تشوف واحد من اللى مش لاقيين ياكلوا او اللى درجة الفقر وصلت لاقصى مدى ليها وبيناموا فى الشارع .. او حتى اللى بيكنسوا الشوارع والزبالين .. فهو بيقول ان الانسان بطبعه بيبصلهم بنوع من الدونية شوية .. وبيقول ( حتى وان لم يقل بلسانه فبقلبه) انه مش ممكن يبقى زيه .. وانه ايه الاشكال دى والحمد لله الذى عافانا ياعم دول ناس معرفش ايه وربنا يعافينا وربنا يكون فى عونهم

فهو بيقول ان ده هو الكبر والعجب بعينه

او انه يسمع عن فلان عمل معصية كذا .. او انه مثلا يقول انا الحمد لله .. لا يمكن اوصل لدرجة انى اعمل الذنب الفلانى .. انا اه ممكن اغلط بس عمرى ما اوصل للذنب الفلانى ده .. كله الا ده

ده برضه من العجب والكبر

فهو بيكمل وبيقول

ليه يعنى ؟؟

ليه يعنى انت متعملش كده ؟؟ معاك وصل من حد مفوض من الله تعالى انك متعملش كذا كذا ؟؟ ولا انت يعنى كائن بشري والباقيين ولاد مخلوقات فضائية ولا جماد ؟

فالخلاصة علشان مطولش .. انك اذا لم تتخيل نفسك زبال .. ولم تتخيل انك قد تصبح فى يوم من الايام تنام على الرصيف فى البرد القارس وتمشى فى الشارع تبحث عن لقمة هنا او هناك لتأكلها .. فانت معجب بنفسك .. وحاسس انك مستحق للنعم اللى انت فيها .. والله سبحانه وتعالى لا يتوجب عليه شئ لاحد

واذا لما تتخيل نفسك بتعمل احط واقذر وابشع وادنى واسوأ وافظع المعاصى .. اذا لم تتخيل نفسك بتعملها . فانت فى حالة كبر وغرور .. لانك شايف نفسك مستحق لحالة الالتزام اللى انت فيها وبرضه ربنا يلا احدٌ يستحق على الله شئ

فعلا والله .. الواد ممكن فى ساعة كل شئ يتحول .. فده مش مشكلة .. لكن المشكلة انت ازاى هتتعامل معاه

يلا نكمل بقه فى الموضوع

مقابلة الاستاذ اسامة حمدان

اول مرة عرفت فيها اسم الاستاذ اسامة حمدان كانت فى مؤتمر القاهرة الرابع .. اول مؤتمر اروح احضره .. ساعتها فى المؤتمر كنت فى اللجنة الاعلامية برضه .. وكان جزء من مهامى قصة الحوارات على اساس انه نفس اللى بعمله فى الجامعة

قبل بداية المؤتمر قيل لنا انه فى واحد من حماس جاي .. وقيل انه خالد مشعل .. وكانت الانباء متضاربة ساعتها .. يعنى جائنا خبر ان خالد مشعل جاي .. ثم خبر انه منع من دخول مصر .. ثم خبر انه دخل فعلا مطار القاهرة وانه فى الطريق الى المؤتمر ثم خبر اخر يؤكد انه وصل الى مكان المؤتمر فعلا وساعتها طرت على هناك علشان الحقه

ثم جائنا خبر اخر يفيد انه لن يأتى وان الاستاذ اسامة حمدان سيأتى .. وكان ساعتها حماس نجحت فى الانتخابات وبدأت تشكيل حكومتها

فجه اسامة حمدان .. وجه عطا الله ابو السبح ( وزير الثقافة الفلسطيني) و عضوان من المجلس التشريعي من اعضاء حماس للاسف مش فاكر اسمهم

مين بقه الاستاذ اسامة حمدان؟؟

هو فلسطيني الاصل ويعيش فى لبنان .. وهو ممثل حركة حماس فى لبنان

جه هو والحارس الشخصي بتاعه ( وكان ده قبل الاجتياح الاسرائيلي للبنان ) والحارس الشخصي اسمه ابو مؤمن وده ليه قصة تانية

المهم جه وحضر المؤتمر وكانت فرصه اننا نعمل معاه حوار

المهم رحنا ووصلناله وللاسف هو كان جدول مواعيده مشغول تماما .. لكن قلنا باننا هنعمل الحوار على هامش اعمال المؤتمر

بعد ما حددنا المعاد ورحتله فعلا .. انشغل مع كام ضيف وبعدها جت العربية الخاصة بتاعته ( واللى المخابرات اديتهاله بالسائق وليها قصة برضه) ونزل من مقر انعقاد المؤتمر

فكلمنا المرافق الشخصي وهو واحد من الاخوان مكلف بمرافقه كل زوار حماس داخل مصر وتنظيم اعمالهم .. فقالنا ماشى هيحاول يزبط معاه معاد تانى قبل ما يسافر

وفعلا حددلنا معاد معاه بعد المؤتمر باسبوع .. ولكن فى الفندق اللى هو مقيم فيه

كان اللى هيروحوا يعملوا معاه الحوار انا وواحد من جامعة حلوان فقط .. على اساس ان انا اللى بعمل الحوار والتانى ده اللى بينظم المعاد معاه

لكن لقينا ناس تانية من جامعات تانية اصروا على انهم يجيوا وقالوا ده حقنا . قلنا طيب تعالوا

فرحت انا .. وبتاع حلوان .. وواحد من عين شمس .. وواحد من ازهر .. والمرافق الشخصى وواحد كمان

كان معاد تقابلنا عند كوبري الاسدين وبعدها هناخدها مشى لحد الفندق

وكان فندق هلنان شبرد على الكورنيش

اتقابلنا فعلا فى المعاد المحدد .. وبدأنا التحرك ناحية الفندق

كان فى مشكلة .. وهى كيفية الدخول للفندق ؟؟ لان احنا معانا كاميرات واستاند وحاجات كتيرة ممنوع دخولها لافندق

فبدأنا نخبيها فى الشنط وكده .. ودخلنا دخلة جامدة علشان الراجل ميلحقش يفتشنا بمزاج والحمد لله عدينا من البوابه من غير اى مشاكل

لما دخلنا الفندق على اليمين كان المطعم .. وكان استاذ اسامة حمدان قاعد فى المطعم مع صحفية كانت بتعمل معاه حوار

فاحنا وعددنا الكبير .. طلعنا فوق فى الدور التانى .. صالة استراحة كده بس بتبقى انت شايف المطعم تحت

فضلنا قاعدين فيها مستنينه يخلص .. فجالنا المرافق الشخصى واخذنا بهدوء وطلعنا الغرفة بتاعت الاستاذ اسامة حمدان

وقالنا انه جاي خلال عشر دقائق وهيروح يجيبه ويجي

فاحنا فرصه قعدنا نتصور فى الغرفة بتاعته فى الفندق .. خاصة انها كانت فوق وكانت البلكونة بتطل على منظر جامد جدا .. بس طبعا مش

هوريكوا الصور

المهم نزل المرافق الشخصى ده وجابه وطلعوا مع بعض

طبعا لاننا فى فندق .. ولان اسامة حمدان شخصية مش بسيطة .. فكان مطلوب الهدوء تماما وان محدش يحس باى حاجة لان الطبيعي بيبقى فى ناس من المخابرات موجودين فى الفندق وناس من امن الدولة

لما جه المرافق الشخصى وجه مع اسامة حمدان والحارس الشخصى ليه ابومؤمن ودخلوا الغرفة

طبعا سلمنا عليهم وقعدنا نهزر .. بالذات مع الحارس الشخصى ده وهقولكوا فى الاخر ليه

المهم جهزنا الكاميرات وقفلنا البلكونة علشان محدش يشوف

اثناء ما احنا بنجهز الكاميرات .. كانت الجزيرة شغالة وكان هو بيتفرج على تقرير عن حماس والحكومة اللى هتشكلها .. افتكر ساعتها كانت المشكلة بتاعت ان فى واحد من المرشحين للوزاره من المسيحين وهو اعتذر وقدم استقالته .. فاحنا سألناه عن الموضوع فقال انه بيبقى مضغوط عليه ومهدد بالقتل والتصفية الجسدية وبتشريد اطفاله لو قبل الدخول فى الحكومة ولذلك بيرفضوا علشان يزيد التضييق والخناق على حكومة حماس

ساعتها جاله تيلفون من وزير الخارجية اليابانى او من القنصل اليابانى . المهم كان حد يابانى وخلاص بقه

وفضل يتكلم معاه شوية وكنا احنا جاهزين وكله تمام

عملنا الحوار معاه وسألناه فى كل اللى احنا عايزينه وادى نص الحوار

http://www.alltalaba.com/meets.php?act=2&id=9275

وخلصت الحوار معاه وبعدها بقه قعدنا يجي بتاع نص ساعة بنتصور معاه ومع الحارس الشخصى بتاعه

كانت من اجمل اللحظات اللى قضيتها فى حياتي

مواقف جامدة بقه

1- من المواقف اللى حصلت ساعتها والى عمري ما هنساها ابدا .. واللى فعلا تأثرت بكلامه فيها .. بعد ما خلصنا كان المفروض انه معزوم على الغدا عن احد السياسيين افتكر انه قال عند فهمي هويدي تقريبا

الطبيعي انه من اول ما بيدخل مصر بيبقى فى حماية وحراسة المخابرات لحد لما يخرج.. لان شخصية فى نفس مركزه بتبقى مستهدفه من قبل الموساد بشكل كبير جدا ( علشان كده قفلنا البلكونة خوفا من انه يكون متراقب من الموساد من الفندق التانى ومش بعيد يكون فى جهاز تنصت مزروع )

فالمخابرات بتبقى مكلفه بحمايته وحراسته لحد لما يخرج .. حتى الحارس الشخصيى بتاعه بيسلم سلاحه للمخابرات ولما يجي خارج ياخده .. وكل الحماية دى بتحصل من غير ما يحس .. يعنى بيبقى فى عربيات بتتابع تحركات اسامة حمدان بس من غير ما يشعر علشان ترصد اى حركة غريبة وتتدخل بسرعة لضمان حمايته.. او مثلا فى المؤتمر بيبقى فى ناس قاعدة فى المؤتمر كأنها بتحضر عادى جدا بس هيا بتراقب اى حركة غريبة وتضمن حمايته .. بجد انا بحترمهم جدا بتوع المخابرات لانهم بيشتغلوا من غير ما حد يحس بيهم على عكس قمل الدولة

المهم فمن ضمن وسائل الحماية .. عربية مصفحة مع سائق ماهر جدا من المخابرات لاسامة حمدان .. وطبعا السواق ليه مهمة تانية وهى التنصت برضه

فهو السواق ده كان المفروض هياخد اسامة حمدان ويوديه عند الاستاذ فهمي هويدي واى حركة لاسامة حمدان فى داخل مصر لازم تكون عن طريق السائق ده وفقط

فكان المرافق الشخصى اتصل بيه وقاله يجي فى معاد محدد .. وفعلا جه

فلما جه السواق .. المرافق الشخصى كان مخنوق منه لانه بيفضل يتنصت ويرمي ودنه .. فلما جه السواق واتصل بيه بيقوله انه وصل

قاله طيب خلاص استنى شوية وهننزلك ( كان بيكلمه بنوع من الخنقة منه )

فاسامة حمدان قاله كلمة عمري ما هنساها .. قاله انت بتعامله كده ليه ؟؟

فقاله : علشان ده من المخابرات وبيفضل يتصنت ويسمع والمفروض ميعملش كده

فرد عليه وقاله .. هو لو بيفكر زيك .. كان زمانه بقه مكانك

الكلمة دى نزلت على كالصاعقة فعلا .. وساعتها عرفت اسامة حمدان .. وعرفت الناس دى على الرغم من الحصار والبهدلة اللى هما فيها .. لكن قلوبهم رحيمة جدا

فاحنا بنستفسر عن الموضوع .. فقال اسامة حمدان.. انه بيعامله كويس .. وحتى لما يروحوا عند اى حد يتغدوا .. بيقولوا للسواق تعال وياخدوه على نفس المائدة اللى بياكلوا فيها وياكل معاهم ويقعد معاهم وهما بيتكلموا وكأنه واحد منهم (فاكرين الكلام بتاع العجب والكبر)

فالموقف ده اثر فيا جدا جدا

لوكان بيفكر زيك .. كان زمانه بقه مكانك

2- من المواقف الجامدة برضه لما جينا نخرج بعد ما خربنا الدنيا تصوير معاه.. اتصورنا يجي 30 صوره مع بعض .. الاول خرج المرافق الشخصى وجاب الاسانسير .. وبعدها خرج ابومؤمن الحارس الشخصى وتأكد ان الممر فاضى ومفيش حد فيه .. ثم بدأنا فى الخروج واحد واحد علشان محدش يلاحظ وجودنا فى غرفته علشان المخابرات لانهم هيشكوا فينا على طول خاصة الحاجات اللى احنا شايلينها دى

ونزلنا فعلا بسرعة جدا ..

واحنا ماشيين فى الممر علشان ننزل .. كان فى واحد جاى ماشى .. هو كان عامل نفسه واحد قاعد فى غرفة عادى .. لكن انا اشك انه كان من المخابرات

عامة نزلنا وخرجنا من الفندق بسهولة الحمد لله ورجعنا للنقطة الى اتقابلنا فيها .. اتفقنا على هنعمل ايه ونبعت الصور والحاجات لبعض ومشينا روحنا

3- برضه من المواقف الجامدة هو ابومؤمن .. ابومؤمن ده واحد مكشر (اللى واقف ورا اسامة حمدان فى اول صورة فى اللينك بتاع الحوار) ودائما تلاقيه بيبص بحذر .. وبسم الله ما شاء الله سريع الملاحظة والبديهة فعلا .. وسريع الحركة كمان

يعنى لو هو واقف .. وحاجة اتحركت وراه ياخد باله منها .. او لو حد واقف جنبه موازي ليه .. وحرك ايده البعيده عن عينه .. يلاحظها ويجيبها

بسم الله ما شاء الله عليه فعلا

المهم فى المؤتمر كان دايما مكشر .. لا يتحدث اصلا مع اى احد .. ولو حد راح يسلم عليه ومد ايده علشان يسلم عليه .. ابومؤمن ميمدش ايده ولا يسلم عليه ولا كأنه موجود

كنا خايفين منه جدا لحسن نقول حاجة كده ولا كده وميكونش عنه روح رياضية وتسامح

لكن سبحان الله ..

اول ما دخل الغرفة ورا اسامة حمدان .. قسما بالله كأنك شايف واحد تانى

وفقري موووووووت .. وفضل يضحك ويهزر معانا ويحكيلنا عن ذكرياته مع الناس ومع الاستاذ خالد مشعل

لدرجة انى قلتله .. اللى يشوفك فى المؤتمر يخاف (اصلا كان بيمنع اى حد من انه يقرب من الاستاذ اسامة .. ومعندهوش مشكلة يجيبك الارض لو شك فيك) .. واللى يشوفك هنا ميصدقش انك انت اللى كنت فى المؤتمر

قالى معلش ده شغلى .. والاحتياط واجب

وحكالي مرة عن موقف حصل للاستاذ خالد مشعل .. ان اجمهور هجم عليه فى سوريا مرة علشان يسلموا عليه .. والحراس الشخصيين بدأوا يزقوا الناس .. فلما الضغط زاد والناس مش بترجع راحوا ضاربينهم .. ولما برضه مرجعوش . طلعوا الاسلحة وشهروها فى وجوههم

فبيقول انهم كان لازم يعملوا كده لانك مع الزحمة ممكن تحصل عملية اغتيال سريعة... وقال ان محاولة اغتيال الاستاذ خالد مشعل من قبل الموساد كانت عبارة عن جهاز واحد جابه جنب وشه فقط .. مش شرط مسدس يعنى او مطواه

افتكر مرة فى المؤتمر واحد راحله عايز يتعرف عليه .. فراحله قاله انا اخوك فلان الفلانى وحكاله تاريخه كله .. فرد عليه ابو مؤمن بهدوء وقاله اخوك فى الله ابو مؤمن .. نقطة

فالتانى اذبهل .. كان فاكره هيقوله اى حاجة عن نفسه .. فقاله ايوة الباقى ايه

فرد عليه ابو مؤمن وقاله .. نقطة

يعنى خلاص دى بطاقتى الشخصية فقط

لكن فى الفندق حكالنا عن قصته .. انه من نابلس وعاش فترة فى مخيم عين الحلوة تقريبا

بجد حبيته جدا جدا بعد ما قعدنا معاه فى الفندق

وعمرى ما هنساه ابدا

لدرجة انى جبتله ورقة وقلتله اكتبلى اهداء او كلمة اى حاجة

فكتب

اتق الله .. وجدد نيتك .. ابومؤمن

ياااااااااااااااااااااااااااه الراجل ده فظيع قوى قوى بجد

ونفسى والله اقابله تانى ابومؤمن

فى الاخر بقه ادعولى ربنا يسهل الامور

والمرة الجاية باذن الله هكتب عن اتنين من بعض الشخصيات المهمة

وهى الفريق سعد الدين الشاذلي

واللواء اركان حرب صلاح الدين سليم الله يرحمه

ومحمد حسين البزي .. قيادي فى حزب الله

اعتذار شديد

2008-01-17T20:50:00.000+02:00

السلام عليكم ورحمة الله وبركاته

1- اولا بجد بعتذركوا جدا عن الغياب الطويل ده واللى راجع لعدة اسباب منها ضغط الشغل اللى بقيت انزل من البيت ستة ونص صباحا وارجع ثمانية مساءا .. الموضوع طلع اصعب مما اتخيل

ده غير ان الشغل مرهق جدا بدنيا وذهنيا .. خاصة اننا علشان بنعمل دراسات جدوى وبحوث تسويق بننزل نشوف السوق ونقابل مختلف طبقات المجتمع .. فالحمد لله على كل حال

2- احد اهم الاسباب اللى خليتني فترة من الزمن مش قادر ادخل ولا اكتب اى حاجة .. كان قرار صعب جدا اضطريت اخده خلال الاسبوع الماضى .. من غير الدخول فى تفاصيل

فعلا كان صعب عليا جدا نفسيا انى اخده .. لكنى كنت مضطر لذلك .. والحقيقة ممرش عليا قرار اخدته وكنت متردد وخايف جدا زي القرار ده .. وحتى كنت حاسس بضيق نفسى شديد جدا بس كان لازم .. ومكانش ينفع اخد غيره

صحيح كنت واخد القرار ده يوم الخميس بليل .. لكنه دخل حيز التنفيذ ابتداءا من يوم الثلاثاء مساءا .. وكنت طوال الفترة دى تعبان من التفكير وكل يوم افضل افكر فى الموضوع تانى يمكن اوصل لحل تانى مختلف ليه .. وصليت فى الفترة دى سبع استخارات .. لكن الحمد لله على كل حال .. محدش عارف يمكن ده الخير

فالموضوع ده كان مأثر عليا جدا .. لكن الحمد لله

3- برضه من المشاكل اللى منعتنى وهى مشاكل فى الجهاز .. انا اصلا دخلت دلوقتى بالعافية لان الجهاز ضارب تماما وبيشتغل لوحده

الله المستعان

معلش بقه .. ممكن بكرة ابقى اكمل الموضوع او اكتب غيره

ان شاء الله هرجع اكمل فى الهدف بتاع المواضيع دى وربنا يكرم ان شاء الله

ادعولى كتير

مكتب الارشاد

2008-01-05T09:42:00.000+02:00

السلام عليكم ورحمة الله وبركاته

1- معذرة بجد على التأخير والتنفيض والتطنيش وكل حاجة .. انا والله مش لاقى وقت خالص
الشغل ده الله يخرب بيت الكفرة مش ممكن ..
(الحمد لله اشتغلت فى شركة بحوث تسويق ودراسات جدوى واستشارت تسويقية وادارية
الشغل جامد جدا وطحن .. وحتى الخبرة عالية جدا فعلا .. فالحمد لله العملية ماشية كويس )

ده غير حاجات تانية وشغل تانى بزبطه مع ناس تانية فانا دماغى ولعت
بس ان شاء الله هحاول على الاقل كل اسبوع اكتب حاجة فى ايام الاجازة .. واللى مش باين اننا هناخدها اجازة من الشغل

2- فى حاجة عايز اكتبها عن قصة الشغل دى .. لكن مش دلوقتى شوية كده .. وهيا عبارة عن التجربة اللى انا مريت بيها فى الشركات وحاجات اتعلمتها منها

3- اما بقه الحاجات اللى هتكلم فيها فهيا عن شغل الاعلامية .. وخاصة الزيارات اللى عملناها للناس الكبيرة

من البداية

انا لاحظت حاجة فى المواضيع اللى فاتت اللى بنزلها على المدونة ان فى ناس بتبقى منبهرة جدا بالتنظيم بتاع طلاب الاخوان .. انا معاكوا فعلا ان احد اهم اسباب نجاح طلاب الاخوان فى كثير من اللى بيعملوه هو التنظيم الجيد .. بل ان فى اى حاجة الطبيعي انه تنظيمها هو بينجح العمل او بيجعله فاشل

واللى عايز اقوله انه فى الهيكل بتاع طلاب الاخوان .. فى مجموعة من المهام والوظائف موزعة بشكل منظم ومرن حسب التغير اللى بيحصل .. يعنى تقريبا اقدر اقول انه كل سنة بيتغير الهيكل الوظيفي بتاع طلاب الاخوان .. لانه بيبقى فى مستجدات او بيبقى فى ظروف جديدة او فكرة جديدة .. فبيتغير بشكل كبير
من ضمن احد اهم اللجان واللى بتعمل بشكل مركزي هي اللجنة الاعلامية .. فى بداية نشأتها القريبة كان هدفها الترويج الاعلامى لطلاب الاخوان .. لا اكثر ولا اقل .. وكان حتى العدد اللى فيها مش كبير
لكن مع تطور الاحداث واعلان الاسم اصبح لها اهمية ووزن نسبي كبير .. فزادت المهام بتاعتها وزاد العدد بتاعها .. ومن ضمن المهام اللى اضيفت ليها غير الترويج الاعلامي اللى يعتبر المهمة الاولى للجنة , اضيف اليها تقديم صورة جيدة للعالم الخارجي, والتواصل مع قيادات المجتمع من الناحية الاعلامية, اضافة الى مهام اخرى زى التصوير والتفريغ والتقارير الصحفية وفاكسات وبلاوي مسيحة

المهم بالنسبة لينا فى الكلام النهاردة هو التواصل مع قيادات المجتمع ... هو الحقيقة كان فى ناس اخرين بيقوموا برضه بنفس المهمة .. بس كان الدور بتاع اللجنة الاعلامية فى الحتة دى هو عمل حوارت صحفية تخدم اهداف طلاب الاخوان .. وتنشر عبر الموقع والوسائل الاخرى المناسبة .. وده اللى عايز اتكلم فيه واقول اللى حصل فيه

الحمد لله كنت احد الافراد العاملين فى الجزئية دى .. والحدم لله كان فى حاجات كتيرة عملتها وحصلت فيها مواقف كتيرة لازم تتكتب .. ومن ضمن الناس اللى قابلتها واللى هحكى تجربتى معاها :
1- مقابلة الدكتور محمد حبيب
2- مقابلة الاستاذ اسامة حمدان
3- مقابلة محمد حسين البزي
4- مقابلة اللواء اركان حرب صلاح الدين سليم الله يرحمه
5- مقابله الفريق سعد الدين الشاذلي
6- مقابلة الدكتور صفوت حجازي
7- مقابلة الاستاذ الدكتور عمرو دراج
8- مقابلة احمد الجعلي
9- مقابلة الدكتور عصام العريان
10- مقابلة ام نضال فرحات ( نائبة فى مجلس النواب الفلسطيني الان )
11- مقابلة فداء مدهون ( شاهدة على مجزرة شاطئ غزة )

مقابلة مكتب الارشاد

هي لم تكن اول مقابلة اقوم بيها .. لكن كانت اشهرها علشان اللى حصل فيها .. او يمكن لانها فرقت معايا جامد .. لكن كانت اجمد مقابلة على الاطلاق هيا مقابلة اسامة حمدان . .. وكل حاجة هتذكر فى السكة

كنا ساعتها بنتكلم عن حملة بالاسلام نقدر نحلها .. وكانت حملة سياسية بالدرجة الاولى .. وهدفها الترويج لشعار الاسلام هو الحل ..مش الترويج للشعار كشعار .. انما للمخزى والمعنى المفهوم من الشعار
وهو اننا نطرح حل فعلى وعملى (المشروع الاسلامى)
المهم كان فى جدول الاعمال حبة اهداف ومهام .. وكان مطلوب مننا نحط اسامى الناس اللى هنعمل معاها حوارات عن الموضوع ده
فكان فى ناس كتير وهتكلم عنهم .. وكان منهم بالدرجة الاولى حد من مكتب الارشاد نعمل معاه حوار

لما جه الوقت بتاع الحوار ده .. بدأت ادور على الناس اللى تنفع .. والحقيقة ملقيتش غير الدكتور محمد حبيب لعدة اسباب , كان ابرزها انه ما شاء الله متحدث مفوه جدا .. ويعرف يديلك اللى هو عايز يديهولك وبدبلوماسيه عالية جدا .. ولو ان الدكتور عصام العريان متفوق عليه فى الحتة دى .. لكن الدكتور حبيب دبلوماسى جدا جدا وهدوئه جميل جدا

المهم الاول جبت رقمه .. واتصلت بيه وعرفته بنفسى واللى هجيله علشانه .. فقالى استنى وطلع اجندته وشاف المواعيد بتاعته .. وادانى معاد كان فاضى فيه

كان معايا فى الموضوع ده صلاح بوب فقلتله على المعاد وبدأنا نجهز الحاجات وكتبنا الاسئلة مع بعض و
جبنا الكاميرا الفيديو والاستاند بتاعها والكهربا وكل حاجة .. وشرائط جديدة وكله تمام
فى اليوم المحدد اتقابلنا فى الجامعة .. وطبعا كنا رايحين فورمال خالص
طلعنا من الجامعة وركبنا تاكسى لحد سينما فاتن حمامة .. وبعدها اخدناها مشى لحد المكتب .. طبعا علشان التاكسى ميتشدش من المخبرين ويتسأل جم منين وليه وقالوا ايه وحوارات ملهاش لازمة
وصلنا قبل المعاد المحدد لنا .. واحنا داخلين لقينا المرشد نازل .. سلمنا عليه الاول واتصورنا معاه ونزل
ولقينا ناس كتيرة هناك منهم خيرت الشاطر .. وكان فى طلبة تانيين من جامعة المنصورة على ما افتكر هناك برضه بس جم على غير معاد .. فخدوا من الوقت بتاعنا :(

المهم دخلنا كلنا مع الدكتور حبيب فى غرفة المرشد .. وهما عملوا الحوار بتاعهم بسرعة وخدوا الصور ومشيوا
وبعدها دخلنا مع الدكتور حبيب الى المكتب الشخصى بتاعه وزبطنا الكاميرا وكل حاجة وكله تمام وبدأنا تصوير

طبعا كانت معانا اسئلة نارية .. وسبحان الله كان بيجاوب بكل هدوء وعقلانية بشكل جميل جدا .. والحقيقة كنت بخاف منه بس بعد ما قابلته سبحان الله حبيته جدا وحسيت انه فعلا مثال للتفكير والعقل الراقى جدا
المهم بعد ما خلصنا وقفلنا .. قعدنا معاه بقه واتكلمنا فى مشاكل كده .. زى ما تقولوا فرصة بقه .. ووافقنا على حاجات طرحنا فعلا
وبعدها طلعنا صلينا العصر معاه جماعة فى قاعة اجتماعات المكتب وبعدها سلمنا عليه ونزلنا رجعنا

من الحاجات الجميلة اللى حصلت ساعتها ان فى حتة زنقناه فيها فى الاسئلة .. وكنت متوقع انه خلاص مش هيعرف يخرج منها .. لقيته خرج منها بطريقة جامدة جدا عملتها فيديو كمان .. هبقى انزله ان شاء الله
فى مرة برضه من المرات قابلته الدكتور محمد فى نقابة المحامين فسألته عن ماذا ستفعل جبهة مش فاكر اسمها ايه اذا لم يتم الاستجابة لمطالبكم

مقابلة الدكتور عصام العريان

بعد ما الدكتور عصام العريان خرج من فترة اعتقل فيها .. رحت قابلته وعملت معاه حوار فى السريع . كان اول حوار اعمله صوتيا وكان كنوع من التجربة فعليا .. لان برضه صعب من اول مرة نروح لناس جامدة ونعمل معاهم حوارات
المهم رحتله بس للاسف متأخر بسبب المواصلات .. وكان عنده واحد صحفى من جرنان معرفش ايه وبعد ما خلص قعدنا معاه حوالى نص ساعة وسألناه حبة اسئلة وبتاع عن الفترة واللى حصل .. كانت ساعة ما راحوله البيت بالمدرعات وفجروا الابواب
فانا زنقته بسؤال عن دلائل ومؤشرات العملية دى التى تفهمونها من امن الدولة ؟؟
فرد وقالى .. اه طبعا هذه العملية لها دلائل ومؤشرات كبيرة وتدل على ان الوضع خطير .. وسكت !!

حد استفاد حاجة من الكلمة دى ؟؟
لكن هو فعلا رد على السؤال .. بس بحاجة ليس لها علاقة بالسؤال وده الفن بقه

بس كده
المرة الجاية بقه .. هيا الدمار الشامل كله
ربنا يكرم

مؤتمر القاهرة الرابع والخامس

2007-12-21T16:46:00.000+02:00

السلام عليكم ورحمة الله وبركاته

ايه الدنيا وايه الاخبار معاكوا بعد العيد واللحمة

كل سنة وانتوا طيبين .. وادعوا ان ربنا يكتبلنا عمرة او حج السنة الجاية ان شاء الله

والله الواحد وهو بيتفرج على الناس اللى راحت تحج وهما واقفين على عرفات .. ياه حسيت باحساس غريب

نفسى اروح والله تانى ... فعلا من احلى ايام حياتى لما رحت حجيت

ويومها بليل كنت قاعد بتفرج على اقرأ فجه واحد بيتكلم من الحجاج وقال
ان الدراسات بتقول انك علشان تطلع اربعة مليون واحد من مكان زى ده محتاج على الاقل اربع ايام علشان تعمل كده
لكن فى الحج كلهم بيطلعوا فى اربع او ست ساعات

بس الحقيقة فضلت افكر فى الكلام ده

انت اصلا علشان تجمع اربعة مليون واحد .. كلهم لابسين لبس واحد .. كلهم بيعملوا حاجة بنفس الترتيب .. كلهم تقريبا جايين لهدف واحد .. كلهم بيتحركوا بنفس واحد .. انت بتتكلم على حاجة كبيرة جدا

ده انت لو حاشر الناس وحابسهم فى الاستاد .. ماشى ممكن تنظم العملية بقوات الامن .. لكن عمرك ما هتعرف تجمعهم على هدف واحد .. ولو جم وهم مكرهين .. بس ان الناس تتسابق علشان تيجي وكل واحد عنده نفس الهدف فدى حاجة صعبة جدا

اى دين ده اللى يقدر يعمل كده .. اى دين يقدر يخلي المسلمين كلهم فى لحظة واحدة يمتنعوا عن الاكل والشرب نهائيا .. وفى لحظة واحدة كلهم ياكلوا فى وقت واحد وان اختلفت بيوتهم واماكنهم
اى دين ده اللى يقدر يخلى الناس كلها فى وقت معين تنتظم صفوف مستقيمة .. وفى اتجاه واحد .. ومحدش فيهم بيتحرك ابدا الا لما القائد ( الامام ) يقولهم

والله لو نفهم بس دينا صح .. هنعيش فى سعادة غير طبيعية فعلا

الحاجة التانية
انى من بكرة ان شاء الله
هقدر امضى عقود .. هقدر اقدم فى اى حتة .. واقدر احجزلى شقة باسمى .. وافتحلى حساب فى البنك واعمل اللى نفسى اعمله من زمان
بكرة عيد ميلادى الواحد والعشرين
اهئ اهئ
الواحد كبير وعجز خالص
المهم انا كنت ناسى الموضوع اساسا .. لحد لما واحد اتصل بيا وبيقولى
انت بكرة هتبقى كام سنة
قلتله يانهار ابيض .. ده انا نسيت اصلا
يلا العمر مش بعزقة

المهم بقه ... نرجع نكمل بقه فى القصص وحكاوي القهاوي بتاعتنا
الحقيقة فى حاجات كتيرة فى بالى عايز اكتبها .. فربنا يعينا باذن الله

انا عايز اكتب النهاردة عن مشاركة طلاب الاخوان فى مؤتمر القاهرة

البداية

فى الاول المؤتمر ده كان عبارة عن مبادرة من الاشتراكيين على ما افتكر يعنى .. هو عبارة عن مؤتمر سنوي هدفه الاساسى مناهضة الاستعمار والامبريالية .. يعنى مناهضة الاحتلال الغربى سواء الفكري او سواء العسكري
لكن طبعا .. لم يكن يخلو من الخبيط فى القضايا الداخلية وزادت مؤخرا طبعا

فى اول سنتين لم يكن فيه اقبال على المؤتمر .. فى السنة الثالثة شارك الاخوان المسلمون فى المؤتمر ده
المشاركة تعنى تحمل نسبة من التكاليف وبالتالى الاستحواذ على نفس النسبة من المؤتمر

يعنى المؤتمر كان بيقعد اربع ايام منها يوم الافتتاح
الاخوان مثلا هيشاركوا بنسبة الثلث .. يبقى ليهم ثلث وقت حفلة الافتتاح موزعة على كلمات وقضايا, وليهم ثلث المحاضرات اللى بتتم وورش العمل اللى بتتم طوال مدة المؤتمر .. وليهم ثلث الامكانيات التى ستتاح فى المؤتمر .. وكده

فى السنة الثالثة شارك الاخوان فى المؤتمر بشكل عام وبنسبة قليلة .. وشاركت اطياف اخرى زى حزب العمل والشيوعيين وطبعا الاشتراكيين والليبراليين وحزب الغد

كل ده كان على المستوى العام .. وفى المؤتمر الثالث .. شارك وفد من طلاب الاخوان كان صغير جدا .. شارك فى حضور حبة ندوات فقط لا اكثر

لكن فى السنة الرابعة من المؤتمر .. ودى كانت سنة ثالثة بالنسبة لى فى الجامعة .. واللى فيها حصل التحول لاسم طلاب الاخوان رسميا وحصل فيها مظاهرة جامعات مصر والتحرك تحت شعار معا للاصلاح .. فكان فى تحول سياسى بحت فى فكر وتحركات طلاب الاخوان
فكان الطبيعي انهم يشاركوا بقوة فى المؤتمر ده .. وهو اللى حصل
فكان فى جيش من طلاب الاخوان وبيشتغلوا كخلية نحل لا تهدأ ابدا

كان فى اللجنة الاعلامية, ودى كان هدفها عمل تغطية اعلامية لانشطة طلاب الاخوان بالدرجة الاولى, والقيام بكافة الانشطة من تصوير وكتابة تقارير وفيديو وكل حاجة
ولجنة التواصل وهدفها عمل لينكات مع جميع الشخصيات العامة اللى هتيجي سواء من بره مصر او من مصر, واظهار صورة جيدة عن طلاب الاخوان وطبعا مكانش اى حد بيعمل كده بسهولة
ولجنة الحضور .. دى كانت الاكبر عددا .. لان هدفها انها تعمل ثقيف ليها وتنقل الكلام ده لما ترجع الكلية بتاعتها

طبعا كل لجنة بتجتمع وتحدد اهدافها بدقة ومستهدفاتها.. وتحط جدول اعمالها خلال الاربع ايام .. وتبدأ تحدد متطلباتها وتوفرها ان استطاعت .. وتوزع الاعمال كمان
انا كنت فى اللجنة الاعلامية .. وكانت اللجنة الوحيدة اللى بنحتاج امكانيات سواء كمبيوتر محمول او كاميرات او غيرها
فى مؤتمر القاهرة الرابع كانت الامكانيات المادية اقل من الخامس
بس كان مؤتمر القاهرة الرابع احلى وامتع من الخامس بمراحل

فى الرابع كان الناس اللى معايا حتى من طلاب الاخوان سواء من القاهرة او من غيرها .. كنا بجد فرحانين جدا واحنا بنشتغل .. والناس فاهمة كده وتحس ان الدنيا ماشية صح وفى تفاهم جامد

ساعتها افتكر كان معانا حوالى 5 لاب توب وكاميرا فيديو واحدة وكام واحدة ديجيتال وكام فلاش ميموري وكام ام بى ثري .. حاجة كانت متواضعة ولازم نتعامل

كنا بنروح المؤتمر من تسعة صباحا ونطلع من هناك على حداشر مساءا فكان صباح الفحت فعلا
مفيش حاجة مميزة تقريبا فى المؤتمر .. يعنى مفيش حاجة مميزة حصلت فى المؤتمر ساعتها
بس حاجتين فقط اللى فعلا لسه فاكرهم
الاولى كانت اسامة حمدان وبالذات الحارس الشخصى اللى كان معاه .. وده ليه موضوع تانى ان شاء الله
والثانية وهى تفاجأنا فى اخر المؤتمر بشهادات تقدير من الاخوان المسملين ومضى عليها المرشد العام الاستاذ محمد عاكف بايده .. فانت مفاجأة جميلة جدا

فى المؤتمر طبعا كان فى مشاركة للاخوات فيه واعتقد كانت اول حاجة يشاركوا فيها .. فكانوا بيشاركوا على استحياء وخوف الا القليل من الاخوات اللى كانوا فعلا متميزات فى العمل العام .. فعلا كانوا على الرغم من قلتهم الا انهم كانوا صورة مشرفة للاخوات وتحس انهم بيفكروا صح

طبعا كان المؤتمر فرصة جامدة لتلاقى وتبادل الخبرات . حتى ان طلاب الاخوان فى جامعات بعيدة بعتت عدد للمشاركة وكان هدفهم انهم ياخدوا خبرة فقط

اما مؤتمر القاهرة الخامس .. فعلى الرغم من ان الامكانيات المادية فيه كانت عالية جدا (يعنى الكمبيوتر المحمول كان معانا كتير ومكناش عارفين نوديهم فين وثلاث كاميرا فيديو .. وطابعة واسكانر ده غير العدد غير الطبيعي من الكاميرات الديجيتال .. فعلا مكنش فى حاجة بنطلبها الا وبتيجي بعدها بساعات ) .. والتحضير ليه كان احسن من اللى قبله , والتغطية الاعلامية كانت اعلى من اللى قبله ... لكن المؤتمر فى رأيي كان ضعيف جدا .. سواء فى حضور الشخصيات او فى شغلنا كلجان طلاب الاخوان
معرفش بس تحس كده انهم مش زى السنة اللى فاتت .. مش قادر اعبر علشان الناس متزعلش بس فعلا كنت حاسس ان الناس الجامدة مش موجودة .. وده مش احساسى انا بس
يمكن واحد بس هو اللى كان معايا من المؤتمر اللى فات .. وهو الوحيد الفقري اللى مكمل معايا فى المؤتمر الخامس

ده باختصار .. لان مكانش فيه حاجة مميزة الحقيقة فى المؤتمر الخامس

ان شاء الله المرة الجاية بقه هتكلم على حاجات جامدة جدا
وطبعا زى ما انتوا متعودين لاول مرة تعرض .. فالمخبرين يمتنعون

وربنا يحفظنا جميعا

انتخابات امين جامعات مصر

2007-12-09T15:41:00.000+02:00

السلام عليكم ورحمة الله

1- ما من ايام العمل الصالح فيهن احب الى الله من هذه العشر .. قالوا ولا الجهاد فى سبيل الله ؟ قال ولا الجهاد فى سبيل الله .. الا رجل خرج بنفسه وماله فلم يرجع من ذلك بشئ

يعنى هو ده الوحيد اللى احسن منك اذا انت استغليت العشر الاوائل دول
يعنى هى احسن من العشر الاواخر وليلة القدر التى هى خير من الف شهر ؟
اه احسن منها
يمكن السبب فى رأيي ان فى كل حاجة فى دينا تقريبا .. بنبقى عارفين احنا بنعملها ليه .. زى الصلاة والصوم والزكاه .. احنا عارفين السبب والحكمة .. الا الحج
وخاصه المناسك بتاعت الحج .. يعنى ليه سبع اشواط سواء السعى او الطواف .. وليه لازم تقف فى عرفة .. وايه الحكمة من الترتيب ده .. وايه الحكمة انه اربعة ايام محددة .. مش ربنا كان ممكن يخلي كل واحد يحج فى نفس الوقت وهو فى مكانه زى الصوم مثلا او الصلاة .. او يخليها زى الزكاة كل واحد لما يجي الوقت بتاعه ؟؟
لكن كل دى اسئلة ملهاش اجوبة .. وان كانت فهى اجتهادات بشرية.. لكن عظم هذه الايام يرجع فى رأيي .. الى انك متسألش
يعنى ايه ؟؟
يعنى انت تروح تحج وتعمل المناسك دى وانت ساكت .. متسألش ايه وليه وعلشان ايه .. وليه اجيب سبع حصوات من منى علشان ارمي بيهم حجر تانى
قمة الاستسلام لله تعالى ولاوامره دون مناقشة .. ودى قمة الخضوع والعبادة لله تعالى

زى سيدنا ابراهيم .. ربنا امره انه يترك اهله .. حاضر .. اذن فى الناس بالحج .. قال يعنى يارب محدش هيسمع صوتى الضعيف ( مسألش ليه يا رب واشمعنى فى الصحراء دى ؟؟ ) فربنا قاله عليك النداء وعلينا البلاغ
استسلام كامل لله تعالى

والعكس بقه فى ابليس
ربنا امر الملائكة بالسجود .. فسجد الملائكة كلهم اجمعون الا ابليس .. بدأ يعارض ويسأل .. ااسجد لمن خلقت طينا؟ .. انا خير منه .. ابى واستكبر
ولو كان سجد من غير ما يتكلم مكانش حد فى الارض هيعصي ربنا

الدكتور ياسر نصر كان بيتكلم فى القصة دى وقصة سيدنا ادم .. بيقول يعنى ايهما الاولى بالعذاب والتوعد بالجحيم ؟؟
سيدنا ادم ولا ابليس ؟؟
ابليس كان مع الملائكة عابد لله .. لحد لما ربنا خلق سيدنا ادم وقاله اسجد فرفض فخرج من رحمة الله
اما سيدنا ادم .. ربنا خلقه وخلى الملائكة تسجدله وبعدها دخل الجنة على طول .. وعصى ربنا فى الجنة
فايهما الاولى بالعذاب .. واحد كان طائع وعنده رصيد حسنات وعمل معصية ومخالفة لاوامر الله .. ولا سيدنا ادم اللى معندهوش ولا حسنة واحدة تشفعله .. ولما غلط ربنا تاب عليه ؟؟

فقال ان اللى حصل بعد المعصية هو السبب .. ان ابليس رفض الاعتراف بالمعصية .. وفضل يجادل ويتكلم ويناقش
اما سيدنا ادم .. على طول اسلم واعترف بغلطته
فهى دى نفس القضية .. ممكن يكون واحد رايح يحج وراح فعلا .. بس رايح وعمال يجادل ويناقش .. طيب وليه .. وايه الحكمة وعلشان ايه وليه
فيحبط الحج بتاعه .. فلا رفث ولا فسوق ولا جدال فى الحج

فربنا يرزقنا حسن العمل ويعينا على الطاعة فيها .. ويتقبل مننا صالح الاعمال ويتجاوز عن سيئها
وكل واحد بقه يبدع مع نفسه فى الاعمال اللى ممكن يعملها ... صيام وقيام .. قران ودعاء ... صدقة وزكاه .. اى حاجة من الاعمال الصالحة .. وكل ماتكتر كل ما تكسب اكتر

دعواتكوا بقه وكل واحد يدعي بذمة بقه .. واحد بعتلى ماسج عنده امتحانات بيقولى ادعيلي باخلاص بقه :D

2- فى سؤال سألته الاخت فلسطينية الهوى مصرية الاصل .. عن اذا كنا احنا عارفين مسبقا مين اللى هيفوز ليه بنعمل الحوار ده وفين الديموقراطية والكلام الكبير ده ..
هو اولا مين القائم على هذه الفكرة ؟ بالجهد والمال والتضحية والوقوف قدام امن الدولة ؟؟
طلاب الاخوان المسلمين .. طيب .. مين اللى شارك فى الانتخابات دى ورشح نفسه ؟؟ الاغلبية من طلاب الاخوان المسلمين .. طيب
يبقى ايه المشكلة ؟
انا مثلا اترشحت فى الدفعة عندى ونجحت .. وبعد ما بقينا اغلبية فى هيكل اتحاد الكلية ... احنا كنا متفقين على مين هو اللى هيبقى الامين .. لاننا كتلة انتخابية .. وطبيعي وعادى جدا ان الكتلة تتفق تنتخب مين
بس كده :)

الاتحاد الحر .. الفصل الاخير

بعد ما رحنا هناك نقابة المحامين .. الاول عملنا اجتماع لكل الامناء والامناء المساعدين كنوع من التعارف .. وفضلنا نضحك ونهزر مع بعض كتير

وبعدها دخلنا القاعة علشان الانتخابات

بدأت الانتخابات .. وبدأ الترشيح .. فى ترشيح الامين المساعد نزلت انا وبتاع جامعة المنصورة وواحد كمان

وفى الامين نزل عمرو حامد وبتاع جامعة حلوان قدام بعض

نجح عمرو حامد .. ونجح الاخ بتاع المنصورة فى الانتخابات وانا اخدت صوت واحد بس وهو صوتى لنفسى :D

عادى بتحصل يا جماعة بتحصل

وكان فى تنسيق ساعتها .. وبعدها طلعنا خدناهم احنا طلاب جامعة القاهرة وعزمناهم فى اتخن حتة فيكي يا مصر :D

وبعدها الناس روحت واللى كان مسافر وكده

ليلتها .. المعدة بتاعت برنامج العاشرة مساءا اتصلت بصلاح وقالتله انهم عايزين حد يطلع يتكلم عن الاتحاد الحر .. فاتصل بعمرو حامد وهومروح وخلاه يلف ويرجع تانى علشان يروح التصوير . فعمرو حامد كان مقتول خالص

وراح صلاح معاه هناك فى التصوير .. وكانت الحلقة اللى طلع فيها مع امين مساعد اتحاد القاهرة المزور .. وكانت حلقة جامدة جدا عمرو حامد ادى فيها بشكل كويس وجميل جدا جدا

طبعا بعدها الاتحاد الحر لم يستطع عمل اى اعمال اطلاقا .. كان فى فعلا حرب غير طبيعية على اى حاجة باسم الاتحاد الحر .. وحتى بعيدا عن الامن .. يعنى انا رحت مرة لاحدى مراكز التدريب والتنمية المعروفة .. كنت رايحلهم بعرض يعنى .. نديكوا كذا كذا كذا فى المقابل تدونا كورسات كذا كذا كذا

لما عرفوا انها باسم الاتحاد الحر رفضوا تماما .. ورفضهم كان مبرر .. لانهم لو وافقوا فالامن مش هيسيبهم وهيخرب بيتهم علشان يلغوا الاتفاق ده

وحتى كورس التنمية البشرية اللى كنا اتفقنا عليه مع دكتور على عبالرحمن مقدرناش نعمله اصلا

طيب ليه كده ؟؟

لان معنى ان يبقى فى اعمال تتعمل فى الجامعة باسم الاتحاد الحر .. ده معناه ان الاتحاد الحر فعلا موجودة كبديل للاتحاد المزور وانه بيعمل انشطة .. بل مشاركة الطلبة فيه هتبقى اسوأ خبر بالنسبة للامن .. لان ده هيبقى فعلا دليل على ان الطلبة ترفض الاتحاد المزور وبتشارك فى الاتحاد الحر وده لن يرضاه الامن ابدا

لكن فى حبة اعمال اتعملت لكنها صغيرة وبالجهود الذاتية للافراد .. انا للاسف مكنتش متابع قوى فى الاتحاد الحر ده .. لانى كنت مشغول فى قسم ادارة وحاجات تانية لانها كانت اخر سنة .. فمكنتش مركز قوى فى الاتحاد الحر

وبكده تكون قصة الانتخابات خلصت على خير

تبقت حبة مواقف كانت حصلت لكن انا مش قادر احدد بالضبط تاريخها او السياق بتاعها
كان مرة طلع قطب وعبدالعزيز مجاهد ( امين اتحاد حر حلوان السابق ) على برنامج تسعين دقيقة مع معتز الدمرداش ومى الشربيني واتكلموا على الانتخابات والاتحاد الحر والحرية فى الجامعة لممارسة الاعمال السياسية والاعمال العامة
وكان المفروض ان حد من الاتحاد المزور هيروح الحلقة لكن حسب كلام مى ومعتز .. اختفى فى ظروف غامضة ومجاش التصوير

ومرة تانية كان الاخوات عملوا مظاهرة فى الجامعة .. مش فاكر كانت عن ايه .. لكن المهم انهم فى تسعين دقيقة كانوا عايزين مننا الشرايط بتاعتها علشان يذيعوها .. صلاح اتصل بيا وانا كنت فى الجامعة وادانى رقم اخت كلمتها ورحت اخدت منها الكاميرا والشريط وقابلت صلاح وطلعنا على مدينة الانتاج الاعلامى
لما رحنا هناك ودخلنا قابلنا فى المدخل معتز ومى كانوا واقفين بيتكلموا فى الموبايل والظاهر كان فى مشكلة ما
فرحنا سلمنا عليهم واتكلمنا معاهم فى حاجة كده وشكرناهم على اللى عملوه لينا فى الجامعة وكده .. ومشينا طلعنا الاستوديو بتاع تسعين دقيقة نفسه علشان نديهم الشريط ونحاول
المشكلة ان الكاميرا اللى صوروا بيها من نوع معين وبتسجل بطريقة معينة مش موجودة فى اى كاميرا تانية .. والاجهزة بتاعتهم مش عارفه تلقط اى حاجة من على الشريط .. فجربوا الكاميرا نفسها .. مفيش فايدة

المعد اللى كلمنا ورحناله بالشرايط كان بيعيط .. علشان الحلقة خلاص بتبدأ وهو لسه مش عارف يجيب الصور علشان يعمل التقرير
خصوصا ان فى اخوات طلعوا فى التصوير وقالوا كلام جامد جدا مكانش ينفع ميتذاعش .. لكن معرفوش ياخدوا الحاجة من الكاميرا خالص
طبعا طول الفترة دى احنا بنحاول معاهم .. وبنحاول بكل الطرق الممكنة اننا نطلع الفيلم من على الشريط بس مش عارفين .. حاولت انا اطلعه بالطريقة اللى بعمل بيها فى البيت ونزلت البرنامج من على النت عندهم فى الاستديو ومفيش فايدة .. جابوا ناس من بره وجابوا كابلات جديدة من قناة الناس على امل انهم يعرفوا ياخدوا الفيديو ومعرفوش .. اتصلنا بطوب الارض اللى بيعرف القصة دى ومفيش فايدة .. فى الاخر مشينا هنعمل ايه يعنى

وروحنا مع واحد من القناة كان نازل فخدنا فى طريقة
ودى كانت اول مرة ادخل فيها الانتاج الاعلامى .. وادخل استوديو التصوير بتعهم

كنا برضه لما بنصور حاجة كنت احيانا بروح انا وصلاح نوديها للجزيرة والعربية وكده .. فالاستوديو بتاع الجزيرة لا يقارن تماما بالاستديو بتاع تسعين دقيقة .. يعنى استديو الجزيرة ده اسوأ السيئين سوءاً قدام الاستوديو بتاع تسعين دقيقة
يعنى لما حد بيجي فى اى نشرة من القاهرة بيجي ووراه كوبري اكتوبر .. المكان ده اصلا عبارة عن غرفة فيها مكتبين يعنى فيها اتنين بيقعدوا يخلصوا شغلهم هناك .. وبالمرة التصوير فى نفس المكان
يعنى اقصد ان استديو الجزيرة سئ جدا مقارنة بتسعين دقيقة .. ومع ذلك فالفرق كبير جدا بين دول ودول

من المواقف برضه اللى حصلت .. مرة عمرو حامد كلمنى قالى ان فى جريدة عاملة زى حلقة نقاشية كده عن الانتخابات والاتحاد الحر .. ساعتها كنت مشغول علشان الامتحانات فعمرو حامد راح لوحده .. ونزلت فى الجرنان بعدها
ومرة رحت انا وهو لجريدة تانية مش فاكرها فى حاجة زى نقاش مفتوح وخدوا صور وبتاع .. بس متابعناش بعدها ايه اللى حصل

من الحاجات برضه اللى حصلت .. الجزيرة اتصلت بعمرو حامد علشان يطلع فى برنامج هذا الصباح .. المفروض قالوله ان الموضوع عن الانتخابات .. فلما راح طلع الموضوع عن المشاركة السياسية للطلاب فى الجامعة ودورهم والصحافة الشبابية وكلام كده مختلف تماما .. بس عمرو حامد قال كلام شديد جدا حتى ان بابا عجبه كلام

يلا كفاية كده .. ده اللى انا فاكره
فى حاجات تانية فى فترة الجامعة دى ان شاء الله هحاول اكتب عنها

الله المستعان واكتبها باذن الله

انتخاب مجلس الجامعة

2007-12-02T09:20:00.000+02:00

السلام عليكم ورحمة الله وبركاته

ياااااااه الواحد بقاله فترة طويلة قوى منقطع عن العالم الخارجي

1- معذرة على التأخير .. بس بجد الفترة اللى فاتت دى كانت فترة الى حد ما صعبة
ما بين انشغالات فى البيت ومشاوير عمرها ما بتخلص .. وما بين اختيارات وبدائل كتيرة مش عارف تختار انهى فيهم
خاصة انك بتاخد قرار مصيري .. ولازم تاخد قرار .. فالموضوع كان محتاج تفكير كبير جدا وصبر ايوب
فادعولى ان ربنا يقدرلى الخير حيثما كان .. وانه يعيني على اختيار الطريق الصحيح ان شاء الله تعالى
ربنا يكرم هبقى اكتب عنه بس لما الامور تهدى شوية
وتسمعوا خبر جامد جدا قريب ان شاء الله

2- انا كنت كتبت موضوع كده سميته مراجعات .. بس الحمد لله انى منزلتهوش ومسحته .. يعنى كان فيه كلام ممكن يزعل البعض . لكن انا لما قعدت افكر فى الهدف من المدونة والهدف من اللى انا بكتبه ده .. ففضلت انى منزلهوش وامسحه
لكن الموضوع ما زال موجودا وهياخد نصيبه من الكتابة ان شاء الله

3- نكمل بقه فى الاتحاد الحر

بعد يوم التصوير ده .. وخاصة النهاية الدرامية لليوم بالكلام اللى قالته مي فى البرنامج بعد التقرير .. تانى يوم انا كنت نازل الجامعة طبيعي يعنى مفيش حاجة مش طبيعية .. فخير اللهم اجعله خير لقيتلك ايه بقه
لقيت كميات امن مركزي محاصرة الجامعة بشكل غير متوقع اطلاقا .. بجد كان تقريبا اول مرة فى تاريخ الجامعة يحصل حصار بالشكل ده
على سبيل المثال الى حصل
عربيات امن مركزي على كل الابواب .. وحتى الابواب الصغيرة كان عليها عربيات والعساكر على الارض واقفين بعدتهم وواقفين صفوف ..
باب تجارة كان واقف عليه لواااااااااااااااااااء .. عارفين يعنى ايه لواء واقف على باب تجارة ؟ يبقى الباب الرئيسي عليه المشير طنطاوي ولا ايه ؟
لو شفتوا الفيديو بتاع الامن المركزي اللى اتصور ( وهجيبه فى الاخر ان شاء الله ) هتتخضوا من طريقة تطويق الجامعة من خلال الامن المركزي
احد ضباط الامن المركزي من اللواءات واللى كان على رأس القوة دى كلها .. كان نازل بكامل عدته والنياشين على صدره .. معنى انه ينزل بالنياشين دى يعنى انه فى حالة حرب مش حالة سلم .. فده يعكس الاستعداد الرهيب للامن المركزي تاني يوم
وكان الامن المركزي واقف من الصباح الباكر .. يعنى قبل ما الناس تصحى اصلا
( بالمناسبة يوم الاربع العظيم ده .. الامن المركزي مروحش .. وفضل محاصر الجامعة لحد تانى يوم بتاع التصوير ده لحد العصر او قرب المغرب .. وبدا بعدها يلم عزاله ويمشى )
المهم فى اليوم ده كان واقف من الصبح بدري جدا .. وبالكثافة والاعداد الكبير ده .. لدرجة انى اتخضيت اصلا من منظرهم وطريقة وقفتهم .. كانت فعلا مريبة جدا
المهم دخلت الجامعة ايه يا جدعان ايه البهدلة الى بره دى .. من خلال الكلام فهمت ان ده بسبب
الكلمة اللى قالتها مي فى البرنامج 90 دقيقة
واللى كانت لميس قالتلها لمي
واللى كان صلاح قالها للميس فى التيلفون .. بس قالتها مي على لسان محمود قطب
يانهار .. كلمة اتقالت .. وقفت الامن على رجل واحدة

الامن المركزي يومها كان خايف جدا .. كانت مرعوب بشكل غير طبيعي
وفضلوا واقفين بالشكل الغريب ده فترة طويلة
واحنا كملنا عادى جدا فى البرنامج بتاع اليوم واللى كان كالاتى
اتفرج هنا اهو واتفرج على الرعب
احنا حسب اتفاقنا ان المفترض هيطلع وفد للدكتور على عبدالرحمن علشان يقابله ويعرض عليه المشكلة
طلع الوفد علشان يقابله .. قالولهم ان الدكتور على مش موجود

الوفد اللى طلع طبعا فيه قيادات من طلاب الاخوان .. فكان الاتفاق انهم لو معرفوش يقابلوا الدكتور على .. واحد منهم فقط هيدي رنه على الموبايل لواحد اخر .. الرنة دى اشارة مفادها اننا معرفناش نقابله
طيب وبعدين يعنى ايه اللى يحصل ؟؟
اللى يحصل بعدها ان كل طلاب الاخوان اللى فى كل الكليات .. يتجمعوا فى اعتصام مفتوح تحت مبنى القبة لحد لما نقابل الدكتور على عبدالرحمن

وده اللى حصل
وصلت الرنة للشخص المسئول .. وخلال خمس دقايق من وصول الرنة تجمع كل طلاب الاخوان فى اعتصام مفتوح تحت مبنى القبة

فى ساعتها .. مكتب الدكتور على عبدالرحمن اتصل بواحد من الوفد اللى كان طالع يقابله وقاله ان الدكتور على مستنيكوا فى المكتب دلوقتى

طبعا احنا استمرينا فى الاعتصام

قبل ما اكمل .. هو كان متوقع اصلا ان ده يحصل .. وكان معروف ان ده هيحصل ليه ومتوقع الخطوة اللى جاية كمان
لان معروف عند الامن اننا هنشتغل فى الازرق اللى هو الاتحاد الحر .. وده بالنسبة للامن خط اسود لا يمكن يتعمل ان شاء الله لو على جثث واشلاء الضحايا .. بس مش هيتعمل .. ودى كانت رسالة مفهومة من الامن فى اكتر من موقف
فعلشان كده .. الامن مكانش عايزنا نعمل الاتحاد الحر فى مقابل انه يدينا اى حاجة
بس مش هيديهالنا فى ساعتها .. انما بعدها بفترة
وهو ده اللى حصل فعلا

الدكتور على طلب من الوفد قائمة باسماء المشطوبين ووعدهم انه هيرجع للكليات ويشوف .. ولو ثبت ان فى طالب واحد فقط مشطوب ظلما .. فهيلغى كل الانتخابات دى ويعيدها تانى
كلام جميل .. وطبعا كلنا هنقول انه مكسب كبير جدا
ده غير انه طلب اننا نجهز ورق اى اسرة احنا عايزنها وهيعملهالنا ويسجلها حتى لو باب التقديم للاسر قفل .. اضافة الى ان واحد من طلاب الاخوان اللى كانوا فى الاجتماع طلب اننا نعمل كورس فى التنمية البشرية واحنا اللى نعمله .. وافق على طول وكتب ورقة لعميد كلية تجارة انه يهتم بالموضوع حالا وفورا واحنا اللى نعمله بالتنسيق مع العميد على طول ومضاها باسمه هو الدكتور على عبدالرحمن

طبعا كنا بنقول ايه الهنا اللى احنا فيه ده .. ده اى حاجة طلبناها وافقوا على طول

بس مش علينا الحركات دى .. لانه كان واضح جدا انه ميقدرش يعمل كده
وهو كان قاصد يقول كده علشان يمتص الغضب .. والاهم يكسب وقت ويضيع علينا الوقت
بمعنى انه يفضل يأخر ويأخر لحد لما الانتخابات تعدى على خير ويتعين الطلاب .. وفى نفس الوقت الاعلام يهدى شوية من قصة الانتخابات .. ويكون التيرم اصلا قرب يخلص فمنلحقش نعمل الاتحاد الحر .. الكلام ده كان واضح ومفهوم جدا لينا

احنا كل يوم بيعدي فى الجامعة لو مش لينا بيبقى علينا .. لان الطبيعي ان خطة التيرم اصلا مزحومة جدا والاعمال فى التيرم كتيرة جدا فلازم تستغل الوقت
طبعا كان فى فرصة للسير فى المفاوضات لكن كان له سقف زمنى معين
دى حتة كده بره الجون عن كيفية اننا بنتعامل مع الامن فى الجامعة .. بيبقى فى رسائل متبادلة بين الطرفين .. وحسب فهم كل طرف للرسالة وقدرته على حشد الناس نحو رسالته بيبقى هو الكسبان .. هبقى اعملها موضوع بس ربنا يسهل

نرجع تانى .. زى ما قلتلكوا انه كان متوقع ان رئيس الجامعة يرفض المقابلة واننا هنعمل الاعتصام .. فكلمنا الاعلام وفى بعضهم جه وحضر والصحفيين طبيعي بيجوا عادى

فى اليوم ده قناة معرفش ايه كانت عايزة حد يصور معاها .. فصلاح جاب عمرو حامد علشان يصور معاهم .. وعمرو قال كلام جامد جدا وكان مفوه جدا فى الكلام .. ما شاء الله عليه
فبعدها تقرر انه هو اللى يخوض انتخابات الاتحاد الحر كأمين جامعة القاهرة .. وبعدها كأمين جامعات مصر .. وانا هبقى المساعد ليه

لانه احنا مش هنعمل اعمال جوه الجامعة مع الطلاب .. انما كل اللى هنعمله هيبقى فقط ضربه اعلامية جديدة .. فلازم يكون الشخص اللى هيبقى الاتحاد الحر متمثل فيه .. لازم يكون مفوه وصوره جميلة ومشرفة ليك .. وده كان متوفر فى عمرو حامد اكتر منى وهو فعلا كان احسن منى بكتير جدا فى الحديث مع الاعلام .. فتم اختياره ليكون الامين

وبدأ الاتحاد الحر

بعد السقف الزمنى للمفاوضات واللى كان متوقع انها فقط لتضييع الوقت علينا وتفويت الفرصة .. خلال الفترة دى كان بدأ التجهيز للاتحاد الحر .. الصناديق الشفافة .. اللجنة العليا للاشراف على الانتخابات من الطلبة بمساعدة اعضاء هيئة التدريس ولجنة 20 مارس
اوراق الانتخابات .. مراجعة سير العملية الانتخابية والجدول الزمنى لها

فى انتخابات الاتحاد الحر كان لازم ان عمرو حامد يفوز فى كليته بالاتحاد وكذلك انا اكسب فى الكلية عندى .. لان الدعاية اللى نزلت للانتخابات فيها صورتي انا وعمرو حامد
اللى حصل عندى انى لحد يوم الانتخاب مكنتش اصلا دخلت المدرجات عندى فى الكلية علشان اعمل دعاية
وحتى لما دخلت على مستوى سنة رابعة كنا ثلاث مرشحين فى احدى اللجان
انا كسبتها بالعافية وكنت التانى .. يعنى فى واحد كسب الاول .. وبعده انا التانى وكان الفرق حوالى اربع اصوات تقريبا

لدرجة ان واحد من القيادات الطلابية قالى هولع فيك لو مكسبتش .. مش بعد كل فلوس الدعاية الانتخابية متفزش كمان !!
بس الحمد لله فزت فيها

طبعا الاعلام كان موجود فى كل خطوة وبيصور .. او احنا نصور ونبعتله الشرايط عادى خالص .. واستمر الموضوع تمام قوى وعادى جدا

وعدت الايام لحد لما وصلنا ليوم انتخاب مجلس الجامعة فى الاتحاد الحر . ومنه هيطلع الامين والامين المساعد للجامعة
كان فى مؤتمر عند القبة برضه وفاز عمرو حامد امين للااتحاد وانا امين مساعد وواحد من الاشتراكيين وواحد من كفاية واخت من الاخوان

عملنا المؤتمر .. وحصل موقف جامد يومها
علشان الوقت ...فاللى كان بينسق المؤتمر قالى فى الغالب مش هتقول كلمة .. قلتله كويس
لان الاخت هتقول كلمة عن البنات .. وبتاع كفاية هيقول كلمة .. ويبقى عمرو حامد يختم بكلمته
فانا مكنتش مجهز حاجة اقولها وخلاص عادى يعنى

فوجئت يومها لقيت حامد ( منسق المؤتمر ) بيقولى انت هتقول كلمة فى السريع عشر دقايق
قلتله نعم ؟
قالى اه هتقول كلمة بعد الولد بتاع كفاية ( مش فاكر اسمه للاسف )

قلتله لا انا مش جاهز ومش هقول حاجة

ولقيته فجأة قال ودلوقتى مع كلمة امين مساعد اتحاد حر جامعة القاهرة عمر عزمى !!
يابن الايه يا حامد .. انا مش جاهز
وراح مديني المايك .. طبعا قلت كلام اى حاجة وخلاص واللى ربنا فتح بيه عليا قلته و كنت موجه الكلام بتاعى للطلبة .. فكنت بقوله بالعامية مش بالفصحى
بعدها عمرو حامد قال كلمة .. كانت للاعلام اكتر منها للطلبة فكان بيتكلم بالفصحى

وانتهى المؤتمر على خير

انتخاب امين جامعات مصر

المفترض ان كل الجامعات المشاركة فى الاتحاد الحر كانت اتمت انتخاب مجلس الجامعة بتاعها .. فى سقف زمنى معين
وفى يوم معين تم تحديده مسبقا .. كان هيتم انتخاب امين جامعات مصر .. ايه قصته ده بقه
هو زمان .. كان فى كل جامعة اتحاد طلاب .. وفى اتحاد طلاب جامعاااات مصر كلها .. كلهم كلهم
وبيبقى فى امين ليهم وبيحضر فى مجلس الشعب ويقول رأي الطلاب .. وممكن يطلب مقابلة رئيس الوزراء او رئيس الجمهورية ويعرض عليه مشكلة معينة او اى حاجة يعنى

فاحنا كنا عايزين نرجعها ودى انت احد مطالبنا .. فعلشان كده قلنا السنة دى هنعملها وتبقى ضربة الاتحاد الحر الجديدة

المهم كان محدد يوم كل امناء جامعات مصر والامناء المساعدين هيجوا فى القاهرة علشان الانتخابات
كان المفترض انه هيبقى فى جامعة القاهرة .. عند القبة .. والمفترض ان جامعات القاهرة الكبرى تبعت كل افرادها من طلاب الاخوان .. لكن اللى حصل ان رئيس الجامعة او الامن مش فاكر .. بعت رسالة قال فيها انه هيعمل اى حاجة علشان يبوظ الموضوع ورئيس الجامعة قال انه ليس له علاقة ولن يحمى اى طالب من خارج جامعة القاهرة .. يعنى تفهم على طول ان الامن هيدخل الجامعة يبهدل العملية وهيعتقل الناس دى

فى ساعتها .. تم الغاء الموضوع تماما من جامعة القاهرة .. وفى سرية تامة تم نقله الى نقابة المحامين

المفروض ان الانتخابات تبدأ 12 الظهر .. الناس عرفت انه فى نقابة المحامين الساعة 11.30 علشان الامن ميلحقش يعرف ولا يبعت قوات امن مركزي هناك

قبلها واحد من المنسقين للموضوع قالى تعالى بلبس عادى مش لازم بدلة
تانى يوم واحنا بنستقبل الناس دى وبنوديها للنقابة .. كلهم كانوا جايين ببدل .. فقلتله الله يسامحك كده القاهرة منظرها وحش
قالى الاتفاق انهم يجوا من غير بدل .. والكلام اتغير الصبح وقالك كله يجي ببدل بس ملحقوش يقولونا احنا

رحنا هناك وبدأنا مؤتمر انتخاب امين جامعات مصر والامين المساعد .. والمرة الجاية بقه علشان انا تعبت

والسلام عليكم ورحمة الله

لن انال شرف خدمة هذا الوطن

2007-11-21T17:24:00.000+02:00

السلام عليكم ورحمة الله وبركاته

الحمد لله ... الحمد لله .. الحمد لله

لن انال شرف خدمة هذا الوطن

وفقد الجيش اليوم ... احد اعظم كوادره و احد اقوى اعمدته

يا خسارة قوات الصاعقة ... خسرت واحد من اشد الرجال

يلا هو العمر بعزقة ..

ربنا ما يوريكوا الجيش ابدا فى حياتكوا بجد

لانه مأساه بمعنى الكلمة

واحد صاحبى وقف على اليوم بتاعه !! يعنى خطوة كمان كان راح فيها وش

الحمد لله اخدنا التأجيل وهتجوز اخيرا

باي باي يا عزوبية يا وحشة

المهم لما دخلت البيت ..اختى كانت بتغنى اغنية

الاغنية هيا :

انا مش مصدق .. حلم الليالى الغالى خلاص اتحقق
انا مش مصدق
واتأجلت ( بدل نجحت ) خلاص معقولة خلاص
ارتحت خلاص يا ناس يا هوووووو
كان جبل انزاح عن قلبى وراح
اه يا محلى يا محلى طعم التأجيل

فالحمد لله على كل حال

ندخل بقه فى اللى عايز اقوله النهاردة

1- انا طبعا فرحان جدا جدا بالناس اللى بعتتلى رايها فى المدونة على الميل .. فعلا انا كنت فرحان جدا حتى الناس اللى نقدت حاجات معينة كده .. فبجد رأيكوا فرحنى جدا
وطبعا كان يمكن اجمل تعليق كان من خلال تيلفون من عمرو حامد حبيبي ورفيق الكفاح المسلح فى الاتحاد الحر وهو كان دخل وقرأ فعجبه جدا وقالى على حبة افكار جميلة جدا ربنا
طبعا عمرو حامد هو بطل القصص القادمة عن الاتحاد الحر لحد لما يخلص ان شاء الله

لكن طبعا .. العدد اللى بعتلى على الميل قليل جدا مقارنة باللى بيدخلوا المدونة ومقارنة باللى بينزلوا الفيديوهات
لكن دى خليها فى المرة الجاية ونخلى الارقام تتكلم ان شاء الله

2- الحقيقة فى خبر احزنى جدا جدا

وهو وفاة اللواء اركان حرب صلاح الدين سليم رحمه الله

كثير مننا ميعرفهوش .. لكن الحقيقة الراجل ده من اقوى الرجال اللى شفتهم وقابلتهم
ده غير انه عقلية جبارة واستراتيجية من الدرجة الاولى فعلا

للاسف الشديد .. لم يوف حقه ولم يعرف الناس قدره وحتى فى جنازته

كانت من سكات ولم يعرف احدا
هو مات بعد اصابته بازمة قلبية بعد محاضرة قالها فى اكاديمية الشرطة

وكانت يوم 21 اكتوبر .. يعنى من شهر تماما .. وانا عرفت فقط من يومين
ولما سألت بابا عن خبر الوفاه تفاجأت انه اصلا ميعرفش انه مات مع ان بابا بيتابع الاخبار بشكل مستمر
وعرفت انه لم يعط قدره بعد مماته للاسف .. ومنع الاعلام من تصوير الجنازة .. او على القل الاعلام الرسمى

طبعا انا ليا معاه ذكريات لا تنسى .. واحداث جميلة لازم اتكلم عنها لكن بعد ما اخلص الاتحاد الحر ان شاء الله

رحمك الله يا سعادة اللواء .. لم يعرف قدرك البشر

يلا استنوا الموضوع الجاى بقه ان شاء الله