Saturday, April 18, 2009

ما فائدة المقاطعة !!

السلام عليكم ورحمة الله وبركاته

فى البداية احب ان اوضح بعض الامور

1- اعتذر وبشدة عن عدم كتابتي ان الموضوع السابق " ومن الخرفان ما قتل " ليس من تأليفي وانما انا نقلته بعدما جائنى على البريد الاليكتروني

2- دعواتكوا جميعا علشان عندي امتحان الـ
( mid term )
يوم الاربعاء القادم .. فالله المستعان

3- امبارح كنت فى فرح احد الاصدقاء من الجامعة .. وبعد الفرح قررنا اننا نصيع شوية ونتغدى مع بعض

فالمهم واحنا ماشيين وكنا فى شارع الهرم .. لقيت واحد نايم على الارض على الرصيف

ومغطي نفسه ببطانية .. وفارش قدامه فى مكان نومه اكياس الليمون اللى بيبعها

وهو مستغرق فى نوم عميق .. وسايب اكياس الليمون على الارض مفروشة دون اى احساس بالخوف من ان يتم سرقتها

استغربت من الموقف جدا

حسيت ان فى حاجة عنده مش طبيعية

ازاي واحد ينام كده .. فى عز وقت الشغل وفى الوقت اللى الناس كلها بتنزل فى الشارع وقد يصادف ان واحد يشتري منه ( كنا وقت المغرب )

وازاي اصلا ينام كده وهو سايب رأس ماله وكل ما يملك امامه فى الشارع

ازاي يجيله قلب ينام وهو سايب اكياس الليمون ممكن بكل سهولة حد يسرقها ؟؟؟

وسبحان الله .. لا يجروأ احد معدي من قدامه انه ياخد او يسرق كيس الليمون مع ان الراجل مسافر فى الـ (second life )

وترى العكس تماما

تلاقي واحد عايش فى قصور وحوله الخدم والحشم .. وفى كل شبر فى القصر حرس واسلحة

ويملك من الاموال ما لا يستطيع هو نفسه ان يحصيها او يعدها او يعرف مصدرها اصلا

ومع ذلك .. تلاقيه خايف ومرعوب جدا .. خايف لحسن الفلوس تتسرق .. وخايف لحسن حد يؤذيه

وفعلا لا يستطيع النوم .. مع كل الحراسة اللى حواليه لكنه يخاف من ان ينام

وسبحان الله ... وتلاقي الناس لا تتوانى عن سرقته حتى ولو كان ربع جنيه !!

وقديما قال احد العلماء .. فى معنى الكلام انه الحكام لو يعرفوا مقدار السعادة والراحة اللى احنا فيها واحنا بنام بليل .. لقاتلونا عليها بالسيوف !!

وصدق الرسول عليه السلام " من بات آمنا فى سربه ... معافً فى بدنه .. عنده قوت يومه .. فقد حيزت له الدنيا بحذافيرها "

فعلا .. انت مش هتبقى محتاج حاجة من الدنيا دى خلاص بعد ما حصلت على الثلاثة دول
نايم مرتاح البال وقرير العين .. أتاك الله صحة فى البدن وبسطة فى الجسم .. ولديك قوت يومك وما تحتاجه من اكل وشرب وملبس ومسكن .. خلاص محتاج ايه تانى من الدنيا دي

فى ابحاث عديدة اتعملت وحاولوا يوصلوا لحل .. ايه هيا الحاجة اللى يعنى تمثل غاية الغايات الانسانية

اللى يعنى لو وصلها خلاص يفتح القبر وينام وهو مرتاح ؟؟

قالوا تحقيق الذات .. قالوا الاجتماعية .. قالوا الانجاز .. قالوا الاضافة للبشرية ..
وفى الاخر وجدوا .. انها السعادة وراحة البال

المهم .. موضوع النهاردة ده كان شاغل بالي من زمان

ومن فترة وانا كنت عايز ادون فيه واكتب رأيي الشخصي اللى انا مقتنع بيه تمام الاقتناع

وهو عن المقاطعة واهميتها

كتير جدا من الناس اللى كانت بتقاطع بدأت تشعر بان المقاطعة لم تأت بنتائج .. بدليل ان الشركات لسه موجودة اهي وبتتوسع والحياة زي الفل
واصلا نسبة الناس اللى كانت بتقاطع كانت قليلة مقارنة بغير المقاطعين

ولقيت حتى لدى بعض الناس المقاطعين .. بعض المشاكل فى فهم السبب من المقاطعة

وكانت اغلب ارائهم تتجه نحو اننا نقاطعهم لانهم يقتلوننا

ماشى جميل طبعا السبب ده وهو طبعا احد الاسباب الهامة جدا

لكن فى حاجات تانية برضه مهمة جدا ولازم تبقى قدامنا واحنا بنتكلم عن المقاطعة او بننفذها فعلا

1- هو احنا اصلا ليه بنشتري منهم ؟؟ يعنى احنا ليه معندناش احنا اكتفاء ذاتى اصلا من الحاجات اللى احنا محتاجينها حتى ولو كانت سلع رفاهية وليست سلعا اساسية ؟؟
احد اهم الاهداف الرئيسية اللى لازم نفهمها من موضوع المقاطعة ده .. هو اننا نعتمد على انفسنا فى انتاج ما نحتاجه
عيب جدا لما نبقى مليار وشوية وما زلنا لا نستطيع ان ننتج ما نحتاجه وما نستهلكه
انت لما بتقاطع المنتجات الامريكية او اليهودية وما شابهها .. انما بنقاطعها علشان نوجد لانفسنا بدائل محلية تحل محل تلك المستوردة
ولازم نستغل المقاطعة فى الموضوع ده كويس جدا

2- لازم نفهم ان المقاطعة هي احد الوسائل الهامة اللى تخلصنا من التبعية للاخرين .. بمعنى انه اذا انت على مستواك الشخصي قادر على ان تقاطع البيبسى والكنتاكي وغيرها .. فانت على مستوى الدولة تستطيع ان تتخلص من التبعية والتذلل للاخرين اللى بيدونا الاكل والشرب واللبس بتاعنا
والعكس .. لو احنا مش عارفين نبطل نشرب ازازة بيبسى .. يبقى لايمكن يبقى عندنا عزيمة وقوة اننا نعمل اى حاجة فى حياتنا وهنفضل طول عمرنا مذلولين ومتخاذلين بدون هوية وبدون قرار مدى الحياة . او على الاقل لحد لما يأتي جيل جديد يمتلك من العزيمة ما يستطيع ان يفعل ذلك
لان المقاطعة تربي العزيمة

3- المقاطعة من اهم فوائدها الوحدة .. النهاردة لما مليار وشوية يتفقوا على انهم لن يشربوا البيبسى ولن يأكلوا كنتاكي ولن يلبسوا الملابس الامريكية .. تخيلوا ممكن يعملوا ايه تانى على رأي موبينيل

اذا استطاع هؤلاء ان يجتمعوا على هدف واحد وهو مقاطعة المنتجات الامريكية .. افلا يستطيعون ان يحكموا العالم ؟؟
واكيد كلنا فاكرين القصة اللى حكاها الاستاذ عمرو خالد لما كان بيفطر فى مطعم مع شاب اسباني وحكاله عن رمضان وقاله انه لو عدنهم قانون فى اوروبا يستطيع ان يجمع الناس على شئ واحد لقادوا العالم باسره

4- المقاطعة تعلي الهمة والعزة فى نفوس الناس .. هحكيلكوا على موقف ظريف
كنت فى نقاش فى الشغل مع بعض الزملاء عن المقاطعة .. كان محور الحديث انه لو حد عزمك على شئ وهو مقاطعة .. بيبسى - ماك - كنتاكي - اى حاجة
فمن قواعد الذوق انك لا ترفض وتقبلها .. وبعد كده تقوله انك مقاطع وانك مش بتشرب الحاجات دي
كان برضه احد اسباب انك لا ترفض الدعوة .. هو انك لا تكلفه مرتين .. مرة اشترى البيبسى ورفضتها .. ومرة تانية اشترالك العصير البديل

انا طبعا ضد ده تماما واخالفه بشدة
لانه اولا اذا انا قبلت فى المرة الاولى ان اتنازل .. فاكيد هتنازل بعد كده على طول وفى كل مرة يقدم لي فيها المنتجات اللى المفروض نقاطعها
ثانيا : مين اللى صح ومين الغلط ؟؟ يعنى لو واحد دعانى للزنا هقوله ماشى علشان مكسفهوش وبعد كده اقوله ان الزنا حرام ؟
ثالثا : انا لما برفض وبقوله ان مقاطع .. بقوله باسلوب راقي ولا انكر عليه انه بيشرب حاجات مقاطعة .. هو حر يشرب اللى هو عايزة .. وانا حر اشرب اللى انا عايزة
رابعا : ايهما اغلى .. دماء اخوانا المهدرة .. كرامة الامة المهانة .. حرمة الدول المستباحة .. ولا انى مكسفهوش ومرجعش ايده ؟؟
خامسا : هو يعلم انى مقاطع .. فلماذا يطلب لي مشروبات مقاطعة ؟؟
سادسا : لو كل شئ هيمشى بالذوقيات واننا منكسفش الناس .. يبقى فى حاجات كتير هنتنازل عنها تحت هذا البند
سابعا بقه ودي الاخطر : الدكتور القرضاوي قال فى احدى فتواه ايام انتصار غزة الاخير على الصهاينة .. قال فى فتوى صدرت على الموقع بتاريخ 16 يناير 2009 ان شراء البضائع الامريكية والاسرائيلية فى هذا الوقت من الكبائر
يعنى تخيل انت بقه الكبائر زي الشرك بالله وعقوق الوالدين والزنا وشهادة الزور .. ومعاها شراء البضائع الامريكية والاسرائيلية

ثامنا : القصة مش قصة مين اللى دفع .. يعنى يا فرحتي .. مش انا اللى بكسبهم لا ده واحد تانى اللى بيكسبهم .. يعنى احنا اكيد مش هنضحك على بعض بقصة انه مش انا اللى اشترتها ده هو اللى اشتراها وانا شربتها .. يبقى قول لربنا كده لو تقدر
انا بعتبر الكلام ده عذر اقبح من الذنب نفسه .. لانه عامل زي بني اسرائيل .. ينصبوا الشباك يوم الجمعة ويلموها الاحد .. علشان يقولوا احنا مش بنصيد السمك يوم السبت!!

واخيرا .. هيا دعوة لتجديد المقاطعة .. يا جماعة لا تنظروا للمقاطعة بهذا المفهوم الضيق
وياريت كمان متبقاش المقاطعة موسمية .. لما يحصل عدوان على غزة يبقى نقاطع .. وبعدها نرجع نشتري وان عادوا عدنا وهكذا
العملية دي بتفقد المقاطعة وزنها وتأثيرها
وهيا دعوة لعدم التذرع بـانه " مش انا اللى اشتريتها " وانما يكون عندنا عزم وقوة وارادة وصبر وهمة , متخافش والله مش هتموت لو مشربتش بيبسى ... ووالله مش هتموت لو لم تأكل من كنتاكي او ماك وما شابههم

وهيا دعوة لكي نقوم بايجاد بدائل عملية اسلامية ومحلية .. تساعد الناس فى استمرار المقاطعة والاعتماد على انفسنا

ونلقاكم فى موضوع اخر ان شاء الله ان كان فى العمر بقية وقت

والسلام عليكم ورحمة الله