Wednesday, May 30, 2007

يوم ما رحت احج - الجزء الاول

السلام عليكم ورحمة الله وبركاته

طبعا انا عارف ان الناس زعلانة علشان بتدخل ومش بتلاقى حاجة جديدة تقراها

ويمكن سبب الزعل هو انها لحد لما افتكرت الاسم ويمكن عملت سيرش على جوجل .. بس ان شاء الله هكتب باذن الله
الافكار كتيرة بس المشكلة فى الوقت

المهم الاول دعواتكوا علشان الامتحانات .. لان الدكاترة بيعاملونا معاملة اسوأ من معاملة ابرهه للفيلة لما كان رايح يهدم الكعبة


دكتور جاب امتحان اربع صفحات .. ودكتور جاب امتحان عايز ساعتين دبل علشان يتحل
واللى جاى ده ربنا يهديه اصلا

المهم بقه انا عايز اتكلم على احلى ايام فى حياتى كلها

بجد كانت فعلا احلى الايام بمعنى الكلمة

الحقيقة انا كنت بصلى العشا قريب . فكنت واقف جنب واحد .. يااااه

كانت ريحته زى ريحة الحرم بالضبط

ياااااه .. كانت ريحته مميزة وجميلة جدا زى الحرم بالضبط

طبعا سيبكوا من الصلاة لانها تقريبا باظت علشان مفيش تركيز .. وكنت بفتكر احلى ايام حياتى .. ايام الحج

:: البداية ::


انا اصلا كنت عايش فى السعودية فترة كبيرة من حياتى .. وبعدين كنت جاى على مصر علشان امتحانات الثانوية العامة فكنت جاى على امتحانات سنة تانية ثانوى .. فبابا قالى تعال علشان تحج قبل ما تسافر لانى كنت خلاص جاى مصر نهائى مش هرجع تانى السعودية
فرحت احج

كان من عادة الاخوان فى السعودية انهم بينظموا رحلات الحج داخليا للاخوان فى الداخل .. فبابا حجزلى وحجز ليه معاهم
تقريبا بابا كان بيحج لجدتى .. المهم رحنا وبدأت معاها احلى اربع ايام فى حياتى

اتقابلنا يوم 8 الصبح فى جدة فى مسجد مش فاكر اسمه ( بس المسجد ده بينفذوا فى ساحته احكام الاعدام )
المهم انطلقنا من هناك على العصر على مكة على طول .. رحنا على طول على الحرم مباشرة وعملنا الطواف
ثم طلعنا على الفيلا المخصصة علشان نقعد فيها ..
انا فاكر ان ساعتها ومازال حتى الان .. الحج للمقيمين فى داخل السعودية بالتصاريح
فنص الاتوبيس مكانش عامل التصاريح .. المهم طلع الضابط وكان شاب صغير
فبص على التصاريح .. فكان خد قرار ان الاتوبيس يرجع ..
وبعدين وهو نازل بس على الناس .. والناس كلها بتقوله خلينا نروح نحج .. مش تمنعنا عن الحج وعن ربنا ..
فقال ماشى .. بس بشرط
قال تدعولى ان ربنا يرزقنى الزوجة الصالحة
يانهااااااااااااااااااااااااااااااار

الاوتوبيس كله كان بيدعي ان ربنا يرزقه الزوجة الصالحة .. وناس بتهزر معاه فناس دعوله باتنين وتلاتة
المهم دخلنا وعدينا
لما رحنا الفيلا .. الفيلا من جوه فيها جنينه كبيرة وكانت مفروشة علشان ننام فيها
لان جوه الجو حر جدا وكانوا جايبين تييكف صحراوى فى الجنينة ومقفلينها كمان
وكان فى فيلا تانية للاخوات
المهم تانى يوم استعدينا علشان نروح لعرفات .. وفعلا مع الصباح الباكر بدأنا فى الذهاب الى عرفات

:: يوم عرفات ::

فى اليوم ده وصلنا عرفات على الساعة 10 صباحا .. لان الطريق بيبقى صعب جدا وبتمشى خطوة خطوة .. لو انت ماشى على رجلك هتوصل اسرع من الاتوبيس

وصلنا للخيم المحجوزة لينا .. وقعدنا فيها
فضلنا ما بين دعاء وصلاة وذكر وقراءة قرآن وفقرات مفتوحة للى عايز
وهكذا
ساعتها انا فاكر انى رحت خيمة تانية فاضية معمولة للى مش عايز يسمع الدرس يروح فيها او اللى عايز ينام
رحت فيها انا وواحد تانى من الشباب وقعدنا فيها ندعى ونقرا قرآن .. وفاكر حتى واحد من الاخوان اللى بحبهم جه معانا وفضلنا ندعى مع بعض كلنا
كان شعور جميل جدا جدا
المهم جينا على العصر كده كنا جبنا جاز وعايزين ناكل
المهم الاكل بتاع المكان مش عجبنا .. فقررت انا والاتنين الشباب على اننا نطلع نجيب اكل
( ملحوظة .. فى الرحلة دى مكانش فيها غير حوالى خمسة شباب فى سن الشباب زيي اقصد .. فكنا مقضينها صباح الفل )
فطلعنا ثلاثة بس وفضلنا نلف ولقينا واحد ربنا يكرمه كان جايب عربية .. وبيوزع اكل .. كانت علبة فيها مياه وباتيه وحاجات خفيفة .. بس كانت فى الجون بالنسبة لينا فى الحتة اللى مفيهاش محل يوحد الله

المهم رجعنا للناس .. وكنا بدأنا الاستعداد للتحرك الى مزدلفة
طبعا الناس متحركش على الاتوبيس الا لما المغرب دخل
وكان كل ما وقت المغرب يقرب نسمع الدعاء بشدة وبحرقة اكتر
لدرجة ان الناس خرجت بره الخيم وفضلت تدعى بشكل هيستيري مع الدعاء
انا فاكر ساعتها كنت واقف ابص عليهم ومستغرب جدا

المهم خلصنا من عرفات وراجعين بقه .. فاللى بيحصل ان الناس بتاخد نفس الطريق .. بس بتلف العربية وترجع تانى
فحلنى بقه لما الناس تلف وتبدأ ترجع .. ممكن تقعد فيها اربع ساعات لحد لما تطلع
طبعا احنا فى الاتوبيس
هختم الموضوع ده بحادثة ظريفة جدا جدا للسواق السوري

وهو بيلف الاتوبيس .. كان فى بوكس كهربا وراه ..
فالضابط جاله وقاله اوعى تتحرك علشان متعملش كارثة .. خليك زى ما انت لحد لما اقولك اتحرك
السواق السوري بصله كده شذرا !!
ولسه الضابط واقف على الباب جنبه .. راح جايب ورا وطلع قدام لحد لما عدل الاتوبيس
فالضابط كان هيتجنن من اللى بيعمله السواق .. فهو بره الاتوبيس بيزعق
فالسواق بتلقائيه .. قال
" ايش بو هادا عم بيعيط ؟؟ "
انا فاكر ساعتها فطسنا على نفسنا من الضحك
مكناش قادرين خالص
وكنا كل شوية نروح نقوله الكلمة دى ونهزر معاه بيها .. احنا الشباب اقصد طبعا
كان سواق زى العس مش ممكن .. بجد راجل فظيع جدا ربنا يكرمه

المهم استنوا بقه الايام الجاية .. دى فيها الشغل التقيل بجد بقه مش بتهريج

يلا كمان شوية ودعواتكوا علشان العملية تمشى والامتحانات تعدى على خير

والسلام عليكم ورحمة الله

Wednesday, May 23, 2007

عن عقلية اصحاب المناصب الكبيرة اتحدث

السلام عليكم ورحمة الله وبركاته

ايييييه .. مش عارف ابدأ اقول ايه

عندى امتحان بكرة .. ولسه داخل من بره كنت فى مشوار مع ماما بتشترى حاجات للبيت

عادى خالص .. بحب انى امارس حياتى عادى خالص فى ايام الامتحانات حتى

المهم .. انا كنت ناوى انى اكتب النهاردة عن احلى ايام حياتى بجد

احلى فترة فى حياتى .. كنت ناوى اكتبها واتكلم عليها فى الموضوع ده

بس حصلت النهاردة حاجة خليتنى اغير رأيي دلوقتى واكتب موضوع تانى

ايه الموضوع بقه ؟

النهاردة الصبح صحيت بدري كالعادة ورحت اشترى الفطار .. المهم محدش كان صاحى غير انا وبابا وعملت الفطار وقعدنا نفطر

فبابا بيقولى انت عرفت الطلبة بتوع الازهر واللى حصلهم ؟؟

قلتله اه .. انهم خدوا مجالس تأديب وطلعوا منها بفصل تيرم وعام دراسى كامل

المهم بابا بيقولى ان بتوع الازهر دول عايزين ×××× وان اللى بيعمله رئيس الجامعة فيهم ده ×××

وكده افهموا انتوا بقه

فانا بقول لبابا لا .. ده فى حلوان اسوأ كمان .. هناك فى حلوان اتفصلوا تيرمين وتلاتة ولحد ثلاثة سنوات كمان

وبقوله ان رئيس جامعة حلوان عضو لجنة السياسات ومزبط نفسه على الاخر ..

فبابا بيقولى يعنى ده حق ولا يرضى حد ده ؟؟؟ اما الطلبة امن الدولة ياخدهم ويوديهم للنيابة والنيابة تقول دول براءة ومفيش عليهم حاجة

قالى وانتوا فى القاهرة فى حاجة ؟؟

قلتله لا .. القاهرة عندنا وضعنا مختلف . لان التسليط الاعلامى علينا مبيخليهومش ياخدوا اى حاجة خالص ضدنا


بابا قالى يعنى ايه الاعلام .. هيأثر فيهم بحاجة ؟؟ ولا حتى بيخليهم يتراجعوا عن اى حاجة عايزين يعملوها

فقلتله هما فى كل الاحوال مش هيعملوا حاجة .. لكن على الاقل لما بيوصل للاعلام بيخافوا لان ده بيزود مشاعر الكراهية ضد النظام

وحكيتله على قصة بنت معانا فى الدفعة كانت بتكره الاخوان من غير سبب كده .. فلما حصل موضوع الانتخابات واتشطبنا واضربنا بليل فى يوم الاربع المجيد ( فكرونى اكتب عنه لانه مهم جدا وفى حاجات عايز اتكلم عليها فيه ) جاتلى البنت تانى يوم .. وكانت هتعيط من اللى شافته وتحولت 180 درجة .. بل يمكن بقت تساعدنا اكتر واكتر وتقولنا على اى حاجة هيا شايفاها غلط وغيرت فكرها تماما عننا وده المطلوب

بل وصل الموضوع لان فى بنات جم يومها بليل .. ولحد الساعة 10 بليل وكانوا معانا ومرضيوش يروحوا وقالوا احنا هنفضل معاكوا .. هبقى اعمله موضوع منفصل ان شاء الله

المهم لقيت بابا بيقولى .. يعنى العميد بتاع الكلية ده ..هما خدوا براءة وهو يحولهم مجلس تأديب

فانا بقوله يا بابا .. العميد مش بيفكر بالشكل ده خالص .. العميد مش بيبص للموضوع على ان ده حقهم انهم يترشحوا وانهم ينتخبوا ..

بابا قالى طبعا انا عارف ان امن الدولة اللى بيحركه .. قلتله بالضبط

وفضلنا نحلل فى شخصية وعقل عميد اى كلية ( لا اقصد احدا بعينه او بقفاه .. علشان محدش يقص ويلزق )

فتوصلنا لكذا نقطة مهمة جدا

عقلية اى مسئول حكومى

1- ان العميد قدامه العديد من الملفات .. احدها الطلاب .. يعنى العميد عنده ملف الموظفين .. وملف التعليم والمحاضرات والعملية التعليمية .. وعنده ملف الدراسات العليا ومناقشة الرسائل العلمية .. وعنده ملف الابحاث الاكاديمية .. وعنده ملف الجامعات الاخرى والشراكة معاهم والاتفاق على جسور تواصل .. وعنده اعضاء هيئة التدريس وانه لازم يلبى طلباتهم .. وعنده الاعمال الادارية والروتينية اليومية .. وعنده مقابلات مع الشركات .. وفى الاخر ملف الطلاب ورغباتهم وطلباتهم

2- انه حتى فى داخل ملف الطلاب .. فان عدد الطلاب الذين يشكلون ضغطا على العميد لكى يعيد اليهم حقوقهم ليس كبيرا ... فما وزن 100 طالب هم طلاب الاخوان مثلا من بين 55 الف طالب هم تعداد طلاب كلية التجارة على سبيل المثال ؟؟
وفى ظل وجود العديد من الملفات الاخرى .. فما هى نسبة هؤلاء الطلبة القليلين من ملف واحد من بين العديد من الملفات الاخرى ؟؟

3- ان المشكلة اصلا فى الاساس .. ليست بينه كعميد للكلية وبين هؤلاء الطلاب .. انما المشكلة بالاساس هى مشكلة بين امن الدولة وبين طلاب الاخوان .. والتى هى اصلا جزء من مشكلة ازلية ومستمرة بين امن الدولة بشكل عام والنظام القائم من ربع قرن .. وبين جماعة الاخوان المسلمين فى الخارج ؟؟ وامن الدولة يتجسد فى الكلية فى شكل عميد الكلية والوكيل .. فلماذا يحشر نفسه فى
صراع مستمر استمرار وجود بنى ادم على وجه الارض ؟؟

ولما ننظر للموضوع من هذه الزاوية نستطيع تفسير الاتى :

1- نستطيع تفسير عدة اهتمام عمداء الكليات بملف الانتخابات الطلابية .. وعدم اعارتهم اهمية لاعادة حقوق الطلاب المفصولين من قبل امن الدولة
2- نستطيع تفسير الانصياع التاام لطلبات امن الدولة .. فليترك الجمل بما حمل .. فليترك امن الدولة ليتولى ملف طلاب الاخوان ( مع تذكر وزنهم ) فى المقابل يتفرغ هو لاداء باقى الوظائف الاخرى وينهض بالكلية
خاصة ان امن الدولة هو الذى يتدخل بشكل مباشر فى تعيين العمداء . اى ان لهم فضلا عليه منذ البدء

دلائل ومؤشرات

هذه بعض الدلائل ازعم انها تؤيد وجهة نظري فى هذا الموضوع:
1- نزول العميد بنفسه لتقطيع ورق الدعاية مثلا او ورق خاص بالاخوان .. مع انه من الممكن ان يرسل احدا ليقوم بذلك .. وهذا يعنى انه قد اخذ " علقة سخنة " من احد او طلب منه القيام بذلك

2- عندما نزل العميد بسبب قيام طلاب الاخوان بعمل معرض فى الساحة فى كلية التجارة ومع الوكيل .. لا ادري كيف اصف لكم طريقته وشكله فى التعامل مع ان المعروف عنه هو الهدوء والطيبة والكلام الجميل والوجه الحسن والشياكة ايضا .. ولم يقل اى شئ سوى " هات الكارنيه " يعنى كان نازل علشان مهمة واحدة وهى اخذ الكارنيهات " كما طلب منه "

3- انه عندما حصلت المشكلة فى الكلية والغى امن الدولة حفلة القسم بسبب وجودى فيها . وعندما كنت عند رئيس القسم بعدما استدعانا انا وباقى فريق الحفلة .. سألنى هل انا من الاتحاد الحر ؟؟ فقلت بانى كنت وان النشاط انتهى .. فقال لى بكل بساطة .. انا لا امنعك من ممارسة ما تريد .. مارس اى نشاط تريد .. لكن لا تؤثر على شغلنا
وهذا يعنى انه حتى لا يرغب فى معرفة ماذا نفعل .. لان الموضوع ليس ذا اهمية لديه

4- واخيرا .. الدكتور عميد كلية الطب السابق .. رأى منه طلاب الاخوان ما لم يره احد فى جامعة القاهرة .. وبعد ان ترك عمادة الكلية .. اول مقالة كتبها ونشرت فى المصري اليوم .. كانت عن التدخل والتعسف الامنى وتدخل امن الدولة فى الكلية .. وكان يعلن موافقته لموقف الطلاب الرافض لهذا التدخل .. بل ان احمد الجعلى وهو من طلاب الاخوان فى كلية الطب واحد رموز وكوادر طلاب الاخوان فى القاهرة.. لم يصدق عينيه بان هذا الذى يتحدث هو نفسه الذى كان يفصلهم ويمنع دخولهم الكلية اصلا
5- حصل ان قام طلاب الاخوان بعمل معرض مضاد للتعديلات الدستورية ونزل وكيل الكلية ومعه دكتور اخر ... ولم يستطع الوكيل ان يقول جملة مفيدة فى ذلك الوقت .. فكل ما كان يصبو اليه ويريده هو ان يتم فض المعرض .. بل انه نفسه لم يكن على دراية بسبب المعرض او بالذى حدث .. فكل ما كان يسأله .. معاكوا تصريح .. طيب شيلوا الكلام ده دلوقتى

6- اخر شئ اختم به .. وهو شئ علمت به من فترة ليست بالبعيدة .. ان اى دكتور .. يتم تعيينه فى منصب كبير .. يجب ان يكون قد حصل على عضوية الحزب الوطنى قبلها .. واترك لكم التعليق

------------------------------
ملحوظة .. فى حاجات متصورة فيديو هبقى ارفعها لاحقا وانزلها على المدونة بسبب الوقت والمذاكرة

معذرة على الكتابة بسرعة وعدم تنسيق الكلام بشكل جميل

Wednesday, May 16, 2007

يوم ان عرضت البحث فى المدرج

السلام عليكم ورحمة الله وبركاته

النهاردة بقه هكلمكوا على اخر جزء من البحث


واحلى جزء من حياتى .. الحقيقة مكنتش عايز اكتبه الفترة اللى فاتت بسبب حالتى النفسية .. لانى محتاج انى اكتبه بذهن صافى

لانه كان احلى ايام حياتى فعلا .. فمكانش ينفع اكتبه وانا فى حالة الاحباط والزعل واللى يمكن مازالت مستمرة الى حد ما

المهم بقه نكمل بقه البحث

بعد ما خلاص رجعت من البنك .. وخلصت البحث وكنت بكتب اللى بشوفه واللى بحس بيه من غير ما الراجل يعرف حاجة .. كانت المهمة الاصعب انى اكتبه فى صياغة بحث على الكمبيوتر

المهم روحت الاول وكتبته بخط ايدي علشان كان لازم اقول للدكتور واجيبهوله تانى يوم يشوفه .. وفعلا رحتله بيه .. قالى اكتبه على الكمبيوتر الاول وبعدين نشوفها ( بيني وبينكوا ومتقولوش لحد .. مكانش عارف يقرا حاجة اصلا )

المهم كتبته واخد يوم كامل وبعته بالميل وطبعته كمان علشان اروح بيه للدكتور عبدالحميد تانى يوم

فعلا رحتله .. وفضلت اتناقش معاه فيه وفى كل جزئيه .. وكان فى اجزاء ناقصة كملتها فيما بعد
واتفقت مع الدكتور على انى اعمل العرض البريزنتيشن وابعته للدكتور علشان يشوفه ويتابع الموضوع

وفعلا روحت وعملته وبعته للدكتور .. شافه وعجبه .. وطلب منى اعدل حبة حاجات وخلاص كله كان تمام

قبل العرض بيوم

قبل العرض بيوم كنت عند الدكتور كالعادة بتابع اخر اللمسات الاخيرة .. المهم الدكتور قالى لو عرفت تجيب لاب توب وداتا شو وتعرضه هيبقى احسن .. قلتله حاضر هشوف
لما خرجت من عنده قابلت واحد اعرفه وقلتله على الموضوع بكرة وبتاع .. قالى بص .. بكرة الصبح هيكون عندك لاب توب وداتا شو وتشتغل عليهم
قلتله بجد ؟؟ قالى اه

طبعا انا كنت هطير من الفرحة .. ورحت جرى للدكتور وقلتله .. قالى كويس .. خد رقم التيلفون وقابلنى الصبح قدام الجامعة ادخلك بالحاجات دى بدل ما تدخل بيها كده

قلتله حاضر وده كان اتفاقنا

طبعا روحت يومها بسرعة علشان اعمل البريزنتيشن على الباور بوينت ( لانى كنت عملته وطبعته على ورق ترانسبيرس .. ورق شفاف بيستخدم فى البروجيكتور )

المهم فعلا عملته وخلصته متأخر

يوم عرض البحث

يومها صحيت بدري ونزلت بسرعة علشان كنت متأخر اساسا .. واكتشفت اكتشاف عظيم ... ان الساعة اتغيرت .. فالحمد لله كنت رايح بدري فحت

المهم .. رحت استنيت الراجل اللى هاخد منه الداتا شو واللاب ... مجاش
يانهااااااااااااار
اتصل بيه .. مش بيرد

فضلت مستنى .. الساعة قربت على 8 الصبح معاد لقائى بالدكتور علشان ندخل
مجاش ..

اتصل بيه تانى .. لسه مجاش

المهم الدكتور جه .. طبعا كنت فى قمة الاحباط والخجل من الدكتور .. هقوله ايه
المهم قلتله يا دكتور معلش فى مشكلة الظاهر انه نايم او حصل حاجة .. المهم الدكتور قالى خلاص مش مشكلة اركب خلينا نروح المحاضرة
الحمد لله ان انا ساعتها كان معايا الورق الترانسبيرنس احتياطى .. معرفش كنت مقلق فجيبته معايا احتياطي

فى داخل المدرج

طبعا دى كانت اخر محاضرة .. فالزحمة كانت موووووووت .. والدنيا كانت صعبة جدا
المهم الدكتور دخل الاول وشرح حبة حاجات فى المنهج واتكلم على الامتحان وكل حاجة والبحث وهيجي ازاى فى الامتحان وخلافه
وبعدها كانت اللحظة اللى كنت مستنيها .. اللحظة اللى كنت بحلم بيها .. اللحظة اللى كنت بتخيلها فعلا

بجد والله مش مبالغة .. بس انا من ساعة ما قررت انى اعرض البحث فى الاول خااااااااالص قبل ما اعمله اصلا .. كنت والله بتخيل اللحظة دى
بتخيل طريقة دخولى ووقفتى .. بتخيل اللبس اللى هبقى لابسه .. والكلام اللى هقوله .. وبتخيل كل لحظة منها كأنها بتحصل ..
علشان لما اجى انفذ بجد .. انفذها زى ما تخيلتها فعلا ..

الدكتور قال ودلوقتى هنشوف واحد عمل بحث وهيعرضه علشان يفيدنا كلنا
طلعت .. بجد شعور كان فوق الوصف
شعور من التوتر والخوف والرهبة .. مع شعور بالفخر والاعتزاز والفرح
بجد انا كنت فرحان جدا .. فرحان بسبب حاجة واحدة

ان دى اول مرة احط هدف قدامى واسعى لتحقيقه بكل قوة
ان دى اول مرة فعلا يكون عندى هدف اصلا اسعى لتحقيقه
ان دى اول مرة لما احط هدف استموت عليه واصبر عليه لحد لما احققه
فعلا كانت لحظة فخر واعتزاز

طبعا فى البداية انا مكنتش عارف اجمع كلمتين على بعض .. لكن بعد دقيقة كده لما الامور هديت اتكمت عادى والحمد لله كان العرض كويس

فى الاخر قلت حاجة زى نصيحه .. وقلت فيها اللى انا كنت فيه والمواقف اللى اتعرضتلها
وخلصت الحمد لله ونزلت

بجد انا كنت فرحان جدا ان العرض كان كويس .. وان فى ناس كتيرة اتأثرت او فكرتها عن الابحاث اتغيرت .. والحمد لله بدليل ردود الافعال اللى عرفتها والايميلات اللى وصلتلى والناس اللى سألتهم عن العرض بتاعى


لكن فعلا .. كان احلى يوم فى حياتى

الحمد لله من نتائج الموضوع وايجابياته ان فى ناس اتشجعت انها تعمل بحث .. وفى ناس جالها احباط بعد ما شافت البحث بتاعى ... وفى ناس طلبت البحث منى بعدها علشان كانوا بيعملوا بحث فى دفعة تانية .. كان بحث مقارن بين بنكين فطلبت منى البحث بتاعى علشان تستخدمه

وتم الحمد لله ..

احلى واجمل يوم فى حياتى

Sunday, May 13, 2007

حوادث العربيات فى حياتى

السلام عليكم ورحمة الله وبركاته

امبارح كان يوم بسم الله ماشاء الله

مش عارف احكى اقول ايه بس

وانا نازل الصبح ركبت عربية علشان اروح الجامعة

فى اتنين اتخانقوا فى العربية .. وطبعا الموضوع معداش الا بالدم .. وصباح الفل

بعدها الراجل مشى شوية بالعربية بعد ما فضوها سيرة

الكاوتش اللى ورا بتاع العربية ضرب
.. لا وايه البار اتكسر والدنيا باظت

طبعا انا قلت ده يوم زى الفل

رحت الجامعة .. حضرت الاول السكشن .. اكتشفت اكتشاف جامد انى معييش ورق

والاكتشاف الاجمد ان كل اللى حواليا مكانش معاهم ورق برضه نكتب عليه

طبعا بعتنا استوردنا ورق من
البنجات اللى حوالينا

بعدها طلعنا على المحاضرة .. محاضرة كانت زى الفل .. دكتور عادل امين بقه

المهم بعدها حصلت حبة حاجات كده .. مش هقولها دلوقتى انما هتكلم عليها بعدين

بس اللى فكرت فيه انى اعمل بوست عن اشهر حوادث العربيات اللى اتعرضت ليها خلال حياتى لحد دلوقتى وربنا يحفظنا ويحفظكوا



1- اول حادثة اشوفها فى حياتى

ساعتها كان عندى حوالى 10 سنين مثلا
كنت فى السعودية ورايح اصلى التراويح انا وبابا واختى
كنا رايحين نصلى ورا الشيخ ابوبكر الشاطري ربنا يكرمه
المهم
كان فى تقاطع على الشكل ده (+)

اللى هو تقاطع خطين بشكل رأسى .. او زى مصفوفة سبيس للناس بتوع ادارة

واحنا جايين من الطرف الجنوبى للشكل .. وفى عربية جاية من الطرف الشرقى واخرى من الطرف الغربى

اللى جاية من الطرف الشرقى عايزة تدخل فى الطرف الجنوبى .. وبتاع الغربى مكمل على طول

المهم الاتنين كانوا جايين بسرعة اصلا .. وكان امتى فى رمضان بعد الفطار .. فالطبيعي ان الشارع يبقى فاضى
والاتنين جايين بسرعة .. وهوب .. طقسوا فى بعض
طبعا بابا كان واقف فى الطرف الجنوبى بيتفرج عليهم .. والحمد لله الموضوع عدى .. بس العربيات اتخبطت جامد بتاعتهم
لسه فاكر ان العربية اللى كانت جاية من الطرف الغربى من شدة الخبطة رجعت لورا لحد لما خبطت فى اشارة المرور وجابت اجلها تقريبا

2- ثانى اشد حادثة فى حياتى

الحادثة دى بقه .. افظع حادثة الواحد ممكن يشوفها .. خاصة انها متعلقة بحياة انسان
كنا فى السعودية برضه .. ( طبعا الحوادث عندهم كتير جدا ومشكلة كبيرة )
المهم كنا فى عقيقة .. هناك الشارع واسع ... وبين الشارع الاساسى والحارة الفرعية جنينه كبيرة مفتوحة .. عادى اللى عايز يقعد
فكانت العقيقة فيها .. كنا فى رمضان وعلى الافطار
المهم .. وصلنا والعيال الصغيرة بتلعب والدنيا زى الفل
وواحد جه ... ركن العربية على اليمين فى الحارة الفرعية .. ونزل
هو مسك ايد بنته وعدى بيهم الشارع .. زوجته مسكت ايد بنته التانية وابنها الصغيرين كلهم واستنت لحد لما العريبة اللى جاية بسرعة تعدى
الراجل كان عدى خلاص
فبنته فلتت من ايده .... ورجعت لامها
فى ساعتها انا كنت واقف بره الجنينه ساند على عربية .. يعنى كنت شايف كل حاجة قدامى
المهم .. العربية خبطت البنت الصغيرة

( ضعاف القلوب بجد مش بتهريج ميكملوش ويقلبوا على الحادثة اللى بعدها )

( ضعاف القلوب بجد مش بتهريج ميكملوش ويقلبوا على الحادثة اللى بعدها )



البنت طارت فى الجو حوالى 15 متر لفوق ... ولمسافة 30 - 35 متر لقدام ..

والانقح .. انها وقعت على .. سن صندوق قمامه .. زى اللى بنشوفه فى الجامعة

طبعا انا كنت واقف بشوف كل ده . وحتى الناس لما جريت عليها .. انا كنت متسمر .. مش قادر اجري من المنظر الل شفته بجد مكنتش قادر امشى خطوة

المهم يعنى . خدوا البنت على المستشفى . وعلى الفجر كان ربنا توفاها ... سبحان الله كان فعلا لازم تموت علشان لو عاشت هتبقى اصعب عليها وعلى اهلها

دى كانت اصعب حادثة اشوفها فى حياتى ... وعمري ما هنساها ابدا

3- حادثة ميكروباص زى الفل

طبعا طالما احنا بنتكلم على الميكروباص يبقى احنا وصلنا مصر الحمد لله
كنت فى سنة تانية ورايح الجامعة الصبح .. المهم ركبت ميكروباص بسرعة علشان عندى محاضرة بنوك للدكتور عبدالحميد الغزالى
المهم الميكروباص كان ماشى بسرعة عالية لان الطريق سريع ومفتوح
المهم انا كنت راكب ورا خالص وكان جنبى على اليمين بنت وانا كنت فى النص
المهم فجأة وبدون مقدمات ... الكاوتش اللى ورا على اليمين طار

ايوة والله طار من العربية خالص .. الكاوتش كان بيسابق الميكروباص جنبنا
المهم السواق مكانش مدى خوانة اصلا ومش فى باله
وفضلنا نزعق فيه علشان يقف .. والحمد لله حس بالموضوع ووقف

مكانش عارف يدوس فرامل علشان العربية متتقلبش .. ففضل بيزحف بالعربية على الطريق مسافة خاصة انه كان ماشى على 120 تقريبا
الحمد لله وقفها .. بس طبعا بعد ما خربت مالطة والبنت كانت هتموت اساسا .. وريحة تكحيت الحديد فى الارض كانت هتجيب اجلنا
والحمد لله الدنيا عدت بخير
المهم فى الموضوع انى ركبت اوتوبيس بعدها ورحت الجامعة ولحقت المحاضرة قبل ما الدكتور يدخل الحمد لله

4- حادثة ميكروباص اخرى
ده بقه .. ميكروباص الله ينور .. كان فى افطار فى الجامعة فى رمضان .. بره الجامعة طبعا
المهم انا رحت وفضلت معاهم بس كان لازم امشى علشان كنا معزومين عند اختى
المهم ركبت وروحنا والدنيا كانت ايزي
فواحد كان عايز ينزل .. فالسواق وقف والراجل فتح الباب علشان ينزل
المهم اول ما الراجل فتح الباب ولسه بيطلع رجله .. جت عربية نقل من ورا .. وديييييييييييييب
رشقت فى الميكروباص من ورا .. ورشقت رشقت

تخيل انت نقل ماشى على 100 بيخبط ميكروباص واقف
طبعا صباح الاحباط

المهم انا برضه كنت قاعد ورا .. والزجاج اللى ورا واللى على اليمين كله اتكسر على راسى ووقع على هدومى .. والصاج بتاع العربية قطع السويت شيرت اللى كنت لسه جايبه واول مرة البسه .. قلت ده فال حلو قوى طبعا
المهم نزلنا من العربية بسرعة علشان لو فى حاجة فى التانك بتاع البنزين .. بس الحمد لله كانت الدنيا سليمة
فى الموقف ده بقه .. كلنا نازلين اللى عمال يقول يا ظهري .. وانا عمال اشيل القزاز من شعري وهدومى ( لدرجة ان كان فى ازاز فى جيب البنطلون معرفش ازاى )
ودول عمال يصوتوا ويعيطوا .. بنتين كانوا فى الميكروباص
يابنت الناس اسكتى .. الحمد لله محدش جراله حاجة جامدة
ودول هاتك يا عياط .. وصويت .. المشكلة انهم كانوا قدام يعنى مجرالهومش حاجة .. رحت فاتح فيهم زعيق ومشيتهم
كل الى حصل غير الخسائر المادية فى العربيات .. ولد ابن سواق النقل رجله اتعورت جامد بس ..

5- اشد حادثة شفتها فى مصر
ده كان يوم .. يااااااااااه عمرى ما هنساه بتفاصيله
كنت نازل الجامعة الصبح علشان عندى محاضرة وكان اليوم ده شبورة بجد متشوفش مترين قدامك
شبورة شديدة جدا جدا
المهم المحور بتاع 26يوليو كان كله حوادث .. فوق ال30 حادثة فى الساعة دى
منهم واحدة كانت شديدة جدا فى نص المحور
واحنا وصلنا اول ما حصلت على طول
دى كانت عربية نقل الجنود بتاعت الامن المركزي .. خبط فيها من ورا عربية ميني بص
والمشكلة ان الميني كان بيولع وفى حريقة فى التانك
وسواق الميني مزنوق قدام مش عارفين نطلعه

احنا لما وصلنا واحنا ماشيين .. فجأة سواق الميكروباص لقى قدامه الميني بص بالعرض .. وطبعا لحد لما فرمل كنا قدامه فيس تو فيس
وهو بيولع .. طبعا نزلنا جرى من الميكروباص ورحنا نشوف ايه الموضوع
احنا لما رحنا كان فى ناس بتحاول تشد السواق بتاع الميني من مكانه علشان ينزلوه
المهم مش عارفين .. وفى ناس تانية بتحاول تتطفى الحريقة قبل ما التنك يولع
المهم فجأة حصل ان فى حاجة ولعت فالناس كلها جريت وسابت السواق . وفاكر ساعتها كلهم قالوله اتشاهد على روحك خلاص
والراجل فعلا قالها وخلاص كان مستنى قدره
بس الناس اللى ورا اتشجعوا ورجعوا طفوا النار .. فالناس رجعت علشان تطلع السواق المحبوس ده
كان فى واحد جنبى معاه طفاية بتاعت عربيتته .. بس الظاهر ان صلاحيتها انتهت
هو كان واقف جنبى .. ولسه بيفتحها .. انفجرت فى وشه
طبعا انا جنبه ونالنى من الشظايا جانب
بس الحمد لله الاصابات كانت طفيفة
وساعتها لاول مرة فى حياتى اشوف جثة هامدة قدام عيني
كان راجل اصيب فى الميكروباص وتوفاه الله
وكان على جنب الطريق .. طبعا بتوع الشرطة راحوا علشان يشوفوا هو مين .. فشالوا الجرنان اللى عليه
بجد وشه كان فظيع .. لان الخبطة تقريبا كانت فى الوجه
والحمد لله

اليوم عدى ... طبعا رحت الجامعة على الصبح وانا مش شايف .. واليوم كان شديد جدا جدا
وكل شوية طول الطريق .. عربيتين خبطوا فى بعض


دول اشد حوادث عربيات شفتها فى حياتى ..
فى حاجات تانية فى النص كده بس خفيفة مأثرتش عليا جامد
افتكر منها وانا صغير بابا كان ماشى بالعربية فى السعودية والاشارة قفلت وبابا كان ماشى بسرعة
( هناك مفيش حاجة اسمها تكسر اشارة .. هتتكسر رقبتك على طول )
فبابا فرمل جاااامد ... فانا طرت من على الكرسى اللى قدام وجبت اجل الازاز بضربه راس جت فى الجون
بابا راح بعدها غير الازاز وجاب ازاز جديد

وانتوا .. عندكوا ذكريات مع حوادث العربيات قبل كده ؟؟

Thursday, May 10, 2007

هتوحشيني جدا

السلام عليكم ورحمة الله وبركاته

فى الاول خالص احب انى بجد اشكر كل اللى واسونى ووقفوا جنبى فى المشكلة الاخيرة اللى حصلت

واللى كانت السبب فى انى مقدرتش اكتب حاجة تانى على البلوج خلال الفترة اللى فاتت دى كلها

سواء بقه اللى اتصلوا بيا او بعتولى ايميلات او حتى فضلوا معايا .. من بنات وشباب المدرج والاخوة وغيرهم

بجد انا مش عارف اعبر عن شكري وامتنانى ليهم كلهم .. وحتى اللى بيقروا وشاركوا بارائهم على البلوج

بجد ربنا يكرمكوا .. جزاكم الله خيرا وفعلا انا حسيت بدعائكوا وفرحت جدا بوقفتكوا جنبى

بغض النظر عن الاراء المخالفة او التعليقات اللى اتكتبت .. فالحمد لله الموضوع عدى والحفلة اتعملت وكنت ناوى اكتب عنها لكن الانشغال هو اللى منعنى انى اكتب عنها

لكن فى النهاية ربنا يكرمكوا ويعزكم يا رب جميعا

ثانيا : وهى يمكن اللى مضايقانى برضه الايام دى .. وهى ان النهاردة كان اخر يوم فى الدراسة بالنسبة لدفعتى حبيبتي

النهاردة كان اخر يوم الدفعة تتقابل وتتجمع فيه فى المدرج .. ومن النهاردة .. شبه انتهت فترة فى حياتنا كانت بالنسبة ليا وبالنسبة لاخرين من اجمل واحلى واحسن فترات حياتى .. وطبعا انا اقصد سنة رابعة ادارة

الحقيقة انا عايز اتكلم عن الدفعة .. اللى لو فضلت اتكلم على جمالها وحبى ليها مش هقدر اوفيها حقها فى الكلام

عايز اتكلم عن الدفعة اللى بجد حسيت بقربنا كلنا من بعضنا .. حسيت باننا فعلا فاهمين بعض وبنحب بعض لله فى لله

النهاردة واحد بيقولى ... رابعة ادارة الدفعة الوحيدة اللى اتعملها فى التيرم اربع حفلات تكريم .. والدفعة الوحيدة اللى اتعملها حفلة من القسم والكلية واتصرف عليها جامد .. والدفعة الوحيدة اللى النهاردة بعد المحاضرات وقفنا مع الدكتور محمدي واتصورنا كلنا صورة تذكارية للدفعة .. والدفعة الوحيدة اللى وقفت مع الدكتور سمير علام رئيس القسم والدكتور محمد جودة واخدنا صورة تذكارية قدام الكلية .. والدفعة الوحيدة اللى عملت بحث عن تطوير القسم وطلعت منه بتوصيات قوية جدا .. والدفعة الوحيدة اللى نزلت عشر جامعات ... والدفعة الوحيدة اللى فى احدى حفلاتها كان فى جاتوه وعصير وحلويات تانية

فعلا .. الدفعة دى دفعة متميزين

معلش انا فعلا مش قادر اعبر عن مشاعى لدفعتى اللى بحبها

لكن فعلا .. انا لو لفيت الدنيا كلها .. مش هلاقى زيهم تانى


بجد عمرى ما هنسى كل الناس اللى حبيتهم وحبيت الشغل معاهم
ومعلش مش هذكر اسامى علشان محدش يزعل

بس ان شاء الله هعملهم مفاجأة قريبا باذن الله بس ادعوا علشان الوقت والمذاكرة

واخيرا

طبعا لاننا فى وقت صعب للغاية .. فمعدل الكتابة هيقل شوية .. لكن هحاول باذن الله انى احافظ على بوست كل يومين على الاقل
والله المستعان

جزاكم الله خيرا احبتى .. جزاكم الله خيرا دفعتى الحبيبة .. جزاكم الله خيرا لكل شباب وبنات رابعة ادارة
هتوحشونى جدا .. لكن هنتقابل باذن الله قريبا


Saturday, May 5, 2007

لما تكون سبب فى انهيار الحلم

قمة الاحباط والألم

انك تكون سبب فى فشل اناس اخرين .. وبدون قصد منك

لما تكون الناس دى بتعمل حاجة كبيرة جدا جدا جدا جدا

وشغالين فيها بشكل كبير جدا جدا جدا جدا

ومش بيناموا وبيسهروا الليل

ويسافروا ويلفوا ويتعرضوا لضغوط وكلام مش كويس

ويصروا على حلمهم وطموحهم

وفجأة .. كل ده .. ينهار بسببك !!

وتشوف دموعهم وبكائهم على حلمهم اللى كانوا بيحلموا بيه وهو بينهار قدم عينيهم
بسببك !!

هتحس بايه لما تلاقى ان الناس كلها بتتكلم على الحلم ده .. وكلهم حاطين امال كبيرة جدا على المشروع اللى بيتعمل ده

وتلاقيهم هما هما

بيتكلموا على انهيار الحلم و انه بينتهى .. وانه بينهار بسببك !!

والمشكلة .. ان انت مليكش ذنب فى ده كله

اكيد شعور فظيع بالاحباط و الخجل


هو ده شعورى دلوقتى تجاه دفعتى


وتجاه فريق رابعة ادارة

بجد انا حاسس كأنى قتلت الحلم قدامهم

انا حاسس كأنى دفنت طموحاتهم وامالهم

حاسس كأنى كنت حفرة شديدة قوى .. وقعت روحهم المعنوية فى مشروعهم الكبير جدا

والمشكلة ... ان ده كله حصل دون قصد ابدا

ده باختصار .. ملخص الاحداث

البداية

كانت يوم الاحد .. لما رحت علشان اختم ورق من الدكتور سمير علام علشان نبعته للقنوات الفضائية والضيوف علشان يجيوا حفلة قسم الادارة

الدكتور سمير علام مضى على الورق عادى جدا

ورحت بعدها للعميد علشان يمضيه

اللى شافنى ساعتها .. كان احمد عبدالمجيد قائد حرس تجارة

و دخل وسلم عليا وكأنه صاحبى .. واه لو كنت اعرف انه هيعمل اللى عمله مكنتش عبرته بشلن

وبعدها خلصت الورق ومشيت

فوجئت بعدها فى السكشن واحدة بنت معانا فى الشغل بتقول ان الدكتور سمير علام عايزنا يوم الاثنين ضروري فى المكتب وعايز اسامينا

انا مجاش فى بالى قصة احمد عبدالمجيد .. وقلنا للدكتور ده اجازة وعايزين نذاكر .. قال لأ تعالولى برضه

قلنا ماشى ورحنا

دخلنا عنده .. ايه يا دكتور ايه الموضوع

قال مين اللى ختم الورق امبارح منى ؟؟

قلتله انا يا دكتور وخلاص راح للقنوات ووصل ووافقوا وجايين

قالى هسألك سؤال .. انت من الاتحاد الحر ؟؟

الحقيقة استغربت جدا .. بس فهمت ساعتها ان احمد عبدالمجيد عملها

قلتله يا دكتور انا كنت

قالى كنت ولا لسه ما زلت ؟؟

قلتله لا كنت . لان التيرم خلص وانا فى رابعة خلاص ومفيش شغل .. فخلاص الدنيا خلصت

المهم خلاصة الموضوع ان عمنا احمد .. لما مشيت .. سأل الموظفة انا كنت بعمل ايه ( هو الظاهر مش عارف ان من حسن اسلام المرء تركه ما لا يعنيه )

ولما عرف انا كنت بعمل ايه .. راح مكلم ضابط فى امن الدولة من بره الجامعة

طبعا الظابط راح متصل برئيس الجامعة .. واداله اللى فيه النصيب .. رئيس الجامعة راح مكهرب عميد الكلية
وعميد الكلية كهرب رئيس القسم .. والدكتور طلعه علينا احنا

والغريب .. ان الكلام ده كان خلال ساعة زمن فقط

انا ختمت الورق الساعة 2

التيلفون جه للدكتور سمير الساعة 3

وفضل هو وعميد الكلية 3 ساعات يتكلموا مع امن الدولة فى الموضوع وازاى ممكن يتحل

( الحقيقة كلمة حق .. العميد الدكتور محمد يوسف والدكتور سمير علام كانوا متحمسين جدا جدا للحفلة .. وكانوا حاطين امال كبيرة عليها وعلى نتائج البحث والتوصيات .. وكانوا اكتر الناس المحبطة بعد قرار امن الدولة )

المهم بعد نقاش .. قلت للدكتور انا واحد من رابعة ادارة .. الموضوع ملهوش علاقة بطلاب الاخوان ولا بالاتحاد الحر اطلاقا

وقالى .. انت يابنى علم فى الكلية .. انت عاملهم رعب فظيع

ده اسمك لما بيسمعوه بيخافوا

وفى النهاية الموضوع انتهى على كده ومشينا

يوم الجمعة

( فى بيت الدكتور محمدي )

يوم الخميس كان دكتور محمدي رجع من السفر من دبى .. وكان عايزنا نروحله يوم الجمعة البيت علشان يراجع معانا اخر التطورات ويعرف اخر الاخبار

اتفقنا على اننا نصلى الجمعة جنب البيت ورحنا وقابلناه فعلا

كنت انا وفؤاد وميدو

فضلنا نتكلم فى البريزنتيشن والباور بوينت والبرنامج اللى معمول والكتاب

وفضلنا فى نقاشات مستمرة مع الدكتور ونتفق على حاجات ونخلص واحنا قاعدين على طول

وخلصنا على العصر او بعد العصر بشوية

( ميدو وفؤاد بيخلصوا اخر اللمسات فى البحث والكتاب اللى هيصدره الطلبة مع الدكتور )

ومشينا روحنا على اساس اننا نخلص الشغل الباقى ونبعته بسرعة علشان نمشى فى الاجراءات بشكل طبيعي

وكان عندنا معاد مع الدكتور تانى يوم السبت الساعة 12 علشان يشوف ما توصلنا اليه واللى خلصناه

يوم السبت

يوم السبت اتقابلنا الاول الصبح احنا لجنة الحفلة ولجنة البحث

واتكلمنا فى حبة نقاط اساسية ومهمة جدا كان لازم نخلصها

وعملنا تصور كامل للحفلة وسيناريو لكل حاجة فى الحفلة

ساعتها .. جاتلنا اخبار ان الدكتور سمير عايز يأجل الحفلة يوم الخميس

طبعا كلنا اضايقنا جدا .. وكلنا اجمعنا على ان الحفلة لو اتأجلت .. يبقى مش هنشد فيها خط وملناش دعوة علشان نذاكر

المهم .. فى نفس الوقت .. جالنا خبر ان فى اسباب تانية لتأجيل الحفلة .. واترمت كلمة الامن

المهم .. فى الوقت ده وصل الدكتور محمد ودخلنا معاه فى الغرفة بتاعته نخلص شغلنا

فى الوقت ده نزل هيثم ومحمد عودة وخيري وسمر للدكتور سمير علام .. وعرفوا المشكلة فين بالضبط

قال ايه .. ان امن الدولة قال للكلية تلغى الحفلة تماما والموضوع منتهى

والسبب ؟؟؟

ان انا موجود فيها وفى تنظيم الحفلة

حقيقة انا اتصدمت .. بجد كان نفسى اعيط

المهم اتكلمنا فى غرفة الدكتور .. وازاى .. ويعنى ايه .. وزعقنا فى بعض

حتى ان الدكتور محمدى اتنرفز جدا وزعق فى بنت كانت معانا .. وفى بنات من جروب البحث عيطت ... طبيعي لانها شافت ان حلمها بينهار قدامها

المهم .. الدكتور محمد نزل لسمير علام ومكانش موجود .. فراح للعميد على طول ودخله

وفضلوا يتكلموا كتير .. وليه ومش ليه وايه اللى حصل وايه الاحتمالات والاختيارات

المهم .. الدكتور مخادش كلمة ترد الروح

فجالنا وقالنا ان الحفلة هتتعمل فى المدرج

ايه .. ازاى .. طيب يعنى ايه .. والإعلام .. والحاجات اللى اتفقنا عليها

حقيقة ... كانت صدمة للكل

فى ناس هنجت ساعتها .. وفى ناس عيطت جامد جدا

فضل فريق البحث فى نقاش وقرارات .. نعرض ولا لأ

نكمل ولا لأ

الى ان حصلت مشكلة وفريق البحث لم يتوصل الى قرار

وتفرق الفريق وكل واحد بيبكي بشدة ..

حلم الدفعة وطموحاتها ورؤيتها .. بتنهار بسرعة غير متوقعة

والسبب ... انا

بعدها الفريق جمع بعضه تانى

وتناقشوا بالراحة .. خلاص .. كله طلع اللى كان جواه من التعب والاحباط والسهر

وتوصلوا لقرار نهائى ... انهم هيعرضوا البحث فى المدرج

طبعا كان خبر الى حد ما كويس .. لكن برضه .. مازال الاحباط واليأس على وجوههم

اتصلت بالدكتور محمدي .. وحددنا معاد للقاء عنده فى البيت

وفعلا طلعنا من الجامعة على الدكتور محمدي على طول

ودخلنا عنده .. وفضلنا فى نقاش تانى جديد

وايه الموقف وهل الموضوع فيه نقاش ولا خلاص خلص

طيب ايه الاحتمالات والبدائل التانية المتاحة

طيب شكل الحفلة فى المدرج .. والحمد لله توصلنا الى تخيل كويس

واتفقنا على بعض النقاط المهمة وانجزناها مع الدكتور

وانهينا الاجتماع الساعة 11.20 ليلا


بسببى انا

كل الكلام ده .. حصل بسببى انا

اه .. لانى ببساطة فى الاتحاد الحر

طيب ليه ؟؟ ايه المشكلة ؟؟

ليه يدمر حلم شباب فكروا انهم يعملوا حاجة جامدة للكلية ؟؟

والسبب انا ؟؟ لا مش انا

السبب عقلى اللى اقتنع بافكار صحيحة !!

يعنى ايه ان انا من طلاب الاخوان فالحفلة تتلغى ؟؟

ليه اصلا ؟؟ خلاص بلاش عمر خالص

سيبك منه وكمل الحفلة عادى

يقولك لأ واصله من الجماعات الاسلامية وممكن يعملوا زى بتوع الازهر !!

عمركوا شفتوا متخلف وغبى اكتر من اللى قال الكلام ده ؟؟

حفلة .. هنعرض فيها بحث وجهد وتعب استمر شهور .. وفى الاخر يتعمل كده
لا وايه .. حفلة جاى فيها مستشار وزير ورؤوساء مجالس ادارة شركات ورجال اعمال
حفلة جاى فيها قنوات واعلام جاى يصور
اللى هو لو حصل حاجة غلط الاعلام هياخدها ويكبرها وتبقى ضدنا اصلا

كل ده بسبب انى من الاخوان ؟؟

ولما تكون فى حفلة فى تجارة انجليش وفيها دى جى ورقص وعرى وقلة ادب
ولما يحصل حاجات مخلة بالاداب واللى ما يشترى يتفرج فى تجارة انجليش فى وضح النهار ومحدش منهم يتحرك
ولما تكون فى حفلة لتامر حسنى ولا حمادة هلال فى الجامعة والطلبة يشيلوه بالعربية بتاعته
ولما تكون فى حفلة فى مسرح الكلية وفيها رقص وولاد وبنات يقبلوا بعض على الهوا
ولما يأجروا المسرح بتاع كليتنا .. لواحد من دولة افريقية .. علشان يعمل حفل زفافه فى المسرح وهاتك يا رقص واغانى !!
ولما ميزانية الاتحاد بتاع تجارة بس بتاعت السنة دى اللى انا بكتب فيها دلوقتى .. طالعة ب 122 الف جنيه ومضى عليها الدكتور على الديب رائد الاتحاد وتم اعتمادها
وشفتها بعيني الاتنين قدرا من غير ما يعرف ووصلتلى ... اعرف راحت فين بقه ؟؟

ساعتها مفيش مشاكل .. صح

ليه ؟؟؟ ليه ؟؟؟ ليييييييييييييه ؟؟؟

ليييييييه ؟؟

وبعدها نيجي نقول ان الشباب مستهتر ومتهور ومش بيفكر فى البلد .. ونفضل نطبل على الانتماء والوطنية !!


اللى مضايقنى ومخليني زعلان جدا

دموع وبكاء البنات والشباب اللى تعبت جدا وسهرت جامد جدا ومكانتش بتذاكر علشان تخلص المشروع

وللاسف .. مش ده اول موقف يحصل فيه معايا كده .. ومش لازم التفاصيل دلوقتى

Thursday, May 3, 2007

المواقف الهامة فى بحث الادارة العامة

السلام عليكم ورحمة الله وبركاته

نكمل بقه موضوع البحث

وصلنا لحد لما الدكتور قالنا نعمل بحث عن المنظمات الحكومية

طبعا انا لانى هربان من الحكومة بكفالة .. فانى الاقى واحد مدير فى اى منظمة حكومية او قطاع عام واعمل معاه البحث كانت المشكلة الازلية بالنسبة لينا كلنا

ومن ضمن اسباب صعوبة الموضوع ان اصلا المديرين انفسهم مهما بلغوا من درجات الرقى الاداري بيخافوا يدوا اى معلومة خالص .. فانا مضطر انه حتى لو وافق هضطر انى اخد المعلومات بشكل غير مباشر علشان ميقلقش ويقفلها من بابها

ودى مكانتش مشكلة قوى قد ما كانت المشكلة انى الاقى شركة توافق اصلا او مصلحة حكومية

المهم بدأت رحلة الالف ميل فى البحث عن اى منظمة حكومية اعمل عليها البحث

كان الدكتور فى المحاضرات الاولانية اللى كان بيشرحلنا فيها المنهج قال ان لو حد عمل بحث كويس ممكن يطلع يعرضه هنا فى المدرج

الصراحة انا الفكرة شعشعت فى نفوخى .. وقلت ماشى .. هطلع ضمن اول 100 طالب يعرضوا الابحاث ابقى انا واحد منهم

الصراحة كنت متخيل ان المدرج كله هيطلع يعرض . لان اللى كانوا معايا كانوا عباقرة فعلا

ومن ساعتها وانا حطيت الهدف ده قدامى وقلت انا هبقى احسن واحد يعرض البحث من ضمن الكام مائة واحد اللى هيعرضوا

وبدأت رحلة البحث عن شركة عامة او قطاع او اى حاجة اعمل عليها البحث

بدأت الاول بالاقرب ليا .. كنت هروح اعمله مع واحد فى شركة بترول

هو كان عمل البحث معاه وكان زبطلى معاد معاه

اتصل بيا ليلتها .. اللى كنت هروح اعمل البحث معاه .. وقالى معلش كنسل لانه عمل خناقة مع الراجل وطبعا مش هينفع اروح معاه

قلت خير .. كلمت واحد تانى قالى ماشى تعال اعمله معايا على احد اقسام البنك الاهلى .. والموضوع وقف لان الراجل معرفش حصله ايه ومرضيش

قلت ماشى .. بدأت ادور تانى .. اخويا مدرس فى مدرسة تجريبية .. قلتله انا عايز اجى اعمل البحث عندكوا .. قالى انهم دلوقتى فى مشكلة مع المديرة .. والمديرة شكلها هتمشى وعندها مشاكل الدنيا والاخرة ومش هينفع

قلت طيب .. هروح اعمله على مدرستى بتاعت الثانوية .. فوجئت بكارثة .. ان المدرسة ليها 3 مديرين وكلهم بيقعدوا فى غرفة واحدة !! معرفش ازاى ومتسألش فانت فى مصر يا حبيبي ( خربت بعد ما سيبتها للاسف واترقيت للجامعة )

قلت اللهم صلى على اجدع نبى

كلمت واحد تانى قالى انه يعرف عميد كلية التجارة فى جامعة المنوفية .. وهيزبط معاه ويكلمنى

طبعا .. كانت الاخبار جيدة جدا ومشجعة .. ان الواحد ميكلفش نفسه انه يروح هناك

فى الوقت ده طبعا انا كنت خلاص هرمى نفسى من الشباك .. ايه مش ممكن بلاها بحث من اساسه

كنت خلاص فى احدى الليالي قد اتخذت قرارا .. بانى هروح اعمله على كلية طب القصر العيني

وكنت هنزل الصبح الساعة 7 الصبح اعمل البحث ... ولو جت جت .. مجاتش يبقى يولع البحث ومش هعمل بحث

وانا نازل .. قلت اتصل بكريم صاحبى اقوله لو فاضى يجي معايا

المهم بقوله ما تيجي وبتاع .. قالى رايح فين

قلتله دى اخر مرة انزل فيها .. هروح كلية الطب لو مشيت مشيت لو لا خلاص

قالى لأ .. خد العنوان ده روح اسأل على فلان وقوله من طرف فلان وخلص البحث معاه

قلتله ماشى .. هشوف لو منفعش هطلع على كلية الطب واخلص الموضوع

شكرته جدا ونزلت ورا اخر بصيص أمل انى اعمل الموضوع ( حلوة بصيص دى صح ؟ )

المهم رحت .. ادور على العنوان .. مفيش

ايه يا كريم .. انت بتبعتنى ولا ايه

ادور .. مفيش .. اسأل .. الاقى العقدة الازلية فى المصريين
( العقدة دى ان كل واحد عنده ورم فى الشخصية وعامل فيها الغفير بتاع المنطقة وعارف كل صغيرة وكبيرة فيها .. وكل واحد يوديك مكان شكل )
طبعا لفيت المنطقة كلها مشى .. كانت فى جاردن سيتي

ومن حسن حظى ابو شلن .. ان هناك فى فرعين للبنك الاهلى المصري

دخلت الاولانى ( وطبعا كان الفرع الغلط ) وسألت على فلان .. قالى مفيش حد بالاسم ده اصلا فى البنك

قلت الصلاة على اجدع نبى .. ايه النظام ؟؟

مكنتش اعرف ان فى فرع تانى .. قالى روح شوفه فى الفرع التانى كده هناك

قلتله فين .. وصفهولى ورحتله مشى برضه

المهم رحت .. ودخلت وفعلا الحمد لله قابلت الراجل اللى كان كريم قالى عليه

الحقيقة مهما اتكلمت فى حقه مش هقدر اوفيله حقه معايا

بجد الراجل كان كريم جدا .. سواء فى المعلومات او العزومة بانى اشرب حاجة وكان فعلا راجل قمة فى الادب والاخلاق والذوق وكل حاجة

والحمد لله خلصت معاه الاسئلة وخلصت معاه اللى كنت جاى علشانه

واستئذنته فى انى امشى علشان كان ورايا سكاشن بعدها ومشيت من هناك

طبعا انا كنت بلاحظ وباكتب وهو مش واخد باله .. يعنى انا كنت ابصله وهو بيشتغل وابص للى حواليه وطريقتهم فى الشغل واكتب الكلام ده من غير ما يحس .. والكلام ده كتبته فى البحث ولو عرف اعتقد ممكن يقتلنى فيها

المهم الحمد لله الموضوع خلص

وبدأت بعدها رحلة تانية من العذاب والاصرار على الهدف
وهى عمل البريزنتيشن فى المدرج والمتابعة مع الدكتور

ايه اللى حصل ..
تابعونا بعد الفاصل الطويل شوية علشان المذاكرة

والسلام عليكم ورحمة الله وبركاته