Friday, December 21, 2007

مؤتمر القاهرة الرابع والخامس

السلام عليكم ورحمة الله وبركاته

ايه الدنيا وايه الاخبار معاكوا بعد العيد واللحمة

كل سنة وانتوا طيبين .. وادعوا ان ربنا يكتبلنا عمرة او حج السنة الجاية ان شاء الله

والله الواحد وهو بيتفرج على الناس اللى راحت تحج وهما واقفين على عرفات .. ياه حسيت باحساس غريب

نفسى اروح والله تانى ... فعلا من احلى ايام حياتى لما رحت حجيت

ويومها بليل كنت قاعد بتفرج على اقرأ فجه واحد بيتكلم من الحجاج وقال
ان الدراسات بتقول انك علشان تطلع اربعة مليون واحد من مكان زى ده محتاج على الاقل اربع ايام علشان تعمل كده
لكن فى الحج كلهم بيطلعوا فى اربع او ست ساعات

بس الحقيقة فضلت افكر فى الكلام ده

انت اصلا علشان تجمع اربعة مليون واحد .. كلهم لابسين لبس واحد .. كلهم بيعملوا حاجة بنفس الترتيب .. كلهم تقريبا جايين لهدف واحد .. كلهم بيتحركوا بنفس واحد .. انت بتتكلم على حاجة كبيرة جدا

ده انت لو حاشر الناس وحابسهم فى الاستاد .. ماشى ممكن تنظم العملية بقوات الامن .. لكن عمرك ما هتعرف تجمعهم على هدف واحد .. ولو جم وهم مكرهين .. بس ان الناس تتسابق علشان تيجي وكل واحد عنده نفس الهدف فدى حاجة صعبة جدا

اى دين ده اللى يقدر يعمل كده .. اى دين يقدر يخلي المسلمين كلهم فى لحظة واحدة يمتنعوا عن الاكل والشرب نهائيا .. وفى لحظة واحدة كلهم ياكلوا فى وقت واحد وان اختلفت بيوتهم واماكنهم
اى دين ده اللى يقدر يخلى الناس كلها فى وقت معين تنتظم صفوف مستقيمة .. وفى اتجاه واحد .. ومحدش فيهم بيتحرك ابدا الا لما القائد ( الامام ) يقولهم

والله لو نفهم بس دينا صح .. هنعيش فى سعادة غير طبيعية فعلا

الحاجة التانية
انى من بكرة ان شاء الله
هقدر امضى عقود .. هقدر اقدم فى اى حتة .. واقدر احجزلى شقة باسمى .. وافتحلى حساب فى البنك واعمل اللى نفسى اعمله من زمان
بكرة عيد ميلادى الواحد والعشرين
اهئ اهئ
الواحد كبير وعجز خالص
المهم انا كنت ناسى الموضوع اساسا .. لحد لما واحد اتصل بيا وبيقولى
انت بكرة هتبقى كام سنة
قلتله يانهار ابيض .. ده انا نسيت اصلا
يلا العمر مش بعزقة


المهم بقه ... نرجع نكمل بقه فى القصص وحكاوي القهاوي بتاعتنا
الحقيقة فى حاجات كتيرة فى بالى عايز اكتبها .. فربنا يعينا باذن الله

انا عايز اكتب النهاردة عن مشاركة طلاب الاخوان فى مؤتمر القاهرة

البداية

فى الاول المؤتمر ده كان عبارة عن مبادرة من الاشتراكيين على ما افتكر يعنى .. هو عبارة عن مؤتمر سنوي هدفه الاساسى مناهضة الاستعمار والامبريالية .. يعنى مناهضة الاحتلال الغربى سواء الفكري او سواء العسكري
لكن طبعا .. لم يكن يخلو من الخبيط فى القضايا الداخلية وزادت مؤخرا طبعا

فى اول سنتين لم يكن فيه اقبال على المؤتمر .. فى السنة الثالثة شارك الاخوان المسلمون فى المؤتمر ده
المشاركة تعنى تحمل نسبة من التكاليف وبالتالى الاستحواذ على نفس النسبة من المؤتمر

يعنى المؤتمر كان بيقعد اربع ايام منها يوم الافتتاح
الاخوان مثلا هيشاركوا بنسبة الثلث .. يبقى ليهم ثلث وقت حفلة الافتتاح موزعة على كلمات وقضايا, وليهم ثلث المحاضرات اللى بتتم وورش العمل اللى بتتم طوال مدة المؤتمر .. وليهم ثلث الامكانيات التى ستتاح فى المؤتمر .. وكده

فى السنة الثالثة شارك الاخوان فى المؤتمر بشكل عام وبنسبة قليلة .. وشاركت اطياف اخرى زى حزب العمل والشيوعيين وطبعا الاشتراكيين والليبراليين وحزب الغد

كل ده كان على المستوى العام .. وفى المؤتمر الثالث .. شارك وفد من طلاب الاخوان كان صغير جدا .. شارك فى حضور حبة ندوات فقط لا اكثر

لكن فى السنة الرابعة من المؤتمر .. ودى كانت سنة ثالثة بالنسبة لى فى الجامعة .. واللى فيها حصل التحول لاسم طلاب الاخوان رسميا وحصل فيها مظاهرة جامعات مصر والتحرك تحت شعار معا للاصلاح .. فكان فى تحول سياسى بحت فى فكر وتحركات طلاب الاخوان
فكان الطبيعي انهم يشاركوا بقوة فى المؤتمر ده .. وهو اللى حصل
فكان فى جيش من طلاب الاخوان وبيشتغلوا كخلية نحل لا تهدأ ابدا

كان فى اللجنة الاعلامية, ودى كان هدفها عمل تغطية اعلامية لانشطة طلاب الاخوان بالدرجة الاولى, والقيام بكافة الانشطة من تصوير وكتابة تقارير وفيديو وكل حاجة
ولجنة التواصل وهدفها عمل لينكات مع جميع الشخصيات العامة اللى هتيجي سواء من بره مصر او من مصر, واظهار صورة جيدة عن طلاب الاخوان وطبعا مكانش اى حد بيعمل كده بسهولة
ولجنة الحضور .. دى كانت الاكبر عددا .. لان هدفها انها تعمل ثقيف ليها وتنقل الكلام ده لما ترجع الكلية بتاعتها

طبعا كل لجنة بتجتمع وتحدد اهدافها بدقة ومستهدفاتها.. وتحط جدول اعمالها خلال الاربع ايام .. وتبدأ تحدد متطلباتها وتوفرها ان استطاعت .. وتوزع الاعمال كمان
انا كنت فى اللجنة الاعلامية .. وكانت اللجنة الوحيدة اللى بنحتاج امكانيات سواء كمبيوتر محمول او كاميرات او غيرها
فى مؤتمر القاهرة الرابع كانت الامكانيات المادية اقل من الخامس
بس كان مؤتمر القاهرة الرابع احلى وامتع من الخامس بمراحل

فى الرابع كان الناس اللى معايا حتى من طلاب الاخوان سواء من القاهرة او من غيرها .. كنا بجد فرحانين جدا واحنا بنشتغل .. والناس فاهمة كده وتحس ان الدنيا ماشية صح وفى تفاهم جامد

ساعتها افتكر كان معانا حوالى 5 لاب توب وكاميرا فيديو واحدة وكام واحدة ديجيتال وكام فلاش ميموري وكام ام بى ثري .. حاجة كانت متواضعة ولازم نتعامل

كنا بنروح المؤتمر من تسعة صباحا ونطلع من هناك على حداشر مساءا فكان صباح الفحت فعلا
مفيش حاجة مميزة تقريبا فى المؤتمر .. يعنى مفيش حاجة مميزة حصلت فى المؤتمر ساعتها
بس حاجتين فقط اللى فعلا لسه فاكرهم
الاولى كانت اسامة حمدان وبالذات الحارس الشخصى اللى كان معاه .. وده ليه موضوع تانى ان شاء الله
والثانية وهى تفاجأنا فى اخر المؤتمر بشهادات تقدير من الاخوان المسملين ومضى عليها المرشد العام الاستاذ محمد عاكف بايده .. فانت مفاجأة جميلة جدا

فى المؤتمر طبعا كان فى مشاركة للاخوات فيه واعتقد كانت اول حاجة يشاركوا فيها .. فكانوا بيشاركوا على استحياء وخوف الا القليل من الاخوات اللى كانوا فعلا متميزات فى العمل العام .. فعلا كانوا على الرغم من قلتهم الا انهم كانوا صورة مشرفة للاخوات وتحس انهم بيفكروا صح

طبعا كان المؤتمر فرصة جامدة لتلاقى وتبادل الخبرات . حتى ان طلاب الاخوان فى جامعات بعيدة بعتت عدد للمشاركة وكان هدفهم انهم ياخدوا خبرة فقط

اما مؤتمر القاهرة الخامس .. فعلى الرغم من ان الامكانيات المادية فيه كانت عالية جدا (يعنى الكمبيوتر المحمول كان معانا كتير ومكناش عارفين نوديهم فين وثلاث كاميرا فيديو .. وطابعة واسكانر ده غير العدد غير الطبيعي من الكاميرات الديجيتال .. فعلا مكنش فى حاجة بنطلبها الا وبتيجي بعدها بساعات ) .. والتحضير ليه كان احسن من اللى قبله , والتغطية الاعلامية كانت اعلى من اللى قبله ... لكن المؤتمر فى رأيي كان ضعيف جدا .. سواء فى حضور الشخصيات او فى شغلنا كلجان طلاب الاخوان
معرفش بس تحس كده انهم مش زى السنة اللى فاتت .. مش قادر اعبر علشان الناس متزعلش بس فعلا كنت حاسس ان الناس الجامدة مش موجودة .. وده مش احساسى انا بس
يمكن واحد بس هو اللى كان معايا من المؤتمر اللى فات .. وهو الوحيد الفقري اللى مكمل معايا فى المؤتمر الخامس

ده باختصار .. لان مكانش فيه حاجة مميزة الحقيقة فى المؤتمر الخامس

ان شاء الله المرة الجاية بقه هتكلم على حاجات جامدة جدا
وطبعا زى ما انتوا متعودين لاول مرة تعرض .. فالمخبرين يمتنعون

وربنا يحفظنا جميعا

Sunday, December 9, 2007

انتخابات امين جامعات مصر

السلام عليكم ورحمة الله

1- ما من ايام العمل الصالح فيهن احب الى الله من هذه العشر .. قالوا ولا الجهاد فى سبيل الله ؟ قال ولا الجهاد فى سبيل الله .. الا رجل خرج بنفسه وماله فلم يرجع من ذلك بشئ

يعنى هو ده الوحيد اللى احسن منك اذا انت استغليت العشر الاوائل دول
يعنى هى احسن من العشر الاواخر وليلة القدر التى هى خير من الف شهر ؟
اه احسن منها
يمكن السبب فى رأيي ان فى كل حاجة فى دينا تقريبا .. بنبقى عارفين احنا بنعملها ليه .. زى الصلاة والصوم والزكاه .. احنا عارفين السبب والحكمة .. الا الحج
وخاصه المناسك بتاعت الحج .. يعنى ليه سبع اشواط سواء السعى او الطواف .. وليه لازم تقف فى عرفة .. وايه الحكمة من الترتيب ده .. وايه الحكمة انه اربعة ايام محددة .. مش ربنا كان ممكن يخلي كل واحد يحج فى نفس الوقت وهو فى مكانه زى الصوم مثلا او الصلاة .. او يخليها زى الزكاة كل واحد لما يجي الوقت بتاعه ؟؟
لكن كل دى اسئلة ملهاش اجوبة .. وان كانت فهى اجتهادات بشرية.. لكن عظم هذه الايام يرجع فى رأيي .. الى انك متسألش
يعنى ايه ؟؟
يعنى انت تروح تحج وتعمل المناسك دى وانت ساكت .. متسألش ايه وليه وعلشان ايه .. وليه اجيب سبع حصوات من منى علشان ارمي بيهم حجر تانى
قمة الاستسلام لله تعالى ولاوامره دون مناقشة .. ودى قمة الخضوع والعبادة لله تعالى

زى سيدنا ابراهيم .. ربنا امره انه يترك اهله .. حاضر .. اذن فى الناس بالحج .. قال يعنى يارب محدش هيسمع صوتى الضعيف ( مسألش ليه يا رب واشمعنى فى الصحراء دى ؟؟ ) فربنا قاله عليك النداء وعلينا البلاغ
استسلام كامل لله تعالى

والعكس بقه فى ابليس
ربنا امر الملائكة بالسجود .. فسجد الملائكة كلهم اجمعون الا ابليس .. بدأ يعارض ويسأل .. ااسجد لمن خلقت طينا؟ .. انا خير منه .. ابى واستكبر
ولو كان سجد من غير ما يتكلم مكانش حد فى الارض هيعصي ربنا

الدكتور ياسر نصر كان بيتكلم فى القصة دى وقصة سيدنا ادم .. بيقول يعنى ايهما الاولى بالعذاب والتوعد بالجحيم ؟؟
سيدنا ادم ولا ابليس ؟؟
ابليس كان مع الملائكة عابد لله .. لحد لما ربنا خلق سيدنا ادم وقاله اسجد فرفض فخرج من رحمة الله
اما سيدنا ادم .. ربنا خلقه وخلى الملائكة تسجدله وبعدها دخل الجنة على طول .. وعصى ربنا فى الجنة
فايهما الاولى بالعذاب .. واحد كان طائع وعنده رصيد حسنات وعمل معصية ومخالفة لاوامر الله .. ولا سيدنا ادم اللى معندهوش ولا حسنة واحدة تشفعله .. ولما غلط ربنا تاب عليه ؟؟

فقال ان اللى حصل بعد المعصية هو السبب .. ان ابليس رفض الاعتراف بالمعصية .. وفضل يجادل ويتكلم ويناقش
اما سيدنا ادم .. على طول اسلم واعترف بغلطته
فهى دى نفس القضية .. ممكن يكون واحد رايح يحج وراح فعلا .. بس رايح وعمال يجادل ويناقش .. طيب وليه .. وايه الحكمة وعلشان ايه وليه
فيحبط الحج بتاعه .. فلا رفث ولا فسوق ولا جدال فى الحج

فربنا يرزقنا حسن العمل ويعينا على الطاعة فيها .. ويتقبل مننا صالح الاعمال ويتجاوز عن سيئها
وكل واحد بقه يبدع مع نفسه فى الاعمال اللى ممكن يعملها ... صيام وقيام .. قران ودعاء ... صدقة وزكاه .. اى حاجة من الاعمال الصالحة .. وكل ماتكتر كل ما تكسب اكتر

دعواتكوا بقه وكل واحد يدعي بذمة بقه .. واحد بعتلى ماسج عنده امتحانات بيقولى ادعيلي باخلاص بقه :D


2- فى سؤال سألته الاخت فلسطينية الهوى مصرية الاصل .. عن اذا كنا احنا عارفين مسبقا مين اللى هيفوز ليه بنعمل الحوار ده وفين الديموقراطية والكلام الكبير ده ..
هو اولا مين القائم على هذه الفكرة ؟ بالجهد والمال والتضحية والوقوف قدام امن الدولة ؟؟
طلاب الاخوان المسلمين .. طيب .. مين اللى شارك فى الانتخابات دى ورشح نفسه ؟؟ الاغلبية من طلاب الاخوان المسلمين .. طيب
يبقى ايه المشكلة ؟
انا مثلا اترشحت فى الدفعة عندى ونجحت .. وبعد ما بقينا اغلبية فى هيكل اتحاد الكلية ... احنا كنا متفقين على مين هو اللى هيبقى الامين .. لاننا كتلة انتخابية .. وطبيعي وعادى جدا ان الكتلة تتفق تنتخب مين
بس كده :)


الاتحاد الحر .. الفصل الاخير

بعد ما رحنا هناك نقابة المحامين .. الاول عملنا اجتماع لكل الامناء والامناء المساعدين كنوع من التعارف .. وفضلنا نضحك ونهزر مع بعض كتير

وبعدها دخلنا القاعة علشان الانتخابات

بدأت الانتخابات .. وبدأ الترشيح .. فى ترشيح الامين المساعد نزلت انا وبتاع جامعة المنصورة وواحد كمان

وفى الامين نزل عمرو حامد وبتاع جامعة حلوان قدام بعض

نجح عمرو حامد .. ونجح الاخ بتاع المنصورة فى الانتخابات وانا اخدت صوت واحد بس وهو صوتى لنفسى :D

عادى بتحصل يا جماعة بتحصل

وكان فى تنسيق ساعتها .. وبعدها طلعنا خدناهم احنا طلاب جامعة القاهرة وعزمناهم فى اتخن حتة فيكي يا مصر :D

وبعدها الناس روحت واللى كان مسافر وكده

ليلتها .. المعدة بتاعت برنامج العاشرة مساءا اتصلت بصلاح وقالتله انهم عايزين حد يطلع يتكلم عن الاتحاد الحر .. فاتصل بعمرو حامد وهومروح وخلاه يلف ويرجع تانى علشان يروح التصوير . فعمرو حامد كان مقتول خالص

وراح صلاح معاه هناك فى التصوير .. وكانت الحلقة اللى طلع فيها مع امين مساعد اتحاد القاهرة المزور .. وكانت حلقة جامدة جدا عمرو حامد ادى فيها بشكل كويس وجميل جدا جدا

طبعا بعدها الاتحاد الحر لم يستطع عمل اى اعمال اطلاقا .. كان فى فعلا حرب غير طبيعية على اى حاجة باسم الاتحاد الحر .. وحتى بعيدا عن الامن .. يعنى انا رحت مرة لاحدى مراكز التدريب والتنمية المعروفة .. كنت رايحلهم بعرض يعنى .. نديكوا كذا كذا كذا فى المقابل تدونا كورسات كذا كذا كذا

لما عرفوا انها باسم الاتحاد الحر رفضوا تماما .. ورفضهم كان مبرر .. لانهم لو وافقوا فالامن مش هيسيبهم وهيخرب بيتهم علشان يلغوا الاتفاق ده

وحتى كورس التنمية البشرية اللى كنا اتفقنا عليه مع دكتور على عبالرحمن مقدرناش نعمله اصلا

طيب ليه كده ؟؟

لان معنى ان يبقى فى اعمال تتعمل فى الجامعة باسم الاتحاد الحر .. ده معناه ان الاتحاد الحر فعلا موجودة كبديل للاتحاد المزور وانه بيعمل انشطة .. بل مشاركة الطلبة فيه هتبقى اسوأ خبر بالنسبة للامن .. لان ده هيبقى فعلا دليل على ان الطلبة ترفض الاتحاد المزور وبتشارك فى الاتحاد الحر وده لن يرضاه الامن ابدا

لكن فى حبة اعمال اتعملت لكنها صغيرة وبالجهود الذاتية للافراد .. انا للاسف مكنتش متابع قوى فى الاتحاد الحر ده .. لانى كنت مشغول فى قسم ادارة وحاجات تانية لانها كانت اخر سنة .. فمكنتش مركز قوى فى الاتحاد الحر

وبكده تكون قصة الانتخابات خلصت على خير

تبقت حبة مواقف كانت حصلت لكن انا مش قادر احدد بالضبط تاريخها او السياق بتاعها
كان مرة طلع قطب وعبدالعزيز مجاهد ( امين اتحاد حر حلوان السابق ) على برنامج تسعين دقيقة مع معتز الدمرداش ومى الشربيني واتكلموا على الانتخابات والاتحاد الحر والحرية فى الجامعة لممارسة الاعمال السياسية والاعمال العامة
وكان المفروض ان حد من الاتحاد المزور هيروح الحلقة لكن حسب كلام مى ومعتز .. اختفى فى ظروف غامضة ومجاش التصوير

ومرة تانية كان الاخوات عملوا مظاهرة فى الجامعة .. مش فاكر كانت عن ايه .. لكن المهم انهم فى تسعين دقيقة كانوا عايزين مننا الشرايط بتاعتها علشان يذيعوها .. صلاح اتصل بيا وانا كنت فى الجامعة وادانى رقم اخت كلمتها ورحت اخدت منها الكاميرا والشريط وقابلت صلاح وطلعنا على مدينة الانتاج الاعلامى
لما رحنا هناك ودخلنا قابلنا فى المدخل معتز ومى كانوا واقفين بيتكلموا فى الموبايل والظاهر كان فى مشكلة ما
فرحنا سلمنا عليهم واتكلمنا معاهم فى حاجة كده وشكرناهم على اللى عملوه لينا فى الجامعة وكده .. ومشينا طلعنا الاستوديو بتاع تسعين دقيقة نفسه علشان نديهم الشريط ونحاول
المشكلة ان الكاميرا اللى صوروا بيها من نوع معين وبتسجل بطريقة معينة مش موجودة فى اى كاميرا تانية .. والاجهزة بتاعتهم مش عارفه تلقط اى حاجة من على الشريط .. فجربوا الكاميرا نفسها .. مفيش فايدة

المعد اللى كلمنا ورحناله بالشرايط كان بيعيط .. علشان الحلقة خلاص بتبدأ وهو لسه مش عارف يجيب الصور علشان يعمل التقرير
خصوصا ان فى اخوات طلعوا فى التصوير وقالوا كلام جامد جدا مكانش ينفع ميتذاعش .. لكن معرفوش ياخدوا الحاجة من الكاميرا خالص
طبعا طول الفترة دى احنا بنحاول معاهم .. وبنحاول بكل الطرق الممكنة اننا نطلع الفيلم من على الشريط بس مش عارفين .. حاولت انا اطلعه بالطريقة اللى بعمل بيها فى البيت ونزلت البرنامج من على النت عندهم فى الاستديو ومفيش فايدة .. جابوا ناس من بره وجابوا كابلات جديدة من قناة الناس على امل انهم يعرفوا ياخدوا الفيديو ومعرفوش .. اتصلنا بطوب الارض اللى بيعرف القصة دى ومفيش فايدة .. فى الاخر مشينا هنعمل ايه يعنى

وروحنا مع واحد من القناة كان نازل فخدنا فى طريقة
ودى كانت اول مرة ادخل فيها الانتاج الاعلامى .. وادخل استوديو التصوير بتعهم

كنا برضه لما بنصور حاجة كنت احيانا بروح انا وصلاح نوديها للجزيرة والعربية وكده .. فالاستوديو بتاع الجزيرة لا يقارن تماما بالاستديو بتاع تسعين دقيقة .. يعنى استديو الجزيرة ده اسوأ السيئين سوءاً قدام الاستوديو بتاع تسعين دقيقة
يعنى لما حد بيجي فى اى نشرة من القاهرة بيجي ووراه كوبري اكتوبر .. المكان ده اصلا عبارة عن غرفة فيها مكتبين يعنى فيها اتنين بيقعدوا يخلصوا شغلهم هناك .. وبالمرة التصوير فى نفس المكان
يعنى اقصد ان استديو الجزيرة سئ جدا مقارنة بتسعين دقيقة .. ومع ذلك فالفرق كبير جدا بين دول ودول

من المواقف برضه اللى حصلت .. مرة عمرو حامد كلمنى قالى ان فى جريدة عاملة زى حلقة نقاشية كده عن الانتخابات والاتحاد الحر .. ساعتها كنت مشغول علشان الامتحانات فعمرو حامد راح لوحده .. ونزلت فى الجرنان بعدها
ومرة رحت انا وهو لجريدة تانية مش فاكرها فى حاجة زى نقاش مفتوح وخدوا صور وبتاع .. بس متابعناش بعدها ايه اللى حصل

من الحاجات برضه اللى حصلت .. الجزيرة اتصلت بعمرو حامد علشان يطلع فى برنامج هذا الصباح .. المفروض قالوله ان الموضوع عن الانتخابات .. فلما راح طلع الموضوع عن المشاركة السياسية للطلاب فى الجامعة ودورهم والصحافة الشبابية وكلام كده مختلف تماما .. بس عمرو حامد قال كلام شديد جدا حتى ان بابا عجبه كلام


يلا كفاية كده .. ده اللى انا فاكره
فى حاجات تانية فى فترة الجامعة دى ان شاء الله هحاول اكتب عنها

الله المستعان واكتبها باذن الله

Sunday, December 2, 2007

انتخاب مجلس الجامعة

السلام عليكم ورحمة الله وبركاته

ياااااااه الواحد بقاله فترة طويلة قوى منقطع عن العالم الخارجي

1- معذرة على التأخير .. بس بجد الفترة اللى فاتت دى كانت فترة الى حد ما صعبة
ما بين انشغالات فى البيت ومشاوير عمرها ما بتخلص .. وما بين اختيارات وبدائل كتيرة مش عارف تختار انهى فيهم
خاصة انك بتاخد قرار مصيري .. ولازم تاخد قرار .. فالموضوع كان محتاج تفكير كبير جدا وصبر ايوب
فادعولى ان ربنا يقدرلى الخير حيثما كان .. وانه يعيني على اختيار الطريق الصحيح ان شاء الله تعالى
ربنا يكرم هبقى اكتب عنه بس لما الامور تهدى شوية
وتسمعوا خبر جامد جدا قريب ان شاء الله

2- انا كنت كتبت موضوع كده سميته مراجعات .. بس الحمد لله انى منزلتهوش ومسحته .. يعنى كان فيه كلام ممكن يزعل البعض . لكن انا لما قعدت افكر فى الهدف من المدونة والهدف من اللى انا بكتبه ده .. ففضلت انى منزلهوش وامسحه
لكن الموضوع ما زال موجودا وهياخد نصيبه من الكتابة ان شاء الله

3- نكمل بقه فى الاتحاد الحر

بعد يوم التصوير ده .. وخاصة النهاية الدرامية لليوم بالكلام اللى قالته مي فى البرنامج بعد التقرير .. تانى يوم انا كنت نازل الجامعة طبيعي يعنى مفيش حاجة مش طبيعية .. فخير اللهم اجعله خير لقيتلك ايه بقه
لقيت كميات امن مركزي محاصرة الجامعة بشكل غير متوقع اطلاقا .. بجد كان تقريبا اول مرة فى تاريخ الجامعة يحصل حصار بالشكل ده
على سبيل المثال الى حصل
عربيات امن مركزي على كل الابواب .. وحتى الابواب الصغيرة كان عليها عربيات والعساكر على الارض واقفين بعدتهم وواقفين صفوف ..
باب تجارة كان واقف عليه لواااااااااااااااااااء .. عارفين يعنى ايه لواء واقف على باب تجارة ؟ يبقى الباب الرئيسي عليه المشير طنطاوي ولا ايه ؟
لو شفتوا الفيديو بتاع الامن المركزي اللى اتصور ( وهجيبه فى الاخر ان شاء الله ) هتتخضوا من طريقة تطويق الجامعة من خلال الامن المركزي
احد ضباط الامن المركزي من اللواءات واللى كان على رأس القوة دى كلها .. كان نازل بكامل عدته والنياشين على صدره .. معنى انه ينزل بالنياشين دى يعنى انه فى حالة حرب مش حالة سلم .. فده يعكس الاستعداد الرهيب للامن المركزي تاني يوم
وكان الامن المركزي واقف من الصباح الباكر .. يعنى قبل ما الناس تصحى اصلا
( بالمناسبة يوم الاربع العظيم ده .. الامن المركزي مروحش .. وفضل محاصر الجامعة لحد تانى يوم بتاع التصوير ده لحد العصر او قرب المغرب .. وبدا بعدها يلم عزاله ويمشى )
المهم فى اليوم ده كان واقف من الصبح بدري جدا .. وبالكثافة والاعداد الكبير ده .. لدرجة انى اتخضيت اصلا من منظرهم وطريقة وقفتهم .. كانت فعلا مريبة جدا
المهم دخلت الجامعة ايه يا جدعان ايه البهدلة الى بره دى .. من خلال الكلام فهمت ان ده بسبب
الكلمة اللى قالتها مي فى البرنامج 90 دقيقة
واللى كانت لميس قالتلها لمي
واللى كان صلاح قالها للميس فى التيلفون .. بس قالتها مي على لسان محمود قطب
يانهار .. كلمة اتقالت .. وقفت الامن على رجل واحدة

الامن المركزي يومها كان خايف جدا .. كانت مرعوب بشكل غير طبيعي
وفضلوا واقفين بالشكل الغريب ده فترة طويلة
واحنا كملنا عادى جدا فى البرنامج بتاع اليوم واللى كان كالاتى
اتفرج هنا اهو واتفرج على الرعب
احنا حسب اتفاقنا ان المفترض هيطلع وفد للدكتور على عبدالرحمن علشان يقابله ويعرض عليه المشكلة
طلع الوفد علشان يقابله .. قالولهم ان الدكتور على مش موجود

الوفد اللى طلع طبعا فيه قيادات من طلاب الاخوان .. فكان الاتفاق انهم لو معرفوش يقابلوا الدكتور على .. واحد منهم فقط هيدي رنه على الموبايل لواحد اخر .. الرنة دى اشارة مفادها اننا معرفناش نقابله
طيب وبعدين يعنى ايه اللى يحصل ؟؟
اللى يحصل بعدها ان كل طلاب الاخوان اللى فى كل الكليات .. يتجمعوا فى اعتصام مفتوح تحت مبنى القبة لحد لما نقابل الدكتور على عبدالرحمن

وده اللى حصل
وصلت الرنة للشخص المسئول .. وخلال خمس دقايق من وصول الرنة تجمع كل طلاب الاخوان فى اعتصام مفتوح تحت مبنى القبة

فى ساعتها .. مكتب الدكتور على عبدالرحمن اتصل بواحد من الوفد اللى كان طالع يقابله وقاله ان الدكتور على مستنيكوا فى المكتب دلوقتى

طبعا احنا استمرينا فى الاعتصام

قبل ما اكمل .. هو كان متوقع اصلا ان ده يحصل .. وكان معروف ان ده هيحصل ليه ومتوقع الخطوة اللى جاية كمان
لان معروف عند الامن اننا هنشتغل فى الازرق اللى هو الاتحاد الحر .. وده بالنسبة للامن خط اسود لا يمكن يتعمل ان شاء الله لو على جثث واشلاء الضحايا .. بس مش هيتعمل .. ودى كانت رسالة مفهومة من الامن فى اكتر من موقف
فعلشان كده .. الامن مكانش عايزنا نعمل الاتحاد الحر فى مقابل انه يدينا اى حاجة
بس مش هيديهالنا فى ساعتها .. انما بعدها بفترة
وهو ده اللى حصل فعلا

الدكتور على طلب من الوفد قائمة باسماء المشطوبين ووعدهم انه هيرجع للكليات ويشوف .. ولو ثبت ان فى طالب واحد فقط مشطوب ظلما .. فهيلغى كل الانتخابات دى ويعيدها تانى
كلام جميل .. وطبعا كلنا هنقول انه مكسب كبير جدا
ده غير انه طلب اننا نجهز ورق اى اسرة احنا عايزنها وهيعملهالنا ويسجلها حتى لو باب التقديم للاسر قفل .. اضافة الى ان واحد من طلاب الاخوان اللى كانوا فى الاجتماع طلب اننا نعمل كورس فى التنمية البشرية واحنا اللى نعمله .. وافق على طول وكتب ورقة لعميد كلية تجارة انه يهتم بالموضوع حالا وفورا واحنا اللى نعمله بالتنسيق مع العميد على طول ومضاها باسمه هو الدكتور على عبدالرحمن

طبعا كنا بنقول ايه الهنا اللى احنا فيه ده .. ده اى حاجة طلبناها وافقوا على طول

بس مش علينا الحركات دى .. لانه كان واضح جدا انه ميقدرش يعمل كده
وهو كان قاصد يقول كده علشان يمتص الغضب .. والاهم يكسب وقت ويضيع علينا الوقت
بمعنى انه يفضل يأخر ويأخر لحد لما الانتخابات تعدى على خير ويتعين الطلاب .. وفى نفس الوقت الاعلام يهدى شوية من قصة الانتخابات .. ويكون التيرم اصلا قرب يخلص فمنلحقش نعمل الاتحاد الحر .. الكلام ده كان واضح ومفهوم جدا لينا

احنا كل يوم بيعدي فى الجامعة لو مش لينا بيبقى علينا .. لان الطبيعي ان خطة التيرم اصلا مزحومة جدا والاعمال فى التيرم كتيرة جدا فلازم تستغل الوقت
طبعا كان فى فرصة للسير فى المفاوضات لكن كان له سقف زمنى معين
دى حتة كده بره الجون عن كيفية اننا بنتعامل مع الامن فى الجامعة .. بيبقى فى رسائل متبادلة بين الطرفين .. وحسب فهم كل طرف للرسالة وقدرته على حشد الناس نحو رسالته بيبقى هو الكسبان .. هبقى اعملها موضوع بس ربنا يسهل

نرجع تانى .. زى ما قلتلكوا انه كان متوقع ان رئيس الجامعة يرفض المقابلة واننا هنعمل الاعتصام .. فكلمنا الاعلام وفى بعضهم جه وحضر والصحفيين طبيعي بيجوا عادى

فى اليوم ده قناة معرفش ايه كانت عايزة حد يصور معاها .. فصلاح جاب عمرو حامد علشان يصور معاهم .. وعمرو قال كلام جامد جدا وكان مفوه جدا فى الكلام .. ما شاء الله عليه
فبعدها تقرر انه هو اللى يخوض انتخابات الاتحاد الحر كأمين جامعة القاهرة .. وبعدها كأمين جامعات مصر .. وانا هبقى المساعد ليه

لانه احنا مش هنعمل اعمال جوه الجامعة مع الطلاب .. انما كل اللى هنعمله هيبقى فقط ضربه اعلامية جديدة .. فلازم يكون الشخص اللى هيبقى الاتحاد الحر متمثل فيه .. لازم يكون مفوه وصوره جميلة ومشرفة ليك .. وده كان متوفر فى عمرو حامد اكتر منى وهو فعلا كان احسن منى بكتير جدا فى الحديث مع الاعلام .. فتم اختياره ليكون الامين

وبدأ الاتحاد الحر

بعد السقف الزمنى للمفاوضات واللى كان متوقع انها فقط لتضييع الوقت علينا وتفويت الفرصة .. خلال الفترة دى كان بدأ التجهيز للاتحاد الحر .. الصناديق الشفافة .. اللجنة العليا للاشراف على الانتخابات من الطلبة بمساعدة اعضاء هيئة التدريس ولجنة 20 مارس
اوراق الانتخابات .. مراجعة سير العملية الانتخابية والجدول الزمنى لها

فى انتخابات الاتحاد الحر كان لازم ان عمرو حامد يفوز فى كليته بالاتحاد وكذلك انا اكسب فى الكلية عندى .. لان الدعاية اللى نزلت للانتخابات فيها صورتي انا وعمرو حامد
اللى حصل عندى انى لحد يوم الانتخاب مكنتش اصلا دخلت المدرجات عندى فى الكلية علشان اعمل دعاية
وحتى لما دخلت على مستوى سنة رابعة كنا ثلاث مرشحين فى احدى اللجان
انا كسبتها بالعافية وكنت التانى .. يعنى فى واحد كسب الاول .. وبعده انا التانى وكان الفرق حوالى اربع اصوات تقريبا

لدرجة ان واحد من القيادات الطلابية قالى هولع فيك لو مكسبتش .. مش بعد كل فلوس الدعاية الانتخابية متفزش كمان !!
بس الحمد لله فزت فيها

طبعا الاعلام كان موجود فى كل خطوة وبيصور .. او احنا نصور ونبعتله الشرايط عادى خالص .. واستمر الموضوع تمام قوى وعادى جدا

وعدت الايام لحد لما وصلنا ليوم انتخاب مجلس الجامعة فى الاتحاد الحر . ومنه هيطلع الامين والامين المساعد للجامعة
كان فى مؤتمر عند القبة برضه وفاز عمرو حامد امين للااتحاد وانا امين مساعد وواحد من الاشتراكيين وواحد من كفاية واخت من الاخوان

عملنا المؤتمر .. وحصل موقف جامد يومها
علشان الوقت ...فاللى كان بينسق المؤتمر قالى فى الغالب مش هتقول كلمة .. قلتله كويس
لان الاخت هتقول كلمة عن البنات .. وبتاع كفاية هيقول كلمة .. ويبقى عمرو حامد يختم بكلمته
فانا مكنتش مجهز حاجة اقولها وخلاص عادى يعنى

فوجئت يومها لقيت حامد ( منسق المؤتمر ) بيقولى انت هتقول كلمة فى السريع عشر دقايق
قلتله نعم ؟
قالى اه هتقول كلمة بعد الولد بتاع كفاية ( مش فاكر اسمه للاسف )

قلتله لا انا مش جاهز ومش هقول حاجة

ولقيته فجأة قال ودلوقتى مع كلمة امين مساعد اتحاد حر جامعة القاهرة عمر عزمى !!
يابن الايه يا حامد .. انا مش جاهز
وراح مديني المايك .. طبعا قلت كلام اى حاجة وخلاص واللى ربنا فتح بيه عليا قلته و كنت موجه الكلام بتاعى للطلبة .. فكنت بقوله بالعامية مش بالفصحى
بعدها عمرو حامد قال كلمة .. كانت للاعلام اكتر منها للطلبة فكان بيتكلم بالفصحى

وانتهى المؤتمر على خير

انتخاب امين جامعات مصر


المفترض ان كل الجامعات المشاركة فى الاتحاد الحر كانت اتمت انتخاب مجلس الجامعة بتاعها .. فى سقف زمنى معين
وفى يوم معين تم تحديده مسبقا .. كان هيتم انتخاب امين جامعات مصر .. ايه قصته ده بقه
هو زمان .. كان فى كل جامعة اتحاد طلاب .. وفى اتحاد طلاب جامعاااات مصر كلها .. كلهم كلهم
وبيبقى فى امين ليهم وبيحضر فى مجلس الشعب ويقول رأي الطلاب .. وممكن يطلب مقابلة رئيس الوزراء او رئيس الجمهورية ويعرض عليه مشكلة معينة او اى حاجة يعنى

فاحنا كنا عايزين نرجعها ودى انت احد مطالبنا .. فعلشان كده قلنا السنة دى هنعملها وتبقى ضربة الاتحاد الحر الجديدة

المهم كان محدد يوم كل امناء جامعات مصر والامناء المساعدين هيجوا فى القاهرة علشان الانتخابات
كان المفترض انه هيبقى فى جامعة القاهرة .. عند القبة .. والمفترض ان جامعات القاهرة الكبرى تبعت كل افرادها من طلاب الاخوان .. لكن اللى حصل ان رئيس الجامعة او الامن مش فاكر .. بعت رسالة قال فيها انه هيعمل اى حاجة علشان يبوظ الموضوع ورئيس الجامعة قال انه ليس له علاقة ولن يحمى اى طالب من خارج جامعة القاهرة .. يعنى تفهم على طول ان الامن هيدخل الجامعة يبهدل العملية وهيعتقل الناس دى

فى ساعتها .. تم الغاء الموضوع تماما من جامعة القاهرة .. وفى سرية تامة تم نقله الى نقابة المحامين

المفروض ان الانتخابات تبدأ 12 الظهر .. الناس عرفت انه فى نقابة المحامين الساعة 11.30 علشان الامن ميلحقش يعرف ولا يبعت قوات امن مركزي هناك

قبلها واحد من المنسقين للموضوع قالى تعالى بلبس عادى مش لازم بدلة
تانى يوم واحنا بنستقبل الناس دى وبنوديها للنقابة .. كلهم كانوا جايين ببدل .. فقلتله الله يسامحك كده القاهرة منظرها وحش
قالى الاتفاق انهم يجوا من غير بدل .. والكلام اتغير الصبح وقالك كله يجي ببدل بس ملحقوش يقولونا احنا

رحنا هناك وبدأنا مؤتمر انتخاب امين جامعات مصر والامين المساعد .. والمرة الجاية بقه علشان انا تعبت

والسلام عليكم ورحمة الله

Wednesday, November 21, 2007

لن انال شرف خدمة هذا الوطن

السلام عليكم ورحمة الله وبركاته


الحمد لله ... الحمد لله .. الحمد لله

لن انال شرف خدمة هذا الوطن

وفقد الجيش اليوم ... احد اعظم كوادره و احد اقوى اعمدته

يا خسارة قوات الصاعقة ... خسرت واحد من اشد الرجال

يلا هو العمر بعزقة ..

ربنا ما يوريكوا الجيش ابدا فى حياتكوا بجد

لانه مأساه بمعنى الكلمة

واحد صاحبى وقف على اليوم بتاعه !! يعنى خطوة كمان كان راح فيها وش

الحمد لله اخدنا التأجيل وهتجوز اخيرا

باي باي يا عزوبية يا وحشة

المهم لما دخلت البيت ..اختى كانت بتغنى اغنية

الاغنية هيا :

انا مش مصدق .. حلم الليالى الغالى خلاص اتحقق
انا مش مصدق
واتأجلت ( بدل نجحت ) خلاص معقولة خلاص
ارتحت خلاص يا ناس يا هوووووو
كان جبل انزاح عن قلبى وراح
اه يا محلى يا محلى طعم التأجيل


فالحمد لله على كل حال

ندخل بقه فى اللى عايز اقوله النهاردة

1- انا طبعا فرحان جدا جدا بالناس اللى بعتتلى رايها فى المدونة على الميل .. فعلا انا كنت فرحان جدا حتى الناس اللى نقدت حاجات معينة كده .. فبجد رأيكوا فرحنى جدا
وطبعا كان يمكن اجمل تعليق كان من خلال تيلفون من عمرو حامد حبيبي ورفيق الكفاح المسلح فى الاتحاد الحر وهو كان دخل وقرأ فعجبه جدا وقالى على حبة افكار جميلة جدا ربنا
طبعا عمرو حامد هو بطل القصص القادمة عن الاتحاد الحر لحد لما يخلص ان شاء الله

لكن طبعا .. العدد اللى بعتلى على الميل قليل جدا مقارنة باللى بيدخلوا المدونة ومقارنة باللى بينزلوا الفيديوهات
لكن دى خليها فى المرة الجاية ونخلى الارقام تتكلم ان شاء الله



2- الحقيقة فى خبر احزنى جدا جدا

وهو وفاة اللواء اركان حرب صلاح الدين سليم رحمه الله



كثير مننا ميعرفهوش .. لكن الحقيقة الراجل ده من اقوى الرجال اللى شفتهم وقابلتهم
ده غير انه عقلية جبارة واستراتيجية من الدرجة الاولى فعلا

للاسف الشديد .. لم يوف حقه ولم يعرف الناس قدره وحتى فى جنازته

كانت من سكات ولم يعرف احدا
هو مات بعد اصابته بازمة قلبية بعد محاضرة قالها فى اكاديمية الشرطة

وكانت يوم 21 اكتوبر .. يعنى من شهر تماما .. وانا عرفت فقط من يومين
ولما سألت بابا عن خبر الوفاه تفاجأت انه اصلا ميعرفش انه مات مع ان بابا بيتابع الاخبار بشكل مستمر
وعرفت انه لم يعط قدره بعد مماته للاسف .. ومنع الاعلام من تصوير الجنازة .. او على القل الاعلام الرسمى

طبعا انا ليا معاه ذكريات لا تنسى .. واحداث جميلة لازم اتكلم عنها لكن بعد ما اخلص الاتحاد الحر ان شاء الله

رحمك الله يا سعادة اللواء .. لم يعرف قدرك البشر

يلا استنوا الموضوع الجاى بقه ان شاء الله

Thursday, November 15, 2007

يوم التصوير فى الجامعة

السلام عليكم ورحمة الله وبركاته

عدنا من تانى .. بعد فترة انقطاع طويلة حبتين تلاتة اربعة كده

1- ادعولى كتير يا جدعان بجد .. بجد اللى بيحبنى يدعيلي كتير .. بالذات يوم الاربع اللى جاى .. كله من اوله لاخره
لان ده يوم الحشر الاصغر .. يوم الوقفة فى حوش المنطقة التجنيدية .. حيت يجتمع كل شباب التجنيد فى صعيد واحد .. تحملهم الارض وتظلهم الشمس فى السماء .. اختلفوا فى اللبس لكنهم كلهم يسألون الله سؤالا واحدا .. وكلهم جاءوا شعثا غبرا من اماكن بعيده . جاءوا يلبون النداء .. يوم الارجاء العظيم .. الستر يا رب
وعايز دعاء كده جامد .. لان الواحد حالته النفسيه صعبة شوية من كام حاجة .. وربنا يستر وتخلص على خير باذن الله


2- انا عايز بس ياريت طلب مهم جدا بالنسبة ليا .. بجد ده حاجة كبيرة قوى بالنسبة لي
انا عايز كل واحد يبعتلى ميل ( ممنوع فى التعليقات ) يبعتلى عن رأيه فى المدونة , مدى استفادته منها , مدى تأثيرها وانتشارها فى رأيه , عيوب يراها فى المدونة , ايجابيات فى المدونة , اقتراحات يراها لتحسين المدونة

بجد الموضوع ده هيفرق معايا انا شخصيا فياريت محدش يكسل .. خاصة الناس اللى بتدخل تقرا وتهرب دى
الميل موجود وهكتبه تانى
general_garhy@hotmail.com

3- صلاح كان عايز يجي يكتب فى المدونة .. بس طبعا حاجة فرايحي كده كل فترة .. فانا بقولكوا انتظروا اول مواضيع صلاح بيه .. من انزه عشر شخصيات فى مصر والعالم العربى .. ولا عزاء للحاقدين :P
وانت عارف نفسك كويس يا .... ههههههههههههههههههههههههههه

4- هرجع اكمل فى الانتخابات .. ان شاء الله هخلصها فى الموضوع ده لان الباقى حاجات صغيرة وربنا يسهل ان شاء الله


تانى يوم بعد الاربعاء


بعد اليوم الطويل بتاع يوم الاربع العظيم .. واللى حصل فيه والبلاوى اللى حصلت .. طبعا انا مروحتش البيت ورحت نمت عند صلاح
لان احنا اصلا خلصنا متأخر

المهم تانى يوم لما صحينا .. نزلت الجامعة انا وصلاح
هو كان وراه حاجات يعملها .. وانا كان ورايا مليون حاجة وحاجة

الاول طبعا التيلفون مكانش ساكت .. كل شوية ناس تتصل عايزة تعرف ايه اللى حصل والضرب والقلق اللى جه على العاشرة مساءا وبتاع
فلقيت تيلفون جالى من واحدة اسمها فردوس عبدالحميد تقريبا .. وقالتلى انها من المنظمة المصرية لحقوق الانسان وعايزة تقابلنى علشان تفهم ايه اللى حصل .. كانت عند القبة ورحت قابلتها .. وخلصت معاها بسرعة لان كان فى واحد بيكلمنى عايزنى اروح اصور تقرير مع اوربت ... والراجل واقف مستنيني ولازم اروحله حالا

فقلتله ماشى ورحتله

فى الطريق وانا رايح من ظهر كلية اقتصاد وعلوم سياسية ( الطريق الجديد ده انا وصلاح مسمينه شارع شهاب .. والشارع اللى قدام الكلية من ناحية سور الجامعة .. ده شارع محيي الدين ابو العز .. وافهموا انتوا بقه :D )
المهم وانا رايح لقيت واحدة واقفة بتصور تقرير مع حد ومعاهم كاميرا وبتاع

فانا وقفت بعيد كده وفهمت انها بتصور عن الانتخابات فى الجامعة
فبعد ما خلصت رحتلها .. قلتلها انا فلان .. مرشح طلاب الاخوان لامين اتحاد جامعة القاهرة

قالتلى ايوة .. بس .. استنى عايزة اسجل معاك

وقفت علشان اصور معاها .. والمصور كان بيزبط الكاميرا .. فجه واحد لقيته جاى ونط زى ما يكون الدب المتوحش .. وقالك لا مفيش تصوير ويلا يا استاذ من هنا مش هنصور خلاص

المهم انا مكنتش عارف مين عم الحاج ده

انا كنت فاكره حد تبع البرنامج .. فقلت اتفلقوا .. هعملكوا ايه انتوا الخسرانين يا وحشين :(
لان كرامتى نشعت عليا .. وقلت فى مليون قناة غيركوا تتمنى تصور معايا .. بدليل المسكين بتاع اوربت اللى كل شوية يتصل بيا انت فين
وواقف فى الشمس مستنيني

المهم فلقيت ان المصور والبنت دى ( اسمها لميس معدة فى برنامج تسعين دقيقة ) بتقوله لا وانت ملكش دعوة انا هصور معاه

انا قلت يا صباح الانحراف .. المعدة بتتخانق مع المخرج !! برنامج فاشل !!

ولقيت واحد من المساعدين اللى معاهم خد الراجل وقاله ماشى يلا يا عم مش هنصور .. وخده فى ايده قدام ناحية القبة

وهيا لميس فهمت ان الراجل ده بيوزع صاحبنا ده وبيشغله شوية لحد لما تخلص تصوير معايا

فبتاع الكاميرا راح شغلها وبدأ التصوير .. وهيا جات عندى وقالتلى انها هتصور معايا .. سألتها مين الوحش قصير النظر اللى مش عايز يصور معايا :(

قالتلى لا واحد من العلاقات العامة بتاعت الجامعة .. ان لازم اى قناة تدخل تصور يبقى معاهم حد من العلاقات العامة
طبعا فى الايام العادية محدش بينزل ... وبيقولوهم القصة معاكوا .. لكن علشان الانتخابات واننا اضربنا .. فكان لازم ينزل غصب عنه

المهم هيا قالتلى بص .. هات رقمك وخد رقمى علشان لو حصل حاجة يبقى نتقابل نصور معاك

وانا واقف باخد الرقم بتاعها .. كان عمنا الدب المتوحش ده خد باله ان الراجل بيتوزع علشان لميس تصور معايا
وكان المصور مشغل الكاميرا بتصور .. فده راح جاى وراح قافل الكامير بايده وقالك انا قلت لأ يعنى لأ
هبقى اوريهالكوا فيديو فى الاخر

المهم هو طبعا راح قافش فى الكاميرا علشان ميتخدعش تانى

طبعا المصور راح متخانق معاه والصوت على
فى الوقت ده مين اللى كان جه؟؟
كان صلاح جاى فى وشى

فمسكته .. قلتله وزع الراجل ده .. وطلع لميس والمصور علشان تصور معايا
قلتله انا ماشى .. قالى رايح فين . قلتله هصور مع اوربت وكلمنى اقابلكوا اصور معاها
قالى طيب

انا سيبتهم ورحت فعلا لبتاع اوربت ده صورت معاه تحت اشعة الشمس اللى حرقت قفايا

ووانا واقف بصور لقيت محمود قطب معدى ... رحت مثبته .. وعرفته على الراجل بتاع اوربت وراح مصور معاه كمان
يلا هو العمر بعزقه :D

المهم اللى حصل بقه مع صلاح بقه

انهم خدوا برضه الراجل ده واعاقوا طريقه

وخلوا فريق التصوير بتاع لميس ولميس نفسها .. تجري فى ناحية تانية .. وخدهم صلاح على الجامع

طبعا عند الجامع يبقى التخين يقرب بقه وهنخلى الجامعة تتفرج عليه

طبعا الراجل بتاع العلاقات العامة حس انه خد على قفاه صح .. فمسك فى الراجل اللى كان حاجزه
وخده معاه على مكتب حرس الجامعة .. طلع السواق :D

المهم لميس جت عند الجامع .. صورت انا معاها الاول وقبل ما اصور قالتلى يبقى لمح عن قصة المنع من التصوير .. وبعدين عمر جمال وبعده قطب وبعده واحد كمان
طبعا الناس اول ما تيجي وتشوف تسعين دقيقة تقف وايه وبتاع وتتفرج .. فكانت هتبقى مشكلة لانه هيتعرف مكانهم
فكل شوية كانوا بيغيروا مكان التصوير بتاعهم .. بس برضه فى محيط الجامع بتاع تجارة

المهم بعد ما انا صورت .. محمود قطب كان جاله تيلفون .. على اساس انه المتحدث الرسمي باسم طلاب الاخوان
فقطب مكانش فاضيله ومعندهوش دماغ يتكلم معاه .. قاله استىن كده خد كلم المرشح بتاعنا
وراح مديني التيلفون .. يابن الايه يا قطب !
الراجل كان عنده قدرة رهيبة على الرغى .. فضل حوالى نص ساعة بيسأل على اللى حصل واحنا عايزين ايه وليه حصل كده .. طيب ايه مطالبكو .. طيب هيحصل ايه .. يا عم خلص بقه !!

المهم خلصت خلاص معاه وصليت الظهر
طلعت من الصلاة .. لقيت بنات من كلية اعلام واقفين ومعاهم كاميرا باستاند ومايكروفون .. تحس انهم الجزيرة مثلا !
وواقفين فى المكان اللى احنا بنقف فيه . فالناس مستغربة ايه يا جدعان

فانا رحت رايحلهم .. ايوة يا بنتى انا فلان مرشح كذا كذا
قالت ايوة بس .. احنا عايزينك علشان نصور معاك
انتوا ايه بقه ؟؟
قالتلى احنا بنات من اعلام .. وبيعملوا مشروع التخرج عن حاجة ليها علاقة بالانتخابات
قلت يا مسهل يا رب .. ماشى لو هتصوروا مفيش مشاكل
طبعا كان فى تخبط شديد بينهم .. اللى كانت هتحاورنى وتسألنى قالتلى بص الاسئلة اللى هقولهالك اهى
فواحدة تقريبا معيدة عندهم راحت شاخطة فيها .. ازاى وازاى وليه ومعرفش ايه
قلتلها مش مشكلة اى حاجة هتسألوها انا مستعد اجاوب متخافوش يعنى :D
المهم جم يشغلوا الكاميرا .. مش عارفين .. يحاولوا مفيش فايدة
رجعوا الكاميرا للكلية تانى وجابوا الكاميرا التانية
وشغلوها .. وفعلا صورت معاهم والدنيا كانت ايزي موزو خالص
كانت خالص خالص خالص يعنى :D

المهم .. بعد ما خلصت ... شكرتهم وبتاع .. وقلتلهم انا عايز ابقى اخد منكوا نسخة من مشروع التخرج .. يعنى نشوف انتوا بتعملوا ايه
وفعلا اخدت رقم واحدة او اتنين منهم .. بس معرفتش اشوفهم بعدها وانا اساسا نسيت الموضوع
بس هيا كانت كلمتنى بعدها كانت عايزة نسخة من الضرب بليل .. فجيبتهولها علشان تحطه فى المونتاج

المهم خلصت مع دول .. كانت فى مشكلة بقه مع لميس

انها مش عارفة تخرج من الجامعة
لانها لو راحت علشان تخرج هياخدوا منها الشريط
ولازم تروح علشان هما مثبتين السواق والعربية ولازم تروح علشان تاخدهم

قلنالها شوفى بقه الكلام الصح
المصور والكاميرا احنا هنخرجهم .. بطريقتنا بقه

انتى روحى على الجامعة خدى السواق وخدى العربية .. وقابلينا فى الحتة الفلانية .. استلمى المصور والكامير والشريط :D

طبعا الشريط كان مع واحد وطلع بدري بدري .. والمصور خد الكاميرا شالها فى حاجة كده علشان نخبيها وخرج فى حراسة من طلاب الاخوان
مجموعة كانت ماشية حواليه .. ومجموعة تانية ماشية وراهم بمسافة طويلة نسبيا علشان لو حصل حاجة يتدخلوا ويرجعوا الراجل والكاميرا

طبعا كان الشريط مع واحد تانى وكان خرج الحمد لله بسهولة

فعلا طلعناهم ولميس راحت الجامعة خلصت القصة وجابت السواق وخدت العربية بتاعتهم وخرجوا بيها
وقابلوا المصور بره وخدوه وخدوا الكاميرا والشريط .. وتوكلوا على الله :D
للاسف انا مكنتش معاهم علشان كنت فى قصة تانية بخلصها .. وخرجوا وانا مش موجود

طبعا من ساعتها وهما مش ناسيينها .. وشكروا صلاح والناس جامد على اللى عملوه وانهم خرجوا بالسلامة

فى الوقت ده وهما لسه بره ... رجعت علشان اصلى العصر فى تجارة
فكنت تعبان جدا .. لقيت واحد تانى واقف بكاميرا وشكله مش مصري
كان واقف عند المسجد

وكان العصر هيأذن .. فرحتله
كان المانى من القناة الاولى الالمانية
اتكلمت معاه وعرفته بنفسى وهو عرفنى بنفسه
فهمت منه انهم مستنيين حد وبيعملوا ريبورتاج عن طلاب الجامعات المصرية
قلتله لو عايز حاجة يبقى نادى بس وقول يا جارحى .. هتلاقى الجامعة كلها بتشاورلك عليا

المهم دخلت صليت وخرجت وكان صلاح رجع خلاص وخلصنا كل حاجة

انا وصلاح بقه كنا هنموت من الجوع .. من الصبح بره ولف وتعب فظيع .. فرحنا اكلنا وروحت انا بقه لان كان بقالى يومين بنفس اللبس .. ده غير الفحت بتاع الضرب بليل والتصوير والكلام ده فمكنتش قادر خالص

المهم بليل .. بقه .. لميس عرضت الشريط بتاعى لما اتمنعت من التصوير وجه الراجل وحط ايده
صلاح اتصل بيها علشان يأكد عليها على ان احنا مش هنسيب حقنا وان رئيس الجامعة لو مستجابش لمطالبنا فاحنا هنعمل حاجات تانية وكده
عادى يعنى نفس الكلام اللى انا قلتلهولها اصلا فى التصوير
فهيا لما قعدت مع مى اللى بتذيع البرنامج مع معتز
متفهمش هيا قالتلها ايه ولا لعبت فى دماغها ازاى

بعد الفقرة لقينا مى بتقول .. ان المتحدث الرسمى باسم طلاب الاخوان اتصل بلميس قبل البرنامج
واصدر نوع من التهديد .. انه اذا رئيس الجامعة لم يستجب لمطالب طلاب الاخوان فسيكون هناك رد اخر !!

طبعا مين المتحدث الرسمي ؟؟ محمود قطب
فقطب راح ماسك التيلفون واتصل بواحد كده .. قاله الله يباركلك انا عايز انام فى بيتنا الليلة دى :D
طبعا كان بيهزر معاه

انا لما سمعت الكلام ده فهمت القصة .. رحت متصل بصلاح .. ايه يابنى .. فضلنا نضحك ضحك فظيع فى التيلفون على اللى حصل
بس سبحان الله .. الكلمة دى عملت شغل جامد جدا

والحمد لله العملية خلصت على خييييييير وخلصنا

بس كان يوم ملهوش حل

بس كانت ايام .. ملهاش حل بجد

شوف بقه الفيديو علشان تحلى بقه

نقطة بقه اخيرة قبل ما اخلص

وهيا قصة ان ممكن امن الدولة يصادر الشرايط بتاعت الصحفيين

هقول موقف بس هتفهموا منه الحوار
مرة الجزيرة كانت موجوة بتصور .. طبعا احنا اللى بنقولهم تعالوا امتى وندخلهم
ففى مرة كانوا جوه فى حاجة متعلقة بالانتخابات وبتاع .. اعتقد ساعة المؤتمر بتاع الدعاية اللى انا اتكلمت فيه ده
فهما لما جم يخرجوا . احنا فهمناهم .. واخدنا منهم الشريط وخليناهم يحطوا شريط تانى مزيف .. وعلشان يوهموا امن الدولة ان ده الشريط اللى صوروا عليه .. راحوا مصورين كام لقطة وبتاع
وخرجوا من الجامعة
بعد ما خرجوا بشوية بالعربية .. عربية شرطة وقفتهم .. وزبطتهم وخدوا منهم الشريط فعلا

طبعا هما عملوا فيها انهم رافضين وبتاع . فى الاخر ادولهم الشريط
وكان الشريط الاصلى مع واحد كان متفق معاهم عهلى مكان قدام شوية من المكان اللى اتمسكوا فيه .. المهم بطريقة ما زبط معاهم واداهم الشريط .. وروحوا بيه للقناة سالمين غانمين وزى الفل
فده عادى بيحصل كتير مع الصحفيين .. بس مش علينا الحركات دى

طبعا انا بحاول بقدر الامكان احكى التفاصيل كلها .. فهو ده اللى حصل فعلا
وقدام شوية كده ان كان لينا عمر .. فى حاجات لما تعرفوها اساسا هتتخضوا من اللى بيحصل حوالينا .. واحنا مش عارفين دى اتعملت ازاى
او مش عارفين التفاصيل والملابسات الى حصلت معاها
ربنا يكرم ان شاء الله

----------------------
طبعا الموضوع كبير وبقه شكله وحش خالص

فهكمل قصة الاتحاد الحر فى الموضوع الجاى

بس الله اعلم .. هلحق اكتبه .. ولا هكتبهولكوا من داخل الجيش المصري العظيم

اللهم لا تجعلنا من الذين يخدمون البلد من خلال الجيش

ادعوا يا جدعان بذمه .. يا رب اجعل حد من اللى بيدخلوا المدونة وبيقروا من الاتقياء الاخفياء
واجعله يا رب يقسم عليك انى اخد تأجيل من الجيش لكى تبره فى قسمه

ياااااااااارب

Wednesday, November 7, 2007

قوات خاصة .. صاعقة !!

السلام عليكم ورحمة الله وبركاته

كان حتة يوم بتاع الكشف الطبى ده

مأسااااااااااااااه

الاول انا كنت مزبط مع خطاب اننا نتقابل ليلتها

ونروح لتيتو نبات عنده ونشد على الفجر كده على التجنيد

وفعلا قابلت صلاح الساعة 11.30 بليل فى الهرم

وروحنا لتيتو .. وتيتو كان فى المحل وكان فى مشكلة عجز كبير

وفضلوا يحلوها .. طبعا احنا مستنيين فى الشارع لحد لما يجي

فضلنا لحد واحدة بليل

وجه الحمد لله

المهم نزلنا صلينا الفجر ورحنا على التجنيد على طول

دخلنا الاول على حتة كبيرة كده عاملة زى ما تكون مدرجات ملاعب وقعدنا فيها

كنت هقعد فى الاول .. بس واد كان قدامى قالى تعال معايا

ايه يابني ؟؟ قالى هياخدوا الناس من الاخر مش من الاول

وقالى انه كان موجود قبلها وعارف النظام

وفعلا ده اللى حصل .. فكنت مع اول دفعة دخلت الصبح . وطبعا انا وخطاب مع بعض على طول فى كل حاجة

دخلنا الاول على قاعة كبيرة .. قالولنا ازاى نزبط الورق ورحنا علشان ندبس الورق

بعدها ودونا على صالة تانية قعدنا فيها فى انتظار ان ينادوا على اسامينا علشان نتصور بالبدلة العسكرية

طبعا دخلت انا وخطاب والثالث اللى كان معانا برضه احمد شوقى

اه لو شفتو صورتي

ولا موشيه كوهين يا خواتى



اتصورنا وطلعنا بعدها قعدنا فى مكان اخر فى انتظار الكشف الطبى

خدونا بعدها على الكشف الطبى ورحنا كشفنا

صلاح واحمد خدوهم كشف تانى علشان النضارة .. والحمد لله خدوا اعفا الاتنين

وانا بعدها رحت على حاجة اسمها المدرسة ... وده مسرح الاحداث

المدرسة دى هيا ادارة الانتقاء والتوجيه

بيتم فيها فرز الناس وتوزيعهم

دخلت من الباب على حوش كبير كده وفى الاخر مبنى

فى المبنى ده كان فى واحد واقف فى الدور اللى فوق

المهم انا مش فايقله اصلا وتعبان.. لاننا مكناش نمنا اصلا لما رحنا لتيتو

المهم كان فى ظابط بيقول اللى لسه جاى دلوقتى يجي هنا علشان اشرحله هيعمل ايه

فرحتله ..

اللى فوق ده نادى على واحد وكان طالعله .. فاللى تحت قاله خد يا كابتن رايح فين

فالى فوق قاله خلاص يا فندم ده معايا

فانا فهمت انها واسطة .. وراح مشاور لواحد تانى وقاله اطلع

وراح باصصلى وقالى وانت كمان !!

قالى ايوة انت ابوكاب انت اطلع معاهم

فطلعت اشوف ده عايز ايه ده

اول ما طلعنا خدنا بضحك وايه يا رجالة وانتوا كلية ايه وبتاع

طيب اقفوا على الحيطة !!

اول ما قال الكلمة دى احنا الثلاثة بلمنا .. فهمنا انها صاعقة

فكان بيكشف علينا .. جه عليا بصلى كده

فلقى ان طولى اقل من المطلوب بحوالى 5 سم تقريبا

فقالى انت بقه انزل تانى مع صحابك اللى تحت

طبعا نزلت جري على تحت

الاتنين اللى طلعوا معايا .. واحد منهم دخل والتانى خرج بحاجة طبية برضه

وانا نازل قابلت واحد طالع .. قلتله اوعى تطلع فوق ... فوق صاعقة لف وارجع تانى

فهو حاول يرجع تانى بس معرفش .. الراجل قفشه وطلعه

بس خرج برضه طبى

المهم بعدها نزلت كنت بكتب حاجة

لقيت صاحبنا بتاع الصاعقة اللى جابنا فوق .. نزل بيلف بين العيال .. وفضل يلف ويدور

جه عندى ووقف قعد يبصلى .. وفضل يبص ويلف عليا ... وانا مقلق فحت لحسن يرجع فى كلامه

المهم مشى

فرحت علشان اقدم الورق ده

لقيت واحد تانى جاى .. ده منين ده

ده بقه من قوات خاصة المظلات

كان قدامى واد جسمه ما شاء الله
وورايا واد طويل

فالواد اول ما شافه قلق وخبى وشه

فجالنا .. قاله انت بتستخبى منى

قاله لا يا فندم ده علشان الشمس بس

قالنا انتوا كلية ايه ؟؟

تجارة ها ؟؟

المهم بص علينا كده .. وراح ماشى

العيال كانت هتقع من طولها من بصته دى :D

يعني نعدى من الصاعقة نلبس فى المظلات

ناقص بقه الحرس الجمهوري وتكون كملت !!

والحمد لله بعدها طلعنا من المدرسة دى ورحنا علشان ناخد اخر حاجة ورقة ملهاش لازمة اسمها 110

الورقة اتعملت ليا الساعة 12 ونص .. اخدتها الثالثة عصرا

حاجة تكسف
رجعت يومها مش شايف تماما .. ونمت يومها 12 ساعة متواصله
مفيش محدش يحاول هما الاتناشر ساعة متقفلين كده .. باكته واحدة !

المهم بقه

الارجاء يوم 21/11

يعنى مش هوصيكوا بقه

1- دعاء بوضوء
2- واكيد باخلاص .. يعنى ايه مش عايزين كلام سد خانة وخلاص
3- ابتهالات بقه وتضرع لربنا .. علشان نطلع ومندخلش ان شاء الله
4- الدعاء برضه ان احنا نخلع من الجيش ان شاء الله
5- الدعاء انى مدخلش الجيش
6- واخيرا الدعاء برضه انى مدخلش الجيش واخد تأجيل ان شاء الله



Sunday, October 28, 2007

الله يخرب بيت الجيش

السلام عليكم ورحمة الله وبركاته

دى بس فترة نقاهة بعد اللى شفته فى الجيش

الله يخرب بيت الجيش يا جدعان

لا بجد فعلا الجيش ده مأساه

ميت ختم ومليون توقيع و تبصم ولا كأنك ميلوسوفيتش مجرم الحرب مثلا

او يلتسن بتاع روسيا

مش عارف انا في ايه

تخيلوا .. انك اول حاجة تجهز الورق

وتروح تعمل فيش فى القسم .. اسمه فيش جنائى

وبعدها تطلع بكل الكومة بتاعت الورق دى لمندوب التجنيد والمفترض ان فى كل قسم فى واحد .. بس اهو بنتحشر فى مكان واحد

وتروح علشان ياخد الملف .. فيشوفه ويتأكد من الحاجات دى ( طبعا فيها كام يوم دى )

طبعا اليوم ده كان مأساه بالنسبالى .. انا كنت عنده فى المكتب الساعة 6 الصبح

وفى الاخر كان هيدينى الفيش وانا واقف .. فلما لقانى مش متجاوب معاه ومش بطلع الفلوس علشان يمشيني ..

راح رامى الملف بتاعى وقالى تعال يوم السبت خده ( كنا يوم الثلاثاء )

قلتله لا بقه .. عليا وعلى الجيران وعلى عم عباس بتاعكوا

ده انا ممكن اقلبهالك خرابة عندك

ويا انا يا انت بقه فى البلد دى

المهم مرضيتش امشى لحد لما اداهونى غصب عنه ابن !*($&!@&^%!


وبعدها الناس ترجعله علشان يديها الملف وفيه ورقة اسمها الفيش الثلاثى العسكري ( الله ينتقم من اللى فى بالى )

الفيش الثلاثى العسكري ده ثلاث ورقات بتبصم على كل واحدة فيهم بالعشرة .. ولو حد عنده صوباع زيادة يبصم بيه برضه ... هتبصم يعنى هتبصم

المهم بعدها تطلع بالورقة دى على شيخ الحارة يمضيلك .. ومنها على مأمور القسم يختملك بالنسر .. على وشك فى الصورة اللى بتحطها على كل ورقة . وتحت .. يعنى ست اختام

بعدها تطلع على مديرية الامن ربنا يحفظنا تختمها ختم ملهوش اى معنى ولا اعتبار
لا وايه قمة الذل بقه .. ان الشباك اللى بتاخد منه الختم فى المديرية .. بالضبط بالضبط حوالى 12 سم * 20 سم

اللى هو يادوب صوابعك تتحشر بالورق علشان يدخل .. ووراها عسكري ملهوش لازمة بيذل فى خلق ربنا وبيتكلم بطريقة لو كان بره الشباك وفى مكان بعيد عن المديرية كان خد حتة علقة !! مش هينساها ابو ابتدائية ده

وبعدها تطلع على التجنيد تانى يختمها ختم التجنيد وفيه المعاد

طبعا كل ختم من دول بياخد سنة

والناقص يقولك هات قفاك اختملك عليه كمان

يعنى مثلا اخر ختم ده مثلا .. رحتله من 8 الصبح

ومشيت الساعة 2 الظهر

وكل ده علشان ختم (!@÷$‘*#!*َ ) لا مؤاخذة يعنى

وحتى العسكري ابن ال!@*)#‘!@ اللى كان فى التجنيد كان قاعد ورا المكتب وعمال يشتم
والله كنا واقفين نفسنا الواد ده يطلع .. علشان هياكل علقة هو التانى .. كان هيروح لابوه وامه معاق مثلا او بعاهة !!

ومش عارف انا في ايه بس

البلد دى بتموت فى حاجة اسمها ختم .. ويبقى الراجل هيتجنن لو مختمش .. بيحس بانكشاح فى نفسه وذاته لما بيختم كده

وطبعا الناس كلها عندها مرض الورم فى الشخصية وانتفاخ الذات وتضخمها

فتلاقيه يتمزج كده لما يرجعك .. او يذلك قدامه علشان تخلص المصلحة

يعنى بجد ممكن تلاقى عسكري ([ً@#!##) ملهوش اى لازمة فى الحياة ولو يعنى جيت توزنه مش هيوزن ذبابة على رأي الشاعر

تلاقيه واقف بيذل خلق ربنا ... وطبعا محدش قادر يتكلم عملا بالمثل اللى بيقولك لو ليك عند ال!*&@@ حاجة قوله يا ابن الـ!!#%@

فحاجة تكسف .. لما يكون عسكري زى ده مش فاهم اى حاجة وبيمشى الناس بالشكل ده

واما الظابط فحدث ولا حرج .. انا متأكد ان الظابط ده ولا يفهم حاجة فى الكهربا

وده كان واضح من طريقه تنظيمه للشغل ... انا متفق انه كان مطحون يا عيني وعليه ضغط عصبي كبير .. لكن طريقة تعامله مع الناس كطريقة فلاح مع الزرع ...وياريتها كانت كده

لكن للاسف .. بلدنا كده

انا مش عايز احكيلكوا على كم الناس النهاردةاللى كانت جاية علشان تنال شرف ختم ورقها اللى هيؤهلها لدخول السباق لخدمة هذا الوطن
لدرجة ان فى ناس كانت بتتخانق .. من اجل الحصول على هذا الشرف العظيم

ولكن هيهات ان يحصل عليه اى شخص عادى .. لكل شئ ثمن

طبعا .. فى ناس كانت فاقدة الامل فى خدمة هذا الوطن .. ولذلك كانت هتبكى من حرقت دمها وعندهم حق طبعا

وهيا بتعمل كده .. وبتدعي من جوا قلوبها .. يارب لا تنولنا هذا الشرف واخرجنا منها سالمين


اما من اكتر المواقف المضحكة والجامدة

لسه كنت بكلم صلاح من شوية .. فبقوله ربنا يستر وميخدوش مواليد الشهر بتاعى اللى اتولدت فيه

فقالى لا يا عم متخافش .. يا دفعة .. يا دفعااااااة ؟؟!!

ايه يا بنى مالك ؟؟

ايوة تعال بس كده هقولك حاجة خد كلمه كده

المهم اتاريه كان واحد جندى معدى من قدامه وهو بيكلمى

فراح موقفه واداله الموبايل يكلمنى على اساس انه يطمنى يعنى انهم مش بياخدوهم

طبعا الدفعة ده اتخض اساسا وكان بيجاوب على سؤال تانى ومش فاهم انا بسأل بقول ايه

فى الاخر صلاح بيقوله انت رايح الجيش . قاله اه . قاله طيب ادعيله علشان ميدخلش

بقوله ايه اللى انت عملته ده؟؟ بيقولى معرفش بس جت كده وخلاص :D


ملحوظة ... اى كلمة مش عارفين تقروها اعتبروها شتيمة وخلاص


الحاجة التانية
بقه انى مضايق جدا وزعلان فحت .. من كذا حاجة كده

كذا حاجة ورا بعضها كده الحمد لله على كل حال

احدها ان اختى فاطمة زعلانة منى :(

وهيا بصراحة عندها حق بس انا مش عارف اعمل ايه والله

واحنا والله مش ناسيين ولا حاجة

ده احنا حتى كل ما نكون ماشيين فى حتة ونشوف عربية زى بتاعتك نقول فاطمة اهى

لان فى الغالب بيبقى اللى بيسوقها واحدة ست معرفش ليه :D

الظاهر عاملين احتكار خط انتاج العربية دى للسيدات فقط

انتي عارفه احنا بنحبك قد ايه

ده انا حتى هأجل الخطوبة لحد لما تيجي


الحاجة الثالثة
وهى انى رايح الجيش علشان الكشف الطبى يوم الاحد القادم

فيارب ارزقنى صبر ايوب على الخلق اللى هناك

وهون علينا يومنا ذلك واطوي عنا طوله
اللهم انت الصاحب فى هذا اليوم
اللهم انى اشكو اليك ضعف قوتى وقلة حيلتي


ومع السلام عليكم ورحمة الله

Saturday, October 20, 2007

يوم الاربعاء العظيم

السلام عليكم ورحمة الله وبركاته


1- بالنسبة للتعليقات .. اولا بشكر كل اللى شاركوا فى التعليقات واللى نصحونى فى التعليقات .. ربنا يكرمكوا بس عايز اوضح حاجتين
الاولى انى بطبيعتى مش برد على التعليقات .. مش طناش او انى مش مهتم .. لا ابدا والله .. لكن واحد داخل يشكرنى او يمدح فى اللى بكتبه . فيعينى بفضل عدم الرد واجره على الله
او واحد داخل يشتم ويشمت فيا .. برضه ربنا يكرمه وحسابه على الله
انما لو حد دخل فعلا بيسأل على حاجة او بيستفسر على حاجة فطبيعي برد .. لكن برجع اقول ان طبيعتى مش برد او بكتب تعليقات .. ولا حتى فى اى مدونة تانية اطلاقا .. يعنى نادرا ما تلاقولى تعليقات فى اى مدونة تانية
والتانية بقه فى قصة التعليقات .. انا كان ممكن بسهولة جدا اقفل تعليقات المجهول .. ويبقى محدش يقدر انه يشد خط فى التعليقات الا لما يكون مسجل على بلوجر .. لكن انا مش بعمل كده علشان اشوف الناس الخايفة اللى مش عايزة تقول اسمها .. وللاسف تيجي بتشتم او تقول كلام مش ظريف وتمشى
فدول لو قالوا خيرا يبقى الحمد لله .. لو قالوا كلام مش ظريف يبقى ولا كأنها موجودة ومش بشوفها
لكن لو واحد مثلا مش مسجل وكتب تعليق من خلال مجهول بس كتب اسمه .. انا بحترمه جدا جدا واقدر رأيه جدا .. زى فى الموضوع اللى فات واحدة اسمها مي .. انا معرفهاش وتقريبا اول مرة تشرفنى وتكتب تعليقات .. فعلا انا بحترمها جدا مع انها كتبت نقد محترم جدا وبشكل مهذب جدا جدا .. فانا بحترم رأيك جدا يا مى وربنا يكرمك عليه
لكن الناس التانية اللى بتكتب تعليق باسم مجهول ومن غير ما تكتب اسمها .. فدى بدرجة من الجبن والخوف ورأيهم لا يلتفت اليه اصلا
ولان معنى انه خايف يكتب اسمه يبقى هو بيتكلم غلط او فى حاجة مش مزبوطة فخايف يتعرف .. مع ان سبحان الله الاسلوب بيتعرف بكل سهولة .. بس يلا خير

2- دعواتكوا بقه علشان الاسبوع ده اسبوع الجيش العظيم .. وربنا يسهل يا رب والعملية تخلص بقه
والله المستعان

3- يا ريت بالله عليكوا تسمعوا الدكتور ياسر نصر فى سلسلة فجر امة بتاعت محمد الفاتح .. علشان نعرف الناس دى كانت كده ازاى .. والراجل بيتكلم على معانى فعلا احنا محتاجينها ومحتاجينها اكتر كشباب قبل ما نعجز .. بجد حاولوا تنزلوه من على النت وتتفرجوا عليه

4- الموضوع النهاردة طويل جدا لان اليوم فعلا يستاهل اكتر من كده .. ومعلش مش هينفع اجزأه لازم ينزل حاجة واحدة فاستحملوه بقه


ندخل بقه فى الاربعاء العظيم


اخر حاجة وصلتلها لما بدأنا الانتخابات ورحنا علشان نقدم الورق .. فى اليوم ده انا جيت الجامعة الصبح وكنت مجهز الورق بتاعى .. طلعت فوق عند رعاية الشباب وقلت للموظفة انى عايز ورق علشان ارشح نفسى .. طبعا عملت فيلم هندي علشان انا معييش اثبات نشاط .. احاول معاها يمين شمال .. ياسيتي فى اللائحة مفيش الكلام ده .. تقولى مليش دعوة دى التعليمات اللى جاتلنا الصبح
قلتلها طيب ماشى هجيبلك اثبات النشاط.. قالتلى فين ؟ قلتلها مش معايا دلوقتى بس هجيبهولك
قالتلى يعنى هتجيبه منين ؟؟ قلتلها هتصرف بقه
قالتلى يعنى هتضربه .. قلتلها انا هتصرف
طبعا كانت خلاص اتزنقت .. فمكانتش قادرة تتكلم وراحت مطلعة الورق واديتهولى
الميزة انها مكانتش عارفانى .. وكنت بكلمها عادى فالعملية مشيت
بعدها نزلت وقلتلهم على اللى عملته فالناس كلها طلعت وخدت الورق بنفس الاسلوب .. وعلى طريقة المعاملة بالمثل

المهم بعد ما نزلت لقيت واحد جاي بيقولى ده العاشرة مساءا موجودة وعايزنى اروح اسجل معاها
رحت فعلا وسجلت معاها.. تقريبا كانت سلمى هيا اللى كانت بتعمل التقرير
هبقى ارفعه واحطه فى الموضوع ان شاء الله
"الفيديو اهو"
وكده خلص اليوم

القوائم

بعدها تم اعلان القوائم الابتدائية وكنا كلنا نازلين فيها عادى جدا
لما جت القوائم النهائية .. كان المفروض تنزل وتتعلق يوم الاربع

قبل يوم الاربع واعلان القوائم النهائية .. كانت كل حاجة متوقعة ومعمول حسابها
اذا نزلنا فى القوائم يعنى هندخل الانتخابات .. وده كان مستبعد تماما .. فكان محطوط هنعمل ايه
واذا تم الشطب فكان مخطط هنعمل ايه بالضبط وبالساعة

انا هقول الاول السيناريوا المخطط وبعدها اللى حصل

السيناريو المخطط

فى البداية طبعا زى ما بيعملوا كل سنة هيأخروا القوائم .. فاحنا فى ساعة معينة .. وهيا وقت انتهاء الدوام الرسمى للموظفين لو لسه لم تعلن . فالجامعة كلها سواء الكليات اللى فى الحرم او خارج الحرم زى طب وهندسة وغيرها .. هتيجي داخل الحرم فى اعتصام مفتوح تحت القبة والمطالبة باظهار القوائم النهائية .. كانت نوع من الضغط فقط لا اكتر

طبعا علشان الكلياات اللى بره تدخل الحرم من غير مشاكل .. فهيتم تثبيت الباب الرئيسي .. البابين هيكونوا متثبتين ومفتوحين .. وعليهم حراسة مستمرة

بعد ما القوائم تظهر ونكون اتشطبنا .. احنا هنكون فى اعتصام فى الداخل تحت القبة .. فساعتها هنطلع بره الجامعة من خلال الابواب المتثبته .. وهنستمر فى الاعتصام لحد تانى يوم الصبح .. بس بره الجامعة قدام المسلة
وطبعا هنطلع من الابواب المفتوحة .. وهتبقى مفتوحة وعليها حراسة علشان متتقفلش .. لان بليل لو حصل ضرب يبقى احنا نقدر ندخل جوه الجامعة
فواحد قال .. طيب ما الامن المركزي ممكن يدخلك الجامعة ويطحنك جوه
فكان الرد .. ياريت يعمل كده
ليه بقه ؟
لان مفيش عسكري امن مركزي دخل الجامعة من ايام ابو لهب وابوجهل .. فلو حصل .. يبقى ده هيبقى حديث المدينة .. وممكن نخلى بوش نفسه يندد باللى حصل ده
طيب يا عمى .. ما انت لو اضربت جوه .. ومعاك حد بيصور .. فاكيد ده اول واحد هيتسحل ويضرب ويبقى طلعت من المولد بلاحمص ولا عدس حتى
فقالك لا .. هنعملها بذكاء .. ايه بقه
قالك اننا هنطلع واحد يوم الاربع من قبل العصر كده .. فى وقت معين بيكون محدش واخد باله فيه .. وهيطلع فوق سطح مبنى اداب من خلال مدرج .. ومعاه الكاميرا وعدته كامله .. ويكون جاهز وعلى استعداد انه يفضل هناك لحد تانى يوم بيصور فقط .. ومينزلش من مكانه اطلاقا حتى لو الناس كلها اتلمت فى عربيات الامن المركزي .. يفضل مكانه وميتحركش لحد تانى يوم زى يوم احد كده .. تانى يوم بعد ما الطلبة يجيوا الجامعة .. ينزل فى نفس الوقت وبنفس التخفى .. وتكون مهمته انه يوصل الشريط ده للجهات الاعلامية

صورة من جوجل ايرث للى كان هيبقى فوق بيصور

طبعا الفكرة دى كانت مجنونة بمعنى الكلمة .. وكان ده الحل بتاعك .. حتى ان كان فى اقتراح انهم يبقوا اكتر من واحد ومن كذا زاوية .. وطبعا الشخص ده لو اتكشف .. فى اى مرحلة سواء وهو طالع او وهو بيصور او بعد ما الناس تتاخد او حتى وهو نازل .. فده كان هياكل ضرب لحد لما يموت من الضرب كان هيتعلق فى جوانتنامو كده
فطبعا كان لازم واحد واصل على طول علشان ربنا يسترها عليه ..لانه تقريبا مش هيتحرك لمدة تفوق ال20 ساعة
طبعا انا كنت بعيد عن دايرة الاختيار .. :D والحمد لله

وطبعا كان فى تنبيه للناس انها تتقل فى اللبس علشان القعدة هتطول .. وان الدنيا تبقى برد بليل كنا فى اول نوفمبر

اللى حصل بقه

اللى حصل ان فعلا فى الساعة 3 بالضبط .. وهو معاد انصراف الموظفين .. كانت لسه منزلتش
طبعا كان فى كل كلية واحد مهمته انه يتابع القائمة .. واول ما تظهر يتصل ويبلغ على طول علشان نتحول للسيناريو التانى لو حصل
لكن لما الساعة جت 3 ولسه متعلقتش .. رحنا على الباب الرئيسي
هناك كان الامن عارف او حس بحاجة فراح على طول قافل الابواب .. طبعا كانت مشكلة .. لازم يتفتح ولازم الناس اللى بره تدخل
فالناس كانت جاهزة .. على طول ميه النار كانت جاهزة وفورت القفل
اللى حصل ساعتها وخلى الباب المتلصم اصلا بالعافية يتكسر .. المفروض ان القفل تسيبه بعد ميه النار حوالى عشر دقايق وبعدها بضربه خفيفة هيقع .. فهو الراجل اللى معاه المهمة دى قال شدوا الباب كام شده كده وهتلاقوا القفل طار على طول .. بدل ما نستنى الوقت ده كله .. ده غير ان الامن المركزي كان محوط اللى بره والوقت كل ما يطول مش هيكون فى صالحك
ففعلا بدأوا يهزوا الباب .. اتاري الباب اساسا مصدى والمفصلات كانت خلاص جابت اخرها .. فالمفصلة اللى فوق اتكسرت .. ووقع الباب على راس اللى بيفتحوه

طبعا الحركة دى تم استغلالها بشكل قوى جدا .. سواء من الامن او من الاخوان والمتعاطفين معاهم
يعنى الامن على طول راح ناشر ان دول شرذمة قليلون مخربون وبيكسروا الابواب وبيخربوا التعليم ومش هدفهم الحفاظ على الجامعة وبتاع
بس سبحان الله كان استغلال الصورة دى من المتعاطفين مع الاخوان ومن الاخوان نفسهم كان اكبر ..
افتكر بعدها فى العاشرة مساءا لما جه رئيس الجامعة والدكتور عبدالمنعم وناس تانية .. اتصل الدكتور عادل عبدالجواد ( رئيس نادى اعضاء هيئة التدريس ودكتور فى هندسة ) وقال ان الطلاب كانوا بيتعجنوا من الامن بره وانا شفتهم من المكتب بتاعى من فوق هندسة وزبطنا فى الكلام تزبيط جامد طحن
والدكتور حسن نافعة كتب عن الموضوع ده وعن كسر الباب وايهما اصح .. ان الباب يتكسر ولا ان الطلبة يضربوا وتتكسر عضامهم
وكمان الدكتور محمد سليم العوا اتكلم عن الموضوع .. فيعنى الحمد لله التأثير للعملية غير المقصودة دى كان قوى
شوف كده اللى حصل

هو بيني وبينكم .. الامن فعلا كان محوط اللى بره وفى الاول كان رفع العصيان على الطلبة .. وفى ناس اتعورت من الاول .. لكن ضباط الامن المركزي لموا العساكر بسرعة جدا ورجعوهم ورا .. فالاشتباك مكانش كبير بالشكل الى الناس فهمته
لكن رب ضاره نافعة

طبعا ده غير الكلمة بتاعت قطب .. لما اقسم انه هيكون فى رد غير طبيعي .. يلا مش مهم :D
بليل بقه

بعد ما الباب اتكسر وجم يصلحوه .. فاتقفل تانى !! طيب وبعدين هنطلع بره ازاى
طيب فى مشكلة تانية .. الامن المركزي خلاص وقف قدام الابواب كمان يعنى مش هينفع نكسر الاقفال تانى ونفتح ونخرج

قالك هنعمل الاتى .. هنطلع من باب حقوق الصغير . الباب ده ثبتناه وخليناه مفتوح .. وقلنا الناس هتطلع من الباب الصغير وتجري ناحية الشارع اللى بره وتلف من ورا الامن المركزي .. يعنى هنزنقهم بين باب الجامعة واحنا وراهم
طبعا الامن هيجري علشان يلف من ورانا تانى .. وهيسحبوا دول .. فيبقى احنا كده طلعنا ونعمل الاعتصام ويبقى زى الفل كده
الغلطة اللى حصلت بقه ساعتها .. ان لما الناس جريت وطلعت بره الجامعة .. جريو بعيد شوية . وكان المفروض انهم اول ما يطلعوا يمنعو زحف الامن المركزي .. لان الامن المركزي على طول راح سادد الباب اللى بنطلع منه .. فكان المفروض انه يتعمل حاجز يمنع الامن المركزي انه يسد الباب
لكن اهو اللى حصل .. فبقه فى مشكلة
ان فى 60 واحد بره الجامعة الامن المركزي محاصرهم
وفى ناس جوه مش عارفه تطلعلهم بره
هنا الامن المركزي عمل حركة جامدة جدا .. انه على الباب بتاع حقوق لما سده علينا .. وقع الكابينه الخشب اللى بيقعد فيها العمال وهما بيشوفوا الكارنيهات دى .. وقعتها على الارض فسد اى حركة من ناحيتنا للخروج .. وفى نفس الوقت كانت طريقة انه يبعد اى اشتباك مباشر بينا وبينه .. فكان بيضرب بالعصيان والاحزمة على الكابينه الخشب قدامنا .. فاللى بيكون جاي من ورا جري وهينط فى الامن المركزي يعمل عملية انتحارية .. اول ما يقرب ويسمع الصوت بتاع الضرب على الخشب يخاف على ظهره ويقلق فيرجع تانى
لدرجة انى رحت ووقفت فى النص بين الناس الى جوه الجامعة وبين الامن المركزي .. وعادى يعنى الناس اللى جوه بتحاول تضربهم بس مش عارفين علشان الخشب .. والامن المركزي كده كده مش بيضرب غير فى الخشب .. لدرجة انى وانا واقف قدامهم رحت مصورهم كمان بالمرة .. حاجة للذكرى يعنى

طبعا يمكن الباقى انتوا عارفينه ان الامن خلى رئيس الجامعة يكلم الدكتور مدحت عاصم .. انه يفض الاعتصام مقابل ان الناس تروح سالمين وان الطالب اللى خطف يرجع وانهم تانى يوم يروحوله وهيزبطهم ويشوف ايه القصة
بصوا كده على اللى حصل

اما قصة الطالب اللى اتخطف ده كان اسامة الشاعر .. هو بعد ما خرج فوجئ انه بعيد عن الناس شوية .. فحاول يرجع لكن كان فى ظباط عرفوا يجيبوه بعيد عن الناس فمحدش شافه بليل .. وخدوه ورا عربية وقعد هناك .. خرج بعدها بساعة تقريبا مطولش يعنى

فى حاجات حصلت غلط كتيرة فى الليلة دى .. منها ان لما اتشطبنا .. فى ناس طلعت اتكلمت وقالت كلام سخن جدا خلى الناس تسخن جدا لدرجة ان فى كلام غلط كتير اتقال لحد دلوقتى بنفضل نضحك على اللى اتقال ده ومش لازم بقه نفتحه تانى

فده خلى اخطاء كتيرة تحصل .. زى اللى كسروا كراسى وبدأوا يحدفوها على الامن ويضربوهم بيها ده غير الالفاظ اللى اتقالت للعساكر وعن الامن .. فدى كانت مشكلة فعلا
منها مثلا ان بعد ما الناس طلعت بره وانفصلت عن اللى جوه .. فاللى جوه بدأوا يفكروا فى انهم يثبتوا الاجهزة اللاسلكية والاسلحة والكابات بتاعت الظباط اللى جوه .. او يثبتوا الظباط نفسهم .. كوسيلة لتبادل الاسرى بين الطرفين .. طبعا كان تفكير جهنمى وخاطئ تماما والحمد لله لم يتم تنفيذه
يعنى الكثير والكثير من الاخطاء .. والحمد لله حصلت بعدها مراجعات شديدة والحمد لله الليلة عدت على خير
المهم بعدها طلعت انا وصلاح .. وثلاثة تانيين وركبنا فى عربية واحد مننا وطلعنا على طول على العاشرة مساءا وخدوا نسخة من الشريط ورحنا الجزيرة والعربية وخدوا نسخة من الشريط وذاعوها على طول
الجزيرة تقريبا ذاعت وجابت فى شريط الاخبار
وحصل كمان ان كان فى دكاترة من حركة 20 مارس كانوا قريبين من الجامعة فلما سمعوا الاخبار . على طول راحوا جايين الجامعة ودخلوا وقالولنا احنا عايزين نخلص الموقف على خير من غير خسائر .. فانتوا ايه طلباتكوا .. ساعتها طلع واحد واتكلم معاهم وشكرهم والعملية تمت بخير

اما العاشرة مساءا فذاعت الشريط بتاع بليل كله بالكامل .. وعملت فقره عليه .. حتى انا فاكر ان ساعتها كنا فى الشارع فجالنا تيلفون ان الشريط بيتذاع دلوقتى .. فواحد مننا مسك التيلفون وحاول انه يتصل يعمل مداخلة .. وحاولنا نكلم المراسلين اللى نعرفهم يزبطولنا مداخلة نتكلم فيها .. لكن الفقرة خلصت ومعرفناش نعمل مداخلة لايف

بعدها وبعد ما خلصنا الساعة اتنين بليل .. كنا خلاص جايبين جاز وزيت وبنزين ومأكلناش .. فرحنا اكلنا فى حتة كده عمري ما هنساها .. وبعدها مكانش ينفع اروح .. فرحت بيت عند صلاح

على الفجر بقه .. بابا كان بيتصل علشان يعرف انا فين وايه اللى حصل .. انا نايم ومش حاسس بحاجة .. والله لو فجروا قنبلة مش هقوم مش قادر
فصلاح خد الموبايل وراح كلم بابا وقاله .. لما هو قفل وكان الفجر بيأذن .. صحيت
فقالى انه كام بابا فرحت انا اتصلت بيه برضه وطمنتهم .. نزلنا صلينا الفجر ورجعنا انتخنا لحد الساعة 9 او عشرة .. ونزلنا الجامعة تانى
تانى يوم ده بقه حصلت فيه حبة حاجات برضه محتاجة موضوع لوحده هو التانى

يلا ان شاء الله المرة الجاية علشان انا نفسى تعبت

Monday, October 15, 2007

بداية انتخابات سنة رابعة

السلام عليكم ورحمة الله وبركاته

1- رمضان خلص وكل سنة وانتوا طيبين بالعيد وابعتولى العيدية بقه .. نقبل الشيكات والكمبيالات والاوراق المزورة والفلوس نقدا وكاش وعلى الحساب وبالاجل وتحويل الرصيد !

مش عارف الواحد مش حاسس بفرحة العيد خالص .. مش عارف ليه .. يلا الحمد لله على كل حال

2- الواحد عنده برد معتبر واحتقان فى الزور وربنا يستر ... و المفروض اننا بدأنا نجهز ورق الجيش ( متشوفوش وحش ابدا ) وربنا يسترها ان شاء الله ونخلص الموضوع على خير يا رب

3- المدونة الرابعة اللى عملتها " خواطر عمر " هتبدأ تشتغل كمدونة مستقلة وفيها افكار مستقلة .. يعنى مش هنقل فيها مواضيع مكتوبة تانى خلاص انما هكتب فيها افكار ومواضيع فكرية .. وربنا يسهل


سنة رابعة بقه

قبل ما ابدأ فى انتخابات سنة رابعة .. فى حاجات تانية حصلت فى سنة ثالثة .. بعضها كان ليها علاقة بالانتخابات والبعض الاخر لأ .. فدى هبقى اذكرها بعد ما اخلص قصة الانتخابات كلها
زى مثلا مؤتمر القاهرة الخامس .. وغيرها من الحاجات الاخري .. فانا اخلص الاول الانتخابات وبعدها هرجع لحاجات تانية فى سنة ثالثة

طبعا سنة رابعة دى اساسا كانت سنة السنين كلها ... يعنى انا فعليا اعتبر حياتى الجامعية كانت سنة رابعة فقط .. وان الثلاثة اللى فاتوا دول كانوا حاجة كده لزوم استمرار الحياة يعنى

طبعا انا من سنة اولى وانا كنت محدد انى هدخل رابعة ادارة .. لانى بحب الادارة والمواد الادارية وبكره المحاسبة كشغل .. واضافة الى ان العدد القليل جو مناسب جدا للابداع والحركة

بالنسبة لانتخابات الاتحاد الطلابى فى سنة رابعة مفيهاش احداث جديدة عليكوا .. لان معظمها معروف وكتبت عنها قبل كده .. منها انزل متباتش فى بيتكو الجزء الاول والثانى :D
ومنها الموضوع بتاع حفلة ادارة وغيرها
لكن فى حبة حاجات ومواقف ظريفة حصلت عايز اكتبها علشان متتنسيش اولا .. وعلشان التدوين ثانيا

طبعا سنة ثالثة دى كانت سنة كلها حراك سياسى .. وكلها توعية سياسية بشكل كبير جدا .. وده كان فى المجتمع الخارجى يعنى ظهور حركة كفاية وتحرك الاخوان سياسيا ده غير التعديلات وغيرها .. كل ده خلى سنة ثالثة سنة كلها سياسة .. ولعن الله السياسة وسنينها

انا بطبيعتي مبحبش مجال السياسة .. بمعنى التفرغ التام لممارسة الاعمال السياسية وانها تبقى حياتى .. لان انا بطبيعتى الاجتماعية الكلام ده بحس انه مش بيجيب نتيجة وان انا انفع اكتر فى الاعمال الاجتماعية والخدمية .. ده على المستوى الشخصى يعنى
لكن ده لا يمنع انى اقرأ تحليلات وانى اجعلها داخل دائرة اهتماماتى لكن ليست بؤرة تركيزي
حد فاهم حاجة :D

المهم .. فطبعا سنة رابعة كانت القيادات الطلابية الاخوانية مسيطر عليها الفكر السياسى والتحرك السياسى .. يعنى لو فى عندنا قضيتين ولازم نتحرك فى احداها .. فبيتم اختيار القضية السياسية او التى لها علاقة بالحراك السياسى

فطبيعي ان الانتخابات كانت الورقة الرابحة دوما فى الحركة السياسية .. وده كان الانعكاس اللى ظهر فى الحملة ( الاهداف التى تم وضعها ) التى تم تبنيها فى التيرم الاول من سنة رابعة و حتى الوسائل التى تم اعتمادها ( مؤتمر .. هيئة خارجية مسجلة .. تعاون مع اللجان الاخرى .. لجان سياسية وحقوق انسان ) وغيرها

ولان التركيز فى سنة ثالثة كان على الانتخابات والشطب .. وتركيز الاعلام الاضواء على الاتحاد الحر.. فكان من البديهي ان تجربة الاتحاد الحر تعاد مرة اخرى .. مع مزيد من التسليط عليها والضغط من خلالها

المهم .. بدأت الاستعدادات للانتخابات من الصيف .. كنت فى معاد اجتماع ما للاطلاع على الحملة واقتراح وسائل جديدة ومعرفة خط سير التيرم واحداثه المتوقعة .. فكان من ضمنها حاجة اساسية اسها الاتحاد الحر .. وكان الشطب متوقع بنسبة 100%

اختياري امين الجامعة

المهم بدأت الاستعدادات للانتخابات.. افتكر ان كان لحد قبل الانتخابات بفترة قصيرة لم يكن قد تم اختيار المرشحين
فكنت مرة خارج من الجامعة .. وقابلت واحد اعرفه .. فقالى انت معرفتش ؟ قلتله لأ خير ؟
قالى تم اختيارك ( انا يعنى ) علشان تكون مرشح طلاب الاخوان لامين اتحاد الجامعة .. وبعدها لما نتشطب هتبقى امين اتحاد حر جامعة القاهرة .. والسنة دى هنعمل انتخابات امين جامعات مصر كلها وهيتم انتخابك انت امين اتحاد حر طلاب جامعااات مصر !!

قلتله اللهم صلى على النبى .. كل ده وانا لسه معرفش .. انت عرفت منين

قالى لسه كنت جاى من اجتماع دلوقتى فى المستوى الى هو فيه .. وعرف الكلام ده

وكان لسه القرار واخدينه قبلها بفترة ليست بالقليلة

تانى يوم لقيت واحد من المسئولين بيتصل بيا وقالى عايز اقابلك فى حتة كذا كذا .. ورحت قابلته هناك

هناك قابلت مسئول الجامعة وكل الناس المسئولين فى مكتب الجامعة

ايه يا جدعان خير اللهم اجعله خير

فاخدنى مسئول الجامعة ومسئول الاعمال العامة على جنب .. وقالى على قصة الاختيار لمنصب امين اتحاد جامعة القاهرة .. وبعد ما نتشطب هبقى امين اتحاد حر جامعة القاهرة وبعدها هنعمل على مستوى الجامعات وهبقى امين اتحاد حر جامعات مصر

قلتله لا استنى افكر
سألته .. معندكوش حد تانى للمهمة دى ؟
قالى لأ .. انت انسب واحد .. كانوا عايزين شروط معينة فى المرشح لانه بيبقى واجهة لطلاب الاخوان ..
طبعا الموضوع كان صعب عليا انى اقبله .. المهم انى وافقت على خوف من امن الدولة ان يفتنهم

وكان مقرر ان تانى يوم هتبدأ فعاليات الانتخابات ووافقت فى الاخر تحت الضغط والالحاح

بعدها بيومين تقريبا بدأت الدعاية للانتخابات وتشجيع الطلاب للانتخابات .. وتم عمل مؤتمر صحفى كبير عند القبة للدعاية للانتخابات ولطلاب الاخوان .. كان فيه انا وكل مرشحي طلاب الاخوان لامناء الكليات .. محمد سعيد عن اداب .. اسلام يوسف عن تجارة .. احمد عبدالعال عن دار علوم .. احمد معروف عن هندسة .. احمد مصطفى عن طب .. واحمد رشاد عن بيطري



مواقف تحفة !

المهم العملية مشيت واتكلمت والحياة مشيت .. حصل يوميها موقف ظريف .. بعد ما خلصت وخرجت من الجامعة بليل على المغرب كده .. فكنت خارج مع واحد من اصحابى .. فركبنا عربية الجمعية من الباب الرئيسي وبعد ما قعدنا ركبت بنتين ودخلوا قعدوا فى الكرسى اللى ورانا .. طبعا هما اول ما دخلوا زى ما يكونوا اتكهربوا اول ما شافونى .. وتعمل كأن راكبها فولت عالى وتهمس فى ودن التانية ويبصوا .. المهم ان فهمت انهم مستحقرين اللى قاعد ده .. وانهم شافونى باتكلم الصبح وبليل رايح اركب اتوبيس جمعية ( دى مشكلة ان الواحد يكون معروف ! ) وكانوا فاكرين انى جاى بمرسيدس مثلا ده غير البودي جاردز والسواق

فانا عملت عبيط .. لزوم الموقف يعدى يعنى و عايز اروح بيتنا لانى مش فايق .. فواحدة قالتلى لو سمحت .. مش انت اللى كنت واقف الصبح عند القبة بتتكلم .. قلتلها اه
قالتلى ايه بقه فى ايه ؟؟
قلتلها دى علشان الانتخابات
قالتلى اه ايه الى حصل يعنى وكنتوا بتقولوا ايه ؟؟
قلتلها ياه .. دى قصة طويلة واحنا وصلنا الجيزة .. ممكن اقابلك بكرة ونتكلم لان الموضوع طويل قوى
قالتلى طيب ماشى
طبعا ولا شفتها بعدها .. بس يلا العمر مش بعزقة !

صاحبى بقه قالى ايه يا عم .. قلتله اسكت مسمعش صوتك .. وفضلنا نضحك مع بعض

طبعا المواقف دى كتيرة .. بالذات بعد ما صوري نزلت فى الجامعة .. لان لحد دلوقتى لسه الدعاية والصور متعلقتش فى الجامعة
انما دى جت فى مرحلة بعدها هبقى احكي عنها بس مش دلوقتى

الموضوع الجاى بقه .. هتكلم عن يوم اعلان النتيجة .. المسمى بالاربعاء العظيم .. كان يوم 1/11/2006

ذلك يوم مشهود .. يمكن الناس عارفاه من اللى حصل فيه ومن كتر ما اتكلموا عنه فى العاشرة مساءا وتسعين دقيقة وكل خرابة فى بلدي
لكن انا هاخده من منطلق تانى .. وهقول فيه كلام وتفاصيل لم تذكر من قبل ولا يعرفها كثير من الناس من واقع اللى عيشته وشفته فى ليلتها الفله

الله المستعان

Saturday, October 6, 2007

بداية الانتخابات .. والاتحاد الحر

السلام عليكم ورحمة الله وبركاته

ها .. ايه اخباركوا فى رمضان ؟؟

واخبار التهجد معاكوا ؟؟

ربنا يكرمنا بليلة القدر ان شاء الله تعالى

عجبنى جدا واحد حاطط على الماسنجر كلمة

" ليلة القدر.. والله لن تفلتى منى "
فيارب نكون كلنا بالحماسة والجدية دى باذن الله

انا بقالى فترة كده عايز اكتب واكمل لكن مش قادر اكتب كلمة

ممكن من التعب والانشغال حبتين تلاتة وان كنت فاضى فى العموم لكن يلا

1- من فترة كده .. كنت رايح عزاء فى واحد قريبنا .. وقدرا وانا ماشى بالعربية اعدى على نفس المنطقة اللى تُوفى فيها علاء .. حسيت بشعور كده .. ان انت ممكن تكون بتمشى فى حتة معينة وبتعدى عليها كتير ولا تلقى لها بالا .. ويكون كتب لك فيها انك تموت هنا فى الحتة دى
يلا .. ربنا يلحقنا به على خير ويحسن ختامنا

2- مش هوصيكوا بالدعاء .. خاصة ناس معينة كده فى بالى على طول .. قابلتهم فى الكلية مع صلاح فى ايام الامتحانات اللى فاتت .. بدعيلهم وعايزكم تدعولهم كتير كتير جدا .. وادعولى انا كمان احنا فى ايام مفترجة

انتخابات سنة ثالثة

بعد كل القصة اللى فاتت دى بقه ويوم جامعات مصر .. احنا فى الفترة دى كنا بنتحرك فى مطالب خاصة بجامعة القاهرة لكن فى نفس الوقت مرتبطة بالحملة الكبيرة " معا للاصلاح " وبالمناسبة الحملة دى كانت على جميع المستويات فى الاخوان فى الجمهورية كلها .. يعنى مجلس الشعب كان داخل باسم معا للاصلاح .. الجامعات مع للاصلاح .. العمال معا للاصلاح .. المدارس معا للاصلاح .. كل حاجة كانت بتتكلم فى اسم واحد وهو معا للاصلاح .. ودى طبعا حركة جامدة جدا لانك بترسخ معنى الاصلاح فى نفوس الناس
عاملة زى الشركة اللى بتحط فى كل حتة اعلان عنها .. عمرى ما هنساها طبعا فنفس الفكرة

المهم كان من اهم الحاجات دى عودة المستبعدين من السكن فى الجامعة .. وكان منهم ناس اللى الاول على دفعته .. واللى من العشرة الاوئل .. حاجات غريبة كده وكانوا بيستبعدوهم من السكن فى المدينة الجامعية
ومن هنا بدأت حكايتي مع الانتخابات

فى انتخابات سنة ثالثة كان من المقرر ان كل كلية هتنزل بقائمة المرشحين كاملة .. يعنى لو مقاعد الاتحاد 48 يبقى هننزل بيهم كلهم وش كده .. ويبقى على رأس القائمة اتنين الامين والامين المساعد على مستوى اتحاد الكلية .. ودول الى يتعملهم الدعاية

وطبعا يتم ترك اختيار التفاصيل ومين ومش مين .. للكليات

وفعلا كانوا استقروا على اتنين من الكلية ساعتها عندنا .. كان احمد عدلى .. وسيد عبده

كان فى استقرار على احمد عدلى . لكن كان فى مناقشات على المنصب التانى .. انا ولا سيد

لكنهم فى الكلية استقروا على سيد لانى بطبيعة عملى بره الكلية مش هبقى فاضيلهم

وده اللى حصل

لكن بعدها سيد حصلتله مشكلة ما فى البيت وبقه محتم عليه عدم الظهور كثيرا فى الحاجات الكبيرة وخاصة اللى فيها اعلام

فتم استبعاده .. وتم اختياري

لما كنا فى المظاهرة بتاعت عودة المستبعدين .. لقيت س من الناس جم كلمونى .. قالولى حصل كذا كذا وانت اقوى المرشحين بعده ..ز فانت مستعد وهتبقى فاضى ولا لأ ؟
قلتله استنى افكر وارد عليك

طبعا روحت البيت وبفكر .. لان الظهور فى حاجة زى كده وباسمى الحقيقي وتحت اضواء الاعلام مش حاجة سهلة .. فقلت اجس النبض فى البيت وده اللى هيفرق معايا .. فكنت قاعد باكل مع بابا وكده

فقلتله يا بابا انا عايز اروح اصور البطاقة والكارنيه بتاع الكلية .. علشان هروح اقدمه وندخل الانتخابات بتاعت الاتحاد
قالى انت هتنزل الانتخابات ؟؟
قلتله اه .. هدخل امين مساعد فى الكلية
والموضوع عدى .. لقيت ان بابا وماما معقبوش بحاجة بعدها او قالوا حاجة خالص
فرحت كلمت صاحبنا وقلتله توكل على الله

تانى يوم لقيت الدعاية فى الكلية باسم احمد عبدالمجيد وعمر فهمي :D

ودى كانت بداية الانتخابات

من المواقف الظريفة اللى حصلت .. احنا كنا داخلين ببرنامج انتخابي .. فطبيعي بنروح نشرحه ونكلم الناس عليه .. فكنت بدخل انا واحمد عبدالمجيد المدرجات ونتكلم .. فى مرة من المرات احمد قالى انا مش فاضى روح انت .. وكان معايا محمود قطب .. ودخل قطب واتكلم وقال معانا مرشح طلاب الاخوان .. الاستااااااااذ عمر فهمي فليتفضل
طبعا الناس كلها قالت بلمت !! الاستاذ عمر فهمي فليتفضل !!

المهم انا بدأت اتكلم والناس لسه مبلمة ! فقلتلهم لا ولا استاذ ولا حاجة .. انا واحد زي زيكوا وقلبتها هزار علشان الناس تفك

بعدها بقوله ايه يا قطب .. استاذ ايه وبتاع ايه .. قالى اهى جت كده :D

زى العسل قطب ده .. ده احنا شفنا ايام مع بعض .. عايزالها موضوع لوحده اساسا

المهم استمرت الانتخابات زى الفل ونروح مدرجات ونتكلم ومفيش اى مشاكل

لحد لما اتشطبنا من القوائم النهائية كما كان متوقعا

انتخابات الاتحاد الحر

اول بداية اسمعها فى قصة الاتحاد الحر دى كانت فى الدورة التأهيلية فى الصيف .. كنا بندردش فجت سيرة الانتخابات واننا لو اتشطبنا .. فواحد قال وايه المشكلة .. ساعتها هنعمله الاتحاد الحر ونشتغله فى الازرق

طبعا انا مكنتش فاهم طبيعته قوى لكن فهمت انه بيتعمل فى طب من سبع سنين !!

وكان اتعمل للمرشحين كلهم دورة سريعة لشرح البرنامج ولتعريفهم بسيناريوا الاتحاد الحر .. بس اللى راح ساعتها كان سيد لانه كان لسه موجود

طبعا فى ليلة اعلان القوائم النهائية اتشطبنا طبيعي .. وكان تانى يوم مقرر اننا هنبدأ على طول فى انتخابات الاتحاد الحر

طبعا كان القرار انه هتتعمل انتخابات الاتحاد الحر على طول فى يومها وبعدها بيومين انتخابات امين الجامعة وخلصت كده الانتخابات

طبعا كان فى اعتراض .. يعنى احنا من ضمن معارضاتنا اننا بنعيب على العملية الانتخابية انها بتتسلق وانها بتتعمل بسرعة وتحت السلم علشان محدش ياخد باله .. فنيجي احنا نعمل زيهم

وكان فى نقاش استمر طويلا ما يقرب من ساعتين مثلا يومها .. وتم الاتفاق على الاستمرار وتتعمل وقالك ان اهدافنا

انك تعمل وسيلة ضغط اعلامية .. وبالتالى لو استنين الفترة الطبيعية للانتخاات واللى هيا شهر العملية هتموت منك وهتموت اعلاميا

فقالك لا .. اتحرك السنة دى اعلاميا بقوة والسنة الجاية هتتعمل الانتخابات بالفترة الطبيعية وهيبقى اتحاد بجد وبمعنى الكلمة

وفعلا اتعملت انتخابات الاتحاد الحر يومها على طول

بالنسبة ليا انا . دخلت المدرج عندى بليل .. وشرحنا الفكرة والناس جت وقدمت ورقها وبدأنا الانتخابات

كان فى بنات مرشحات وفى ولاد برضه .. ونزلت فى المدرج عملت حملة انتخابية ولفيت على البنجات .. والمهم فى الاخر كسبت انا و بنت اسمها شيماء

المفروض انه كان يتعمل انتخابات تانى يوم على مستوى الكلية .. لكن لضيق الوقت فالعملية مشيت .. لان المفروض بتاخد من المدرجات وتطلع على الدفعة ومن الدفعة للكلية
لكن ده محصلش والعملية مشيت .. ان انا امين مساعد الكلية وخلاص
طبعا فى اليوم ده كان مقررا ان تكون هناك مسيرة وتختتم بمؤتمر لانتخاب امين الجامعة وباقى اعضاء مجلس اتحاد الجامعة .. طبعا الاتحاد الحر

المهم فى اليوم ده خلاص الدنيا ماشية تمام ومفيش اى مشاكل

احنا علشان كنا كتلة فى الاتحاد الحر .. فاتجمعنا واتفقنا على المرشحين لمناصب مجلس الجامعة وتم الاتفاق عليها .. انا الحقيقة صدمت لما لقيتهم اختارونى اكون امين الصندوق .. مكنتش متخيل كده .. لكن يلا الحمد لله

وفعلا تم اختيار الناس وكنت انا اول واحد تم انتخابه لامين الصندوق وبعدها تم اختيار باقى اعضاء المجلس

وخلصت الانتخابات

فاكر بعدها .. بتوع تجارة مسكونى بقه .. ما صدقوا لقوا حد يمثلهم فى المجلس مع ان كان فى اخت من تجارة كمان نجحت فى المجلس :D
وجايين بيرفعونى فوق .. هووووب .. وقعت على ظهري .. اااه يا ظهري

الحمد لله ربنا سترها ومحصلش حاجة جامدة والحمد لله

طبعا بعدها حصلت حبة لقاءات اعلامية وكان المتصدر ليها الجعلى على طول .. والعملية مشيت

دى كانت انتخابات سنة ثالثة

بعدها اجتمعنا مرة واحدة فقط المجلس يعنى .. واتفقنا على حبة حاجات وخلصنا حبة حاجات

وكان فى كذا عمل اتعمل منها اللى اتعمل وانتهت السنة بحلوها ومرها على خير

طبعا الانتخابات دى عملت صدى اعلامى قوى جدا للجامعة واتعملنا ساعتها الف حساب .. والانتخابات بتاعت الاتحاد الحر بقت يعنى اللى مش لاقى حاجة يتكلم فيها ويملى بيها البرنامج بتاعه يتكلم على الانتخابات الحر
فكانت فعلا ضربة جامدة جدا .. خاصة انها جت مع العاشرة مساءا و90 دقيقة وعملت شغل جامد جدا

مرة كان من المفترض انه يكون فى لقاء لمجلس الاتحاد كله مع فريق قناة بريطانية .. فى مركب فى النيل .. بس معرفش كان عندى ايه ومروحتش .. وعرفت من الجعلى بعدها انهم طلبوا تأجيلها وبعدها متصلوش او حاجة كده

من المواقف الجامدة برضه .. كنت ماشى مرة فى الكلية فوقفنى واحد من طلاب الاتحاد كنت عارفه .. هو يمكن كنت عارف الرموز الى فى الاتحاد وهما عارفيني صحاب عادى .. المهم بيقولى البرنامج بتاعكوا ده فيه حاجات باخدها عليكوا
المهم فضلنا نتكلم ونتناقش واقنعته باللى موجود .. والعملية مشيت

من المواقف الظريفة اللى بتحصل .. اننا رسمي بنعادى بعض .. احنا والاتحاد المزور زى ما كنا بنقول .. وهما كانوا بيقولوا علينا الاتحاد غير الشرعي
المهم رسمي كنا بنعادى بعض .. لكن بعد ما نخلص بنرجع صحاب وعادى ولا كأن فى حاجة
يعنى فاكر مرة .. طلعنا لمدام كاميليا اللى ماسكة رعاية الشباب علشان نكلمها فى قصة الاختام وقصة اثبات النشاط .. فكان وليد شعبان امين الاتحاد الاسبق قاعد .. المهم الكلام سخن بيني انا واحمد عبدالمجيد وناس تانية .. وبين مدام كاميليا والموظفين .. ودخل على الخط وليد شعبان وشمس والعملية سخنت قوى فى الكلام
بعد ما العملية هديت شوية .. كان احمد عبدالمجيد بيتكلم مع مدام كاميليا .. رحت انا واتكلمت مع وليد وعادى ولا كأن فى حاجة حصلت
ومرة برضه .. كنت فى الكلية ماشى مع دكتور محمدي .. وقابلنا دكتور على الديب .. يعنى الاخوان والامن قدام بعض بس دكاترة
وقدرا .. كنت انا مع الدكتور محمدي .. وكان شمس تقريبا مع الدكتور على الديب
والدكتور محمدي اتكلم مع الدكتور على والعملية سخنت ببينهم خالص .. لدرجة ان الطلبة اتلمت افتكرت ان الدكاترة بيتخانقوا مع بعض ولا حاجة .. والنقاش سخن جدا والكلام كتير قوى والدكتور محمدي يخبط فى على الديب .. وعلى الديب يخبط فيا انا لانه ميقدرش يخبط فى محمدي :D
فكان الدكتور محمدي يخبط فيه وانا اخد الطريحة ودخل فى الخط شمس وناس تانية كانوا معاه .. وفى ناس من طلاب الاخوان كانوا معديين شافوا الزحمة فراحوا داخلين فى الخط وبقت لامة كبيرة

طبعا لا دول بيقنعوا دول .. ولا دول بيقنعوا دول .. والعملية كلام فى كلام

المهم ان بعدها كنت ماشى وقابلت شمس وايه يابنى وبتاع وبنتكلم عادى خالص ولا كأن كان فى لامة من شوية فى وسط الكلية

اييييه .. كانت ايام

بس طبعا .. انتخابات سنة رابعة كان ليها طعم تانى خالص .. كانت حاجة تانية خالص

ربنا يسهلها ويدينا عمرا نكتب عنها باذن الله

وربنا يكرم

Wednesday, September 19, 2007

يوم جامعات مصر

السلام عليكم ورحمة الله وبركاته

بداية واجب انى اعتذر للجميع

سواء على المدونة لانى مدخلتش من فترة طويلة بعد وفاة علاء رحمه الله
او اللى كانوا بيتصلوا بيا فى الفترة دى لانى مكنتش برد على حد .. حتى اختى لما كلمتنى علشان تعزيني مرديتش عليها ساعتها
وكان المفروض انى انزل موضوع عن رمضان كنت هنزل فيه حاجات كده .. لكن الحمد لله .. قضاء الله غالب على كل امر

سبحان الله .. الواحد بيحس ان على الرغم ان علاء ملحقش رمضان .. لكن ربنا بيحبه جدا
وده واضح خلال الحاجات اللى حصلت بعد وفاته
ان ربنا جعل وفاته سبب ان كتير من الناس تراجع حساباتها تانى .. وان كتير من الناس تفكر فى نفسها وفى حياتها .. وانا كنت واحد منهم
علاء خلاص افضى الى ما قدم وان شاء الله وجد خيرا .. لكن مشكلتى كانت فى نفسى وفى اعمالى
وكتير من الناس الشباب اصدقائه وقفوا للمراجعة خاصة ان رمضان داخل

برضه من الاسباب اللى بتخليني اقول ان ربنا بيحبه .. ان حصلت حبة حاجات
يعنى واحد صاحبى كان زعلان ومتأثر بالموقف .. ففى الشغل بيسألوه مالك فقالهم .. فقاموا كلهم ساعتها وصلوا صلاة الغائب عليه مع ان محدش اصلا لا يعرفه ولا شافه قبل كده
منها مثلا ان فى اكتر من 150 اخ من اخوان الكويت صلوا صلاة الغائب عليه فى المسجد الكبير اللى بيصلى فيه مشاري راشد
منها ان فى جمعية خيرية كانت عاملة افطار فى رمضان .. وكل المدعويين دعوا لعلاء ساعة الافطار
منها كل الاخوة واصدقائه اللى بيدعوله ليل نهار .. اعرف ناس والله الى الان .. بتدعيله كل يوم
حتى عامل المسجد بتاع الكلية عم عبدالفتاح .. كنت فى الجامعة يوم السبت فقابلته كنت بخلص معاه حاجة .. فبعد ما خلصت بقوله انت تعرف علاء ؟ لقيته جابلى سيرته كلها .. قالى علاء بتاع مشروع الفراخ ( كان بيديرها عن والده ) وكان بيعمل كذا كذا .. ده حبيبي علاء وكان بيهزر معايا و ... و .... وكان بيتكلم ببساطته وابتسامته الجميله المعتادة
المهم بعد ما خلص .. قلتله ادعيله الله يرحمه
كان عم عبدالفتاح بيكلمنى بعد ما قرأ الفاتحة عليه والدموع فى عينيه .. وفضل يدعيله وهو واقف معايا .. وقالى انه هيدعيله كل يوم
منها ان انا مرة كنت فى فطارين خارج البيت مع اصحابى .. وكنا بندعيله مجتمعين وفرادى

يعنى الشواهد كتيرة .. وكلها فى الاخر تدل على حب ربنا لعلاء .. وده واضح فى الحديث " ان الله اذا احب عبدا نادى جبريل . ... " الى اخر الحديث

فيعنى الحمد لله الواحد مكانش زعلان على علاء .. قد ما كان زعلان على نفسه
فالحمد لله على كل حال

ثانيا انا عملت مدونة رابعة اسمها خواطر عمر
http://omarthinks.blogspot.com/
المفروض انها تبقى omar thoughts
لكن لقيت الاسم ده واحد خده
المهم يعنى
المدونة دى هدفها انى اكتب خواطر .. افكار .. حاجات فكرية .. وكده
وهخلى المدونة دى بس لكتابة ذكريات الجامعة والمواقف المختلفة

ثالثا الناس تدعيلي واحنا فى رمضان ان ربنا يرحمنا ويرضى عنا .. واننا نخلص من الجيش وناخد تأجيل او اعفاء ان شاء الله .. ونشتغل ونتجوز بقه عشان العملية وسعت خالص وبتبوظ كل يوم اكتر من اللى قبله .. الله المستعان

رابعا بقه.. ان شاء الله هرجع اكمل فى احداث سنة ثالثة ورابعة
وخصوصا الانتخابات
فدعواتكوا ان ربنا يكرم ان شاء الله

سنة ثالثة تانى

كنت قلت فى اخر موضوع متعلق بسنة ثالثة عن قصة الاعلان عن اسم طلاب الاخوان وحكيت عن عين شمس والمجزرة اللى حصلت فيها

كان من المقرر من قبل مظاهرة الاعلان عن الاسم ... انه هيكون فى حاجة هتحصل .. لم تحدث فى تاريخ الحياة الجامعية ولا فى تاريخ مصر الى مرة واحدة فقط .. ودى هتكون المرة الثانية
وفعلا بدأ الاستعداد للحدث ده من الصيف اصلا
الحدث ده .. هو
مظاهرة جامعات مصر
ودى تعنى .. ان كل طلاب الاخوان فى جامعات مصر كلها فى كل محافظات مصر .. هتيجي فى يوم واحد فى وقت واحد فى تاريخ واحد وهتلبس لبس واحد وتشارك فى مظاهرة واحدة باسم واحد

تقريبا كنا بنتكلم عن 19 الف واحد من طلاب الاخوان فى مظاهرة واحدة فى جامعة القاهرة .. كلهم فى جامعة القاهرة

المظاهرة دى حصلت مرة واحدة سنة 1995 ساعة المحاكمات العسكرية لرموز الاخوان .. لكن ساعتها طلعت المظاهرة باسم التيار الاسلامى .. معنديش تفاصيل عن الموضوع ده
لكن فى 2005 كانت المظاهرة التانية

طبعا عرفنا قبل المظاهرة .. لكن مجالناش التاريخ تحديدا .. لكن كنا عارفين بالموضوع ده .. وكان متحددلها تاريخ 3/10 اللى هو يوم الاعلان عن الاسم .. لكن تم تأجيلها واتعمل مكانه يوم الاعلان عن الاسم لقياس رد فعل امن الدولة
فلما عدى اليوم تم تحديد يوم بعده وكان يوم 11/10/2005
فى رمضان برضه

قبلها كنا فى جلسة متابعة الاستعدادات لليوم ده
الحقيقة لو كان تم اليوم .. كما تم الاستعداد له .. كان هيبقى قنبلة اعلامية غير متوقعة

1- تم تقسيم الجامعات بحيث ان كل مجموعة جامعات تبقى مع بعض وهتدخل من باب معين
طبعا مش من الباب المتر فى متر ده .. انما فى ابواب للجامعة مقفولة من ايام ابو جهل .. فدى كانت هتتفتح غصبا وهيدخلوا منها
كان فى حوالى اربع ابواب هيدخلوا منها
2- ان الناس هتبقى متوزعة حوالين الجامعة .. وكل واحد عارف الباب اللى هيدخل منه .. وان كل الناس هتبقى واقفة على استعداد لحد لما اشارة معينة تحصل فكله يتحرك الى الباب المحدد له
الاشارة دى كانت راية زرقاء هترفع على كل باب .. وكل الرايات هترفع فى وقت واحد .. افتكر تم تحديد الوقت ده مع دقة ساعة الجامعة على الساعة 10 او 11 مش متذكر قوى
3- ان هيبقى فى مجموعة على كل باب تتولى مهمة فتح الباب بطريقة معينة .. كانت وضع مية نار فى القفل المصدى وتسيبه فترة .. بعدها تضرب ضربه خفيفة على القفل تلاقيه وقع حتت .. وتفتح الباب عادى بعدها
4- ان كل مجموعة دخلت من باب هتبدأ تلف الجامعة لحد لما تتجمع كل المجموعات عند مبنى القبة والباب الرئيسي
على فكرة المجموعة الواحدة اللى بتكلم عنها دى ممكن تكون 5 الالاف واحد ... لك ان تتخيل المنظر عامل ازاى
5- طبعا كانت فى اتصالات على مستويات كبيرة جدا لضمان تنظيم اليوم .. حتى ان فى ناس من الجامعات التانية جت قبلها بيوم وقضيت الليلة فى القاهرة .. وقضيت ليلة بعدها فى القاهرة علشان ميحصلش اى مشاكل امنية
طبعا الاستعدادات من كل النواحى كانت كاملة .. يعنى كل طلاب الاخوان فى جامعات القاهرة الكبرى تقريبا كانوا فى لجنة النظام لان العدد مهول جدا

المهم كانت كل حاجة ماشية زى الفل
بس كان فى حاجة واحدة بس وهي الحر وخصوصا اننا صايمين

المهم حصلت حاجة غير متوقعة ليلتها
وصلت رسالة .. انه يتم الغاء كل الاستعدادات ويتم تنظيم اليوم بالتنسيق مع امن الدولة

طبعا كانت مفاجأة كبيرة .. بس فهمنا بعدها ان امن الدولة عرف اللى هيحصل فاتصل على طول بمكتب الارشاد واتفقوا على ان الموضوع يتم بهدوء وبالتنسيق بين طلاب الاخوان وبين امن الدولة
طبعا عنصر المفاجأة اصلا اضرب .. فخلاص مش هتفرق
فتم التنسيق فعلا مع امن الدولة واتعمل اليوم

بس فعلا كان من اشد الايام اللى شفتها فى الجامعة دى

كده تكون نص الاحداث فى سنة تالتة خلصت

ولسه باقى النص التانى المتعلق بالانتخابات

طبعا الناس هتسأل ايه علاقة جامعات مصر بيوم الاعلان عن الاسم بالانتخابات

والعلاقة واضحة زى الشمس

وهى ان فى يوم جامعات مصر .. ومن قبلها الاعلان عن الاسم وقبلها مظاهرة معا للاصلاح

كلها بتصب فى حاجة واحدة وهى اصلاح الحياة الجامعية بشتى نواحيها

واهم ملفاتها رفع وخروج الامن من الجامعة , الحرية للطلاب , انتخابات نزيهة , حقوق طلابية كاملة فى ممارسة العمل الطلابى ولائحة عادلة .. حبة حاجات كده كانت تمثل كوارث بالنسبة للطلاب فى الجامعة

وطبعا كان من اهمها الانتخابات .. خاصة اننا بنتشطب .. والسنة دى كان الشطب بداية عمل الاتحاد الحر بكل تفاصيله

بس كده بكل بساطة اهو

المهم ربنا يكرم المرة الجاية اتكلم عن انتخابات سنة ثالثة

الله المستعان

صور اليوم على فليكر

Monday, September 10, 2007

وداعاً .. علاء

تحديث :

فيديو لعلاء جبة

http://www.4shared.com/file/24108556/7ba7c9ca/___.html

معرفتش ارفعه على يو تيوب

فممكن تنزلوه من فور شيرد او تتفرجوا عليه هناك على طول

بس تستنوا التحميل


السلام عليكم ورحمة الله وبركاته

كانت الساعة العاشرة صباحا .. وربما قبل ذلك بقليل .. استيقظ مسرعا ليرتدي ثيابه ويخرج ليكمل اعماله وصفقاته .. ويحقق احلامه وطموحاته ومشاريعه التى ارادها

لم يكن يدور بخلده ان هذه هى اخر مرة يزرر قميصه .. لم يكن ليعلم ان هناك شخص ما فى مكان ما مكتوب له ان يخلع عنه قميصه بليل .. لم يدري ان هذه هى اخر مرة يخرج فيها من بيته .. وانه سيذهب الى بيت اخر غير الذى اعتاد عليه .. لم يعلم انه لن يرى امه واخوته مرة اخرى الا فى بيت غير البيت .. ومكان غير المكان ... وعالم غير العالم
ربما كان يؤمل ان يعود الى البيت ليتناول وجبة عشاء بين اهله واخوته .. يا الله لم يستطع ان يحقق اخر امانيه

كم هى صعبة هذه الحياة ... مالى وللدنيا .. ومال الدنيا ومالى

كنت انا بين اهلى اتناول العشاء .. بينما كان هو يصارع الموت و يلفظ اخر انفاسه فى دنيا فانية

هل كان يعلم ان هذه السيارة التى سيركبها .. ستكون اخر ما يركب
هل كان علم ان ملك الموت قد نزل من السماء ليقبض روحه
هل علم ان هذه اخر مكالمة له فى الدنيا ؟؟

كم هى صعبة هذه المشاعر



غلبتنى عيناي واحسست برغبة فى النوم .. ذهبت لانام ولا شئ غير عادى

ومن حظى العاثر انى وضعت الموبايل بجانبى

واذا بى استيقظ على رنين مزعج .. كان صلاح يتصل بى

لم استطع الرد عليه .. وكنت اتوقع انى ساخرج فى نزهة اخرى ليلا

او انه يريد الحديث معى فى شئ

ووجدت رسالتين على الموبايل .. فتحت الاولى .. فاذا بى اجد بها وفاة اخونا ...

انتفضت .. اخونا من ؟؟ افتح الرسالة ايها الجهاز الغبى

فتحتها فاذا بالصاعقة


علاء جبة

يا الله

اهو هو !!

هل هو علاء الذى اعرفه ام انه تشابه اسماء ؟؟

ظللت ابحث هل يقصد ابوه .. ام امه .. ام احد اقاربه ؟؟

فتحت الثانية .. فاذا بها نعى لنفس الاسم

قمت مسرعا .. اتصلت بصلاح

ما هذا الذى حدث ؟؟

وكيف حدث .. لم يتمالك احد منا نفسه

اغلق صلاح الهاتف قبل ان يكمل

فوجئت بعدها بعشرات الاتصالات من اشخاص عديدين

وما يفوق سبعة رسائل كلها تنعى شخصا واحدا

لم استطع الرد على اى اتصال

الكثير اتصلوا .. ولم استطع ان ارد على احد منهم

قمت لكى اذهب الى اى مكان .. دخلت غرفة اخى التى بها الكمبيوتر



ويا سبحان الله

كان نائما والقرآن يتلى

وكان يقرأ الاية

" كل من عليها فان () ويبقى وجه ربك ذو الجلال والاكرام () فبأى الاء ربكما تكذبان "

لا نكذب ابدا ً

ذهبت بعدها .. اتصلت باحمد الريدي .. هل حقا مات علاء يا احمد ؟؟

اجب .. ما الذى حدث يا احمد

سكوت

اغلقت الهاتف

ظللت فترة لا اتحرك .. غلبتنى دموعى

ذهبت الى الجهاز اتفقد صور علاء عندى

هل حقا لن اراك ثانية ؟؟

هل حقا لن ارى اسمك على هاتفى مرة اخرى

لا .. انا فى حلم

لابد ان المقصود شخص اخر

قمت وتوضأت وصليت ركعتين

ولا اذكر انى دعيت بشئ الا لعلاء .. وبدعاء اللهم بلغنا رمضان

نعم لقد مات علاء قبل رمضان بيومين

يااااااااه .. ما اصعبها من حياة

ان تكون مشتاقا الى شهر الخيرات و يسبق عليك الكتاب

ان تنوي وتعزم على المضى قدما مسرعا الى الله .. و يكون قدر الله سابق

يارب .. هل سنعيش الى رمضان .. ان سيسبق علينا الاجل

-------------------------------------------------


علاء عصام جبة .. من الشخصيات المرحة ولديهم حس الدعابة بشكل كبير

كان يسبقنى بعام فى الدراسة فى الكلية

كل من تعرف عليه احبه حبا كبيرا ... حقا كان شخصا غير اعتياديا

بعدما تخرج بدأ يأخد الاعمال التى كان يقوم بها والده ... وبدأ يتوسع فيها ويحقق فيها نجاحات كبيرة

والله ان العين لتدمع .. وان القلب ليحزن .. وانا على فراقك يا علاء لمحزونون
ولكن لا نقول الا ما يرضى ربنا .. انا لله وانا اليه راجعون
عزائنا انك قد مت شهيدا

مات علاء .. ماتت احلام علاء .. ماتت روح علاء بيننا

وداعا ً .. علاء جبة
--------------
متابعة: علاء مات شهيدا .. غريقا بعد ان انقلبت السيارة الى كان يقودها ابن خاله
على طريق ترعة المريوطية يوم الاحد مساءا
رحمه الله .. وشفى ابن خاله شفاءا لا يغادر سقما

Sunday, September 9, 2007

حبة خواطر

تحديث:

يا الله .. يا الله

اللهم رحمتك ... انا لله وانا اليه راجعون

لله ما اخذ وله ما اعطى وكل شئ عنده باجل مسمى

يا رب ارحمنا يا رب العالمين

توفى الى رحمة الله تعالى

اخونا علاء جبة



هو من طلاب الاخوان واتخرج الدفعة اللى قبلى مباشرة

انا مش قادر اكتب عنه حاجة دلوقتى
بالله عليكم بالله عليكم

حلفتكوا بالله العظيم

انكم تدعوله ان ربنا يرحمه ويغفرله ويتوب عنه ويتجاوز عن سيئاته

يا الله .. قبل رمضان بيومين

يا الله .. قبل المغفرة والعتق بيومين

يا الله .. قبل ان تفتح ابواب الجنة بيومين

رحمتك يا الله .. عفوك يا الله .. كرمك يا الله

----------------------------------------------------------------------



السلام عليكم ورحمة الله وبركاته


يااااااه .. الواحد بقاله فترة طويلة مكتبش حاجة

يلا معلش اصلى كنت مسافر بعيد عنكوا بصيف فى بور سعيد

فالحمد لله

1- هناك فى بور سعيد بجد الحياة مش عارف الناس عايشين هناك ازاى .. الناس ميته كده ومحدش لا بيهش ولا بينش .. وكل واحد ماشى كأن الدنيا مطربقة على دماغه .. تركب التاكسى السواق قاعد فى حاله ولا فى دماغه حاجة اصلا .. وهناك الناس مش عارف طيبين ولا دى طبيعتهم ولا ايه .. لو اتنين داخلين الشارع مع بعض بعربياتهم . الاتنين يقفوا لبعض مش زى عندنا ( طبعا انا متعود على شارع الهرم والاتوستراد وكوبري اكتوبر .. القاعدة فى القاهرة انك لو لقيت سنتيمتر فاضى ادخل ببوز العربية الاول .. واللى خايف على بوز عربيته يروح )

هناك توقف التاكسى وتركب وتستريح .. وبعدها تقوله انت رايح فين .. والجدع اللى يقولك لا مش رايح علشان تبقى خراب بيته على طول ... لكن تعال هنا بقه .. ده من قبل ما تركب بيقولك هياخد كام وممكن يسيبك زى عمود النور ويسيبك

هناك ركبنا تاكسى مسافة زى من العتبة لحد اخر الهرم مثلا .. بجنيه ونص واتنين جنيه وتديله علقة كمان .. والراجل بياخد الفلوس ويحطها فى جيبه من سكات وميتكلمش فى اى حاجة
تخيل لو فى القاهرة اديته عشرة جنيه يعملك فرح فى الشارع ويسب فى العيش والعيشة والعربية اللى راكبها

المهم بقه فى المصيف الجامد ده حاجتين .. او حاجة مطعم جحا .. جحا ده شعاره " مش هتقدر تطلع من الحمام " ولما تدخل المطعم مع المنيو المفروض يكتب " ينصح الاطباء باستخدام فيلاجين بعد كل وجبة جحا "
احنا كنا تلاتة بس .. انا وخطاب مدونة كش ملك ومحمد انور .. احنا دخلنا المطعم وانور لقيته قلب وشه ومسك بطنه وطلع جري على الحمام .. جبنا الاكل واكلنا .. بات الليلة فى الحمام :D

بس فضلنا نهييس تهييس فظيع .. واحنا راجعين اصلا ضربت معانا تهييس على جحا ده .. الاتوبيس كله كان بيتفرج علينا والضحك اللى كنا بنضحكه
اما الحاجة التانية الجامدة جدا .. اننا فى يوم كده بعد ما صلينا الفجر كنا متفقين اننا هننزل البحر .. انور كان واخد دوا بيخليه ينام خالص فصحى صلى وكمل نوم .. ونزلت انا وخطاب البحر

بجد منظر شروق الشمس من البحر ده فظيع .. بالذات لما تكون فى سحب كمان وتلاقى الشمس مستخبيه ورا السحب و ترمي اشعتها الصفرا على السحب وعلى الارض ... يااااااااه سبحان الخلاق البديع .. لوحة فنية غاية فى الروعة والجمال .. انا بجد مش قادر اوصف منظره لانه فوق الوصف
وتخيل الشمس وهيا بتطلع ولو تركز فيها وتشوفها ثلاثية الابعاد .. يعنى تشوفها كأنها كوره معلقة فى الهواء بتطلع من البحر .. بجد منظرها لا يمكن تخيله فعلا ...

وانا قاعد ساعتها كنت بقرأ فى سورة النحل .. فتحتها وقريتها لانها ما شاء الله مليانة بالايات اللى بتتكلم عن الكون وعن خلق الله تعالى والنعم .. فكانت من ضمن الايات

" هو الذي انزل من السماء ماءاً لكم منه شراب ومنه شجر فيه تسيمون () ينبت لكم به الزرع والزيتون والنخيل والاعناب ومن كل الثمرات ان فى ذلك لاية لقوم يتفكرون () وسخر لكم الليل والنهار والشمس والقمر والنجوم مسخرات بامره ان فى ذلك لايات لقوم يعقلون () وما ذرأ لكم فى الارض مختلفا الوانه ان فى ذلك لاية لقوم يذكرون () وهو الذى سخر البحر لتأكلوا منه لحما طريا وتستخرجوا منه حلية تلبسونها وترى الفلك مواخر فيه ولتبتغوا من فضله ولعلكم تشكرون () وألقى فى الارض رواسى ان تميد بكم وانهارا وسبلا لعلكم تهتدون () وعلامات وبالنجم هم يهتدون () افمن يخلق كمن لا يخلق افلا تذكرون() وان تعدوا نعمة الله لا تحصوها ان الله لغفور رحيم () والله يعلم ما تسرون وما تعلنون () والذين يدعون من دون الله لا يخلقون شيئا وهم يخلقون () اموات غير احياء وما يشعرون ايان يبعثون () الهكم اله واحد فالذين لا يؤمنون بالاخرة قلوبهم منكرة وهم مستكبرون () لا جرم ان الله يعلم ما يسرون وما يعلنون انه لا يحب المستكبرين () "

الحقيقة لما قريت الايات دى حسيت بحاجة غريبة جدا .. ان ربنا سبحانه وتعالى كان بيتكلم على خلقه وقدرته جل وعلا ... من تسخير البحار والليل و النهار .. والشمس والقمر .. وغيرها من الاشياء .. بل وحتى ربنا تكلم عن البحر والسفن اللى بتجري فى البحر .. فعلا تحس بعظمة الله تعالى وتحس بانك ولا حاجة اصلا فى ملكوت الله .. يعنى لما تيجي تبص لمنظر شروق الشمس من البحر والسفن اللى فيه والسحب .. تستشعر فعلا عظمة وجمال الخالق سبحانه وتعالى .. فتحس بانك لا تساوى شئ اصلا جنب حاجة صغيره زى دى ..
وتلاقى الايه تقولك وان تعدوا نعمة الله لا تحصوها .. كدليل انك مفيش اصلا .. يعنى يوم ما تعمل البدع مش هتساوى اى حاجة جنب كل اللى فات ده .. وفى اللحظة دى اللى تحس بيها بصغرك المتناهى وقلة وزنك فى ملكوت الله تعالى .. تيجي الايتين ورا بعض بتسلسل غريب .. الهكم اله واحد .. اللى خلق دول هو اللى خلقك ..

اله السماوات والارض هو الهك .. البديع اللى ابدع الكون وخلاه بالجمال ده هو اللى خلقك فى احسن تكوين .. وتيجي الايه الاصعب .. لا جرم ان الله يعلم ما يسرون وما يعلنون

اوعى تفتكر ان صغرك المتناهى فى الكون ده .. يخليك تحس ان ربنا مش شايفك .. اوعى تفتكر ان العظيم البديع اللى خلق كل الى انت شايفه ده مش شايفك .. علشان كده كانت الايه اللى قبلها تؤكد ان رب السماوات والارض ورب الليل والنهار هو نفسه ربك اللى خلقك ورزقك

حد فهم حاجة من اللى قلته ؟؟

محدش هيفهم حاجة الا لما يكون مكانى ويشوف المنظر الجميل اللى شفته هناك

خلاص كفاية كده بقه على بور سعيد

اه افتكرت حاجة بس يوم ما كنا رايحين

انا كنت وصلت فى المكان اللى هنتقابل فيه بدري شوية لان الطريق كان مفتوح .. فقعدت على دكه كده مستنيهم
فحصلت حادثة بين خمس عربيات قدامى .. ازاى بقه
كانت عربية كورولا جديدة بتقطع الشارع (تقاطع) علشان تعدى وتكمل .. وجنبها تاكسيين على شمال الكورولا
كان فى ميني باص بتاع الهيئة وقف للكورولا علشان يعدى .. فهو كان بيعدي من قدامه .. وجه واحد ترامكو كشك بسرعة ومقدرش يقف .. فجاى يفادى الميني باص بتاع الهيئة من على اليمين .. كان الكورولا بيعدى فى نفس الوقت
فرزع فى الكورولا من الجنب .. ومن شدة الخبطة والسرعة الكورولا جاب التاكسيين اللى جنبه ورزعهم وجاب لوحد منهم الباب والتانى معرفش الازاز اللى قدام طار ووقع على الارض وحاجات كده غريبة
طيب ايه يعنى اللى حصل بقه ؟؟
ان انا كنت قاعد على الدكة .. ووشى كان ناحية الحادثة من قبل ما تحصل اصلا .. يعنى كنت شايف كل حاجة قبل ما تحصل واثناء ما هى بتحصل لحد لما حصلت خلاص
وانا كنت قاعد ببصلها وحاطط رجل على رجل
الاسوأ بقه .. ان الترامكوا كان جاى فى وشى .. يعنى بعد ما لف علشان يفادى الميني وخبط فى الكورولا .. هو خبطه وزاحه فى الطريق ناحيتي .. كان جاى ناحيتي فعلا بالكورولا والتاكسى
كل ده حصل .. وانا كنت قاعد بكل برود .. الترامكوا كان بيزيح الكورولا قدامه وجاى ناحيتي وانا قاعد ومتحركتش
مش علشان انا خايف ومش قادر اقوم .. انما انا قاعد برود .. اللى هو وايه يعنى ما تجيبه وتيجي ايه اللى حصل يعنى من كتر ما شفت حوادث وحصلتلى حوادث الموضوع بقه عادى .. زى الدكتور اللى اتعود يشوف الدم والجثث فمبقاش يفرق
المشكلة ان الترامكوا كان جايب العربية الكورولا ناحيتي فى الاتجاه اللى انا قاعد فيه .. وانا ولا هنا اصلا

وايه .. الحادثة حصلت ووقفوا خلاص .. والناس نزلت واللى وشه دم واللى ايده متعوره .. وانا قاعد مكانى ولا احرك ساكنا ... ولا كأن فى حاجة خالص
والناس تجري ويجيى عشروميت واحد اتصلوا بالاسعاف وانا قاعد وحاطط رجل على رجل ولا كأن فى حاجة قدامى
وفين وفين بعد الهنا بسنة قمت رحت بصيت على الكورولا .. عرفت ان بتاع الترامكوا هيكع دم قلبه وهيبيع اللى قدامه واللى وراه علشان يصلح الكورولا بس ( العربية شيست وفيها قايم اتنى لجوه ده غير الابواب جابت ضرفها ) واحتمال يبيع حياته علشان يكمل تصليح فيها وبعدها رجعت قعدت تانى مكانى ولا فى الدماغ

احلى ايام حياتى


2- يوم الثلاثاء اللى فات .. كان فعلا من اجمل ايام حياتى
هي كانت حفلة للاولاد الصغيرين وكده .. المهم يعنى ان الحفلة دى كانت من احلى واجمل الحفلات اللى شفتها وحضرتها
بجد الاولاد دول حاجة جميلة جدا .. وبجد عملوا حفلة انا مكنتش متخيل انى انبهر بيها بالشكل ده
لان فى البروفات كان باين ان الحفلة ضاربها عين الحسود والاولاد مكانوش بيمثلوا اساسا
بجد فى الحفلة دى الاولاد ابدعوا فيها بشكل غير عادى

ولما جينا فى اخر الحفلة فضلنا نهرج مع الاولاد ونلعب معاهم على المسرح ... وجبنا اسبراي التلج ورشيناه عليهم وشيلناهم وحدفناهم فوق واحد واحد .. وخلصت الحفلة بنجاح ساحق بدليل كل الناس اللى حضرتها

لما كنت مع واحد كده بنكلم على الحفلة فقال ان الحفلة دى تنافس حفلات بتعملها مدارس لغات فى نفس المنطقة وبيصرف عليها مبالغ لا تتخيلوها .. وبيجيبولهم مدرسين متخصصين فى المسرح
ومع ذلك مبتطلعش بنفس الكفاءة والروح دى
فعلا .. الروح اللى كانت بين الاولاد كانت عالية جدا
هما كلهم صغار .. بس كانوا كلهم حاجة واحدة .. لما يحصل ان واحد يربت على كتف التانى ويشجعه على الاداء اللى عمله .. ولما واحد صغير عمره سبع او ثمن سنين يبكى جامد قوى .. والسبب .. ان الحفلة خلاص بتخلص وانه مش هيروح ويشوف زمايله تانى .. وواحد تانى كان بيعلب والدموع فى عينه بيحاول يحبسها لكن تغلبه دموعه وهو بيلعب فى اخر الحفلة مع زمايله

ساعتها نعرف الفرق بين الحفلة دى بالامكانيات المتواضعة بتاعتها والمشاكل اللى كانت فيها للصبح .. والحفلات التانية اللى بيتصرف عليها بشكل غير طبيعي

ولو جينا نفسر اكتر بين اسباب نجاح حفلتنا وفشل حفلات مدارس لغات متخصصة .. صحيح هيا الروح بين الاولاد وحبهم لبعض .. بس الحب ده لانه مرتبط فى اذهانهم بالله تعالى .. مش لمصلحة ولا لان ده جدع وده مش عارف ايه .. لا كلهم كانوا فعلا بيحبوا بعض وبيخافوا على بعض علشان ربنا يرضى عنهم كلهم

كانت حفلة جميلة جدا جدا .. والاولاد فرحوا جدا

وده كان المطلوب

رمضان السنة دى


طبعا كلنا خلاص مستعدين لرمضان .. الا انا للاسف ..
الحقيقة ان موسم الطاعات اللى تكمل بيها للموسم الجاى هيبدأ كمان ساعات قليلة
فهل احنا عارف ومحددين هنعمل ايه ؟؟
مش مهم تكون استعديت فى رجب وشعبان بالصيام والقيام .. خلاص مش مشكلة لو معملتش كده
بس الاهم انك تكون عارف ومحدد هتعمل ايه فى رمضان
طبعا مش هقولكوا على الشرائط اللى تسمعوها .. لكن بجد نصيحة لازم تسمعوا شريط رمضان وبناء الامة للدكتور راغب
احنا فى حاجات كتير بنعملها من غير ما نفهم طبيعتها او نعرف هدفها والمقصد من وراها .. وحجتنا فى كده ان دى اوامر ربنا او نواهيه فخلاص مش لازم نسأل .. وده غلط كبير لان ده بيفقدنا الاحساس باللى بنعمله .. بحس انى بصمجى عايز اخلص الفرض وخلاص
لكن لما نفهم المقاصد بتاعت الفرض ده ونتعلم ايه المطلوب مننا .. خاصة لما نعلى بتفكيرنا لفوق ونبص على الموضوع من زاوية كبيرة بعيدة عن زواية ( أنا ) هنفهم حاجات كتيرة قوى
وده الى بيعجبنى فى الدكتور راغب السرجانى قوى .. وده اللى هيعجبكوا قوى فى شريطه الجديد القديم رمضان وبناء الأمة

حاجة اخيره وهى ان الدكتور خالد ابو شادى هيصلى فى الرواس فى رمضان .. الدكتور خالد بقه من الاخر .. ان شاء الله هحاول انى اروحله كل يوم ان استطعت الى ذلك سبيلا

كمان حاجة معلش .. جدول برامج التيلفزيون الحمد لله جالى دلوقتى على الميل . من ايمن نيل ربنا يكرمه جمع كل البرامج الى هتيجي
طبعا دماغكوا راحت لبعيد .. وافتكرتوا انى بتكلم على الفوازير والافلام والمسلسلات .. لا انا باتكلم على دروس المشايخ اللى هتبقى فى التلفزيون

انا فى حبة حاجات الصراحة عاجبانى جدا وان شاء الله هحاول انى اتفرج عليها كل يوم باذن الله
منها برنامج فجر امة للدكتور ياسر نصر ( الراجل ده بحبه جدا جدا جدا )
ومنها النبأ العظيم للشيخ حازم صلاح ابو اسماعيل ( ده بقه بحبه اكتر من اللى قبليه .. جامد جدا جدا جدا )
واهم برنامج المبدعون وروائع القصص بتاع الدكتور طارق السويدان ( مش ممكن هفوتله حلقة ان شاء الله )
وبرنامج الاحاديث القدسية للدكتور عمر عبدالكافى
وبرضه خواطر شاب بتاع احمد الشقيري لو لقيتله وقت

يعنى فى برامج جامدة بجد خسارة الواحد يضيعها
عامة لو حد عايز البرنامج يبعتلى على الميل بتاعى اللى انا حاطه فى المدونة وابعتهوله ان شاء الله تعالى


هييييييييه .. معلش ده كان فاصل وان شاء الله هرجع اكمل قصة الانتخابات فى وقبلها الحدث الاهم فى سنة ثالثة ونهاية السنة
وربنا يكرم ان شاء الله تعالى