Wednesday, August 29, 2007

ذكريات سنة ثالثة جامعة


السلام عليكم ورحمة الله وبركاته

قبل ما ابدأ اتكلم على سنة ثالثة واللى حصل فيها لانها سنة فارقة بمعنى الكلمة

عايز بس اقول كذا حاجة

1- ادعولى كتيييييييييييير قوى علشان فى حاجة كدة ربنا ييسر لو ربنا قدرها هتبقى جامدة قوى ان شاء الله

2- امبارح جالى خبر زعلنى كتير قوى .. واحد من الناس اللى بحبها جدا وعرفته من خلال الشغل واسمه يحيى زكريا .. كان هو وثلاثة من اصحابه راجعين من فرح الساعة 4 فجرا... فنزلوا علشان يغيروا كاوتش العربية اللى ضرب .. واتصلوا بناس زمايلهم فى عربية تانية علشان يجيوا .. كلهم كانوا حوالى 8 ... واحد قالهم انه هيروح يقضى حاجته بعيد شوية ... وكانت الدنيا شبورة جامدة فجت عربية نقل بمقطورة دخلت فيهم .. المهم ان الثلاثة اللى كانوا معاه ماتوا الله يرحمهم .. والعربية التانية اتنين برضه الله يرحمهم .. ويحيى فى المستشفى فى العناية الفائقة وحالته خطيرة جدا .. بالله عليكوا تدعوله ان ربنا يشفيه ويعافيه ... انا حلفتكوا بالله كلكوا تدعوله ان ربنا يشفيه ويعافيه وطبعا يرحم اصحابه وكلهم الحمد لله كويسين ومحترمين .. وطبعا ان ربنا يعدي الصدمة دى على خير

الله المستعان

3- فى ناس اشتكت ان المواضيع بتبقى كبيرة وان الصفحة الرئيسية للمدونة بتبقى كبيرة قوى .. فانا هخلى كل صفحة فى البوج تاخد خمس مواضيع بس .. واللى عايز حاجة من الباقى اما يشوف الصفحات التانية ( تحت خالص فى البوج حاجة اسمها older posts )
او يجيبها من الارشيف وامره لله


نبدأ بقه فى سنة ثالثة

سنة ثالثة كانت سنة غير طبيعية .. لان فى السنة دى حصلت عدة امور .. كانت فعلا فاصلة فى تاريخ التيار الاسلامى او طلاب الاخوان فى الجامعة .. وخصوصا فى جامعة القاهرة
لم يظهر طلاب الاخوان فى الاعلام الا فى السنة دى
لما يحدث حراك سياسى مثلما حدث فى هذه السنة
لما يتم الاهتمام بالانتخابات الطلابية الا فى هذه السنة
تعالوا نشوف اللى حصل

فى بداية السنة .. انا كنت بحضر دورة تدريبية .. كانت فكرية وثقافية وفى جزء منها سياسى
المهم كان فى اتفاق على ان الحراك السياسى اللى حصل فى البلد لازم يستغل بشكل قوى وخاصة فى الجامعة لاخراج امن الدولة من الجامعة

المهم الدنيا كانت ماشية تمام ... وحصل فى الفترة دى ان جماعة الاخوان بدأت النزول للشارع من قبلها .. لكن كانت بدأت تدشين حملة على كافة المستويات موحدة الاسم .. كانت معا للاصلاح

فطبعا فى الجامعة تم تبنى الحملة على طول لان اصلا احنا بنعانى من مشاكل كتيرة وفساد غير طبيعي فى الجامعة .. فكانت جاية فى وقتها
زى ما قلت فى الموضوع اللى فات ان علشان فى تيارات اخرى بدأت تشارك فى الحملات دى وفى فتح مناخ الحرية .. فكان لابد ان كل واحد يبرز نفسه وفكره بشكل واضح ..

الحقيقة ان اسم طلاب الاخوان المسلمين بدأ يظهر فى جامعة القاهرة فى اواخر سنة تانية .. كان فى مظاهرة ضخمة اسمها مظاهرة الاصلاح كانت باسم طلاب الاخوان المسملين .. ساعتها الطلبة مكانوش مصدقين . او مأخدوش بالهم .. لكن طبعا بالنسبة للاعلام كانت حاجة كبيرة

فى سنة ثالثة .. حصل بقه الاعلان الرسمى عن طلاب الاخوان المسلمين .. وده كان فى

مظاهرة 3/10/2005


التاريخ ده .. حاجة غير عادية بمعنى الكلمة


فى اليوم ده .. كان فى مظاهرة حاشدة لكل طلاب الاخوان فى جامعة القاهرة .. كانت تدشين لحملة معا للاصلاح .. وكانت المظاهرة دى بمثابة الاعلان الرسمى عن طلاب الاخوان المسلمين فى جامعاااات مصر .. لان اللى حصل ان فى كل جامعات مصر فى نفس اليوم وفى نفس التوقيت خرجت نفس المظاهرة بنفس الاسم وبنفس اسم طلاب الاخوان المسلمين وبنفس الشعار وبنفس اللون الموحد للحملة فى نفس التوقيت

وكان الهدف هو الاعلان رسميا عن الانتماء لجماعة الاخوان المسلمين


المظاهرات دى فى جامعات القاهرة الكبرى كانت صدمة اعلامية قوية للدولة ولامن الدولة فعلا .. ودى كانت ميزتها

طبعا لان التركيز الاعلامى اكبر على جامعة القاهرة باعتبارها اعرق جامعة مصرية واقواها صدى .. فحضرت وفود من طلاب الاخوان فى جامعات القاهرة الكبرى للمشاركة فى المؤتمر التأسيسي للحملة ولطلاب الاخوان فى جامعات مصر

فعلا المظاهرة دى حققت نجاح غير عادى على المستوى الاعلامى ... وفكرة المفاجأة فى جميع الجامعات فى نفس التوقيت كان ليها اثر قوى جدا فى الاعلام ولدى النخبة فى المجتمع .. ودلالة على القوة الحركية لطلاب الاخوان وانهم قوة لا يستهان بها

انا هوريكوا حبة صور متعلقة باليوم ده




حادثة يوم 3/10/2005

فى نفس اليوم بتاع المظاهرات اللى تمت فى جميع جامعات مصر .. حصلت حاجة غريبة جدا .. وهيا اختطاف اختين من جامعة عين شمس .. اختطافهم من داخل حرم الجامعة وخدوهم على امن الدولة فى لاظوغلى
هو معروف بشكل عام ان فى حاجات خطوط حمرا عند الجماعة لا يمكن تجاوزها .. منها اعتقال الاخوات ( معرفش ليه يعنى )
فطبيعي ان اللى حصل ده كان ليه رسالة ومخزى معين .. والرسالة هي ان اذا كنت انت عرفت تعمل مظاهرات فى جامعات مصر كلها .. فانا برضه استطيع انى اعتقلكم وابهدلكم .. وادى الاخوات كمان

طبعا ساعتها جامعة عين شمس انتفضت وفضلت على مدار العام بتتكلم فى الموضوع ده وبتظهره اعلاميا كاداة لاخراج امن الدولة من الجامعة
افتكر كان تانى يوم على طول فى مظاهرة .. فانا رحت هناك فى جامعة عين شمس علشان اشوف الدنيا بتمشى ازاى
الحقيقة انا كنت منبهر باللى حصل فى اليوم ده ..
كان فى 3 مظاهرات فى وقت واحد فى الجامعة هناك .. واحدة عند الباب الرئيسي .. ودى انضمت لمظاهرة تانية .. وكان الاخوات بدأو تحريك مظاهرة تالتة من داخل الحرم .. فكانت الجامعة كلها بتتظاهر ضد اللى حصل
طبعا حصل هناك اشتباك بسبب حالة الاحتقان بين الطلبة من اللى حصل ده
انا فاكر ان المظاهرة المفروض هتلف الحرم الجامعة .. كنا فى رمضان ساعتها كمان .. فلما بدات المظاهرة فى التحرك كان فى مجموعة من العساكر واقفين على مبنى الشئون .. فالطلبة هتعدى من قدامهم عادى
كان فى واحد بيصور جنبهم .. فهما خدوه ودخلوه جوه .. فصحابه اضايقوا وراحوا يجيبوه .. وكانوا كلهم طلبة عاديين .. فحصل اشتباك بين زمايله وبين العساكر .. وتصادف مرور المظاهرة فى نفس توقيت الاشتباك .. فالطلبة المخنوقة خلقة نشعت عليها الحمية وزمايلهم .. فاتحركت مجموعة من الطلبة وبدأوا يضربوا العساكر
طبعا كانت مأساه .. لان الطلبة بدأوا فى رمى الحجارة على العساكر .. والعساكر عملوا حركة جامدة برضه . راحوا داخلين جوه المبنى .. فالطلبة حسيت بانها انتصرت فى المعركة ودخلوا جري وراهم .. هما كانوا استخبوا جوه وجاهزين بالاحزمة بتاعتهم .. اول ما الطلبة دخلوا نزل العساكر فيهم ضرب .. فالطلبة طلعت تجري بره المبنى بتاع الشئون
فلما طلعوا بره العساكر وقفت على الباب ومنزلتش وراهم .. فهما لفولهم تانى واشتبكوا يدا بيد
اللى رفع الحزام على العساكر .. واللى جاب الحاجز الحديدي بتاع المرور ورماه على دماغ كام واحد .. وكانت مأساه بمعنى الكلمة
طبعا تدخل ناس من طلاب الاخوان المعروفين وتم سحب كل طلاب الاخوان من المظاهرة واعادتهم الى مقر رئيس الجامعة ( مبنى القبة عندنا .. هناك اسمه مبنى الزعفرانة)
طبعا كان فى جروح بين الشباب ... جرح فى الراس .. وواحد فى رجله .. يعنى الحمد لله اليوم عدى على خير
انا هناك لما بدأ الضرب كنت ورا .. فلما سمعت الضرب جريت على قدام اشوف اللى بيحصل .. وانا بجري الكاميرا وقعت منى تحت عربية .. الوقت ده كان الطلبة دخلوا ورا العساكر جوه
جبتها كان الطلبة طلعوا وبيشتبكوا معاهم بره
اول ما وقفت كان الطلبة رجعوا خلاص والعساكر بطلوا ضرب وانسحب طلاب الاخوان كلهم من المظاهرة ومن مكان الاشتباك
.. حالة هدنة
انا اول ما وقفت .. وببص على العساكر الى واقفين
لقيت طوبة وزنها لا يقل على كيلو مثلا .. وعدت من جنب وشى بالضبط .. يعنى لو كنت حركت راسى للشمال بوصة مثلا كانت لبست فى دماغى على طول .. المهم الطوبة دى استقرت فى صدر احد العساكر

بجد الواد العسكري صعب عليا جدا .. لانه اصيب بحالة هيستيرية بعد ما الطوبة خبطته .. وطبعا دخلوه جوه وعالجوه .. لكن فعلا كان تصرف غبى من الواد اللى رمى الطوبة عليه

من ضمن الحاجات اللى حصلت هناك بره .. لما الطلبة كانوا جوه . واحد من الموظفين الله اعلم ماله .. لقيته طلع وبيزعق للطلبة .. ولاانقح انه ماسك عصاية وبيكسر فى الازاز بتاع مكاتب الشئون .. وبيشتم وبيلعن فى اللى خلاه يشتغل هناك .. طيب ماشى انت بتكسر الازاز ليه ؟؟
كان شكله غريب جدا وهو عمال يكسر فى الازاز تحس كانه بيطلع غله وضغط الحياة فى الازاز .. ما صدق يزيط فى الزيطة

بقيت اليوم الدرامى ده واحنا فى رمضان زى ما قلتلكوا .. رجع طلاب الاخوان تانى قدام مبنى رئيس الجامعة
واعلنوا برائتهم من اللى حصل ... وانهم غير مسئولين عن الاشتباك اللى حصل

لكن الحقيقة ان فى بعض من طلاب الاخوان اللى انا عارفهم كمان ... كانوا بيضربوا فى العساكر ... طبعا للانصاف فى الوقت ده اصلا انت مش بتميز ومش هتروح تسأل الاول ايه اللى حصل وبعدها تقرر اذا كنت تضرب ولا لأ .. ده غير ان اصلا الطلبة كانوا مخنوقين جدا من الى حصل للبنتين والسحل والضرب وشد الحجاب الى حصلهم فى الجامعة

المهم ان احنا رجعنا تانى قدام مبنى الجامعة .. فضلنا قاعدين .. وطلع وفد يقابل رئيس الجامعة ... طلع تقريبا من قبل العصر كمان
المهم احنا طبعا مش عارفين بيعملوا ايه جوه فقاعدين مش هنمشى الا لما يجيوا

المهم صلينا العصر .. الوقت بدأ يقرب من المغرب

لاحظنا حاجة .. ان الجامعة بدات تفضى من الطلاب .. طبعا كل التخيلات السيئة بدأت تدور فى الاذهان

وحتى تم جمع طلاب الاخوان وتم اطلاعهم على السيناريوهات السيئة المتوقعة

طبعا احنا لسه فى الاعتصام .. مستنيين الوفد اللى فوق ينزل .. لاننا لو مشينا وسيبناهم يبقى هناخدلهم عيش وحلاوة تانى يوم فى طرة
ولو فضلنا قاعدين يبقى كلهم هيتجابلنا عيش وحلاوة تانى يوم

المهم هما خدوا قرار ان الاخوات يروحوا حالا .. وميخرجوش الا فى مجموعات كبيرة ورا بعضهم ومفيش واحدة تروح لوحدها

وطبعا العدد بقه قليل ممكن نتلم كلنا فى عربية واحدة

ساعتها كان فى ناس تانية من جامعة القاهرة معايا .. طبعا اتفقنا اننا مينفعش ننسحب فى الوقت العصيب ده

فقررنا اننا نتاخد معاهم بقه وخلاص مش فارقة كتير :D

المهم كان خلاص باقى على المغرب نص ساعة بالضبط .. وكل حاجة زى ما هيا

الجامعة بقت فاضية تماما من اى طالب ومن الموظفين

مفيش غيرنا .. والباب الرئيسي للجامعة اغلق
ولم يتبق الا باب واحد فقط هو المفتوح
بدأنا الاستعداد للسيناريو الاسوأ المتوقع وهو المواجهة المباشرة مع الامن المركزي داخل الجامعة واننا ناخد علقة حلوة الاول .. وبعدها نركب العربيات المكيفة بتاعتهم

طبعا كان فى اتصالات وتوجيه رسائل للامن ولرئيس الجامعة ان الناس تنزل حالا

المهم فعلا نزلوا . كان باقى على المغرب بالضبط ثلث ساعة

اول ما نزلوا بدأنا فى الخروج

خطة الخروج من الجامعة

خطة الخروج ان كله هيخرج مع بعضه فى نفس الوقت ومحدش يخرج لوحده .. وحتى بعد الخروج هنمشى شمال ناحية منطقة سكنية شعبية فيها شوارع كتيرة وسوق وزحمة يعنى .. وهنروح على المترو وكله هيركب المترو

المهم بقه بدانا نتحرك ناحية الباب .. الباب كان مفتوح لسه .. وطبعا فى عربيات امن مركزي هناك واقفة على الباب

اول ما بدأنا نوصل للباب .. فوجئنا بان عساكر الامن المركزي بدات تنزل من العربيات بتاعتها بكامل عدتها وتسليحها ( الدرع والخوذة والعصيان او الكازلك ) .. وبدأت تنظم نفسها

طبعا كلنا خلاص كنا بنموت .. اساسا صايمين وعلى المغرب ده غير الضرب ومفيش طاقة وعايزين نخرج على خير

المهم كملنا مشى عادى بس مستعدين لاى حركة غباء منهم .. وخرجنا واحنا متأهبين لحد لما خرجنا عادى ومشينا بره .. وعدى الموقف على خير

اللى اتضح ان الامن المركزي كان خايف اننا واحنا خارجين نعمل اعتصام على الباب .. فكان بيستعد لاى حاجة مننا .. واحنا اصلا كنا خايفين لحسن ياخدوا قرار غبى باى تحرك ضدنا .. المهم الحمد لله اليوم عدى

طبعا بعد ما خرجنا كنا خايفين من التتبع من المخبرين .. ففضلنا نمشى فى حتت غريبة كده لحد لما وصلنا المترو

بدأنا ساعتها فى التفرق فى مجموعات برضه

وانا كنت فى مجموعة فيها طلاب الاخوان اللى من جامعة القاهرة .. ومعانا ناس من عين شمس

والحمد لله اليوم عدى على خير

كان يوم فظيع بمعنى الكلمة وروحت البيت بعد المغرب بفترة .. انا دخلت وهما اصلا كانوا خلصوا افطار

بس بجد كان حتة يوم .. فظيع بجد بجد

من ضمن المواقف اللى حصلت .. هناك كان معانا المصورين من بره .. كان ناصر نوري من المصري اليوم قبل ما يروح رويتر .. وكان مصور رويتر وغيرهم .. كنت واقف معاهم بنتكلم فى اللى حصل فجم بعد الضرب قالك لازم نمشى دلوقتى .. ليه ياعم ناصر .. قالك علشان نروح نودى الصور وعلشان نخرج فى الزحمة مع الطلاب بدل ما نتوقف وتتاخد مننا الكاميرات والصور
المهم فعلا زبطناهم وخبينا الكاميرات وخرجوا الحمد لله


لسه السنة مخلصتش .. فيها اهم حاجة حصلت فيها واكبر حاجة حصلت فى سنة ثالثة .. والحاجة دى ما حصلت فى تاريخ جامعات مصر على مدار عشر سنين .. ايه هيا ؟؟
لا استنوا بقه المرة الجاية علشان الموضوع شكله كبير قوى وانا لسه عايز انزل حبة صور


انا رفعت الصور كلها على فليكر
ممكن تشوفها سلايد شو من هنا
دوس هنا يا ريس

Friday, August 24, 2007

انتخابات الاتحادات الطلابية .. خطوة خطوة

السلام عليكم ورحمة الله وبركاته عليكم اهل المدونة

قبل ما ابدأ بس

1- معذرة على التأخير فى الفترة اللى فاتت .. مش عارف كنت كاتب حبة مواضيع بس مسحتها نظرا للحالة النفسية .. لكن الحمد لله .. ده غير الانشغال الشديد .. واشياء لا تنتهى والحمد لله

2- محدش عنده شقه فى الاسكندرية على البحر على طول ممكن نروح فيها يومين ولا حاجة ؟؟ المفروض كنت مزبط مع واحد هنطلع النهاردة بس باعنى على اول ناصية .. مش باع انما خالته صاحبة الشقة هتروح يلا عادى

3- قريت دلوقتى موضوع فى مدونة كلبوزة لكن سمباتيك .. عن الحجاب نص كم ... معرفش ليه جه فى بالى حاجة ابشع من كده بمراحل .. وهى ان الحجاب اصبح موضه .. بمعنى ان دلوقتى الموضه نلبس حجاب .. طيب يلا .. طيب ده فى فرح ؟ لا نخلع الحجاب دلوقتى بقه
انا عايز اكتب عن الافراح وحاجة انا شفتها كده . ربنا يسهل ان شاء الله

4- فى بقه حتة كليب سعودي .. بصوا من الاخر بجد ... اللى عمله ده عبقري وبيفهم بجد انا عايز اديله جائزة نوبل للكليبات الجامدة
اسمه ما لك غير الله
فكرته عن شاب طايش .. لا بيصلى ولا بيهش ولا بينش .. لا وصايع كمان .. معاه الريس ( موتوسيكل السباقات ) بتاعه وبيصيع مع صحابة لحد الفجر ولحد لما الشمس تطلع جنب المسجد ولا بيصلوا .. وبيروحوا السوق يعاكسوا البنات
المهم هتحصله حبة مشاكل ومراته تسيبه والشغل يفشل فيه .. ويخسر فلوسه وتحصله حادثة فيتحول للالتزام
صحيح القصة مكررة ومخلله .. لكن التصوير .. والنهاية بتاعتها لما مراته ترجعله البيت ومعاها بوكيه ورد .. بجد عبقري اللى عمل الكليب ده
اساسا الشعب السعودي حالته تصعب على الكافر .. ومحدش يقولى انهم متدينين لحسن افجر راسه ... الشباب السعودي اصلا جواه قنبلة موقوتة هتنفجر قريب .. وفيهم امراض ومشاكل الدنيا والاخرة .. هبقى اكتب ان شاء الله على اللى شفته فى السعودية
للاسف هناك .. الشاب اما انه ضايع تماما و اما انه قفل تماما
ربنا يسهل هبقى اكتب عن الشباب السعودي باذن الله
المهم الكليب اهو
حمل الكليب على طول



المهم بقه


انا عايز اتكلم عن الانتخابات فى الجامعة
ذكرياتى فيها واللى حصل والكواليس بتاعتها
طبعا الموضوع كبير
فممكن استخدم الرموز بدلا من اسامى الناس
وطبعا هتبقى على مراحل

فى سنة اولى

فى سنة اولى لما انا كنت فى اولى يعنى .. عرفت صدفة كده ان فى حاجة اسمها اتحاد الطلبة .. وعرفت ساعة الانتخابات لما بعض الاخوان قالوا انهم يدخلوا الانتخابات
طبعا ساعتها كان الاسم التيار الاسلامى .. ومكنش معروف طلاب الاخوان دى خالص
وطبعا لان مش كل الاخوة معروفين .. فكان لازم فى الانتخابات يتم اختيار الناس المعروفة .. وخاصة من سنة رابعة اللى هما شهر ويتخرجوا
وفعلا تم ترشيح 12 اسم من الاخوة لسحب اوراق الترشيح والتقدم للترشيح .. طبعا 12 بس لان ساعتها اصلا مكانش فى حراك سياسى ولا اهتمام بالسياسة .. ده غير ان اصلا كانت سياسة الاخوان الاهتمام بالقضايا الاسلامية الكبيرة وكان ابرزها ساعتها منع الحجاب فى فرنسا فمفيش مجال للكلام عن السياسة والاصلاح
وطبعا حصل المسلسل المتكرر .. اننا نزلنا الانتخابات بال12 واحد وتم شطبهم فى القوائم النهائية
ورحنا عملنا اعتصام ومظاهرتين تقريبا .. وطبعا انتهى الموضوع

اللى انا فاكره ساعتها انه لما تم اتخاذ قرار خوض الانتخابات وكان قرار داخلى بحت بين طلاب الاخوان او التيار الاسلامى ساعتها فى كلية التجارة .. كانت الدوافع هو ان ده حقنا الطبيعي اننا ندخل الانتخابات .. ونوجه رسالة ان دى بداية تدريجية لتطوير الموضوع

وهو ما حصل فعلا وانتهت سنة اولى على خير

سنة تانية

فى سنة تانية كان حصل تحول فى سياسة الجماعة ككل وطبعا اثر على طلاب الاخوان فى الجامعة
وهو ان الجماعة بدأت فى الانتقال من خطة مرحلية الى خطة اخرى مرحلية .. وهى التحول الى الانفتاح على المجتمع وبناء الاسرة المسلمة
فى الاول علشان تبقى فرد مسلم يبقى انت عايز تخليه يهتم بالقضايا الاسلامية وخاصة فلسطين والعالم والصلاة والحجاب والقيم الاسلامية الكبيرة
بعدها تبدأ تخليه يبنى الاسرة المسلمة .. فيطلع الولد من صغره متعلم الكلام ده من والديه
طبعا علشان تخليه يبنى اسرة مسلمة لازم كداعية تبدأ فى تبنى قضايا مجتمعية بحته .. وده يتطلب انك تنفتح على المجتمع وتبدا تعيش همومه ومشاكله
وده يمكن اللى ادى ليه واللى نجح فيه عمرو خالد .. انه لما بدأ يعمل كده فبقه فى راي عام بالاهتمام بالقضايا الاجتماعية
المهم كانت بدايتها مع الحب .. وكانت حملة يلا نحب بجد
انا بطبيعتي كنت شايف انها انجح واقوى واجمل حملة اتعملت فى الجامعة .. وانها فعلا زودت مساحة التقارب بين التيار الاسلامى والناس الملتزمة عامة وبين الطلاب بشكل كبير جدا .. وحصل فعلا حبة مواقف تدل على كده مش وقتها دلوقتى

فنتيجة للانفتاح ده وانك بقيت مهتم بالقضايا التى تخص الطلاب بما اننا فى الجامعة .. بدأت فكرة الانتخابات الطلابية تدخل برأسها تانى بقوة كوسيلة هامة لخدمة الطلاب وحل مشاكلهم الجامعية
فكان القرار برضه بخوض الانتخابات .. وحصل نفس السيناريو وانتهت الانتخابات بالشطب بس مع تصعيد اكبر شوية من ناحية طلاب التيار الاسلامى

فى سنة تانية وفجأة حصل شئ غير متوقع وغير محسوب .. وهو التعديلات الدستورية .. وكان قبلها فى نفس السنة .. خروج كفاية الى النور وبدأها العمل . وكان اول حاجة تعملها من امام الباب الرئيسي لجامعة القاهرة ومن امام المسلة

طبعا ده ادى الى ان الجماعة تبدأ فى تبنى القضايا الاصلاحية فى الشارع وتنزل فى مظاهرات الاصلاح
وطبيعي فى الجامعة كان فى تأثر بالحراك السياسى ده .. فبدأ التحول الى المطالبة بالاصلاح
كان من اسخن الملفات ملف الشطب من الانتخابات .. غير بعض الملفات الاخرى زى الحريات ورفع يد امن الدولة عن الجامعة ومؤسساتها وغيرها
ومن هنا بدأت مرحلة جديدة تماما وغير متوقعة
كان من نتيجة نزول كفاية للشارع ومن نتيجة التعديلات الدستورية .. ان تم تغيير تدريجي لاسم التيار الاسلامى الى طلاب الاخوان المسلمين
لان بقه دلوقتى فى كذا حد بينادى بالاصلاح .. وبيتبنى القضايا المجتمعية .. فكان لازم توضح انت مين ومين مرجعيتك فى التحرك .. اضافة الى ان ده كان بهدف توسيع مساحة الحرية اللى اتفحت فى البلد عامة

وبكده انتهت سنة تانية .. بحلوها ومرها وتحولاتها

فى سنة تانية كنا ماشيين فى حملة يلا نحب بجد عن الحب بين الولد والبنت وان ده مش حب وكان الكلام جامد جدا
لما بدأنا التحول لحملات الاصلاح ... ومعا للاصلاح ..
كان الطبيعي فى الخطة انه بعد حملة الحب هتبقى حملة الحرية كاحد مشاكل المجتمع .. لكن اللى عجل بالموضوع الحادثين دول بتوع كفاية والتعديلات الدستورية

من اول سنة تالتة بقه كانت الانتخابات الطلابية حاجة تانية خالص .. وكذلك فى سنة رابعة
يلا المرة الجاية بقه

ومع السلامة



Monday, August 13, 2007

صلاح حيث التكبر والغرووور هههههه

السلام عليكم ورحمة الله وبركاته

مش عارف اكتب عن ايه النهاردة

بس خلينا اتكلم شوية على صلاح

صلاح ده زى ما استاذ ياسر باشا سعد قال عليه انه من انزه 10 شخصيات فى مصر .. والراجل ده كنت حاسس انه بينجم بس بجد بعد ما عرفت صلاح الراجل ده بيتكلم صح

وفعلا طبيعة نشأته وطبيعة تفكيره هو كده فعلا

واساسا صلاح ده عليه حبة افيهات انا مش عارف بيخترعها منين .. وعلى رأيه بيقول ان الصياعة لما فكروا يعملوها .. راحوله الاول وعملهالهم

مرة كنت انا وصلاح رايحين فى حتة كده … المهم كنا رايحين نتبرع بالدم لواحد صاحبنا وكده .. فطول الطريق عادى بنتكلم بشكل عادى ومكانش فى مشاكل .. اول ما دخلنا المستشفى وهاتك يا ضحك و هلس للصبح .. كان حتة يوم فظيع بجد

كان مثلا فى المدرسة .. هو بيروح يجيب الوجبات بتاعت الطلبة للفصل بتاعه .. اساسا اتخن فصل عندهم كان بتاع 32 واحد .. والحاضرين اصلا بتاع 7 مثلا .. فكان بينزل للمستر ويقوله عدد الطلبة فى الفصل 67 واحد .. فياخد اكل يكفى 67 واحد فعلا .. ويجيب عيال معاه يشيلوا قفص برتقان على كام كرتونة جنبة نستو ويطلع بيها الفصل .. وبعدها يبعت ولد تانى يروح للمستر يقوله يا مستر فى عجز بتاع 11 واحد كمان .. واصلا الفصل كله مفيهوش غير 6 او 7 بالكتير قوى

المهم بعد كل ده مش ياكل مع العيال .. بعد ما يجيبلهم الاكل يقولهم يلا سلام وميرضاش ياكل اى حاجة خالص .. اساسا هو مش بيحب ياكل اى حاجة غير من مطاعم معينة … حتى اكل البيت مش بيرضى ياكل منه .. هو نوع معين من المطاعم بياكل منها وبس

ده صلاح ده عذبنى فى الاكل .. مرة كنا طالعين من يوم طويل جدا من الشغل والتعب ومش قادرين هنموت .. فرحنا مطعم ناكل .. فاحنا لما دخلنا كان فى ناس مسيحيين قاعدين بياكلوا .. متفهمش لقيتلك ده اتقرف وخرج من المحل وحلف ما هو واكل .. اقوله يابنى انت انا مش شايف قدامى .. وهو مفيش حلف مش واكل .. المهم فى الاخر اكلت انا وكان فى واحد ثالث معانا .. وهو كان راح جاب اكل من مطعم تانى واكل

وبعدين ايه .. انا وصلاح مثلا .. وانا عايز اكل وهو مش جعان فيقولى هات اكل اقوله لا مش واكل لوحدى . وهو نفس القصة .. يقولى جعان اقوله روح هات اكل انا مش عايز يقولى لا مش واكل لوحدى

من ضمن المواقف برضه موقف تانى … كان راكب هو وواحد صاحبه .. صاحبه ده كبير فاللجنة وقفتهم وطلع الامين قال لصاحبه بطاقتك . فمكتوب فى البطاقة انه طالب مع ان شكله كبير .. قاله انت شغال فين .. فصاحبه بيقوله " مدرب كلاب بلدى "

الامين قاله ايه ؟؟

قاله ايه ؟؟ مدرب كلاب بلدى مسمعتش … وبيتكلم بجد بقه ومش بيضحك مثلا .. لا .. بيتكلم كأنه فعلا مدرب كلاب بلدي

المهم فالامين اداله البطاقة وقال للسواق استنى بقه على جنب يا اسطى .. لما يشوف بقه مدرب الكلاب البلدى ده

نزل وجاب الضابط .. فبيقوله فين قاله اهو … راحله قاله بطاقتك .. وقاله انت شغال فين ؟؟

قاله مدرب سباحة فى نادى الصيد

قاله طيب اتفضل البطاقة .. اتكل على الله يا اسطى .. والضابط افتكر الامين ده اهبل مثلا او متخلف .. قال مدرب كلاب بلدى

بيقولى الناس كلها كانت على الارض من كتر الضحك مش قادرة تمسك نفسها من الضحك

مرة برضه كنا راكبين انا وصلاح فعايزين ننزل شارع مصدق .. واساسا فى خناقة ورا فى الميني باص علشان مفيش مكان وبتاع .. فاحنا عايزين ننزل والسواق وهو بيسوق عمال يتخانق .. فصلاح قاله " مصدق معاك يا عم عباس " .. السواق قاله حاضر يا ريس .

المشكلة ان التلقائية اللى السواق اتكلم بيها خلتنا نفطس على نفسنا من الضحك بعدها .. مش ممكن يعنى


اساسا انا وصلاح لما بنبقى مع بعض بنمشى بغباء .. يعنى ممكن نمشى مسافات من غير ما نحس خالص

يعنى مرة مثلا قابلته فى الجيزة .. مشينا لحد اول فيصل خلصنا حاجة .. وبعدها طلعنا على الجامعة .. ومنها رجعنا شارع محي الدين فى بيته .. وبعدها طلعنا على كوبري الجامعة .. ومنها رجعنا الى الجيزة تانى . وكل ده مشي مركبناش مواصلة واحدة

خد عندك بقه ان صلاح ( غير قصة انه مش بياكل الا من حتت معينة ) مش بيلبس الا من اماكن معينة … يعنى بيشتري من حتت جامدة جدا وفعلا هو لبسة شديد فحت .. يعنى بدل من لورينزو وبيجيب القمصان من كونكريت و فان هاوزن واسامى غريبة انا معرفش بيجيبها منين .. ودايما بيكون معاه فى الشنطة بتاعته علبة حلويات من " كنت kint " افخم نوع بونبوني فى العالم اصلا ... و لابس ساعة من رولكس حد جابهاله من بره .. الساعة دى ثمنها 18 الف جنيه بس

المهم صلاح ده من انزه عشر شخصيات فى مصر كلها ورجل اعمال كبير .. كل شوية اكلمه الاقيه فى كارثة جديد .. كذا مرة اكلمه يقولى انه رايح يقابل فلان .. طبعا من غير ما اقول اسامى بس فعلا فلان ده بيبقى حد كبير انتوا مش متخيلين ممكن يكون مين .. وموبايله ده مبيهداش من الرن زى دماغه مبتهداش من التفكير خالص

مرة كنت بكلمه فى حاجة كده فمردش .. فقلت ماشى شوية وهكلمه .. فلقيته بعتلى ماسج بيقولى انا بره مصر دلوقتى ولو عايز حاجة سمسلى او على الفويس ميل وبيقولى جاى النهاردة الساعة 2 بليل .. يعنى مقعدش فى البلد اللى راحها غير بتاع 18 ساعة مثلا .. فكنت بكلمه على الفويس ميل وهو يبعتلى ماسج بالرد ... وفضلنا كده لحد لما جه .. بعد ما جه بقوله ايه بقه السفرية المفاجأة دى فركة كعب يعنى مش حاجة كبيرة .. قالى ان فى واحد رجل اعمال كان عايزة يخلصله شغل بره فى دولة خليجية .. فيادوب يعنى مسافة السكة راح ورجع

هناك بقه ايه .. عربية بسواق ويروح بقه ويركب ورا زى الباشا وعاش دور رجل الاعمال بجد ( ده اصلا هنا فى مصر لما بيركب تاكسى مش بيقعد غير ورا .. مبيعدش قدام جنب السواق )

المشكلة ان الناس كلها بتشوف صلاح مثلا لما بيجي الجامعة .. فهو مثلا بره الجامعة يتصل بيا .. ايوة يابنى انت فين .. انا فى الحتة الفلانية يقولى طيب انا جايلك .. فلما يجي يكون مثلا عايزنى علشان نخلص حاجة او جاى يقعد معايا .. فهو ايه ممكن يجي وميسلمش على حد مثلا فالناس كلها تقولك صلاح ده متكبر ومغرور .. لدرجة ان واحد قال صلاح ده مش بيجي الجامعة الا لما يكون فى كارثة او جاى يقابل عمر او الريدي .. او جاى يقابل حد مهم

مع انه على العكس خالص وبيحب يهرج .. ويانهار ابيض لما رحنا مرة فيلا كده وكان فيها حمام سباحة .. يانهار ابيض على اللى عمله هناك فى البسين .. حاجة فظيعة وشكلى كده هطلع الصور اللى عندى

المهم انا اصلا مكنتش عايز اكتب حاجة وكنت عايز اغير مود الكآبه فكتبت عن صلاح .. بس فى حاجة صحيح عايز اعرف رأيكوا فيها .. هو اللى يلبس كويس ويجيب ماركات جامدة وبتاع .. ولما يجي مثلا مبيسلمش على حد علشان مش يعرفهم كويس يبقى كده متكبر ومغرور وشايف نفسه وبتاع ؟؟

Thursday, August 9, 2007

الاسراء والمعراج

السلام عليكم ورحمة الله وبركاته

يااه .. الواحد من فترة طويلة مكتبش حاجة

معلش والله مشغول جدا فى الفترة اللى فاتت وبتاع

ولسه اهو داخل من بره من شويتين تلاتة

المهم النهاردة عايز اتكلم على كذا حاجة صحيح مش مترابطين لا زمنيا ولا مكانيا .. بس مرتبطين فى الموضوع

الاولى:

النهاردة بعد العشاء

كان فى درس عن الاسراء والمعراج

فالراجل كان بيتكلم وقال كلام جميل جدا وطبعا كان بيركز على الصلاة

لانها فرضت فى الوقت ده

فبيقول

ان الدين .. نزل من عند ربنا عن طريق سيدنا جبريل ... يقصد بداية الوحي وبداية الاسلام
وكل الفرائض فرضت بنفس الطريقة عن طريق ان جبريل ينزل بيها
وكل احكام الدين الاسلامى نزلت بهذا الشكل سواء عن طريق الوحي المباشر او عن طريق ايات قرآنية

الا

الصلاة
لاهميتها وعظم مكانتها وعظيم شأنها .. كان لازم ان الرسول عليه السلام يطلع ياخد الامر مباشرة من الله عز وجل
فالرسول اسري به الاول من مكة الى بيت المقدس
ثم عرج به الى السموات كلها واحدة تلو الاخرى
ومعه سيدنا جبريل

الى ان وصل الى مكان توقف فيه سيدنا جبريل
فقال الرسول عليه الصلاة والسلام
افى هذا الموقف يترك الخليل خليله ؟؟
فقال سيدنا جبريل عليه السلام
يا محمد تقدم .. فانك ان تقدمت اخترقت .. وان تقدمت احترقت
وهنا كان لقاء الله تعالى وكان الامر المباشر بالصلاة من الله عز وجل للرسول عليه السلام

انتوا يا جماعة متخيلين قد ايه هيا كبيرة ومهمة جدا ؟؟
الحديث فيما معناه ان عرى الاسلام هتحل عروة عروة .. اولها الامانة .. واخرها الصلاة
لانها الحصن اللى بيحمى المسلمين .. لو اتحلت واتفكت خلاص يبقى مفيش اسلام

ما هو انت تعرف المسلمين ازاى ؟؟ من الصلاة
مفيش حد فى الارض بيصلى زى المسلمين
فى اى مكان يصلى
فى اى وقت يصلى ( عدا الاوقات المكروهه )
فى اتجاه واحد بيصلى
بيتوضأ قبل الصلاة
والاهم .. انه بيعمل حركات لا يفعلها اى شخص اخر

طبعا مش هتكلم عن فوائدها الطبية وفوائد المحافظة عليها فى مواعيدها للجسم
لكن اقصد انك تميز المسلم من هذه الحركات

طبعا ده مش القضية الاساسية .. قد ان قضية الخشوع فى الصلاة مهمة جدا
ان الصلاة دلوقتى اصبحت فعلا حركات تؤدى علشان نمضى اننا صلينا
لكن حلاوة الصلاة وحلاوة التركيز واتقان الصلاة ده مش موجود للاسف

فى الحديث ان الرجل يصلى فتفتح لها السموات الى ان تصل صلاة العبد الى الله تعالى .. وواحد تانى ممكن يكون بيصلى جنبه .. فى نفس الصف وسمع نفس الايات ونفس الامام .. بس علشان مفيش تركيز ولا اخلاص فى الصلاة .. فتقذف فى وجه وتقول له ضيعك الله كما ضيعتنى
يااااه .. الواحد حس قد ايه فعلا هو مقصر جدا فى الصلاة .. واننا مكناش بنصلى اصلا
لا تركيز ولا اتقان وبنصلى على قد المفروض ومفيش لا سنن ولا قيام ولا اى حاجة


الحاجة التانية

وهيا رمضان
انا فعلا الفترة اللى فاتت الواحد كان مقصر جدا فى العبادات والطاعة مع ربنا سبحانه وتعالى .. والواحد مكنش حاسس بالشوق والحنين لرمضان وايام رمضان زى زمان
وفعلا بتيجي فترة على الواحد بينسى اصلا رمضان وينسى فضله ونعم ربنا علينا فيه
وبيحتاج دائما ان حد يفكره ويقوله

فعلشان كده محتاجين اننا نستعد لرمضان كويس .. مش نستعد يعنى كل واحد يأنتخ فى البيت ويقولك انا مستنى رمضان
لا .. انما اسمع شرائط مثلا كيف تستقبل رمضان .. تقولى ده لسه شعبان .. ايوة ما هو ده الاستعداد
الواحد لو عنده ماتش .. بيفضلوا من قبلها بقرن يستعدوا ويسافروا ويصرفوا فلوس ووقت
هو ده المطلوب
ليه دايما نبخل فى دينا بكل حاجة حتى فى الوقت
فلازم كل واحد يبدأ يستعد ويجهز نفسه
وعلشان كده انصحكوا بانكوا تسمعوا شريط كيف تستقبل رمضان لاستاذ عمرو خالد وفى شرائط عن الموضوع ده للدكتور راغب السرجانى بالذات شريط رمضان وبناء الامة .. وفى كتير بقه كل واحد حسب ما هو عايز لكن انا بنصح بشرائط الدكتور راغب السرجانى وعمرو خالد والدكتور القرضاوى لو ليه والدكتور عمر عبدالكافى والدكتور عائض القرنى ووجدي غنيم ( اساسى لازم تسمعه )


الحاجة الثالثة بقه

بمناسبة قصة الاسراء والمعراج
عايزكوا تسمعوا النشيد ده
اكتر من رائع
اسمه اسري برسول الله(خش اسمعه الاول لانه روعة وبعدين يبقى نزله من جوه)


ونشيد تانى: عن رمضان
اسمه رمضان الكرم (تحميل)

واخر نشيد
عن رمضان برضه
اسمه اقبلت يا رمضان ( مشاهدة الكليب)

اسمه اقبلت يا رمضان(تحميل النشيد لوحده من غير كليب)

واستنوا اناشيد تانية بس الواحد مش فاضى اليومين دول
الله المستعان